Maɛ 1
1
Nyɔ̍ nǐ dlǔ po̍ Chɔɔn-a tìh bla̍-a
(Matio 3.1-12; Luu 3.1-18; Chɔɔn 1.19-28)
1Ɛ̀ la bo ɛ̀ nu̍ pɔ̀n chɛ̀-a gbɔ̀ tè la̍ dǒ Nyɔsoa-a Jǔ Jusu Klai we̍. 2Asaia ɔ̀ nu̍-a Nyɔsoa-a tu̍owli po̍ nyɔ̍-ɛ, kǎ ɔ̍ nu̍ ka ɛ̍ chlǐh-ɛ.
“Nyɔsoa la̍a̍, ‘Ǎn mu̍ ǎn tu̍owli po̍ nyɔ̍ nya̍ dbo̍ dě ìn jǔ,
ɔ̍ iě àn wìè gba̍a̍ po̍.’
3Nyɔ̍-a we̍le-e dě kwlǎslò we̍, ɔ̍ la̍a̍,
‘Mɔ̀ po̍ wìè gba̍a̍ dǒ Joi we̍,
mɔ̀ slɛ̌-ɛ ɛ̍ i̍ dǒ ɔ̍ we̍.’ ”
4Wɛ̀ Chɔɔn ɔ̀ po̍-a nyɔ̍ nǐ dlǔ-ɛ ji̍, ɔ̍ wlǔh-i dě kwlǎslò we̍. Dě ɔ̍ poe nyɔ̍ nǐ dlǔ, iě ɔ̍ bla̍ tìh. Ɔ̍ la̍a̍, “Mɔ̀ bǐi i̍, mɔ̀ iě gblɛ̍n sɔ̀ɛ̀n i̍ tǎli, mɔ̀ iě nǐ dlǔ po̍. Nɛ̀ Nyɔsoa-a mu̍ mɔ̀-a gblɛ̍n sɔ̀ɛ̀n-a tìh i̍ tǎli.” 5Nyɔ̍ kli̍hgbɛ̍ nɛ-a dě Judia fɔɔ-ɛ ke, juh nɛ-a dǒ Juluslɛn wlɔ̀ di̍i̍-ɛ, u̍h mu̍ dě ɔ̍ we̍ u̍h iě ɔ̍ wlu̍ wɔ̌n. Wɛ̀ u̍h sà u̍h-a gblɛ̍n sɔ̀ɛ̀n gbɔ̀ i̍, iě ɔ̍ po̍ u̍h nǐ dlǔ dǒ Jɔɔdɛn nǐ kɛ̍n.
6Jliɛ̍ ɛ̀ Chɔɔn pa̍-aɛ, gbo̍ kɛ̍ɛ̍n bli-a mǐ bo u̍h nui ɛ̍. Nɛ̀ ɔ̍ tù dɛ̍ku wlu̍h we̍, wɛ̀ gbaunᵻ ke du̍h nu̍ ɔ̍ di̍-dɛ̍. 7Ɔ̍ bla̍ dɛ̍ dě u̍h we̍, ɔ̍ la̍a̍, “Jɔ mu̍-a ǐn kɛ̍n i̍ ji̍-ɛ, ɔ̍ gbǐh bɛ̌ i̍ ɛ̍ sìì naɛ̍. Ǎn chɛ̀ ǐn se̍ i̍ blaɛ iě ɔ̍ bu̍hdih-a chɛ̀ kwa̍ blě. 8Ǐn po̍ mɔ̀ nǐ dlǔ dǒ nǐ we̍, jɛ ɔ̍ nɔ̀ɔ̍, Nyɔsoa-a Sùù bo ɛ̀ mu̍ nǐ nu̍ ɔ̍ iě mɔ̀ dlǔ po̍.”
Jusu-a nǐ dlǔ po̍-ɛ ke i̍ tɛ̀n-ɛ
(Matio 3.13–4.11; Luu 3.21-22; 4.1-13)
9Dǒ ti̍ laa̍ di̍i̍ bo Jusu sɔ-ɛ dǒ Naaslɔɛ wlɔ̀ di̍i̍ dě Kaladii fɔɔ, wɛ̀ ɔ̍ ji̍. Iě Chɔɔn po̍ ɔ̍ nǐ dlǔ dǒ Jɔɔdɛn nǐ kɛ̍n. 10Ɔ̍ naɛ àn sɔ dǒ niɔ̍ ka-ɛ, ɔ̍ jě ja̍u̍n ɛ̍ pɔ̀ni wɔ̍i̍n, wɛ̀ Sùù-a ji̍ wlù dǒ ɔ̍ we̍ ka gbɔ̀lǐh-ɛ. 11Dǒ wlu̍ sɔ-ɛ dě ja̍i̍wlɔ̀, ɛ̍ la̍a̍, “Mɔ̀ ǎn tìh kma Jǔ, ǎn wlùh tè i̍ dǒ ìn we̍.”
12Dǒ tàdùè laa̍ Sùù nu̍ ɛ̍ iě ɔ̍ mu̍ dě kwlǎslò we̍. 13Dě ɔ̍ nɛ dǒ wǐh-a kwela nyìɛ̍ di̍i̍, dě kwlǎ nmi̍i̍ nynɛ̌. Wɛ̀ Setɔn-a pɔ̀n ɔ̍ iě blu̍ja̍a̍ gbǎ. Jɛ Nyɔsoa-a ǐnchɔ̀ ji̍-i, iě i̍h gbǎ ɔ̍ we̍.
Jusu dǎ ɔ̍ kòà-a sàǐtòò naɛ
(Matio 4.12-22; Luu 4.14-15; 5.1-11)
14Ti̍ u̍h po̍-a Chɔɔn kasoo-ɛ, dǒ ti̍ laa̍ di̍i̍ bo Jusu mu̍-i Kaladii fɔɔ, iě ɔ̍ bla̍ Nyɔsoa-a pɔ̀n chɛ̀-a tìh we̍i̍. 15Ɔ̍ la̍a̍, “Nyɔsoa-a kmɔ̌ wlu̍ i̍ kɔn-ɛ ti̍ kɔǎn we̍ wɛ̀. Mɔ̀ bǐi i̍, mɔ̀ iě pɔ̀n chɛ̀ la tìh chɛ̀ po̍.”
16Ti̍ Jusu-a naɛ-a pɛ̍nu̍ klaa nɛ-a dě Kaladii-ɛ wɔ̍i̍n-ɛ, dǒ ɔ̍ jě-e smìi̍ dbǎ nyɔ̍ sɔɔ̌n, Samo ke ɔ̍ de̍di̍i̍ Andlu. Nɛ̀ u̍h-a fìle sɔ̍ dǒ niɔ̍. 17Jusu la̍a̍, “Mɔ̀ gbǎ dǒ ǐn de̍e̍, ǎn mu̍ ɛ̍ nu̍ ka mɔ̀-a nu̍-a smìi̍ wlɔ̀ ja-ɛ, mɔ̀ iě laǎn nyɔ̍ Nyɔsoa we̍ ja-a nu̍ ke.” 18Dǒ tàdùè laa̍ u̍h si̍e̍ u̍h-a sɔ̍ᵻ, iě u̍h gbǎ dǒ ɔ̍ de̍e̍.
19Ɔ̍ klɛɛn-a dǒ nya̍ wɛɛ-ɛ, iě ɔ̍ jě de̍di̍i̍ᵻ sɔɔ̌n duuh, Chiin ke Chɔɔn. Sɛɛbedii-a nynuu̍ bo. Nɛ̀ u̍h nɛ dě blǎgbè di̍i̍ u̍h-a po̍ u̍h-a sɔ̍ᵻ gba̍a̍. 20Dǒ ɔ̍ nyna ɔ̍ dǎ u̍h, wɛ̀ u̍h si̍e̍ u̍h baa Sɛɛbedii ke ɔ̍ dbo̍ we̍ nui nyɔ̍ dě blǎgbè di̍i̍, iě u̍h gbǎ dǒ Jusu de̍e̍.
Jusu nu̍ jeědih i̍
(Luu 4.31-37)
21Wɛ̀ u̍h mu̍ dǒ Kepanium wlɔ̀ di̍i̍. Ɛ̍ nu̍-a wlè-weɛ̍-ɛ, iě Jusu mu̍ dě Juu nyɔ̍-a wɛɛ sà gbò sɔ̀n, wɛ̀ ɔ̍ tè nyɔ̍ nǎ po̍-ɛ gbɔ̀. 22Sɔ ɔ̍ nǎ po̍-ɛ wlǔh i̍ nyɔ̍ nɛ-a doǒ-ɛ de̍e̍. Dɛ̍nu̍ɛ, ɔ̍ se̍ u̍h-a telě nǎ poe nyɔ̍ wɔ̀. Jɛ ɔ̍ nǎ poe-ɛ blě tùn.
23Kli-a ka-a, nɛ̀ jɔ̍gbau ɔ̀ blě-a jeědih dǒ ɔ̍ de̍e̍-ɛ, nɛ̀ ɔ̍ wlǔh tà wɛ̀ dě u̍h we̍ wɛɛ sà gbò sɔ̀n. Iě ɔ̍ wǐ, 24ɔ̍ la̍a̍, “Naaslɔɛ-a Jusu, ka àn pɔ̀n ìè à tìh nu̍ ɛ? Ìn ji̍-i ìè àɔ̀ gbɔ̀lɔ ae? Ǐn juo m̀, mɔ̀ bo ɔ̀ nu̍ Nɛi̍ Wɛ̀ Nyɔ̍ ɔ̀ sɔ dě Nyɔsoa we̍.”
25Wɛ̀ Jusu po̍ jeědih laa̍ bɔ̌ i̍, ɔ̍ la̍a̍, “Nɛ klìi̍, nɛ̀ ìn sɔ dǒ jɔ̍gbau la de̍e̍.”
26Wɛ̀ ɛ̍ sǐ jɔ̍gbau, iě ɛ̍ plǎn, wɛ̀ ɛ̍ sɔ dǒ ɔ̍ de̍e̍. 27Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h-a tèle-e we̍ i̍. U̍h la̍a̍, “Ne̍o, ɔ̍ naɛ nyɔ̍ nǎ po̍-ɛ nɛ dǒ dɔɔ̌, iě ɛ̍ nɛ gbǐh de̍e̍. Pò ɔ̍ wlu dě jeědih we̍-a chɛ̀-ɛ, nɛ̀ i̍h-a nu̍ ɔ̍ wlu̍ ke wa.”
28Sɔ ɛ̍ nu̍ ɛ̍ Jusu-a pɔ̀n sɛ̍ i̍ suei̍ dě Kaladii fɔɔ kli̍hgbɛ̍.
Jusu pǔh-i nyɔ̍ dɔu
(Matio 8.14-17; Luu 4.38-41)
29U̍h sɔ-a dě wɛɛ sà gbò sɔ̀n-ɛ, wɛ̀ Jusu ke Chiin ke Chɔɔn gbɛ̍n Samo ke Andlu blǐ gbò wìè kɛ̍n i̍. 30Nɛ̀ gbèwè gbɛ̍n Samo-a bila̍ nynɔ̌ ɔ̍ pɛ̌n i̍ dǒ klìɔ̀ kɛ̍n. Jusu naɛ àn pa̍ gbò ka-a, nɛ̀ u̍h-a sèàɛ̍ ɔ̍ wlùh ɔ̍ tìh. 31Wɛ̀ Jusu mu̍ dǒ ɔ̍ we̍, iě ɔ̍ gbɛ̍n ɔ̍ sɔ̍n i̍, wɛ̀ ɔ̍ dǔ ɔ̍ ja̍i̍. Iě ɔ̍ gbèwè bɔ̌. Wɛ̀ nynɔ̌-a chɛ̀ nu̍ u̍h-a dɛ̍i̍.
32Ɛ̍ nu̍ wìe̍we̍, nɛ̀ dě nyɔ̍ kɔnɔᵻ mlǎᵻá gbe la̍ i̍, wɛ̀ nyɔ̍gbei ja poa-nyɔ̍ kli̍hgbɛ̍ ke jeědih-a de̍e̍ nɛ nyɔ̍ dǒ Jusu we̍. 33Iě wlɔ̀ kli̍hgbɛ̍ wɛ̀ de̍ dǒ gbò-a chɛ̀ wɔ̍i̍n. 34Iě Jusu pǔh-i wɛ̌ kaɛn kaɛn-a nu̍ nyɔ̍. Wɛ̀ ɔ̍ sà nyɔ̍ jeědih dɔu de̍e̍ i̍. Jɛ ɔ̍-ɔ wɔ̌n jeědih-i wlu, dɛ̍nu̍ɛ, i̍h juo ɔ̍-ɛ.
Jusu chɛn gbɔ̍i̍ ɔ̍ ba̍le
(Luu 4.42-44)
35Ɛ̍ nu̍ sɔ̀n wɔ̍i̍n iě Jusu sɔ bloɔ̍, wɛ̀ ɔ̍ sǐ sɔ̀n. Iě ɔ̍ sɔ dǒ wlɔ̀, wɛ̀ ɔ̍ chɛn-ɛ ɔ̍ chɛ̀ gbɔ̍i̍, dě ɔ̍ ba̍le-e Nyɔsoa. 36Wɛ̀ Samo ke ɔ̍ ba̍ᵻ mu̍ ɔ̍ i̍ pɔ̀n la̍. 37Ti̍ u̍h jě-a ɔ̍-ɛ, wɛ̀ u̍h la̍a̍, “Nyɔ̍ kli̍hgbɛ̍-a pɔ̀n ìn i̍ wa.”
38Wɛ̀ ɔ̍ sà u̍h-a wlu̍ pɔ̀n we̍. Ɔ̍ la̍a̍, “Mɔ̀ à mu̍ dě wlɔ̀ᵻ diih di̍i̍ iě tìh bla̍ ke dě u̍h we̍. Ɛ̍ kɔn tìh bo ǐn ji̍.”
39Wɛ̀ ɔ̍ na Kaladii bloa̍ kli̍hgbɛ̍ we̍, ɔ̍ bla̍ Nyɔsoa tìh dě u̍h-a wɛɛ sà gbòᵻ sɔ̀n i̍. Wɛ̀ ɔ̍ sà nyɔ̍ɔ jeědih de̍e̍ i̍ ke.
Jusu bɔ̌ɛ wìèìdih
(Matio 8.1-4; Luu 5.12-16)
40Jɔ̍gbau ɔ̀ wìèìdih-a nu̍-aɛ, ɔ̍ ji̍ dǒ Jusu we̍. Iě ɔ̍ chlìi i̍ dǒ ɔ̍ jǔ, ɔ̍ la̍a̍, “Nyɔ̍ klaa, pò ìn wɔ̌ɛn ɛ̍-ɛ, nɛ̀ ìn bɛ̌ɛ ɛ̍ nu̍-ɛ iě fɛ̍nɛ wa.”
41Sɔ ɛ̍ po̍ Jusu wɔɛ kaa̍, wɛ̀ ɔ̍ slɛ̌ɛ sɔ̍n i̍ iě ɔ̍ tǔh ɔ̍ i̍. Ɔ̍ la̍a̍, “Ǐn wɔ̌ɛn ɛ̍-ɛ, fɛ̍nɛ dode̍.” 42Dǒ tàdùè laa̍ ɔ̍ wìèìdih bɔ̌-ɛ. 43Wɛ̀ Jusu la̍a̍, “Sɔ-ɔ ìè mu̍.” Wɛ̀ ɔ̍ gbɛ̍n-ɛ jɔ̍gbau laa̍ wɔ̍i̍n, ɔ̍ la̍a̍, 44“Bɔ̌ nyɔ̍-o-nyɔ̍ wlùh sèàɛ̍, jɛ mu̍ ìè àn chɛ̀ Nyɔsoa-a slaǎ sà nyɔ̍ i̍ to. Nɛ̀ ìn sà slaǎ ɛ̀ Mose-a telě la̍ nyɔ̍ iě-a nu̍-ɛ, ɛ̍ iě ɛ̍ to dě nyɔ̍ kli̍hgbɛ̍ we̍ ka ìn fɛ̍nɛ-aɛ.”
45Jɛ ɔ̍ mu̍-aɛ, iě ɔ̍ sèàɛ̍ nyɔ̍ kli̍hgbɛ̍ wlùh, iě pɔ̀n laa̍ ɛ̍ sɛ̍ i̍. Sɔ ɛ̍ nu̍ ɛ̍ Jusu-u nyɛ-ɛ ɔ̍ chɛ̀ i̍ dɛ wlɔ̀ᵻ di̍i̍ i̍. Jɛ nɛ̀ tà nɛ̌-a i̍-ɛ bo ɔ̍ nɛ la̍ sǔh. Nɛ̀ kǎ nyɔ̍gbei-a sɔ di̍i̍h i̍ u̍h-a mu̍ dě ɔ̍ we̍.
Tans Gekies:
Maɛ 1: KDNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The New Testament in Western Krahn published as KU̍O̍ DELEE © The Bible Society in Liberia, 1999.
