तोलिङ्सोमु 6
6
वदप्मा
1इक्सादिङ् खाम्बेःक्मो मे़न्छाम् याप्मिहाॽ यरिक् मे़बोःन्दे़र मे़बे हे़क्क्याङ् खे़ङ्हाॽरे़ खुन्छिॽ सा मे़न्छुमाहाॽ मे़वये़, #अयुब १:६, २:१ 2निङ्वाॽफुमाङ्साहाॽरे़ मनाहाॽरे़ खुनिॽ मे़न्छुमा साहाॽ नुमा मे़निसुसि, हे़क्क्याङ् खुन्छिॽ सिराॽथाङ्धाङ् मे़ल्लिङ्गे़न् मेःत् मे़दारुसि॥ 3खे़ब्याङ् यहवे दाङ्बाल्ले़ पाःत्तु, “मे़न्छाम् याप्मिहाॽनु आयाम्साम्मिन् सदादिङ् मे़वाॽने़न्, थेआङ्भे़ल्ले़ खे़न् नासिगे़न् थक्लारक्लो॥ खे़न् किप् थिक्काङ् निबोङ् तङ्बे थारिक् हिङ्लो॥”
4खे़न् ये़म्मो नु खे़न् एगाङ्ङाङ् इक्सादिङ् खाम्बेःक्मो होरुहाॽ मे़वये़॥ निङ्वाॽफुमाङ्साहाॽ मे़न्छाम् याप्मिहाॽरे़ खुन्छिॽ मे़न्छुमा साहाॽरो पेःक्मा मे़हेःक्ते़, हे़क्क्याङ् सामे़गत्ते़॥ खे़ङ्हाॽरे़ मे़गत्तुसिबा साहाॽए उन्छेःन्बा ये़म्मोबा मुक्के़गुबा नु कुमिङ् के़इङ्बा मनाहाॽ मे़वये़॥ #खानिःत् १३:३३
5यहवे दाङ्बाल्ले़ इक्सा खाम्बेःक्कोबा मे़न्छाम् याप्मिहाॽ साॽरिक् कुइमे़भे़रे़बा नु खे़ङ्हाॽरे़ निङ्वाॽओ मे़इःत्तुबा पाःन्हाॽ आभे़ल्ले़साङ् ताप्फे़ःम्बारक् चोगे़बा निसु॥ #मत्ति २४:३७; लुका १७:२६; १ पत्रु ३:२० 6इक्सादिङ् खाम्बेःक्मो मे़न्छाम् याप्मि चोगुबाओ यहवे दाङ्बाल्ले़ कुनिङ्वाॽ पङे़, हे़क्क्याङ् साॽरिक् कुनिङ्वाॽ तुगे़॥ 7खे़ल्ले़चोगुल्ले़ यहवे दाङ्बाल्ले़ पाःत्तु, “आङ्गाॽ नावागे़न् चइःत् चोगुङ्बा मे़न्छाम् याप्मिन् इक्सादिङ् खाम्बेःक्कोलाम् मे़क्खुङ्ॽ, मे़न्छाम् याप्मि, के़उःङ्सिङ्बा कुबु थक्सा, के़बे़बा पुसा के़रे़क् मे़क्खुङ्सिङ्ॽ, थेआङ्भे़ल्ले़ आङ्गाॽ खे़ङ्हाॽ चोगुङ्सिङ्बाओ आनिङ्वाॽ तुगे़आङ् वाॽ॥” 8कर यहवे दाङ्बे़ल्ले़ कुमिक्साओ नुहःल्ले़ लुङ्दुक्मा खोसु॥
नुह
9नुहःल्ले़ नु कुहिम्सयङ्ङिल्ले़ कुस्साप्मुःन्धुम्मिन् हाबा कल्लो॥ #२ पत्रु २:५
खुने़ॽ कुये़म्मोबा मनाहाॽओ नुहन् साम्योबा नु कुदोःप्मा मना वये़॥ खुने़ॽ निङ्वाॽफुमाङ्ङिन्नु सोसोरिक् लाङ्घेगे़॥ 10नुहःल्ले़ सुम्सि कुस्सा ये़म्बित्छा मे़वये़—सेम, हाम नु ये़पे़द॥
11निङ्वाॽफुमाङ्ङिल्ले़ कुनिमो इक्सादिङ् खाम्बेःक्मान् फे़न्पान् नु थक्सिङ्मा से़त्छिङ्मारे़ तिम्से़आङ् ने़स्से़॥ 12यहवे दाङ्बाल्ले़ इक्सादिङ् खाम्बेःक्मान् ओमे़त्तु, हे़क्क्याङ् फे़त्लाॽरे़बा निसु, थेआङ्भे़ल्ले़ इक्सादिङ् खाम्बेःक्मो के़वाॽबा के़रे़क् मे़न्छाम् याप्मिहाॽ फे़त्मे़लाॽरे़ मे़बेआङ् मे़वये़॥ 13खे़ल्ले़चोगुल्ले़ निङ्वाॽफुमाङ्ङिल्ले़ नुहन् मे़त्तु, “के़रे़क् मे़न्छाम् याप्मिहाॽ मे़ङ्मासि निङ्वाॽ चोगुङ्ङाङ् वाॽ, थेआङ्भे़ल्ले़ खे़ङ्हाॽरे़ मे़जोगुल्ले़ इक्सादिङ् खाम्बेःक्मान् थक्सिङ्मा से़त्छिङ्माल्ले़ तिम्से़आङ् ने़ःॽ॥ ओमे़त्ते़ॽ, खे़ङ्हाॽ आङ्गाॽ इक्सादिङ् खाम्बेःक्मान्नु सोरिक् मे़क्खुङ्सिङ्ॽ॥ 14आल्ल खे़ने़ॽ सैप्रस मे़प्मनाबा सिङ्ङे़ल्ले़न् वालाधाधिक् चोगे़ॽ॥ वालाधाओ याक्फाङ्हाॽ चोगे़से़ॽ, हे़क्क्याङ् कुसिगाङ् नु लाःक्कात् अलकत्राःल्ले़ ले़ङे़ॽ॥ 15खे़ने़ॽ अक्खेलॽरिक् चोगे़ॽ—वालाधाःल्ले़ कुलाम्तिःन् किप् थिक्काङ् लिबोङ् मितर चोगे़ॽ हे़क्क्याङ् कुभे़रे़न् निबोङ्ङाङ् सुम्सि मितर चोगे़ॽ हे़क्क्याङ् कुलिङ्गे़न्निन् थिबोङ्ङाङ् लिसि मितरबा पोङ्ल चोगे़ॽ॥ 16वालाधाःल्ले़ कुसम्धाङ् खाम्बु चोगे़ॽ॥ वालाधाओ खाओःत्ल फाॽआङ् खाम्बुःल्ले़ कुसिःक्तो हुक्सिक्थिक् खिर्लि हङ्बे़त् फत्छे़ॽ॥ हे़क्क्याङ् वालाधाःल्ले़ कुया ले़प्माङ् लाम्धेःत्थिक् फत्छे़॥ खे़न् कुदाःल्ला सुम्सि के़बप्पा चोगे़ॽ॥ 17थेआङ्भे़ल्ले़ ताङ्साङ्बाल्ले़ कुसिःक्तो कुसक्मा के़याक्पा पाधुङ्सा के़रे़क् से़प्मासिरे़ लागि इक्सादिङ् खाम्बेःक्मो आङ्गाॽ वदप्मा थाङ्ल याःन्दुङ्ॽ, हे़क्क्याङ् इक्सादिङ् खाम्बेःक्मो के़वाॽबा कुसक्मा के़याक्पा पाधुङ्सा के़रे़क् मे़सिरो॥ 18कर खे़ने़ॽनुग आङ्गाॽ आमाङ्हुप्पिन् युक्सिङ् चोगुङ्लो॥ खे़ने़ॽ हे़क्क्याङ् के़मेःत्, के़स्सा ये़म्बित्छाहाॽ नु के़म्बाङ्लिहाॽ के़रे़क् वालाधाओ के़लासिरो॥ #तोलिङ् ८:१६ 19के़रे़क् कुहिङ्वे़त् थक्सा पुसाहाॽओ कुम्बाबा नु कुम्मामा ने़त्ने़त्छि वालाधाओ केःत्ते़से़ॽ, हे़क्क्याङ् खे़ङ्हाॽ खे़ने़ॽनु सोरिक् मे़हिङ्ल॥ 20पुसाहाॽओ खे़ङ्हाॽरे़ खुन्छि लिन् कुइसिक्, थक्साहाॽओ खे़ङ्हाॽरे़ खुन्छि लिन् कुइसिक्, हे़क्क्याङ् खाम्बेःक्मो के़उःङ्सिङ्बा थक्साहाॽओ खे़ङ्हाॽरे़ खुन्छि लिन् कुइसिक् के़रे़क् परिक्ले़न् ने़त्ने़त्छि—खे़ङ्हाॽ कुहिङ्वे़त् वाॽमारे़ लागि खे़ने़ॽओ मे़दारो॥ 21के़रे़क् परिक्ले़न् कुजाहाॽआङ् खे़ने़ॽ सुप्से़ॽआङ् युक्से़ॽ॥ खे़न् खे़ने़ॽ नु खे़ङ्हाॽरे़ खुन्छिॽ लागि चामा थुङ्मा पोङ्ल॥”
22निङ्वाॽफुमाङ्ङिल्ले़ इङ्जाःङ् पिरुबा इसिःक् नुहःल्ले़ के़रे़क् पाःन्हाॽ चोगु॥ #हिब्रु ११:७
Tans Gekies:
तोलिङ्सोमु 6: LIF
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2009, 2023, Wycliffe Bible Translators, Inc. All rights reserved.
