ỌMWỤ ỌDADA 4
4
IKen bala Ebẹlụ
1Ụka ọọwa, Adam ka ẹga nya Iivu ahụ nyamwụ. Ọọwa, ọ jẹnyị lẹ, ọ ma ọnyị ọlẹng họọ lẹlẹ. Ụka ọọwa, Iivu a yẹkẹẹ, “Amkpaa a ya ọnyị ọlẹ ham lẹẹ lẹ.” Ọọwa lẹ, Iivu a wụrụ ẹnyị nya ọnyị ọọwa iKen lẹlẹ. 2Ụka kọ nọ chẹẹ, ọ myịmyị ma ọlẹng ọkịla. Ị wụrụ ẹnyị nya ọnyị ọọwa Ebẹlụ. Ụka ká anyị alẹng ịwẹ nwa angịnyị kpá, Ebẹlụ ri ọlụkụrwọ nya ịkpịlọ ogbegbe. IKen ri ọngọ wu ẹrụ. 3Ụka kọ nọ chẹẹ, iKen hu ang nya ẹrụ nyamwụ kpa kaka kịla iya ha Amkpaa. 4Ebẹlụ hu ụgba nya ọgbanyẹ-ọgbanyẹ nya ọkpịlọ ọnyịịla ọlẹ kọ ju eyo gụ ịkịla wuu kpa kaka kịla iya ha Amkpaa ịnyịnyị. Ụka ọọwa, Amkpaa ye Ebẹlụ ayịdang bala ọhaha nyamwụ ọọwa hiigu-hiigu. 5Ma, Amkpaa-á ye iKen ayịdang lee ọhaha nyamwụ kpong-kpong ka. Ọọwa lẹ, iKen a wụ ẹjẹ lụmẹ-lụmẹ, juwa bwọ ayiiji ọtụka-ọtụka chajị nya ọọwa lẹlẹ. 6Ụka ọọwa, Amkpaa tọ iKen ịtọ yẹkẹẹ, “IKen, ịịyẹ a tị́ du ka juwa wụ ẹjẹ, juwa bwọ ayiiji ọtụka-ọtụka ọlịịwẹ?” 7Amkpaa myịmyị byi iKen yẹkẹẹ, “Ó-ri ká họ hiigu lẹẹ, ịnọ a ya kam ka yeng bala iya nyang ọwẹ lẹka-á? Aa jẹ mẹ, ọ́-ri ká nwụ họ ka aalẹ, ọhọbịrị wẹẹ kụ ịnya gbeng juwa tịtọ kọ ka kụrụng. Ma, a tị myị họọ koo.”
8Ụka ọọwa, iKen byi Ebẹlụ ọnyịnamwụ yẹkẹẹ, “Ebẹlụ, kẹwẹ kahị bajẹ ka ohwodehe chẹẹ mẹ.” Ọọwa lẹ, ị hu ang kele ka ẹpwamẹ lẹlẹ. Ụka kị pwụ ụwa kpá, lụka ọ-mwaa, iKen a gba mịla Ebẹlụ nmoo lẹ, ọ nwụ Ebẹlụ ụ-ụwa lẹlẹ. 9Ụka kọ nọ chẹẹ, Amkpaa tọ iKen ịtọ byoo yẹkẹẹ, “IKen ee, ale Ebẹlụ ọnyịnang a tị́ ji?” IKen wẹ byoo yẹkẹẹ, “M̀ jẹ le? A ya Ebẹlụ him ụbwọ ene?” 10Amkpaa wẹ byoo yẹkẹẹ, “IKen, ang ọlanyị a tị́ họ ịnyị? M̀ jẹ ká nwụ Ebẹlụ lẹ. Ó-ri ká jẹ ka, tụbwọ aalẹ, ịwọ nya Ebẹlụ ọlẹ kọ chị cheji lẹ, ọ cheko wum am Ohe Oluhye lẹ. 11Aa wo mẹ. Am Amkpaa gọlọ jung ám ọ-ọpyị ọlẹ kọ ye ịwọ nya ọnyịnang nwa bwu ẹpwụtụbwọ nyang lẹ. 12Ó-ri ká wu ẹrụ wu abwọ myị abwọ, ang nya ẹrụ nyang á ka há kpá ẹnẹnẹhẹ kaka. Ahụ-ahụ, iKen ọwẹ lẹ, agịlata nya ụnyẹ ọrụrụ hi angịkịla kem, a ka juwa rụ pyịyọọ lẹlẹ. A ka juwa ga tụ odehe-odehe ọlẹ da pyịyọọ la ọhịhị nyang lẹ.” 13IKen byi Amkpaa yẹkẹẹ, “Akama ọlẹ ká ya ham lẹ, ọ lụmẹ kịlam kịla. 14Yẹ wẹẹ, a gọlọ ju ịpyị du kam wẹẹ ka ri ọngọ wu ẹrụ kpong-kpong kaka. A kum rụ hi ijata nyang, ahụ ayịdang ịnyịnyị lẹ. A myịmyị gọlọ jum ya agịlata nya ụnyẹ ọrụrụ hi angịkịla kem, am nyaa ka juwa rụ lẹlẹ. Am nyị ka juwa ga tụ odehe-odehe ọlẹ da pyịyọọ la ọhịhị nyam lẹ. A tụtụm myịmyị ya ọng myị ọng ọlẹ kịị nyị́ yẹm yẹ ẹ-ẹhị lẹ, nyị nwụm daarụ odu mẹ.” 15Ọọwa lẹ, Amkpaa a byoo yẹkẹẹ, “IKen, ịnyị ka. Ọng myị ọng ọlẹ kọ nwụng ahụ iKen aalẹ, am Ohe Oluhye ka wu ọngọọwa uri ugbabwọ irwiye kwiwa nyang ahụ iKen pyii lẹ.” Ọọwa lẹ, Amkpaa-à ju iKen ẹjẹẹ chajị ká ọngọngọhẹ-ẹ́ ka nwọọ kaka lẹlẹ. 16Ịnyị lẹ, iKen a rụ hi ijata nya Amkpaa lẹ, ọ kele kaka kụ ụ-ụwa ọ-ọpyị ọlẹ kị wụrụ ịNọdụ lẹlẹ. ỊNọdụ ọọwa ji ka ọmwẹnụ-ụtụrụ nya Idẹn.
Anyị Ịtụma nya IKen
17Ụka kọ nọ chẹẹ, iKen ka ẹga nya ahụ nyamwụ, ọ jẹnyị. Ọ ma ọnyị ọlẹng. Ị wụrụ ẹnyị nya ọnyị ọọwa Ịnọkụ. Ụka ọọwa, iKen nwụ epweji ọhẹ. Ọ ya ẹnyị nya epweji ọọwa wụrụ Ịnọkụ ọnyị nyamwụ ọwẹ. 18Ịnọkụ ma ọnyị ọlẹng ọlẹ kị wụrụ Ịradị. Ịradị ma iMehujẹlụ. IMehujẹlụ ma iMetuchẹlụ. IMetuchẹlụ ma ịLamẹkị. 19ỊLamẹkị ọọwa ye ịhụ imiiye. Ahụ nyamwụ ọhẹ ri Ada, ọkịla ri iSila. 20Ahụ ọlẹ kọ ri Ada ma ịJabalụ. ỊJabalụ ọwẹ a ri adịda ogogo nya angịlẹ wuu kị kaa kụ ẹpwang nya ọdụ bala ọ-kaa kpa iyo ileji ri lẹ. 21Ọnyịnamwụ ọlẹ kị ma hịlọọ ri iJubalụ. IJụbalụ ọwẹ a ri adịda ogogo nya angịlẹ wuu kị ri angị jẹ-ẹ du ẹnwụ bala ẹkụrwẹ lụmẹ-lụmẹ lẹ. 22ISila, ahụ oheeye nya ịLamẹkị, ma ọnyị ọlẹ kị wụrụ iTubalụ-iken. ITubalụ-iken ọwẹ à ri ọngọ hya ụwa nya ọgbanyẹ-ọgbanyẹ lẹ. Ọ kaa kpa oje ọnyọmịla bala oje ụma ịkịla hyà ang-abwọ datị-datị. Ịnịna nya iTubalụ-iken ọwẹ ma ọnyị ọnyang ọhẹ ịnyịnyị. Ẹnyị nyamwụ ri ịNaama. 23Ụka ọhẹ,
ịLamẹkị byi ịhụ nyamwụ yẹkẹẹ,
“Ada bala iSila, anụ ịhụ nyam, anụ wo mẹ!
M̀ nwụ ọlẹng okolobya ọhẹ-ẹ̄.
Ọngọọwa-à tị họm ang, chịm ẹma jene lẹ.
24Anụ ịhụ nyam, anụ wo myịmyị mẹ.
Ó-ri kị ya ọngọ nwụ iKen akama
mwụ aba ba ugbabwọ irwiye kwiwa aalẹ,
ọngọlẹ kọ ka nwụm, am
kwiwa nya ọngọlẹ kam nwụ wẹẹ aalẹ,
ọ ka yẹ akama mwụ aba ba
ugbabwọ iwo irwiye kụrụ irwiye ịnyịnyị pyii lẹ.”
ỊSẹtị bala Ẹnọchị
25Ụka kọ nọ gbee, Adam myịmyị ka ẹga nya ahụ nyamwụ. Ọ jẹnyị. Ọ ma ọnyị ọlẹng ọkịla. Ụka ọọwa, Iivu yẹkẹẹ, “Ohe Oluhye hu ọnyị ọkịla kum iwa nya Ebẹlụ ọlẹ ká iKen nwụ lẹ.” Ịnyị a du ká Iivu wụrụ ẹnyị nya ọnyị ọọwa ịSẹtị lẹ. 26ỊSẹtị ma ọnyị ọlẹng ọhẹ ọlẹ kọ wụrụ Ẹnọchị. Ụka ọọwa kpangga a ri ụka ọlẹ ká aluche nya angịnyị ehe dọmwụ nya ọ-juwa raabwọ wụrụ ẹnyị nya Amkpaa nya ọgbanyẹ odehe ọlẹ lẹ.
Tans Gekies:
ỌMWỤ ỌDADA 4: IBNO
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Igede Bible © The Bible Society of Nigeria, 2019.
