Chukusakị 15
15
Tamụnọ Ḅe Ebram Ḅe Na Fị Ọḅọkụ
1Ma yema ḅọrọseso, Ebram ḅe ọ̀ tẹmẹḅie ye ọrịmẹ, Nyanaḅọ Ḅe nwọse ọ̀ ḅẹmẹ, “Ḅalafama Ebram. Siaye ḅie àrị agbọ sọ ị́ pịrịḅịa, à pịkịna ḅakama ye seni ị́ pịrịḅịa.”
2Ọkụma Ebram ḅe pẹkẹrẹ se nwọḅẹmẹ, “Kụrọmamgba Nyanaḅọ, ị́ seni ị̀ pịrịḅịaye ma che iḅi àrị nwọse ị̀ mịẹḅe, à nwọ gbọrị tọkụ sọ nyanaka sịkị? Ị̀ya ngọma ọkịḅịaḅọ anị Ẹleaza Damaskọsḅọ ḅe-ẹ. 3Ị́ awọ seni ị̀ pịrịkẹ, anịgose, ị̀ya omoniapụ ma ḅie gbọrịḅọ mị ị̀ya ngọma ọkịḅịaye-ẹ.”
4Nyanaḅọ Ḅe pịkịna nwọse Ebram ḅe ḅẹmẹ, “Ḅe omoniḅọ, Ẹleaza ḅe ị́ya ngọma ọkịḅịaḅọ ḅe orikẹ; ị́ ḅarana yi ḅịa tatarị owutọkụ mị ị́ nyanaye ma ọkịḅịaye-ẹ.” 5Nyanaḅọ Ḅe ori ọkị nụngọ paka se nwọse ọ̀ ḅẹmẹ, “So tọrụ ḍiki se lolia ma kịẹn, àrị ḅaka la ọkụ anị ị́ furo ḅie pakaḅo ḅịa awọma la ḅịa ọkụ-ẹ.”
6Ebram ḅe Nyanaḅọ Ḅe ḍuko ye mị nwọ ḅereni ọkịmẹ, mịn mị gose Nyanaḅọ Ḅe karakaraye mịẹḅọ ḅara nwọse Ebram ḅe ọkịmẹ.
7Nyanaḅọ Ḅe nwọse ọ̀ ḅẹmẹ, “Ị̀rị̀ anị Nyanaḅọ Ḅe-ẹ, Ụr anị Babilọn ama mị ḅie ị́ ọkịpakụmaḅo ḅọ ḅe-ẹ, mị ama mị se ị́ pịrịḅịa gose ị́yaye ḅaraḅụ.”
8Ọkụma Ebram ḅe nwọ gbelamẹ, “Kụrọmamgba Nyanaḅọ, nde à nemiḅịa ọkụ na mị ama mị anị ị̀yaye sọḅịa-ẹ?”
9Ori ọ̀ pẹkẹrẹ se nwọḅẹmẹ, “Gbọrị nambulo na, gbọrị oḅori na, gbọrị ajirima na, arịmgba tẹrẹ-a kụra lasaye, pịkị gbọrị okuku na gbọrị elesika na nwọ ọkịḅo ị̀ pịrị.” 10Ebram ḅe namama ọkịḅo Tamụnọ Ḅe pịrịmẹ, ori àrị seni maịn maịn pẹlẹ se pẹkẹrẹ pẹkẹrẹ ma se damadama ma koromamẹ, ọkụma fenima ori àrị pẹlẹkẹ. 11Nama ma pẹịḅịa ẹrẹchị ẹdẹlẹ koroḅomẹ, ọkụma Ebram ḅe àrị desinmẹ.
12Ịrụa mị ḅịkịarị sịkị, Ebram ḅe ò gbun mọnọ kọnmẹ, opu kanakana ọ̀ gbẹịnmẹ se ḅalafa ọ̀ ḅụ sọmẹ. 13Nyanaḅọ Ḅe nwọse ọ̀ ḅẹmẹ, “Ị́ furo ḅie pakaḅoḅịapụ ma jịn sẹ ḅie ini igoniapụ sọḅịa; ini omoniapụ sọḅịa anịanga, kụra ẹndẹ ini nwọse siḅara se ini na angaḅịa. 14Ọkụma ini seni omoniapụ mịẹ sẹ mị, à fomuḅara se ini pịrịḅịa, se ini anị igoni sẹ ḅie pakasoḅịa sịkị, ini ḅaka ngọ nyana soḅịa. 15Ị́rị́ na mịnaḅụ na ị́ iḅiọkụ kpọḅịa se ị́ deinḅụ fị se ini ị́ ḍipiḅịa. 16Inein-a ḅụọ laḅịa sịkị, ị́ furo ḅie pakaḅoḅịapụ ma pịkịma mịanga ḅoḅịa, anịatịḅị Amọraị apụma àrị ini desin ẹkẹ ọkị nweni iniḅo opuma sitịḅịnyana sịkị à fomuḅara se ini pịrịḅịa.”
17Ịrụa mị tukoro se kanakana ḅo sịkị ḅụnemikaḅụ onwoin ḅẹlẹ na kọrịarị fịnị ḅẹlẹ na pẹkẹrẹ pẹkẹrẹ ḅụ sime namama ogboku ḅọrọmẹ. 18Anịsịkị mị anịju ḅụ Nyanaḅọ Ḅe Ebram ḅe na ọḅọkụ fịye-ẹ. Ọ̀ nwọḅẹmẹ, “À ḅereni ị́ pịrịmẹ na ị́ furo ḅie awọma, mị ama mị mgba ọkịmun Ijipt eke mị la, pịkịna mun Yufretis Tọrụ mị la, à se ini pịrịḅịa, 19Kenaị na, Kenịzaị na, Kadmonaị na, 20Hitaị na, Pẹrizaị na, Rifeim na, 21Amọraị na, Kenan na, Gagashaị na, pịkịna Jebus ama mamgba na à se chụa ini pịrịḅịa.”
Tans Gekies:
Chukusakị 15: OBTP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible Society of Nigeria
