Ntandiliko 46
46
Yakobo, yani Isilaeli àhwena ku Misili
1Bahi Isilaeli nkutandilika mwanda akuno anyakwìlè dimali dyake dyammalele. Pahwikile ku Beli-Sheba, nkunhumija sadaka Nnungu wa Isaka, atatake. 2Chilo uchila, Nnungu nkulonjela na Isilaeli muindoto, nkuchema wachidoni, “Yakobo! Yakobo!” Yakobo nkuyambukila, “Nangu apano!” 3Nnungu nkunnyaulila kuchidoni, “Nangu ni Nnungu, Nnungu wa atatako. Unayope kuhwena ku Misili. Paumbekuva aneko, nangu nìmbevatenda vanu va nnukolo lwako kuva chilambo chikulungwa. 4Nangu nimwene nguchinguhwene pamo na wako aneko ku Misili, na kukuuiha akuno. Na paumbehila, mwanalo Yusufu àmbekuva upopo na nkono wake njo umbekuhunîka meho lako.”
5Bahi Yakobo nkuuka ku Beli-Sheba. Vana vake nkunnyakula atatawao na vana vao na ajavao mmikokoteni yanahumije Falao uchinga vakannyakule Yakobo. 6Uchocho, vávanyakulenge anyama vao na dimali dyammalele divanapete nchilambo cha ku Kanaani, nkuhweneng'ana ku Misili, Yakobo chalumo na vanu vammalele va nnukolo lwake, 7vana vake na adukulu vake, vammalele nkuhwena navo ku Misili.
8Alano njo malina la vanu va nnukolo lwanga Isilaeli, yani Yakobo vanapite ku Misili pamo nanang'e.
Lubeni, mwanawe ntandi kuvelekwa wachilume, 9pamo na vana vake vachilume, yani Hanoki na Palu na Heziloni nawi Kalimi.
10Simeoni pamo na vana vake vachilume, yani Yemueli na Yamini na Ohadi na Yakini na Sohali na Shauli, anavelekwejije na mmahe Nkanaani.
11Lawi pamo na vana vake vachilume, yani Gelishoni na Kohasi na Melali.
12Yuda pamo na vana vake vachilume, yani Eli na Onani na Shela na Pelesi na Zela. (Henga Eli na Onani váhilidile kuchilambo cha ku Kanaani). Na vana vanga Pelesi nni Heziloni na Hamuli.
13Isakali pamo na vana vake vachilume, yani Tola na Puva na Yashubu na Shimiloni.
14Zabuloni pamo na vana vake vachilume, yani Seledi na Eloni na Yaleli.
15Anevo njo vana vachilume vanga Leya vanammelekedile Yakobo aneko ku Padani-Alamu, pamo na Dina mwali wake. Na jumula ya vana vake vachilume na vachikongwe na adukuluvake vávele salasini na tatu.
16Gadi pamo na vana vake vachilume, yani Sefoni na Hagi na Shuni na Eziboni na Eli na Alodi na Aleli.
17Asheli pamo na vana vake vachilume, yani Imna na Ishiva na Ishivi na Beliya na Sela, nnumbwao. Na vana vanga Beliya nni Hebeli na Malukieli.
18Anevo njo vana na adukuluvake Zilipa, vana vanammelekedile Yakobo. Zilipa ávele ntumishi wanga Leya wananhumije Labani kumwing'a Leya, mwali wake. Na jumula ya anevo vanu ívele kumi na sita.
19Na vana vanga Laheli vachilume, n'jawe Yakobo nni Yusufu na Benjamini.
20Na vana vanga Yusufu vachilume vanavelekwejije aneko ku Misili nni, Manase na Efulaimu. Anevo vana, Yusufu ávaveleke na mmahe yumo uvanchema Asenasi mwali wanga Potifela, anavele kuhani wa imanga ya Oni.
21Benjamini pamo na vana vake vachilume, yani Bela na Bekeli na Ashibeli na Gela na Naamani na Ehi na Loshi na Mupimu na Hupimu na Alidi.
22Anevo vanu kumi na nne nni vana na adukuluvake Yakobo vammelekedîle Laheli, n'jawe.
23Dani pamo na mwanawe wachilume uvanchema Hushimu.
24Nafutali pamo na vana vake vachilume, yani Yaseli na Guni na Yeseli na Shilemu.
25Anevo vanu saba ni vana vake na adukuluvake Yakobo vammelekedîle Biliha, ntumishi wananhumije Labani kumwing'a Laheli, mwali wake.
26Jumula ya vana na adukuluvake Yakobo vanapite navo ku Misili, bila kuvavalangila amahe va anavake, yavele vanu sitini na sita. 27Na aneko ku Misili Yusufu ávaveleke vana vavili. Bahi pamo na vana vavili vavaveleke Yusufu aneko ku Misili, jumula ya vanu va nnukolo lwanga Yakobo vanainjidile nchilambo cha Misili vávele vanu sabini.
Yakobo àhwika ku Misili
28Bahi Yakobo nkuntuma Yuda ahwene kwanga Yusufu uchinga akannyuwe vakojane aneko ku Gosheni. Pavahwikile kueneo lya ku Gosheni, 29Yusufu nkukwela munkokoteni wake uutângwa na falasi, nkuhwena unampwechela Isilaeli atatake, aneko ku Gosheni. Pammwikidile atatake, nkunkumbatila, nkukuta kwa uhiku nnehu. 30Isilaeli nkunnyaulila Yusufu kuchidoni, “Ata kunguhwa vino, wala nanga chinu kwa kuva ǹnikwona na kumala kuva umwomi!” 31Yusufu nkuvahaulila akuluvake na vanu vammalele va nng'ande mwa atatake kuchidoni, “Nangu ngùhwena unannyaulila Falao kuchidoni, ‘Akuluvangu na vanu va nng'ande mwa atatangu vanavele nchilambo cha ku Kanaani vàninguidila. 32Vanu anevo nni vachunga, na vàidile na angandolo vao na ambudi vao na dimali dyavo dyammalele.’ 33Bahi nfalume pambenchemanga na kummujanga kuva, ‘Mwenu mùkola madengo ntwani?’ 34mwenu nnyang'ule kuva, ‘Nkulu, hwetu tuvatumishi vako, hwetu nni tuvachunga kutandikila ujoko wetu mpaka nelo, kwa kuva njo chivanavele anakuluvetu.’ Tangola uchocho uchinga Falao annuhusu mwenu kuikala eneo lya ku Gosheni.” Yusufu átangwele uchocho ing'anya munu woheyo achûnga anyama, Vamisili vàmmalangila kuva najisi.”
Tans Gekies:
Ntandiliko 46: Chimakonde
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020 Pioneer Bible Translators
