Ntandiliko 45
45
Yusufu àlitambuliha kwa akuluvake
1Anepo Yusufu nanga panahulwile kulikamulanga muyo mwa vatumishi vake vammalele vanavele pamo na nang'e, nkunonoha lidi wavahaulila vatumishi anevo kuchidoni, “Mmanu mmammalele humananga pawelu!” Pavahumanenge pawelu, nanga munu woheyo anapwawije nng'ande uhiku aula wachilitambuliha Yusufu kwa akuluvake. 2Yusufu nkunonoha lidi wakuta, na Vamisili vánimpilikana pachikuta. Na vanu va mwing'ande yanga Falao navanang'o vánipilikana habali anedyo. 3Yusufu nkuvahaulila akuluvake kuchidoni, “Nangu njo Yusufu! Dachi, atatangu àvele chihi nkulama?” Henga akuluvake nkuhemwa namene kumwona Yusufu muyo mwavo, mpaka nanga pavanahulwile kuyang'ula. 4Yusufu nkuvahaulila akuluvake kuchidoni, “Chonde, hengelekela pepi na nangu.” Pavahengelekedile, nkuvahaulila kuchidoni, “Nangu njo nnung'unwenu Yusufu, umunansumisije kwa vanu vachihwena ku Misili! 5Henga vino munayuvale na wala munalyambe kwa kungusumisa akuno. Nnungu njo angupelekejîje ninnongolelange mwenu uchinga nguupohe umi wa vanu. 6Achino nni chaka chihi chavili cha indala nchilambo, henga pàvele vyaka vinji nnyano viîda, vanu vakambehulula kulima wala kufuna. 7Nnungu áningulongoleja akuno uchinga kwa namuna ikee ya kawaida ngupate kulapoha maisha lenu na maisha la vanu va n'ding'olo dyetu, na kuvatenda vanu vohe namene vanahwe na indala. 8Bahi akee mwenu mungupelekejîje akuno, ila nni Nnungu. Nang'e njo angutendîle nangu kuva nkúhumya ding'ano kwanga Falao, nkwímilila wa ing'ande yake yammalele na ntawala wa chilambo chammalele cha Misili. 9Bahi tendanga upehi muhwene kwa atatangu mukannyaulile kuva, ‘Yusufu, mwanalo, àhaula kuchidoni, “Nnungu àngutendile kuva nkulu wa chilambo chammalele cha ku Misili. Hambi, unatime kwida kwang'une. 10Paumbekwida akuno, wako chalumo na vana vako na adukulu vako na makuwa lako la dingandolo na dimbudi na ding'ombe na vyammalele vyuvenavyo, muchimuikale eneo lya Gosheni, pepi na nangu. 11Paumbekuva ku Gosheni, nangu nguchinikuchunge wako na vanu va nng'ande mwako chalumo na anyama vako uchinga munahwe na indala, kwa kuva pàvele vyaka vinji nnyano vya indala vivenkwîda.’ ” 12Yusufu nkuvahaulila akuluvake kuchidoni, “Mwenu mmene mùningwona kwa meho lenu na ata nnung'unwangu Benjamini nanang'e àningwona kwa meho lake kuva, nangu njo nimwene Yusufu ngulonjêla na mwenu. 13Mùlembelewa mukannyaulile atatangu kwamba ukulu wammalele ungupewije akuno ku Misili, na kwamba kila chinu chimuchiwene. Bahi tendanga upehi muide na atatangu akuno.” 14Bahi Yusufu nkunkumbatila Benjamini nnung'une, nkukuta. Benjamini nanang'e nkukuta, akuno vakumbatilènè na nkuluwe. 15Yusufu panavenkukuta, nkuvakumbatila akuluvake na kuvabusu. Anepo njo akuluvake pavahulwile kutangola nawe.
Falao ànkumbula Yakobo, yani Isilaeli aide ku Misili
16Bahi anedyo habali padihwikile kuing'ande yanga Falao, kuva akuluvake Yusufu vànikamola, Falao pamo na maafisa vake nkuhangalala namene. 17Bahi Falao nkunnyaulila Yusufu kuchidoni, “Vahaulile akuluvako vavanyakuje punda misigo yavo, vauye nchilambo cha ku Kanaani, 18vaide na atatawao na alangavao vammalele apano. Nangu nguchiniveng'e eneo lyambone namene lya chilambo achino cha Misili, na aneko vachivahangalalile vilyo vyammalele vyambone namene vya chilambo achino. 19Uchocho, pavambeuka vahaulile vanyakule na mikokoteni ya kuutangwa uchinga vakavapakile vana vao na ajavao na atatawao, koka vaide navo apano. 20Vahaulile vanalipwalele kudileka dimali dyavo ukoko, kwa kuva, eneo lyambone kupunda lammalele nchilambo cha Misili lìmbekuva lyavo.”
21Bahi vana vanga Isilaeli nkutenda muchi chivalaijijwe. Yusufu nkuveng'a mikokoteni kupapatana na chalaijije Falao, na nkuveng'a na chakulya cha nndila. 22Kila munu nkumwing'a dinguwo dyahambi, henga Benjamini nkumwing'a vipande myatatu vya madini la dihela na dinguwo nnyano. 23Na dimali dyanahumije Yusufu kumwing'a atatake nni adino, punda kumi vananyakwile vitukutuku vyambone vya ku Misili, na punda kumi makolo vananyakwile ngano na mikate na vyakulya vinji vya mmwanda wa kuida ku Misili. 24Bahi Yusufu nkulailana na akuluvake. Na pavachiuka nkuvaduma wachidoni, “Munapwatane nndila!”
25Bahi nkuukananga pa Misili, nkuuya kukaya kwa atatawao Yakobo, nchilambo cha ku Kanaani. 26Nkunnyaulila atatawao kuchidoni, “Yusufu mwomi! Nang'e njo ntawala wa chilambo chammalele cha ku Misili!” Anepo atatawao nkuhemwa, kwa kuva nanga panalakulupidile malove lavo. 27Henga pavansimulidile lammalele lavalaijijwe na Yusufu, na payonite mikokoteni yampelekejijije Yusufu kwajili ya kunnyakula, ntima wake nkuhangalala namene . 28Bahi Isilaeli nkuhaula kuchidoni, “Vino nankulupilanga! Muhiu mwanangu Yusufu mwomi! Nìmbehwena nikamwone kabla nikànambikuhwa.”
Tans Gekies:
Ntandiliko 45: Chimakonde
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020 Pioneer Bible Translators
