Suluet 3
3
’Doro na ŋuto i toron
1 #
Kwe 12.9; 20.2 Nyena a munu gwe a lokoŋ lwö-lwöŋ kulye ŋo liŋ ti mu ’diŋ logon MATAT Ŋun a gweja kulo. A nye pipije nu ŋuto adi, Ŋun ’diri a kulya adi ta ti nyesu ludweki ti kaden liŋ ti melesen le? 2A nu ŋuto waddi munu adi, Yi bubulö nyesu ludweki ti kaden liŋ ti melesen, 3ama Ŋun a kulya adi, Ta ti nyesu ludweki ti ködini lo gwon i kiden na melesen lu kwöŋ, a ta tine ’bo se, an ta twatwa. 4A munu kulyani ko nu Ŋuto adi, Ta ti twatwa asut. 5Kogwon Ŋun a den adii lor lo nyesi ta ludweki ti Ŋilu ködini lu, a konyen kasu mo ŋaji ŋaju, a ta mo gwe gwoso Ŋun lo deŋdya kulya na ’but ko narok. 6A nu nuto ko meddi adi ludweki ti lu ködini a lo ’but i nyei, Köti kwekwelen i meta, Köti a ködini lo ’de ’dekarikin i tokoŋgu na ŋuto, a ’deuŋdye ludweki kanyit a nyesi nyesu, a tiŋdi lalet lonyit Köti, a lu ŋuto nyesi nyesu. 7A kirut konyen kase ŋaji ŋaju se murek liŋ, a se deŋdi adi se gwon ko mugunya a limuö kana; a se ribbe koropo ti ki ’bi i pirit na geleŋ, a tetenakiŋdye ’börik a ’böno.
8A se yiŋge mumuyukta na MATAT Ŋun i wörö i melesen i likun na kak, a lu ŋuto se ko nakwan nanyit ’danani ’dana ko MATAT Ŋun i komor i kiden na kaden ti melesen. 9A MATAT Ŋun luŋgi lu ŋuto a pipije lepeŋ adi, Do liya? 10A nye waddi adi, Nan a yiŋga mumu yukta inot i melesen, a nan kujönöni kujönö, kogwon nan gwon a limu kana; a nan ’danani ’dana. 11A Ŋun pipije adi, Ŋa lo takiŋdya do adi do gwon a limu kana? Do a nyesu ludweki ti lo ködini logon nan a saŋu do adi do ködyö ti nyö lo? 12A lu ŋuto waddi adi, Na Ŋuto nagon do aje tin i gwon ko nan na aje tiŋdu nan ludweki ti lo ködini a nan nyesi nyesu. 13#2 Kor 11.3; 1 Tim 2.14 A kirut MATAT Ŋun pipije nu ŋuto adi, Na ŋo a nyo nagon do a kon na? A nu ŋuto waddi adi, Munu lo mumulukakindya nan, a nan nyesi nyesu. 14A MATAT Ŋun kulyani ko lu munu adi,
Kogwon do aje kon na ŋo,
do a senya i kiden na toro ’bo liŋ,
ko i kiden na kijakwa liŋ ti mu ’diŋ;
do mo wawaraktu kak ko pele,
a do mo nyenyesiti ŋutu i perok liŋ ti gwiliŋit inot.
15 #
Kwe 12.17
A nan mo tiŋdi ŋisa i kiden inot ko na ŋuto,
Köti i kiden na nyakwariat kulök ko na nyakwariat kanyit;
nye mo böböŋörö do i kwe, a do mo böŋöddi lepeŋ i loru ’yum.
16A Ŋun kulyani ko nu ŋuto adi, Nan mo tutuŋdi tömiesi kunökjöre parik i yupuŋdyö inot, iŋkoi, do mo ŋoŋoŋga i ta ’duuŋdyö inot na ŋwajik; a do mo ’deke lalet ilot, a nye mo saŋi do.
17 #
Eb 6.8
A Ŋun kulyani ko Adama adi,
Kogwon do a yiŋga gworo lonarakwan inot,
Köti do a nyesu ludweki ti lu ködinilogon nan a saŋu do adi do ti nyesu kata lu,
kak na a senya kogwon kulya kunök;
do mo nyesu ŋo kanyit ko ŋiŋiresi i perok liŋti gwiliŋit inot.
18A na kak mo towilakindye do kikwa se ko kalelerök;
a do mo nyesi ’dötilön ti mu ’diŋ.
19Do mo nyesu kinyo ko ŋiŋiresi tojo do a yitö kak, kogwon do a ’dumwe kaŋo kanyit. Do a lipo, a do mo yitöni i lipo.
20 # 3.20 Awa Karin ti Awa kweja adi Gwon jorun A lu ŋuto gwije nakwan nanyit a Awa, kogwon nye a ŋote na ŋo liŋ lo gwon jörun kilo. 21a MATAT Ŋun tetenakiŋdye Adama se ko nakwan nanyit boŋgwat nagon a gobero, a nye tojubbi se.
22 #
Kwe 22.14
A kirut MATAT Ŋun kulyani adi, Mete, lo ŋuto a wora gwoso lele likaŋ i deŋdya na kulya na ’but ko narok, nyena sopinana an nye ko riöddu könin i ’dumuŋdya na ludweki i ködini toruet, a nyesi nyesu a gwe jörun ŋupi.
23Nyenagon a MATAT Ŋun riköddi lepeŋ kaŋo i melesen na Edene i kuŋu na kak nagon nye a ’dumwe kaŋo kata na. 24Nyena a nye turöddi lu ŋuto kaŋo, a i swöt lo ’yure na melesen na Edene, a nye tiŋdi kerubajin se ko baŋdu lo tule a kimaö, logon wöwöriŋöddu i swötön liŋ anyen teŋgu kiko lo tu i ködini toruet.
Tans Gekies:
Suluet 3: BBE
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bari Bible © United Bible Societies, 1979.
