Matio 22
22
Nynɔ̌ jla̍ ja peě-a nɛnǎ
(Luu 14.15-24)
1Wɛ̀ Jusu wlu u̍h we̍ dɛ dě nɛnǎᵻ di̍i̍. 2Ɔ̍ la̍a̍, “Kǎ Nyɔsoa-a kmɔ̌ wlu̍ i̍ kɔn-ɛ nu̍ ka nɛ-ɛ. Ɛ̍ wɔ̀ blǔh baa due ɔ̀ po̍-a dɛ̍ᵻ gba̍a̍-ɛ. Wɛ̀ ɔ̍ iě ɔ̍ jǔ jɔ̍gbau-a nynɔ̌ jla̍ ja peě tù. 3Wɛ̀ ɔ̍ dbo̍ ɔ̍ pòi̍nynuu̍ u̍h iě nyɔ̍ ɔ̍ dǎ-a dǒ peě laa̍ kɛ̍n-ɛ wlùh sèàɛ̍ u̍h iě ji̍. Jɛ u̍h la̍ u̍h se̍ ji̍ mu̍. 4Wɛ̀ ɔ̍ dbo̍ ɔ̍ pòi̍nynuu̍ duuh dɛ, ɔ̍ la̍a̍, ‘Nyɔ̍ ǐn dǎ-a peě la kɛ̍n-ɛ, mɔ̀ sèàɛ̍ u̍h wlùh u̍h iě ji̍, di̍-dɛ̍ᵻ wɛ̀ i̍ wɛ̀. Ǐn dbǎ ǎn chlǎn bliᵻ bei ke i̍h-a nynuu̍ wɛ̀, dɛ̍ᵻ kli̍hgbɛ̍ gbǎ gba̍a̍ wɛ̀. U̍h ji̍ à iě peě la tù.’ 5Jɛ u̍h se̍ ɔ̍ pòi̍nynuu̍ dounᵻ we̍ po̍. Tà jɔ kɔn-ɛ, nɛ̀ ɔ̍ mu̍-o. Due mu̍ dě ɔ̍ blǐ klè, dɔɔ mu̍ dě ɔ̍ dɛ̍ ple̍ gbò sɔ̀n. 6Wɛ̀ duuh gbɛ̍n pòi̍nynuu̍ laa̍. Iě u̍h nu̍ u̍h kà i̍, wɛ̀ u̍h dbǎ u̍h. 7Sɔ blǔh baa laa̍ ɔ̍ sɔ̀n-ɛ dǒ jlu̍h we̍. Wɛ̀ ɔ̍ dbo̍ ɔ̍ fledlǔ, iě u̍h dbǎ ùh-a poe-a nyɔ̍ gbe̍ja̍a̍-ɛ, wɛ̀ u̍h fɔ̍n u̍h-a tùgbàwlɔ̀. 8Wɛ̀ ɔ̍ la̍a̍ dě ɔ̍ pòi̍nynuu̍ duuh we̍, ‘Nynɔ̌ peě la ɛ̍ ti̍ nyni̍ wɛ̀. Jɛ nyɔ̍ ǐn dbo̍-a wlu̍ we̍ i̍-ɛ, u̍h se̍ ɛ̍ ka̍ nɛ. 9Mɔ̀ mu̍ dě wlɔ̀gbàɛ̀, juh mɔ̀ jě-ɛ, mɔ̀ dǎ u̍h, u̍h iě peě la kɛ̍n ji̍.’ 10Iě ɔ̍ pòi̍nynuu̍ mu̍ dě wlɔ̀gbàɛ̀, wɛ̀ u̍h po̍ nyɔ̍ chɛ̀ ke nyɔ̍ sɔ̀ɛ̀n kli̍hgbɛ̍ u̍h jě-aɛ tàdùè. Sɔ peě tù-i gbò-a chɛ̀ jǐ-i dǒ dihwi̍hᵻ we̍.
11“Jɛ ti̍ blǔh baa ji̍-a dihwi̍hᵻá chɛ̀ jě la̍-ɛ, dǒ ɔ̍ jě-e jɔ̍gbau due dě u̍h nynɛ̌, nɛ̀ ɔ̍ se̍ nynɔ̌ jla̍ ja jlii̍-i pa̍. 12Wɛ̀ ɔ̍ tèle ɔ̍ i̍, ɔ̍ la̍a̍, ‘Jɔ̍gbau chɛ̀, ìn se̍-a nynɔ̌ jla̍ ja jlii̍-i pa̍-ɛ, ka ìn nu̍ wɛ̀ ìn pa̍ gbò ɛ?’ Jɛ jɔ̍gbau se̍ wɔ̍n-a fuɛn nu̍. 13Wɛ̀ blǔh baa la̍a̍ dě ɔ̍ pòi̍nynuu̍ we̍, ‘Mɔ̀ sa̍n ɔ̍ bu̍hᵻ ke ɔ̍ sɔ̍nᵻ. Nɛ̀ mɔ̀ po̍ ɔ̍ sɔ̀n dě kwile. Dě ɔ̍ mu̍ fìn-i, ɔ̍ iě nynɛ̌ di̍ kìàǎnkìàǎn.’
14“Dɛ̍nu̍ɛ, nyɔ̍ dɔu dǎ-ɛ de, jɛ jɔ̌ wei bo ùh tba̍-ɛ chèɛ̀.”
Nyɔ̍ bo ɔ̀ iě taa̍sìh sà ɛ?
(Maɛ 12.13-17; Luu 20.20-26)
15Wɛ̀ Fɛlesii nyɔ̍ dbǎ wlu̍ i̍, iě u̍h mu̍ u̍h iě Jusu dǒ ɔ̍ chɛ̀-a wlu̍ kɛ̍n gbɛ̍n-ɛ. 16Iě u̍h dbo̍ u̍h-a kòà ke nyɔ̍ sɔ-a dě blǔh baa Ɛlo naɛ gbɔ̀ù di̍i̍-ɛ dě Jusu we̍. U̍h la̍a̍, “Dlǔtu, à juo ɛ̍-ɛ mɔ̀ bo ɔ̀ sà tìh-a taǐn, dɛ̍nu̍ɛ, nɛ̀ gbǎ nyɔ̍-a wlu̍ we̍, iě nɛ̀ ple̍ nyɔ̍-a jua̍a̍ jǔ ke. Jɛ tìh-a taǐn bo àn poe nyɔ̍ nǎ dǒ Nyɔsoa dɛ we̍. 17Ɛ̍ tìh-ɛ, sèàɛ̍ à wlùh, à telě sà à wlu̍ kɛ̍n à iě taa̍sìh sà dě Wloma nyɔ̍-a Bloa̍ Joi we̍ ɛɛ, àe̍e̍ ɛ̍ se̍ à wlu̍ kɛ̍n sà ae? Ka ɛ̍ nɛ ke dě ìn wlùh we̍ ɛ?”
18Jɛ dɛ̍ sɔ̀n u̍h pu̍e̍e-aɛ, ɔ̍ juo ɛ̍ i̍. Wɛ̀ ɔ̍ la̍a̍, “Mɔ̀-ɔ la ùh nɛ-a mɛɔ sɔɔ̌n wɔ̍ɔ̍n-ɛ, dɛ̍nu̍ mɔ̀-a pɔ̀n ǎn gbɛ̍n-ɛ la̍ i̍ ɛ? 19Wliɛ̍-a chɛ̀ mɔ̀-a sà-ɛa taa̍sìh-ɛ, mɔ̀ ja ɛ̍ iě ɛ̍ jě.”
Wɛ̀ u̍h ja ɛ̍ ɔ̍. 20Iě ɔ̍ tèle u̍h i̍, ɔ̍ la̍a̍, “Nyɔ̍ kɔn dlǔ ke nynɛ̌ bo ìh nɛ da̍a ɛ̍ kɛ̍n ɛ?”
21U̍h la̍a̍, “Bloa̍ Joi bo.”
Wɛ̀ ɔ̍ la̍a̍ dě u̍h we̍, “Dɛ̍ ɛ̀ kɔn-a dǒ Bloa̍ Joi we̍-ɛ, nɛ̀ mɔ̀ nyǐ ɛ̍ Bloa̍ Joi. Nɛ̀ dɛ̍ ɛ̀ kɔn-a dǒ Nyɔsoa we̍-ɛ, mɔ̀ nyǐ ɛ̍ Nyɔsoa.”
22U̍h wɔ̌n-a ɔ̍ wlu̍ la-ɛ, sɔ ɛ̍ wlǔh i̍ u̍h de̍e̍. Iě u̍h sɔ dǒ ɔ̍ we̍-e u̍h mu̍.
Sadiusii tèle Jusu i̍ dǒ-e wlǔh dɛ we̍
(Maɛ 12.18-27; Luu 20.27-40)
23Dǒ weɛ̍ due laa̍ di̍i̍ wɛ̀ Sadiusii nyɔ̍ ùh la̍ nyɔ̍ se̍-ae wlǔh mu̍ dode̍-ɛ, u̍h ji̍ Jusu i̍ tèle la̍. 24U̍h la̍a̍, “Dlǔtu, Mose-a telě la̍ pò jɔ̍gbau blě nynɔ̌ iě u̍h se̍ jǔ wlǔh-i wɛ̀ ɔ̍ iě mɛ̌-ɛ, nɛ̀ ɔ̍ de̍di̍i̍ kɔn ɔ̍ iě nynɔ̌ laa̍ blě, wɛ̀ u̍h iě nynuu̍ wlǔh-i dǒ ɔ̍ de̍di̍i̍ mɛ̌-aɛ we̍. 25Nɛ̀ɛ̍ à blě de̍di̍i̍ᵻ jɔ̍gbauᵻ mɛ̀sɔɔ̌n nɔ̌ à nynɛ̌. Wɛ̀ klaa naɛ blě nynɔ̌, jɛ u̍h se̍ jǔ wlǔh-i iě ɔ̍ mɛ̌. Ɛ̍ kɔn ɔ̍ de̍di̍i̍ blě nynɔ̌ laa̍. 26Ɛ̀ due laa̍ bo ɛ̀ nɛ sɔɔ̌n naɛ jii̍. Wɛ̀ ɛ̍ nu̍ ɛ̍ ta̍a̍n naɛ jii̍. Kǎ ɛ̍ nu̍ te̍e̍ wɛ̀ ɛ̍ nyni̍ dě mɛ̀sɔɔ̌n naɛ we̍. 27Ɛ̍ se̍-o siee, nynɔ̌-a chɛ̀ mɛ̌-ɛ. 28Nɛ̀ɛ̍, ka ɔ̍ dǔ-a u̍h nɛ-a mɛ̀sɔɔ̌n-ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ nyɔ̍ kɔn nynɔ̌ ɔ̍ mu̍ nu̍ gbe̍i̍n ɛ?”
29Wɛ̀ Jusu la̍a̍, “Dɛ̍ mɔ̀-a bla̍-aɛ, ɛ̍ se̍-o wìè-i nɛ, jɛ mɔ̀ se̍ Nyɔsoa-a wlu̍ ke ɔ̍ gbǐh juo dɛbo. 30Dɛ̍nu̍ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ u̍h-a mu̍ Nyɔsoa-a ǐnchɔ̀ wɔ̀ dě ja̍i̍wlɔ̀, u̍h se̍ blǐ tǐn-i mu̍. 31Ɛ̀ tba̍-a dǒ mɛ̌-nyɔ̍-ae wlǔh dɛ pùn i̍-ɛ, dɛ̍ ɛ̀ Nyɔsoa bla̍-a dě mɔ̀ we̍-ɛ, mɔ̀-ɔ se̍a ɛ̍ slè ae? 32Ɔ̍ la̍a̍, ‘Mɔ̍ Eblaɛɛn ke, Ase ke Jekɔ-a Nyɔsoa.’ Ɔ̍ se̍ Nyɔsoa dǒ mɛ̌-nyɔ̍ we̍. Jɛ ɔ̍-ɔ Nyɔsoa dǒ kmɔ̌ i̍ tè nyɔ̍ we̍.”
33Ti̍ nyɔ̍ tlùgbei̍ wɔ̌n-a wlu̍ la-ɛ, sɔ ɔ̍ nyɔ̍ nǎ po̍-ɛ wlǔh i̍ u̍h de̍e̍.
Telě-a klaa naɛ
(Maɛ 12.28-34; Luu 10.25-28)
34Ti̍ Fɛlesii nyɔ̍ wɔ̌n-a i̍h ka Jusu sà-a Sadiusii nyɔ̍-a wɔ̍n klèɛ̍-ɛ, wɛ̀ u̍h gbòe i̍. 35U̍h-a due ɔ̀ juo-a telě kaa̍-ɛ, iě ɔ̍ ji̍ ɔ̍ iě Jusu dǒ ɔ̍ chɛ̀-a wlu̍ kɛ̍n gbɛ̍n-ɛ. 36Ɔ̍ la̍a̍, “Dlǔtu, Nyɔsoa-a telě jɛwe̍ bo ɛ̀ ku̍ wɔ̍n ɛ?”
37Wɛ̀ Jusu la̍a̍, “ ‘Jbɛɛ àn Joi Nyɔsoa-a dǒ àn pɔluh kli̍hgbɛ̍ we̍, dǒ àn kmɔ̌ kli̍hgbɛ̍ we̍, ɛ̍ ke àn wlùh kli̍hgbɛ̍ ke.’ 38Ɛ̀ la bo ɛ̀ nu̍ sàǐtòò telě iě ɛ̍ gbǎ dɛ̍kɛ̍n ɛ̍ sìì ɛ̍ ba̍ᵻ kli̍hgbɛ̍. 39Nɛ̀ ɛ̀ po̍-a sɔɔ̌n-ɛ, ɛ̍ ke ɛ̍ wɔ̀ɛ-ɛ. Ɛ̍ la̍a̍, ‘Jbɛɛ ìn pònyɔ̍-ɔ ka àn chɛ̀-ɛ.’ 40Telě sɔɔ̌n la i̍h bo Mose-a telě ke Nyɔsoa-a tu̍owli po̍ nyɔ̍-a nǎ po̍-ɛ kli̍hgbɛ̍ pèle i̍.”
Nyɔsoa-a Chèɛ̀ Tba̍ju la, nyɔ̍ kɔn jǔ bo ɛ?
(Maɛ 12.35-37; Luu 20.41-44)
41Ti̍ Fɛlesii nyɔ̍ gbǎ-a tàdùè-ɛ, wɛ̀ Jusu tèle u̍h i̍. 42Ɔ̍ la̍a̍, “Dɛ̍ bo ɛ̀ nu̍ mɔ̀ naɛ flɔ̍nwlùh ke dǒ Nyɔsoa-a Chèɛ̀ Tba̍ju la we̍ ɛ? Nyɔ̍ kɔn tloemlai bo ɛ?”
U̍h la̍a̍, “Depe-a tloemlai bo.”
43Wɛ̀ ɔ̍ la̍a̍ dě u̍h we̍, “Wɛ̀ dɛ̍nu̍ Sùù po̍ Depe wlu̍ wɔ̍ɔ̍n, wɛ̀ ɔ̍ dǎɛ ɔ̍ Joi ɛ? Dɛ̍nu̍ɛ, Depe la̍a̍,
44‘Joi la̍a̍ dě ǎn Joi we̍,
Tè i̍ da̍a ǎn di̍na̍ we̍ te̍e̍
iě ɛ̍ nu̍ ìè àn nyɛ̌-nyɔ̍ kɛ̍n i̍ na.’
45Nɛ̀ pò Depe-a chɛ̀ dǎɛ ɔ̍ Joi-ɛ, nɛ̀ dɛ̍ bo ɛ̀ nu̍ ɔ̍ Depe-a tloemlai we̍i̍ ɛ?”
46Sɔ u̍h-a nyɔ̍ se̍ wɔ̍n pɔ̀ni-ɛ bɛ̌ɛ ɔ̍ iě ɔ̍ wlu̍ pɔ̀n we̍ sà. Sɔ dǒ weɛ̍ laa̍ di̍i̍-ɛ, nyɔ̍ se̍ ɔ̍ dɛ̍ i̍ tèle-ɛ bɛ̌ɛ dɛ.
Tans Gekies:
Matio 22: KDNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The New Testament in Western Krahn published as KU̍O̍ DELEE © The Bible Society in Liberia, 1999.
