လံာ်တၢ်ကဲထီၣ်အခီၣ်ထံး 2
2
1မၤသးဒ်န့ၣ်ဒီးကယဲၢ်တၢ်ဘၣ်တ့လၢမူခိၣ်ဟီၣ်ခိၣ်ခဲလၢာ်ဝံၤဝဲဒၣ်န့ၣ်လီၤ. 2ဒီးလၢမုၢ်နွံနံၤတနံၤန့ၣ်ကစၢ်ယွၤမၤဝံၤတၢ်လၢအမၤတ့ၢ်ဝဲဒီးဆိကတီၢ်လၢအတၢ်မၤန့ၣ်လီၤ. 3အဝဲဆိၣ်ဂ့ၤတ့ၢ်မုၢ်နွံနံၤတနံၤဒီးပာ်လီၤဆီဝဲဒ်အမ့ၢ်မုၢ်နံၤလီၤဆီတနံၤအသိးလီၤ. အဂ့ၢ်ဒ်အံၤ, တုၤမုၢ်နံၤအဝဲန့ၣ်န့ၣ်, အဝဲမၤဝံၤကွံာ်အတၢ်တ့လီၤပာ်လီၤဒီးဆိကတီၢ်လၢအတၢ်မၤန့ၣ်လီၤ. 4ဒီးတၢ်န့ၣ်မ့ၢ်မူခိၣ်ဒီးဟီၣ်ခိၣ်ဘၣ်တၢ်တ့အီၤဒ်လဲၣ်အဂ့ၢ်န့ၣ်လီၤ.
ဧ့ၤဒ့ၣ်တၤသၣ်အလီၢ်
5ဖဲယွၤ, ကစၢ်ယွၤတ့လီၤပာ်လီၤမူခိၣ်ဟီၣ်ခိၣ်န့ၣ်, တၢ်မုၢ်တၢ်ဘိတအိၣ်ဘၣ်လၢဟီၣ်ခိၣ်အလိၤဒီးတၢ်ချံတဖၣ်တမဲထီၣ်ဘၣ်. အဂ့ၢ်ဒ်အံၤ, အဝဲတဟ့ၣ်လီၤဒံးတၢ်စူၤထံနီတစဲး, ဒီးပှၤလၢအကသူၣ်လီၤဖျးလီၤဟီၣ်ခိၣ်တအိၣ်ဘၣ်နီတဂၤဘၣ်. 6ဘၣ်ဆၣ်ဒီးထံကျိဖိတဖၣ်ကဟဲပြံာ်ထီၣ်လၢဟီၣ်ခိၣ်လာ်ဒီးမၤဘၣ်စီၣ်ဟီၣ်ခိၣ်အမဲာ်ဖံးခိၣ်လီၤ.
7ဒီးယွၤ, ကစၢ်ယွၤဟံးန့ၢ်ဟီၣ်ခိၣ်ကပံာ်တနီၤဒီး တ့လီၤပာ်လီၤပှၤကညီ လၢဟီၣ်ခိၣ်ကပံာ်အံၤန့ၣ်လီၤ. အဝဲအူသဖှိနုာ်တၢ်မူအသါဆူအနါဒ့တဖၣ်အပူၤဒီးပှၤကညီစးထီၣ်အိၣ်မူဝဲဒၣ်န့ၣ်လီၤ.
8ဒီးယွၤ, ကစၢ်ယွၤသူၣ်လီၤဖျးလီၤတၤသၣ်အလီၢ်တပူၤလၢဧ့ၤဒ့ၣ်, လၢမုၢ်ထီၣ်တခီဒီးပာ်လီၤပှၤကညီလၢအတ့လီၤပာ်လီၤဝဲဖဲန့ၣ်လီၤ. 9ဒီးအဝဲဒုးမဲထီၣ်ကယဲၢ်သ့ၣ်အဃံအလၤအကလုာ်ကလုာ်ဒီးဒုးသၣ်ထီၣ် တၤသၣ်အဂ့ၤန့ၣ်လီၤ. လၢတၤသၣ်လီၢ်အခၢၣ်သးန့ၣ်အိၣ်ဒီးသ့ၣ်လၢအဟ့ၣ်တၢ်မူတထူၣ်, ဒီးသ့ၣ်လၢအဟ့ၣ်တၢ်သ့ၣ်ညါသ့နီၤဖးတၢ်ဂ့ၤဒီးတၢ်အၢတထူၣ်န့ၣ်လီၤ.
10ထံကျိတဘိယွၤလီၤဝဲလၢဧ့ၤဒ့ၣ်ဒီးမၤဘၣ်စီၣ်တၤသၣ်အလီၢ်လီၤ. ပူၤထီၣ်ဧ့ၤဒ့ၣ်န့ၣ်နီၤဖးလီၤအသးဒီးယွၤလီၤဝဲဒ်ထံကျိလွံၢ်ဘိအသိးန့ၣ်လီၤ. 11ထံကျိအခီၣ်ထံးတဘိ, မ့ၢ်ဝဲထံကျိပံၤၡိၣ်, ဒီးယွၤလီၤတရံးကီၢ်ဃဝံၤလၤဒီဘ့ၣ်ညါလီၤ. 12(ထူအစီဘၣ်တၢ်ထံၣ်န့ၢ်အီၤဖဲန့ၣ်, ဒီးသိနၢမူလၢအကၤဒီးလၢၢ်လုၢ်ဒိၣ်ပှ့ၤဒိၣ်တဖၣ်ဘၣ်တၢ်ထံၣ်န့ၢ်အီၤဖဲန့ၣ်စ့ၢ်ကီးန့ၣ်လီၤ.) 13ထံကျိခံဘိတဘိန့ၣ်မ့ၢ်ဝဲထံကျိကံဃိၣ်ဒီးယွၤလီၤတရံးကီၢ်ကူၤၡးဒီဘ့ၣ်ညါလီၤ. 14ထံကျိသၢဘိတဘိမ့ၢ်ဝဲထံကျိဃံးဒက့လးလၢအယွၤလီၤဆူကီၢ်အၤၡူၢ်အမုၢ်ထီၣ်, ဒီးထံကျိလွံၢ်ဘိတဘိမ့ၢ်ဝဲထံကျိဖရၤသးလီၤ.
15ဒီးယွၤ, ကစၢ်ယွၤပာ်လီၤပှၤကညီလၢဧ့ၤဒ့ၣ်တၤသၣ်လီၢ်အပူၤဒ်သိးကသူၣ်အီၤဖျးအီၤဒီးပၢၤအီၤန့ၣ်လီၤ. 16ဒီးစံးဘၣ်တဲဘၣ်အီၤ, “ကယဲၢ်သ့ၣ်တထူၣ်လၢ်လၢ် လၢအအိၣ်လၢတၤသၣ်အလီၢ်ပူၤအံၤ နအီၣ်အသၣ်သ့လီၤ. 17ထဲဒၣ်သ့ၣ်တထူၣ်လၢ အဟ့ၣ်တၢ်သ့ၣ်ညါသ့နီၤဖးတၢ်ဂ့ၤဒီး တၢ်အၢအသၣ်န့ၣ်အီၣ်အီၤတဂ့ၤ. နမ့ၢ်အီၣ်အီၤဒီး နကသံတနံၤဃီန့ၣ်လီၤ.”
18ဒီးယွၤ, ကစၢ်ယွၤစံးဝဲဒၣ်, “ပှၤကညီကအိၣ်မူထဲတဂၤဧိၤန့ၣ်တဂ့ၤဘၣ်. ယကတ့န့ၢ်အီၤအတံၤသကိးလၢအကြၢးဒီးအီၤလၢကမၤစၢၤအီၤအဂီၢ်လီၤ.” 19ဒီးကစၢ်ယွၤဟံးန့ၢ်ဟီၣ်ခိၣ်ကပံာ်လၢဟီၣ်ခိၣ်ဒီးတ့လီၤကယဲၢ်ဆၣ်ဧိၤကီၢ်ဧိၤဒီးထိၣ်ဧိၤလံာ်ဧိၤခဲလၢာ်န့ၣ်လီၤ. ဒီးအဝဲဟဲစိာ်အဝဲသ့ၣ်ဆူပှၤကညီအအိၣ်ဒ်သိးအကထံၣ်ဘၣ်လၢအဝဲဒၣ်ကယုၢ်အမံၤဒ်လဲၣ်ဒ်လဲၣ်န့ၣ်လီၤ. ဒီးတၢ်န့ၣ်မ့ၢ်အဝဲသ့ၣ်ခဲလၢာ်မၤန့ၢ်အမံၤတဖၣ်ဒ်လဲၣ်ဒ်လဲၣ်န့ၣ်လီၤ. 20ဒီးပှၤကညီယုၢ်န့ၢ်ကယဲၢ်ထိၣ်ဧိၤလံာ်ဧိၤဒီးဆၣ်ဖိကီၢ်ဖိအမံၤတဖၣ်န့ၣ်လီၤ. ဘၣ်ဆၣ်လၢအဝဲသ့ၣ်အကျါန့ၣ်တံၤသကိးအကြၢးကတၢၢ်လၢကမၤစၢၤအီၤတအိၣ်နီတဂၤဘၣ်.
21ဒီးယွၤ, ကစၢ်ယွၤဒုးလီၤဘၣ်တၢ်မံယိာ်လၢပှၤကညီအလိၤလီၤ. ဒီးဖဲအမံဝဲအခါန့ၣ်အဝဲထဲးထီၣ်န့ၢ်ပှၤကညီအဂုၢ်ဃံအကျါတဘိဒီးမၤဘၢက့ၤအညၣ်လီၤ. 22အဝဲတ့လီၤပာ်လီၤပိာ်မုၣ်တဂၤလၢဂုၢ်ဃံန့ၣ်ဒီးဟဲစိာ်အီၤဆူပိာ်ခွါအအိၣ်လီၤ. 23ဒီးပိာ်ခွါစံးဝဲဒၣ်,
“အအံၤတၢ်အံၤမ့ၢ်ပှၤဒ်သိးသိးယၤတဂၤလီၤ. ဃံလၢအဘၣ်တၢ်ထဲးထီၣ်အီၤလၢယဃံ, ဒီးညၣ်လၢယညၣ်လီၤ.
ပိာ်မုၣ်, မ့ၢ်အဝဲအမံၤ, မ့ၢ်လၢအဝဲဘၣ်တၢ်ထဲးထီၣ်န့ၢ်အီၤလၢပိာ်ခွါအဃိလီၤ.”
24လၢတၢ်န့ၣ်အဃိပိာ်ခွါကဟးသဒၣ်အမိၢ်အပၢ်ဒီးပာ်ဖှိၣ်အသးဒီးအမါ, ဒီးကဲထီၣ်ပှၤတဂၤဃီန့ၣ်လီၤ.
25ပိာ်ခွါဒီးပိာ်မုၣ်ခံဂၤလိာ်အိၣ်ဘ့ၣ်ဆ့ဘၣ်ဆၣ်တမဲာ်ဆှးလိာ်အသးဘၣ်န့ၣ်လီၤ.
Tans Gekies:
လံာ်တၢ်ကဲထီၣ်အခီၣ်ထံး 2: KSWC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Sgaw Karen Common Bible © Bible Society of Myanmar, 1992.
