MATIUS 15
15
Lampa rawi ranginakai b̄a wa'i ra waro
(Mrk. 7:1-13)
1Sakalompo dou Farisi ro pila-pila dou guru agama ma ramai ta Yerusalem mai rakana Ruma Isa. Siad̄oho sod̄ina d̄i Sia, 2”B̄ab̄auku anamorid̄oho-Mu sapakaina lampa rawi ranginakai b̄a wa'i ra waro ndaita? Wakatu ne'e ngaha, siad̄oho wati waca wa'una rima b̄une atora!”
3Cambe b̄a Ruma Isa, ”Ro b̄ab̄auku nggomid̄oho rau sapakaimu parenta Ruma Hatalla, b̄a ne'emu b̄atu lampa rawi ranginakai b̄a wa'i ra waromu? 4#Kel. 20:12, 21:17, Im. 20:9, Ul. 5:16 B̄ara nggahi Ruma Hatalla, ’Lia ra horomapu ama ro inamu,’ ro ’Cou-cou manggahi ma'iha d̄i ama ro inana, pab̄uaku d̄ihukum made.’ 5Pala nggomid̄oho ma ngoa ra teiku: nggara dou manggahi d̄i dou matuana, ’Au ma d̄i pab̄ua d̄onggo ra mbei b̄a mada d̄i ru'u ama ro ina, wa'ura d̄onggo ra mbei b̄a mada d̄i ru'u Ruma Hatalla,’ 6ndad̄i dou ede watid̄u wajibna d̄imalia ra horoma dou matuana. Ndad̄i, b̄ara lampa rawi ranginakai b̄a wa'i ra waromu, nggomid̄oho makamod̄aku nggahi ra eli Ruma Hatalla. 7Nggomid̄oho dou maca'u coro-coro! Ncihi poda au rangoa b̄a Ruma d̄i la Yesaya mab̄oha nggomid̄oho eded̄u,
8 #
Yes. 29:13
’Ndake nggahi Ruma Hatalla:
Dou-dou ede cuma nembana
Nahu kai nggahimpa,
pala ade siad̄oho nad̄o'o rad̄i Nahu.
9Iha mpoampa siad̄oho nembana Nahu,
b̄ara atora manusia rangoa ra tei b̄a siad̄oho
b̄une-b̄uneta ede atora Nahu.’ ”
Lampa rawi-lampa rawi ma kanajis dou
(Mrk. 7:14-23)
10Sawa'u b̄a ede Ruma Isa ouna dou-dou ro nggahina d̄i siad̄oho, ”Ringa ra kade'epu loakud̄u loamu ka'ao! 11Ma lu'u ta asa wati d̄imakanajis dou ede; pala ma ralosa ta asana, edeku ma kandad̄ina sia najis.”
12Edempara anamori-anamori Ruma Isa mai nggahina d̄i Ruma Isa, ”Tab̄ade kombi Ita b̄a one dou-dou Farisi ede iha adena wakatu ringana nggahi Ita bune ede?”
13Cambe b̄a Ruma Isa, ”Sanikina nggud̄a ra congge ma wati ranggud̄a b̄a Ama-Ku d̄i saroga d̄iwongge. 14#Luk. 6:39 Edera kade'e dou-dou Farisi ede. Siad̄oho ede dou-dou mana'ekai mambuda, ro nggara dou mambuda mad̄anda ra wa'a dou mambuda, d̄uana ede namab̄u d̄i ade lapa.”
15Nggahi la Petrus, ”Tangoa kab̄ae to'ipu conto ra ibara ede d̄i madad̄oho, Pa!”
16Cambe b̄a Ruma Isa d̄i siad̄oho, ”Sab̄ua nggomid̄oho rau watipu loamu ka'ao? 17Wati b̄ade d̄ohomu, b̄a one au ramalu'u ade asamu d̄imalu'u ade loko sawa'u b̄a ede d̄imalosa wali? 18#Mat. 12:34 Pala ma losa ta asa, ramaina ta d̄ei ade; ro edeku ma kandad̄ina dou ndad̄i najis. 19B̄ara rad̄i ade woko fiki ra kananu madab̄ae, ma kandad̄ina dou hade angi, jina, karawi ma iha ra dab̄ae, mpanga, mambei sakasi cowa ro mafitina. 20Lampa rawi-lampa rawi edeku ma kamaikaina dou ndad̄i najis, ro laina ngaha kai rima darawaca.”
Imbi sab̄ua dou siwe Kana'an
(Mrk. 7:24-30)
21Sawa'u b̄a ede Ruma Isa tu'u wi'ina hid̄i ede, ro laona aka dana ra rasa mad̄eni lab̄o kota Tirus ro Sidon. 22Sab̄ua dou siwe Kana'an rad̄i dana ra rasa ede, maina d̄i Ruma Isa ro nggahi salahona, ”Ana Daud, kasi to'ipu adeta d̄i mada! Ana siwe mada lu'ukai b̄a roh seta. Ka'ada'ana na'ipi podaku.”
23Ruma Isa wati kone cambena nggahi dou siwe ede. Edempara anamori-anamori Ruma Isa mai rakana Sia ro rahona, ”Pa, takau to'ipu lao dou siwe ede. Sia d̄imangangompa ari mai b̄a kontu ndaita!”
24Cambe b̄a Ruma Isa, ”Nahu ranggadu d̄i ru'u bangsa Israel mpoampa, ma penti d̄i ru'u b̄a siad̄oho ma santuda.”
25Dou siwe ede mai sujuna d̄itando Ruma Isa ro nggahina, ”Bantu to'ipu mada, Ruma.”
26Cambe b̄a Ruma Isa, ”Wati tahona weha weamu ngaha ra nono d̄ambe-d̄ambe to'i ro paki mbeimu lako.”
27”Ncihi, Ruma,” cambe b̄a dou siwe ede, ”pala lako rau nangaha sewi-sewi ma ramab̄u rad̄i meja rumana.”
28Edempara Ruma Isa nggahina d̄i sia, ”Ina, wancuku d̄eina imbimu! Co'opu ndad̄ira b̄unera kane'ekai b̄a ita!” Wakatu ede wa'u tahona ana b̄a dou siwe ede.
Ruma Isa katahona mboto dou masupu
29Ruma Isa tu'u wi'ina hid̄i ede, edempara lampa b̄atuna kengge ndano Galilea. Sawa'u b̄a ede Sia tekana d̄i sab̄ua doro to'i edempara dohona ta ede. 30Mboto dou mamai d̄i Ruma Isa mawa'a dou-dou ma mpako ra mpedu, ma mbuda, ma made b̄inci, ma mpongi, ro mboto wali dou ma supu makalai. Siad̄oho wi'ina dou-dou ede d̄itando Ruma Isa, ro Sia katahona supu dou-dou ede. 31Dou mboto ma wara d̄i hid̄i ede nawancuku mbora akana, wakatu eda b̄a siad̄oho dou mampongi naloa nuntu, dou mampako ra mpedu nataho, dou mamade b̄inci naloa lampa, ro dou mambuda naloa eda. Edempara siad̄oho roi ra wadina Ruma Hatalla bangsa Israel.
Ruma Isa mbeina ngaha upa riwu dou
(Mrk. 8:1-10)
32Sawa'u b̄a ede Ruma Isa ouna ana morid̄oho-Na, edempara nggahina, ”Nahu kasi adeku d̄i dou mamboto ake, wa'ura tolu nai siad̄oho sama-samana lab̄o Nahu, ro ake siad̄oho wati ntauna d̄ingaha. Nahu wati ne'eku co'o siad̄oho dula kai loko ntaru, pea siad̄oho nambisa d̄i ncai.”
33Edempara anamori-anamori Ruma Isa sod̄ina d̄i Sia, ”Tab̄eku d̄i loakai raka b̄a ndaita ngaha ra nono d̄i rasa ma d̄o'o b̄une ake, d̄i ru'u b̄a dou mamboto b̄une ake?”
34”Wara pila mbua roti d̄i nggomid̄oho?” sod̄i b̄a Ruma Isa d̄i siad̄oho.
”Io pidu mbua,” cambe b̄a siad̄oho, ”ro uta to'i pila-pila tembe.”
35Edempara kau b̄a Ruma Isa doho dou mamboto ede ese wawo dana. 36Edempara Sia wehana pidu mbua roti ro uta ede, sawa'u b̄a ede rentana syuku d̄i Ruma Hatalla. Sawa'u b̄a ede Sia tob̄e-tob̄ena roti ro uta ede kai rima-Na, edempara mbeina d̄i anamorid̄oho-Na. Ro siad̄oho cengga-cenggana d̄i dou mamboto ede. 37Samenana dou ede ngahana sampe mboncu. Sawa'u b̄a ede anamori-anamori Ruma Isa kab̄orona mancewi rangaha ra nono ede. Sara'ana wara pidu wonca b̄ini. 38Mboto dou mone-mone mpoa ma ngaha wakatu ede wara upa riwu dou, watipu reke dou siwe ro d̄ambe-d̄ambe to'i.
39Sawa'u b̄a ede Ruma Isa kauna dou mamboto ede dula. Ndai Sia nentena sampa laona aka dana ra rasa Magadan.
Tans Gekies:
MATIUS 15: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
