LUKAS 21
21
D̄onggo ra mbei sab̄ua dou siwe mbaru mboha
(Mrk. 12:41-44)
1D̄i Bait Allah, Ruma Isa edana dou-dou mantau ra wara makalu'u piti d̄i ade hid̄i d̄onggo ra mbeikai. 2Sia eda rauna sab̄ua dou siwe mbaru mboha ma ipi poda ncoki mori, makalu'u d̄ua mbua piti romba. 3Edempara nggahi Ruma Isa, ”Ringa ra kade'epu: Dou siwe mbaru mboha ake kalu'una mancewi mboto ntewi kaisi d̄i ade sara'a dou ma kalai. 4B̄ara siad̄oho sara'ana mbeina d̄i ade mancewi ntau ra warana. Pala dou siwe mbaru mboha ake, kone na'ipi poda ncoki morina, sia mbei sara'ana ma wara d̄i paralu b̄a ru'u mori ndaina.”
Ruma Isa nuntuna mab̄oha ndumba Bait Allah
(Mat. 24:1-2, Mrk. 13:1-2)
5Wara dou-dou ma nuntu ra nggahi mab̄oha b̄uneku taho ntikana Bait Allah rakantika kai wadu ma ntika-ntika ro kai barang-barang rad̄onggo ra mbei d̄i Ruma Hatalla. Edempara nggahi Ruma Isa d̄i siad̄oho, 6”Peade wara wakatuna, sara'a ra'eda b̄a nggomid̄oho ake d̄i d̄umba; wati wara kone sab̄ua wadu rau ta ake d̄imangge'e sadundu weki d̄i hid̄ina!”
Susa ra dahu ro kancoki
(Mat. 24:3-14, Mrk. 13:3-13)
7Siad̄oho sod̄ina d̄i Ruma Isa, ”Pa Guru, b̄une aiku lampa rawi ede ndad̄ina? Ro auku tandana b̄a one wa'ura raka wakatuna lampa rawi ede d̄imandad̄i?”
8Nggahi Ruma Isa, ”Aina kabare, ai to'ina nggomid̄oho b̄ohakai b̄a tipu. Mboto dou d̄imamai kai kanina ngara Nahu, ro d̄imanggahi, ’Nahuku Sia!’ ro ’Wa'ura raka wakatuna.’ Pala nggomid̄oho aina b̄atumu siad̄oho. 9Ai rauna nggomid̄oho dahumu nggara ringasi b̄a nggomid̄oho haba mab̄oha lewa ra laka ro dou makangango rasa. Sara'ana ede pab̄ua d̄imandad̄i ulu. Pala ede laina aona rakara wakatuna kiama.”
10Edempara Ruma Isa nuntu wali-Na, nggahi-Na, ”Bangsa ma sab̄uana d̄imalewa lab̄o bangsa ma kalaina ro negara ma sab̄uana d̄imamai dei negara ma kalaina. 11Tab̄e-b̄e d̄imandad̄i epu ma na'e poda, sarahid̄o ro mboto bala supu. D̄imandad̄i lampa rawi ma samangikai ade mandad̄i ese langi. 12Pala sawatipu ndad̄ina sara'ana ede, nggomid̄oho d̄i wa'u ro d̄i kancoki. Nggomid̄oho d̄i paresa ncihi ra ncaramu d̄i uma-uma sambeakai ro d̄i kalu'u ade uma bui. Ro nggomid̄oho d̄i randa lao wa'a aka tando sangaji-sangaji ro dou-dou mana'ekaina b̄ara nggomid̄oho b̄atumu Nahu. 13Edeku wakatuna d̄i ru'u b̄a nggomid̄oho d̄i kahabakaimu Haba Mataho rad̄i Ruma Hatalla. 14#Luk. 12:11-12 Katenggopu ademu b̄a one nggomid̄oho wati d̄imadarura ade mab̄oha auku d̄i nggahi b̄a nggomid̄oho d̄ihorukaimu weki. 15Ndai Nahu d̄imambeimu nggahi ra eli ro loa timba ra lemba ede, ndad̄i wati kone sab̄ua dou rau rad̄i musu-musumu mawa'una ao atao makawatina au ranggahi b̄a nggomid̄oho. 16Nggomid̄oho d̄i b̄ab̄u b̄a ina ra amamu, b̄a sa'e ra arimu, b̄a cina ra angimu ro b̄a lengad̄ohomu. Sarundena d̄i ade weki nggomid̄oho d̄i hade b̄a siad̄oho. 17Nggomid̄oho d̄i daca'u b̄a sara'ana dou b̄ara nggomid̄oho anamori Nahu. 18Pala salela honggo rau d̄i tutamu wati d̄imambora. 19Nggara mawa'usi taha b̄a nggomid̄oho ro masabasi, nggomid̄oho d̄imasalama.”
Ruma Isa nuntuna mab̄oha ndumbana Yerusalem
(Mat. 24:15-21, Mrk. 13:14-19)
20”Ma'edasi b̄a nggomid̄oho Yerusalem mai heko b̄a tentara, nggomid̄oho d̄imab̄ade b̄a one kota ede wati ntoi walina d̄i kaleli. 21Wakatu ede pab̄uaku dou mawara d̄i Yudea lao rai ese doro. Siad̄oho ma wara d̄i ade kota pab̄uaku tu'u wi'ina kota, ro siad̄oho ma wara ari mai b̄a kota aina lu'una d̄i ade kota. 22#Hos. 9:7 B̄ara wakatu ede eded̄u ’Ainain-ainain D̄ib̄ab̄ukai Hukuma’, loakud̄u ndad̄ira au rawa'u tunti d̄i ade Alkitab. 23Nawancuku samangikai ademu ainain-ainain d̄i ru'u b̄a dou siwe mawunga na'e loko, ro ina ma mbuipu susu anana! Dana ra rasa ake d̄ima'iu susa ra ncoki ma ipi poda, ro Ruma d̄imahukum bangsa ake. 24Wara d̄i hade kai peda, wara rau d̄i wa'a paki aka dana ra rasa dou; ro dou-dou ma wati pata Ruma Hatalla d̄imatonda led̄ina Yerusalem sampe nggori wakatu rawa'u katantukai b̄a Ruma d̄i ru'u b̄a siad̄oho.”
Ainaina maikai Ana Manusia
(Mat. 24:29-31, Mrk. 13:24-27)
25 #
Yes. 13:10, Yeh. 32:7, Yl. 2:31, Why. 6:12-13 ”Peade d̄i liro, wura, ro ntara-ntara d̄imatada tanda-tanda. D̄i dunia, bangsa-bangsa d̄imadahu ro darura adena ringa eli kambimbi balumba d̄i moti. 26Manusia d̄imadahu poda edana au d̄imandad̄i d̄i sara'a dunia ake, b̄ara sara'a makuasa ese woha ai d̄imandad̄i mbari mbura. 27#Dan. 7:13, Why. 1:7 Wakatu edeku Ana Manusia d̄imamai d̄i ade apu kai kuasa ro d̄ese ra ntasa-Na ma na'e. 28Nggara natampu'usi ndad̄ina lampa rawi ede, tu'u ro hantapura tutamu, b̄ara samporo wali nggomid̄oho d̄ikasalama.”
Tana'opu d̄i fu'u Ara
(Mat. 24:32-35, Mrk. 13:28-31)
29Edempara Ruma Isa caritana conto ra ibara ake d̄i siad̄oho, nggahi-Na, ”Tio kab̄aepu fu'u ara ro sara'ana fu'u ma kalai. 30Natampu'usi edamu dumu-dumuna, nggomid̄oho mab̄adeku wa'ura d̄enira mpana ai. 31Ndede rauja nggara nggomid̄oho ma'edasi lampa rawi ede ndad̄ina, nggomid̄oho mab̄adeku b̄a one Karaja'an Allah nawa'ura d̄eni.
32D̄ib̄ademu! Lampa rawi ede d̄imandad̄i sawatipu b̄a dou-dou ma mori wakatu ake made sara'ana. 33Langi ro dana d̄imambora, pala nggahi ra eli Nahu ngge'empa santoi-ntoina.
Paralu jaga-jaga
34”Sandakapu weki ndaimu, ai to'ina nggomid̄oho ipi karepo weki kai ngaha-ndiha ro nono d̄i mawukai, atao kananu ipimu mab̄oha mori ra wokomu, ndad̄ina nggomid̄oho wati sadia wakatu ainaina ede wontu sadekana. 35B̄ara ainaina ede maina b̄une sarente d̄i ru'u b̄a dou sara'ana d̄i dunia. 36Jaga-jagapu, ro sambea ntuwupu loakud̄u nggomid̄oho tenggomu iu sara'a lampa rawi d̄imandad̄i ro nggomid̄oho maloaku mai satando Ana Manusia.
37 #
Luk. 19:47
Ruma Isa ngoa ra teina d̄i Bait Allah wakatu aimarai, ro d̄i aimangad̄ina Sia lao aka doro to'i Zaitun ro ngge'ena ta ede. 38Sanikina aimasid̄i sara'ana dou mai d̄i Bait Allah d̄i kade'ekaina ngoa ra tei b̄a Ruma Isa.
Tans Gekies:
LUKAS 21: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
