Luk. 22
22
Totukut ŋituŋa akikamun Yesu
(Mat. 26:1-5; Mar. 14:1-2; Yoa. 11:45-53)
1Toapuut ŋasuban a ŋamugati a ŋuna emam ŋakinyalet, ŋasuban ŋuna enyaritae Paska. 2Ewarito ŋisacaradotin ŋulu apolok ka ŋiketatamak a Ŋikisila atukun epite ŋoloaret Yesu, nai akuryanito ikes aŋuna a ŋituŋa.
Tocamu Yuda arikokin Yesu ŋituŋa
(Mat. 26:14-16; Mar. 14:10-11)
3Toloma Satan lotau a Yuda a ŋolo anyaritae Isikariot, ŋolo arae epei a ŋulutomon ka ŋiarei. 4Tolot Yuda akirworiun ka ŋisacaradotin ŋulu apolok ka ŋikapolok ŋulu a ŋiketeok Akai ka Akuj epite ŋolo kipotokinet Yesu neni kec. 5Tolakaros ikes, tocamut ainakin iŋes ŋisiliŋa. 6Tocamu nai Yuda ŋisiliŋa, kisyak akiwarit apaki ŋina etemokino torikorere ikes neni a Yesu pa eyenete ŋituŋa.
Kimuja Yesu ka ŋikasyomak keŋ Akimuj ŋina a Paska
(Mat. 26:17-25; Mar. 14:12-21; Yoa. 13:21-30)
7Todol akoloŋit ŋina a ŋamugati a ŋuna emam ŋakinyalet, akoloŋit ŋina a Paska ŋina eŋolere imesek. 8Kiyakiya Yesu Petero ka Yoana tema, “Toloto kitemokis akimuj ŋina a Paska emuja.”
9Kiŋita ikes Yesu temasi, “Ai icamitor iyoŋ isua etemokinioto?” 10Toboŋok iŋes ikes tema, “Topupokisi! Ani ilomarete iyes lotaun, iryamete ka ekile eryoŋit amot ŋina a ŋakipi. Kiwuapakisi iŋes tari kai ŋina elomari, 11ido tolimokis elope ŋolo ka akai temasi, ‘Ebala Eketataman, ai eyai agule ŋina itemokino ayoŋ ka ŋikaakasyomak emujata akimuj ŋina a Paska?’ 12Ikitoodikini iŋes iyes agule ŋina eyai kidiama ŋina aloloman ŋina esubakinitae, kitemokis ibore daadaŋ a nen.”
13Toloto ikes toryamut ibore daadaŋ ikoni neni alimokinitor Yesu ikes; tosodo kitemokis akimuj ŋina a Paska.
Akimuj ŋina ke Ekapolon Yesu
(Mat. 26:26-30; Mar. 14:22-26; 1 Ŋikor. 11:23-25)
14Ani edoli apaki, kiboikinos Yesu ka ŋikasyomak keŋ kimuja. 15Tolimok iŋes ikes tema, “Ekemuit ayoŋ nooi akimor ka iyes akimuj ŋina a Paska naga, eriŋa ŋican kaŋ nyedoluno! 16Akalimokini ayoŋ iyes atemar, emam nabo jik nyemuji akimuj na akitodol akoloŋit ŋina iyookinor apolou keŋ a Napukan ka Akuj.”
17Tolemu nai Yesu ekopo, tolakar neni ka Akuj, ido tolimu tema, “Kijaasi lo, tomora, 18anerae akalimokini ayoŋ iyes atemar, ameun tokona emam nabo nyamasi epiini akitodol Akoloŋit ŋina ebunio Apukan ka Akuj.”
19Tosodi tolemu amugati, tolakar neni ka Akuj, tonyilinyili, inak ikes tema, [“Erae naga akaakuwan ŋina ejalyo ikotere iyes. Kitiyaete ikona ikiitunitotor ayoŋ.” 20Ikwaŋinapei kedaun akimuj, abu iŋes tolemu ekopo, inak ikes tema, “Erae logo ekopo ŋolo a ŋaokot kaŋ aŋuna ka Acamunet a ŋina kitete ŋuna ebukoritae ikotere iyes.]
21“Nai kiŋolikisi, ikirukit ayoŋ a ne alomesa ka ŋolo akalukini ayoŋ! 22Kire etwani Lokoku a Ituŋanan ikwaŋina adwaritere; nai ekaŋ ekile ŋolo erikokini iŋes ŋituŋa!”
23Togeut ikes akiŋitanar make atemar ŋae alokidiŋ kec itiyakini ŋakiro ŋun.
Apolou ŋina a kire
24Topegakinos ŋikasyomak a Yesu irworosi make ebasi, ŋae alokidiŋ kec epol akilo ŋuluce. 25Tolimok Yesu ikes tema, “Epolokinito ŋirwosi ŋulu a ŋibukui a ŋulu nyerae Ŋiyudayan ŋituŋa kec; nabo ŋulu ipukato enyaritae ‘Ŋikeŋaranakinak ŋituŋa.’ 26Nai nyitemokino ŋakiro ikote neni aneni kus; itemokino ŋini epol aneni kus kikwaanikin ka ŋini edit ka ekarikon kikwaanikin ka eketiyan. 27Nyaani ŋini epol, ŋini iboi alomesa kori ŋini ekori akimuj? Meere mono ŋini iboi alomesa a? Nai ayai ayoŋ kidiŋ kus arae ekejanakinan.
28“Irae iyes ŋulu ikiruk ka ayoŋ anakikatakineta kaŋ a daadaŋ. 29Ikwaŋina eketuruworya Papa kaŋ ayoŋ Ekapolon, eketuruwori ayoŋ iyes daŋ ŋikapolok, 30ikotere kimuja ka tomata daŋ a Napukan kaŋ. Kiboikinotor lokicoloŋo, totubonokis ŋatekerin ŋunatomon ka ŋaarei ŋuna a Isirael.
Tolimu Yesu atemar epegi Petero atemar ayeni iŋes
(Mat. 26:31-35; Mar. 14:27-31; Yoa. 13:36-38)
31“Simoni, Simoni! Topupok mono iyoŋ! Aryamu Satan apedor ŋina kikeikeet iyes daadaŋ, ikwaŋina ikeikeya eketan ŋimomwa. 32Nai ekelipak ayoŋ iyoŋ Simoni, ikotere nyepuripuryaar anupit kon. Ani iboŋuni iyoŋ nabo neni kaŋ, itemokino iyoŋ kitogogoŋ ŋikonikaitotoi.”
33Toboŋok Petero iŋes tema, “Ekapolon, atenit ayoŋ arukor ka iyoŋ mabus ka natwanare!”
34Tolimok Yesu iŋes tema, “Petero, akalimokini ayoŋ iyoŋ atemar, eriŋa ekokoroit nyeruuno nakoloŋit na, ipegi iyoŋ ŋapeget ŋauni atemar ikiyeni ayoŋ.”
Ecwee, ekikapu ka atum
35Kiŋit Yesu ikes tema, “Ŋina ekeyakiaritor ayoŋ iyes emam ecwee ŋolo a ŋisiliŋa, ekikapu kori ŋamuk, ayai ibore ŋini ipotu iyes kicanakinosi a?” Toboŋokis ikes temasi, “Amam ibore ikicana.”
36Tolimok Yesu ikes tema, “Nai tokona ŋini daadaŋ eyakar ŋisiliŋa kori ekikapu, itemokino kiric; ani ŋini emamukar atum, itemokino togyela elou, tosodi togyelu atum. 37Anerae akalimokini ayoŋ iyes atemar, itemokino kiyookin aneni kaŋ Ŋakigireta ŋuna igiritae ikona: ‘Emaritae iŋes ka ŋikasecak kaapei.’ ”
38Tolimokis ŋikasyomak iŋes temasi, “Ekapolon! Kiŋolik! Eya ŋatumio ŋaarei ne!” Toboŋok Yesu ikes tema, “Etemokin!”
Kilip Yesu alomoru a ŋikito a ŋulu enyaritae Olipa
(Mat. 26:36-46; Mar. 14:32-42)
39Tonyou Yesu alotaun, tolot moru a ŋikito a ŋulu enyaritae Olipa, ikwaŋinapei sek aloseneneo iŋes, kiwuapakis ŋikeekasyomak iŋes. 40Ani edoli iŋes nen, tolimok ikes tema, “Kilipa, ikotere nyilomasi nakitemyet.”
41Torotok iŋes aneni kec tari neni ebai neni edoe amoru imasaryo, ido toryedik kilip. 42Tema, “Papa, ani kicamit iyoŋ, tolema ekopo lo ŋolo a ŋican aneni kaŋ! Nai meere aŋuna ka acamit kaŋ, nai kitiyakin acamit kon.” [ 43Bu emalaika anakuj, kitogogoŋ iŋes. 44Kilip iŋes imukekinit toryeba nooi alotau, kikokis ŋakinyinyir keŋ edoete kwap ŋaokot.]
45Ani enyouni Yesu aneni elipya, toboŋo torukau ŋikeekasyomak kejotoorosi, kiinaasi ŋakiro ŋuna anomorito ŋikecetai. 46Kiŋit Yesu ikes tema, “Nyo ijotooto iyes? Tonyoutu, kilipa, ikotere nyilomasi nakitemyet.”
Kikamunae Yesu
(Mat. 26:47-56; Mar. 14:43-50; Yoa. 18:3-11)
47Ani eriŋa Yesu irworo, todolu asepic ŋina a ŋituŋa, ŋina arikit Yuda ŋolo arae epei alokidiŋ ŋulutomon ka ŋiarei. Kikomaiya Yuda neni a Yesu, tonu iŋes. 48Tolimu Yesu tema, “Yuda, iluki iyoŋ Lokoku a Ituŋanan ka akinu a?”
49Ani iŋolikinete ŋikasyomak ŋuna alosete akitiyakin, kiŋita ikes Yesu temasi, “Ekapolon, icamit iyoŋ isua etelo ikes a ŋatumio a?” 50Kitel epei alokidiŋ kec epito ŋolo ke Esacaradoti a ŋolo Apolon nooi nakit ŋina aloteten, totubo. 51Nai tolimu Yesu tema, “Etemokin!” Totap iŋes akit ŋina ke epito, kitaŋaleu.
52Tolimok Yesu ŋisacaradotin ŋulu apolok ka ŋikapolok ŋulu a ŋisigarya a ŋulu eteok Akai ka Akuj, ta ŋikatukok ŋulu aponito akikamun iŋes tema, “Nyo iponitotor iyes itiŋito ŋatumio ka ŋabiroi esibit arae ayoŋ ekokolan? 53Ikirukit iyes ka ayoŋ ŋirwa daadaŋ alo Kai ka Akuj, ipotu iyes nyikikamut ayoŋ. Nai tokona erae esaa lo ŋolo kus, ŋolo ka apedor a ŋina ka akiryonut.”
Topeg Petero atemar ayeni Yesu
(Mat. 26:57-58, 69-75; Mar. 14:53-54, 66-72; Yoa. 18:12-18, 25-27)
54Kikamut ikes Yesu, torikosi kai ke Esacaradoti a ŋolo Apolon nooi, kiwuapite Petero ikes aneni alwanan. 55Enokakinitae akim kidiŋ alapatu, tosodi tolot Petero min neni a ŋulu eboiyete a nen irikaunito akim. 56Ani iŋolikini aketiyan apei Petero iboi alodiye akim, kitek iŋes, tolimu tema, “Arukito ekile lo daŋ ka iŋes!”
57Nai topeg Petero ŋun, tema, “Iyoŋ aberu na, nyayeni ayoŋ iŋes!” 58Kelunyar apaki ŋina auruwuana, toyen ekile ece Petero tolimu tema, “Irae iyoŋ jik epei alokidiŋ kec!” Nai toboŋok Petero iŋes tema, “Ekile, meere ayoŋ!”
59Kelunyar epeisaa, kitogogoŋ nooi ituŋanan ice tema, “Arukito jik ekile lo ka Yesu, anerae erae iŋes daŋ ŋolo alo Galileya!”
60Tosodi Petero tema, “Nyayeni ayoŋ ŋakiro ŋuna irworo iyoŋ!” Atipei eriŋa iŋes irworo, toru ekokoroit. 61Toboboŋ Ekapolon Yesu kitek Petero. Totamu Petero ŋakiro ŋuna alimokinit Yesu iŋes atemar, “Eriŋa ekokoroit nyeruuno nakoloŋit na, ipegi iyoŋ ŋapeget ŋauni atemar ikiyeni ayoŋ.” 62Toloma Petero kiŋa, kigwor nooi.
Tokyenare Yesu, ido kibuŋae
(Mat. 26:67-68; Mar. 14:65)
63Tokyenatar ŋikilyok ŋulu eyokiyete iŋes ka kibuŋata daŋ. 64Torapa daŋ ereet keŋ, kiŋita iŋes temasi, “Todwar! Ŋae ŋini ikirami iyoŋ?” 65Tolimokis iŋes ŋakiro ŋuna alalak ŋuna a ŋiyany.
Yesu alokiŋaren Atukot a Ŋiyudayan
(Mat. 26:59-66; Mar. 14:55-64; Yoa. 18:19-24)
66Ani iwalari akwap, totukokin ŋikatukok ka ŋisacaradotin ŋulu apolok ta ŋiketatamak a Ŋikisila, torikoroe nai Yesu Natukot kec. 67Kiŋita ikes Yesu temasi, “Tolimokinae mono iyoŋ isua, iyoŋ iŋes irae Kristo a?” Toboŋok Yesu tema, “Tari kakalimok ayoŋ iyes, nyinupete ŋakiro kaŋ; 68ani tari kekeŋit ayoŋ iyes akirot, emam nyiboŋokinete. 69Nai ameun tokona, iboikin Lokoku a Ituŋanan teten Akuj ŋina alokidiama nooi!”
70Kiŋita ikes daadaŋ temasi, “Irae nai iyoŋ Lokoku ka Akuj a?” Toboŋok iŋes ikes tema, “Ilimut iyes atemar arae ayoŋ.” 71Tolimut ikes temasi, “Okoe, nyo nabo ikiitanitor ŋisuudae ŋice? Ikiira iwon ŋilopeyek ŋakiro ŋuna alimu iŋes!”
Tans Gekies:
Luk. 22: NIB2008
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ngakarimojong Interconfessional Bible © Bible Society of Uganda, 2008.
