Gha ta Wəshi 2
2
1Tsagha kiɗimte geva pa ta yɛ ghweme le hɛɗi ba'a pɛtɛa wəshi nyi te hɛ. 2Ma kwa kiɗimte slene ta ŋkɛ Shala ne, pa ŋkɛ zhɛnakɛ mpi va slene nyi menete ŋkɛ te kwa mberefaŋe ta hɛ. 3Pa Shala wəpikɛ kwa mberefaŋe ta hɛ nyagha, pa ŋkɛ veyi vecia shɛ tekeleke, kwa nza ŋkɛ te vecia shɛ zhɛnakɛ mpi ŋkɛ va slene ta wəshi nyi pate ŋkɛ. 4Nya ya kaghena ta pa ta yɛ ghweme le hɛɗi.
Ntsa nya mbe Ɛdɛn
Ma kwa pate yɛ ghweme le hɛɗi Shala ne, 5wəfe shɛ te hɛɗi we, gwəzə shɛ kenaka kapese we. Kwa nza ŋkɛ kenaka Shala Mahwətə kameke va kadzete hɛɗi we, wəndə shɛ kezha wəza ŋkwa nya te hɛɗi we. 6Ama deke kwete mama ta ɗasle nde hwɛ shave mbe hɛɗi kezha ɓasle ŋkwa nya te.
7Pa Shala Mahwətə pate wəndə ŋelɛ le keləwəa hɛɗi nya ntave ŋkɛ. Pa ŋkɛ vɛsəame nda sefəa mpi mbe ŋshi, ntake ŋkɛ kanza teghweme. 8Kwetere wəmbəa ŋkɛ, pa Shala Mahwətə menete ntsa te hɛɗia Ɛdɛn, laka ŋkwa kesame ta veci, pa ŋkɛ veyi wəndə nya pate ŋkɛ kwa. 9Pa Shala Mahwətə pesete mama ta wəfe nyi ganji ganji ba'a nyi zeɗe zeɗe te hɛɗi. Pa ŋkɛ veyi wəfe ta mpi te tepe ta ntsa shɛ ba'a wəfe ta ɗepe wəsə nya ganyɛ keɗema nya ndiremi.
10Kwete hələ nde hwɛ shave mbe hɛɗia Ɛdɛn kezha ɓasle ntsa shɛ. Se tagha ne, pa hələa shɛ neheve geva wəfaɗe mbe. 11Nahe sləa kwa ghate kenza kaPishon. Gheŋkɛ nde dzasle hɛɗia Havila nya nza mze kwa tere tere mbe, 12mze kwa tere tere nya ganyɛ, tsagha kwete nehwene ta wəfe nya kezəŋwə ganyɛke ba'a kwete pelɛ kwa gheme nya nza zləvə te. 13Gihon sləa kwa bake ta dzeve ta hələa shɛ. Gheŋkɛ nde ntəslə hɛɗia Kəwsh. 14Tigre sləa kwa maheke ta hələa shɛ, laka ŋkwa kesame ta veci yitea meleme ta Asəwr hwɛ ŋkɛ. Efrate sləa kwa wəfaɗe ta dzeve ta hələa shɛ.
15Pa Shala Mahwətə kelete wəndə ŋelɛ ba'a veyi ŋkɛ kwa ntsa ta Ɛdɛn kezha wəza ba'a kezha ya. 16Ma ke Shala Mahwətə gezave nda: «Wərə na kazeme yayata wəfe nya kwa ntsa nya, 17ama katezeme ya ta wəfe ta ɗepe ta wəsə kwa ganyɛ keɗema kwa ndiremi na we, kwa nza ŋkɛ ma te veci nya tezehwe na ne, katemte na.»
18Ma ke Shala Mahwətə: «Ndeɗekə kanza za kwetɛŋenyɛ we. 'Ya katemene nda nde kemane ŋkɛ nya kala ghəa ŋkɛ.» 19Le hɛɗi pate mama ta wəshi keseɗa nyi hwa gamba ba'a 'yɛ nyi yitea ghweme Shala Mahwətə, pa ŋkɛ fəke nda hɛ ke za kezha newe tsema tsema teheka nda slə ŋkɛ ke hɛ. Yayata wəsə keseɗa kakele slə nya hekate nda za. 20Pa ŋkɛ hekate nda slə ke wəshi keseɗa nyi ki ghɛ, nyi hwa gamba ba'a 'yɛ nyi yitea ghweme. Ama kaŋa ŋkɛ ne, kenakɛ wəndə nya kala ghəa ŋkɛ ŋkɛ kezha kemane ŋkɛ we. 21Pa Shala Mahwətə veyite wəndə nyagha yitea hɛ tsape tsape, pa ŋkɛ kweraɗeve slerepe ta ŋkɛ kwetɛŋe, zhiɓəyi sli te ŋkwa ŋkɛ. 22Pa Shala Mahwətə menete male le slerepe nya kweraɗeve nyagha ŋkɛ hwa za shɛ ba'a keleke nda ŋkɛ. 23Tagha gɛ, ma ke za:
«Yawa! Nya ya kamimia ɗa ghɛmɛ gɛ!
Male ta za tenza sləa nta
kwa nza ŋkɛ shave mbe za nde.»
24Vatse tesərə yɛ yitenyɛ le meghekɛ za kezha jikə geva le male ta ŋkɛ yitea nza hɛ kageva nya kwetɛŋe.
25Bake nci se yɛ za le male ta ŋkɛ mederelaŋe, kaɗema kahawe va ghəa nci.
Tans Gekies:
Gha ta Wəshi 2: BEKDC12
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
La Bible en langue Kapsiki avec les livres deutérocanoniques © Alliance Biblique du Cameroun 2012.
