Genesis 7
7
Hiyay Tanep
1Hinabi nan Apo Dioh kanan Noe, “Lumoob kawoynan mitapamilya ha daong, ta ha kaganaan a tatao kananyatin panaon, ket hikan bengat ye nakit kon ampagbi-ay a matoynong. 2Mangilamo ka nin pitoy padih nin balang kalahi nin ayop a naibilang a malinih,#7:2 Main aayop a naibilang a malinih, hilay malyadin ihagpa kanan Apo Dioh. boy maghay padih met nin naibilang a madinat. 3Mangilamo ka met nin pitoy padih nin balang kalahi nin mamanokmanok. Diyagen mo yati ta-omen magpahulong ye lahi la. 4Pangalabah nin pitoy mangaamot, udanen koyna ye babe-luta ha loob nin apatapo a mangaamot boy madeglem. Ket hipeten ko ye kaganaan a pinalhowa ko ha babe-luta.”
5Ket dinyag nan Noe ye kaganaan a imbilin nan Apo Dioh kana.
6Hiyay Noe ket 600 anay taon na ha nandogin matanep ye babe-luta. 7Ket nilumoob ya ha daong a lamo na yay ahawa na, hilay aanak na a laki dayon mamanuyang na ta-omen hila maligtah ha tanep. 8Ket balang kalahi nin aayop, naibilang man a malinih o ahe, boy balang kalahi nin mamanokmanok boy aayop a andumakap ha luta, 9ket nakew hilan mipapadih kanan Noe ha loob nin daong a omen ha imbilin nan Apo Namalyadi kana. 10Pangalabah nin pitoy mangaamot, ket dogiyan naynan tanepen ye babe-luta.
11Hiyay Noe ket 600 anay taon na hatew. Ha ika-17 mangaamot nin ikalwan bowan, hinumopwak ye kaganaan a hubol ha lale luta. Ket paibat ha langit, ampibohboh ye lanom ha babe-luta. 12Ket pangudan-udan nayna ha babe-luta ha loob nin 40 a mangaamot boy madeglem.
13Ket kananyatew met ateed a mangaamot a mangudan, nilumoob hilayna ha daong ye miahawan Noe, lamo la hilay tatlon aanak na a laki, hiyay Shem boy Ham boy Jafet dayon ahawa nin balang magha kanla. 14Kalamo la ye kaganaan kalahin aayop, mahilib man o maamo, angkumodang man o andumakap, boy balang kalahi nin mamanokmanok. 15Maghay padih ha balang angkabi-ay ye nakew kanan Noe ha daong, 16a omen ha imbilin nan Apo Namalyadi. Ha nakaloob hilaynan kaganaan, hiyay Apo Dioh, inleneb nayna ye ilwangan nin daong.
1740 a mangaamot a pangudan-udan na ha babe-luta. Inumalale ye lanom ket nilumpaw yayna met ye daong. 18Lalo a inumalale ye lanom boy pahulong met ye panlumpaw nin daong ha tanep. 19Pahulong yan an-umalale ye lanom angga ha nalipoh hilaynay mangatagay a matundol. 20Pahulong yan an-umalale ket inumigit ya po ye lanom nin manga pitoy mitodo ha babe nin pinakamatagay a matundol. 21Nahipet ye kaganaan angkabi-ay ha babe-luta, hilay mamanokmanok, aayop a maamo man o mahilib, kaganaan a andumakap boy kaganaan a tatao. 22Nangamatey ye kaganaan angkabi-ay ha luta. 23Ket nahipet hilay kaganaan a tatao, aayop, aayop a andumakap boy mamanokmanok ha luwang. Hiyay Noe boy hilay kalamo nan bengat ha loob nin daong ye napatla.
24Ket ha loob nin 150 a mangaamot, maalale ya po ateed ye lanom.
Tans Gekies:
Genesis 7: AABPV+
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Wycliffe Bible Translators, Inc. All rights reserved.
