Yoa. 2
2
Ekiitanu alo Kana
1Ani kelunyar ŋirwa ŋiarei, toyakaun ekiitanu lotaun ŋolo a Kana, nakwap a Galileya. Ayai toto a Yesu nasuban ŋun. 2Anyaritae Yesu daŋ ka ŋikeekasyomak lokiitanu ŋol. 3Ani keŋobasi ŋituŋa epiini, tolimok toto a Yesu iŋes tema, “Kedaun epiini kec!”
4Tolimok Yesu iŋes tema, “Okoe akimat! Kaanukiro eraakar iwon ikimitakinit? Eriŋa apaki kaŋ nyedolo.” 5Tolimok nai toto keŋ ŋiketiyak tema, “Kitiyata ŋuna daadaŋ ikilimokini iŋes iyes.”
6Ayakasi nen ŋamoti ŋakanikapei ŋuna etiyaunitae anamoru, ŋuna esitiyaeneneete Ŋiyudayan ŋakipi kec akitesegununuya ŋawat kec, ikwaŋina ecikikakinitotor Ŋikisila; apedori apeimot aŋobar ŋilitae ŋulu eapikinito amiat. 7Tolimok Yesu ŋiketiyak tema, “Kilelebikisi ŋakipi namoti nu.” Kileleba ikes ŋamoti. 8Tolimok nai ikes tema, “Tookosi tokona ŋadi, inasi ekapolokiniton ŋasuban.” Tookosi ikes, inasi iŋes. 9Ani iiri ekapolokiniton ŋasuban ŋakipi ŋuna aris keruwor epiini, nyeyenu iŋes neni kebunio epiini, (nai ayenete ŋiketiyak ŋulu aokunete ŋakipi). Tonyarau nai iŋes ekeitan, 10tolimok tema, “Jwi jwi anakisyakinet ŋasuban, itamasyo mono ŋituŋa epiini ŋolo ebob; ani nai emerakinosi, tomata ŋolo epyana. Nai kibu iyoŋ ŋinapei tete kiŋada epiini ŋolo ebob.”
11Arae ŋin akujuwuanut ŋina esyaunan ŋina etiyae Yesu alo Kana, anakwap a ŋina a Galileya. Alopite a ŋol kisileerek iŋes ikes apolou keŋ, tonupa ŋikasyomak keŋ iŋes. 12Kedau ŋun, tolot Yesu totiyaar lotaun a Kaperenaum, torukosi ka toto keŋ ka ŋikaitotoi keŋ ta ŋikasyomak keŋ. Kiriyata ikes aina ŋirwa ŋulu ekudyoko.
Kirita Yesu ŋikagyelanarak alo Kai ka Akuj
(Mat. 21:12-13; Mar. 11:15-17; Luk. 19:45-46)
13Aapiyarit akoloŋit ŋina a Paska, ido tolot Yesu todoka Yerusalem. 14Toloma iŋes Kai ka Akuj, toryamu ŋituŋa ŋulu agyelanarete ŋaatuk, ŋamesekin, ŋakuryo ka ŋikesyecak ŋisiliŋa ŋulu eboiyete alomesae kec. 15Kitiyau Yesu adaset a ŋaunoi, kiritarya ikes daadaŋ kaapei ka ŋamesekin ta ŋaatuk alo Kai ka Akuj, kielana ŋisiliŋa a ŋulu esyecak, ka tobuburiyana ŋimesae kec. 16Tolimok ŋulu agyelanarete ŋakuryo tema, “Tolemasi ŋiboro lu a ne! Nyituruworosi Akai a Papa kaŋ ŋina kicurutaet!” 17Totamut ŋikasyomak keŋ atemar igiritae Nakigireta ebe, “Amina kaŋ Akai kon, Akuj, enepi alotau kaŋ ikwa akim.”
18Kiŋita ŋikarikok a Ŋiyudayan iŋes temasi, “Anikujuwuanut ipedori iyoŋ akitiya ikitoodikinia isua atemar ikicamakinitae iyoŋ akitiya nu?”
19Tolimok Yesu ikes tema, “Tobwaŋabwaŋaasi Akai ka Akuj na; abuni ayoŋ adukokin nabo alorwa a ŋiuni bon.”
20Toboŋokis ŋikarikok a Ŋiyudayan temasi, “Abu Akai ka Akuj na ya ŋikaru ŋatomoniomwon ka ŋikanikapei edukyo, kire ipedori iyoŋ adukokin iŋes alotooma ŋirwa ŋiuni a?”
21Nai arae Akai ka Akuj ŋina alimit Yesu akuwan keŋ. 22Kedau Yesu ayarun alokatwak, apotu ŋikasyomak keŋ totamut ŋuna alimunit iŋes, tosodo tonupa Ŋakigireta ka ŋakiro ŋuna erworit Yesu.
Eyeni Yesu ŋatameta a ŋituŋa a daadaŋ
23Ani eriŋa Yesu eyai Yerusalem, alorwa a ŋulu a Paska, apotu ŋituŋa ŋulu alalak tonupa ekiro keŋ, anerae eteete ŋakujuwuanisya ŋuna etiyae iŋes. 24Nai pa ekinyomit Yesu ikes, anerae ayeni ŋatameta a daadaŋ. 25Pa eitanit iŋes idiotuŋanan akiteyenikin iŋes ŋuna a ŋituŋa, anerae ayeni iŋes ŋuna aya tooma lotai kec.
Tans Gekies:
Yoa. 2: NIB2008
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ngakarimojong Interconfessional Bible © Bible Society of Uganda, 2008.
