Genesis 3
3
Nagkahalanan ye tao
1Hiyay bikat ye mapanalingo ha kaganaan a aayop a pinalhowa nan Apo Dioh a Namalyadi. Minghan, nanepet yay bikat kanan babayi, “Peteg nayi a hinabi nan Apo Namalyadi a adi kawo mangan nin dawa nin hinyaman a kakayo ha pananamanan?”
2Nakibat yay babayi ha bikat, “Malyadi min kanen ye dawa nin hinyaman a kakayo ha pananamanan, 3powidan bengat ye dawa nin kayon anti ha bunak nin pananamanan. Ta hinabi nan Apo Namalyadi a no kanen mi ye dawa na o kimpaan man bengat, ket matey kayi.”
4Hinabi nan bikat, “Hi! Aliwan peteg a matey kawo. 5Hinabi nan bengat yain Apo Namalyadi, ta tanda na a no kanen yoy dawa nin yain a kayo, ket maboknakan ye ihip yo. Mag-ilyadi kawon omen kana a nagtanda no hinyay manged boy maloke.”
6Binilew nan babayi ye dawa nin kayo ket manged ya ha pamilew na boy ba-mon malahap kanen. Boy labay na met ye mag-ilyadin madunong. Kaya-bay namoti ya nin dawa, ket kinan na. Binyanan naya met ye ahawa na a kalamo na, ket kinan na met yati. 7Pangayadi lan kinan, naboknakan anay ihip la boy natandaan layna met a loh-ok hila. Kaya-bay nangwa hila nin bōng igoh, ket tinayi la yan pamahanip nin laman la.
8Ha anhuhumilem ana, nange lan miahawa a angkumodang ya ha pananamanan ye Apo Dioh a Namalyadi. Kaya-bay nagtayo hila ha kakayowan ta-omen na hila ahe makitan Apo Dioh a Namalyadi. 9Noba iningat na yan Apo Dioh a Namalyadi ye laki boy tinepet naya, “Adan, way-ihtew ka?”
10Nakibat yay Adan, “Nange koy pangumodang mo ha pananamanan. Ket nalimo ko kamo, ta loh-ok ako. Kaya-bay nagtayo ako.”
11Tinepet na yan Apo Dioh a Namalyadi, a wana, “Ayay nangihabi kamo a loh-ok ka? Nangan ka nayi nin dawa nin kayon imbawal kon kanen mo?”
12“Hiyay babayi a in-ibyay mo kangko, binyan nako nin dawan kayo. Kaya-bay kinan ko met,” wanan laki.
13Ket tinepet naya met Apo Dioh a Namalyadi ye babayi, “Taket ta dinyag mo yatew?”
“Tinalingo na kon bikat. Kaya-bay kinan koy dawa,” wanan babayi.
14Hinabi nan Apo Dioh a Namalyadi ha bikat,
“Uli ha dinyag mo, ihumpa kata.
Ha kaganaan a aayop, hikan bengat ye makadiha nin yatin humpa.
Legan angkabi-ay ka, dumakap ka,
boy towapok ye kanen mo.
15Paykapooten ko yay babayi boy hika.
Ket hiyay lahi mo boy hiyay lahi na, paykapooten ko hila met.
Hiyay lahi na ye mamokpok nin ō mo,
ket tokaen moya met ye boe na.”
16Hinabi na met Apo Dioh a Namalyadi kanan babayi,
“Uli ha dinyag mo, pahanan ko ye idap a madihaan mo ha pagbuktot mo,
boy mananam kan tubat a ilab ha panganak mo.
Noba labay mo yan teed ye ahawa mo,
ket hiyabay ye manakop kamo.”
17Hinabi na met Apo Dioh a Namalyadi kanan Adan,
“Ulita lingnge mo yay ahawa mo,
boy kinan mo ye dawan kayon imbawal kon kanen mo,
ihumpa ko ye luta.
Ket legan angkabi-ay ka,
magteeh kan mag-obda ha luta ta-omen ka main mapupol a kanen.
18Tumubo ha luta ye iilamon boy madiwin tatanaman.
Ket hiyay kanen mo, mangibat ya ha tatanaman ha nikabalang.
19Panayngetan moy mag-obda ha luta ta-omen main kan pamamangan
angga lano miudong ka met ateed ha luta a ibatan mo.
Ket ulita ha luta ye ibatan mo,
miudong ka met ateed ha luta.”
20Ket hiyay Adan, pinangalanan na yan Eva ye ahawa na ulita hiyabay ye indo nin kaganaan a tatao. 21Ket hiyay Apo Dioh a Namalyadi, in-idyagan na yay Adan boy ahawa na nin bado a katat ayop boy pinahootan na hila.
22Hinabi nan Apo Dioh a Namalyadi, “Hiyay tao, katuwad tawo yayna a nagtanda nin manged boy maloke. Ahe tawoyna paolayan a mamoti ya nin dawan kayon ampakaibyay nin bi-ay, ta no makan na, ket mabi-ay yayna makanoman.” 23Kaya-bay hiyay Apo Dioh a Namalyadi, pinaalih na yay Adan ha pananamanan nin Eden ta-omen na bangkagen ye luta a ibatan na. 24Pangayadi na yan pinaalih Apo Dioh a Namalyadi, nangikonin ya nin aanghil a anhabtan kerubim ha dapit daya nin pananamanan nin Eden. Nangikonin ya po nin kampilan a andumlag a ampanliwed ta-omen homain makahaley ha poon-kayon ampakaibyay nin bi-ay.
Tans Gekies:
Genesis 3: AABPV+
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Wycliffe Bible Translators, Inc. All rights reserved.