Zónà 1
1
Zónà e Yàwɛ wè tó
1Lúó doó káa Yàwɛ léwè e nu Ámétà gbe Zónà píé áà gèe, 2“Ì wɛ̀lɛ̀ í ló pɛ́lɛ gbùò lɛ́ ò si Nínívɛ̀ɛ yí í Wálà léwè gèe é gbɛ̃̀ à ká o mɔ̀, ɓii wà sɔ̃̀ɔ̃ yɔɔ aà ɓɔ m wɛlɛ mɔ̀.” 3Kɛɛ Zónà e die bàlà ká Yàwɛ mɔ̀ áà ló Tásà sɛ̀lɛ̀ yi, lɛ́ e gɔɔ sí Zɔ́pà pɛlɛía. Lɛ̀ e nyɛ gɔɔ pɛ̀lèe nɔ́ɔ̀ɔ mɔ̀ɔ, e wàà gbaa Yàwɛ mɔ̀ e lo.
4Lɛ̀ e kɛɛ, Yàwɛ e fã̀ã̀ mɛ̃́ gágà zɛ̀ vɔ mɛ̀ĩ́ là aà gɔɔ vĩ́ɓò e tó péĩ́ kɛɛ e kã́ e kíe mɔ̀. 5Mia lɛ́ ò yɛɓo kɛ gɔɔ yíía, o túó wáà gbóó ɓò wà wálà nì mɔ̀ píé. O gbɛ̃̀ wáà wà pɔɔ̀ dùò yí bà kɛɛ gɔɔ é kɛ fóí fòì o lɛ̀ɛ. Lɛ̀ e kɛ kília, Zónà e kɛ yi zòi gɔɔ yí tã́ã̀ zàá.
6Gɔɔ líé sí mì e Zónà gɛ̃̀ wɔ̀á yibà, lɛ́ a gèe à lɛ̀ɛ, “Mɛ́ ɓà kɛ̀ wɔ̀á lɛ̀ɛ mɔ̀? Ì wɛ́lɛ̀ í sɛ̀nɛ ɓo ɓà wálà lɛ̀ɛ, lúó dò káa lɛ́ lo bɛ̀ii à mɔ̀ é kɔa yéĩ́-kṹ yékɛ̀ kɔa yí é sìè.”
7Mìa lɛ́ ò yɛɓo kɛ̀ gɔɔ yía, wa gèe o kíe nì lɛ̀ɛ, “Kà nu kɔ́á gbónò kɛ, kɛɛ mí è à kɛ̀ lɛ́ wɔ̃́ sùua è kɛ̀ kɔa káa kɛɛ kɔ́á dɔ.” O gbónò e kília kɛ, lɛ́ a zɔ̃̀ kélɛ̀ Zónà lɛ́ a kɛ lɛ́ wàà sùùa è nu o làa. 8Wa wɛ̃́ĩ́ lɔ̀ɔ̀ kɛ wéa kélɛ̀, “À gèe ko lɛ̀ɛ, deĩ̀ lɛ́ a kɛ lɛ́ wàa sùua è nu ko là ɓé? Mɛ́ e i kɛ yɛɓo ká? Íì go mɛ́ zàa? Sɛ́lɛ́ kpɛɛ̀ lɛ́ e i pà ká? Íì gó mia sùu kpɛɛ̀ yi?”
9Zónà a yíɓo o lɛ̀ɛ, “Hííbúlù mi lɛ́ e m káa, ɛ̃́ɛ̃́ ḿm̀ gbìnì Yàwɛ lɛ́ e Wálà ká lɛ́ e lɛ̀í ɛ̃́ɛ̃́ lɛ́ e mɛ̀ĩ́ wà tã́ã̀ kpã́nã̀ o kɛɛ lɛ̀ɛ.” 10Zónà a gèe o lɛ̀ɛ e kɛ wààpìà Yàwɛ mɔ̀.
Wɔ̃́ e kília e mía lɛ́ ò yɛɓo kɛ̀ gɔɔ yia mɛ́ tàle o mɔ̀, lɛ́ wá gèe à lɛ̀ɛ, “Mɛ́ e kɛ lɛ́ ì wɔ̃́ sùua kɛ̀?” 11Fã̀ã̀ã mɛ́ e kɛ kɛpìà gágà kpókpó ɓo, mia lɛ́ ò yɛɓo kɛ gɔɔ yía wá gèe à lɛ̀ɛ, “Mɛ́ kò bɛ̀i à mɔ̀ kó kɛ i ká kɛɛ fã̀ã̀a e dɔ tã́ã̀?”
12Zónà a gèe o lɛ̀ɛ, “Kà m sí ká m dùò mɛ̀ĩ́ ɓà, aà kɛ kília, mɛ̀ĩ́a zɔ̃ kɛɛ̀ɛ lɛ́ɛ̀ lo dɔɔ̀ tã́ã̀, ɓii ḿm̀ yí dɔ kélɛ̀ m mɔ́ɔ̀ wɔ̃̀ mɔ̀ɔ fã̀ã̀ mɛ́ gágà zɛ̀ lɛ́ e dìè ɓɛ.”
13É kɛ bɛ̃̀ɛ̃ kília, mía o zi naa kɛ ó gɔɔ kɛ e nu kpóṹ mɔ̀; kɛɛ òó gbaa bɛ̀i à mɔ̀ fã̀ã̀a mɛ́ e kɛ gágàa mɔ́ɔ̀ wɔ̃̀ mɔ̀. 14Lɛ̀ e kɛɛ, o sɛ̀nɛ ɓo Yàwɛ lɛ̀ɛ, wáa gèe, “Kóò kpé kã I lɛ̀ɛ, Yàwɛ, yékɛ̀ ko yí é sìè gɔ̃́ e kéa kɛ̀ɓe wɛ̃́ĩ̀, ɛ̃́ɛ̃́ ɓáá gɔ̃́ e kéa ga wɔ̃̀ yà ko wĩ́ĩ́, ɓii ɓi Yàwɛ ɓaà i zo dà wɔ̃̀ kɛ.” 15Lɛ̀ e kɛ kília, o Zónà sí wa dùò mɛ̀ĩ́ã ɓà, lɛ́ mɛ̀iã e tèá gbaa zɔ̃ kɛɛ̀ɛ mɔ̀ɔ. 16Lɛ̀ e kɛɛ, gɔ̃ã̀a o gbɛ̃̀ gbaa wáà tùò Yàwɛ lɛ̀ɛ kpókpó ɓo, lɛ́ o sálà ɓo gbaa Yàwɛ mɔ̀, ɛ̃́ɛ̃́ lɛ́ o o wè dɔ à lɛ̀ɛ.
17Záléa, Yàwɛ e kpã̀ã́ gbùò dò pɛ̀kɛ kɛɛ é Zónà mání. Zónà e kɛ kpã̀ã́ã gé lɛ̀kpɛ̀ii yààka wà bĩ́míàa yààka píé.
Tans Gekies:
Zónà 1: MHB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan