LUCAS 24

Ang Pagkabanhaw ni Jesus

(Mat. 28:1-10; Mar. 16:1-8; Juan 20:1-10)

1Apang sa nahaunang adlaw sang semana, sa pamanagbanag, nagkadto sila sa lulubngan, nga nagdala sing mga pahumut nga ila naaman. 2Kag nakita nila ang bato nga napaligid gikan sa lulubngan, 3apang sang nakasulud sila wala nila makita ang bangkay [ni Ginoong Jesus]. 4Sang nagpalibog sila nahanungud sini, yari karon, duha ka tawo nagtupad sa ila nga may panapton nga masilaw; 5kag sang hinadlukan sila kag nagdunguk sa duta, nagsiling ang mga tawo sa ila, “Ngaa bala ginapangita ninyo ang buhi sa tunga sang mga patay? [Wala sia diri, kondi nabanhaw]. 6Panumduma kon paano nga nagpamolong sia sa inyo, sang didto pa sia sa Galilea, 7nga ang Anak sang tawo dapat itugyan sa mga kamut sang mga tawong makasasala, kag ilansang sa cruz, kag sa ikatlong adlaw mabanhaw.#Mat. 16:21; 17:22-23; 20:18-19; Mar. 8:31; 9:31; 10:33-34; Luc. 9:22; 18:31-33.” 8Kag nadumduman nila ang iya mga polong, 9kag nagpauli sila gikan sa lulubngan kag nagsugid sini tanan sa napulog isa kag sa tanan nga iban. 10Karon sila amo si Maria Magdalena kag si Juana kag si Maria nga iloy ni Santiago kag ang iban pa nga mga babayi kaupud nila nga nagsugid sini sa mga pinadala; 11apang ining mga polong sa ila panan-aw daw patopato, kag wala nila sila pagpatiha. [ 12Apang si Pedro nagtindug kag nagdalagan sa lulubngan; sang nagakoob kag nagalingling, nakita niya ang mga panapton nga lino lamang; kag nagpauli sia, nga natingala sang nahanabu.]

Sa Dalanon pa Emaus

(Mar. 16:12-13)

13Sa sadto gid nga adlaw duha sa ila nagapakadto sa isa ka minoro nga ginhingalanan Emaus, nga mga pito ka milya ang kalayoon kutub sa Jerusalem, 14kag nagsugilanon sila sini tanan nga butang nga nahanabu. 15Sang nagasugilanon sila kag nagapangkotanay, si Jesus gid nagpalapit kag nagbuylog sa ila. 16Apang ang ila mga mata nakulapan sa bagay nga wala sila makakilala sa iya. 17Kag nagsiling sia sa ila, “Ano bala nga mga sugid ining ginahambalan ninyo sa nagalakat kamo?” Kag nagdolog sila, nga nagakasubu. 18Niyan ang isa sa ila, nga ginhingalanan si Cleofas, nagsabat sa iya, “Ikaw lamang bala ang dumalayon sa Jerusalem nga wala makahibalo sang mga butang nga nahanabu didto sa sining mga adlaw?” 19Kag nagpamangkot sia sa ila, “Ano bala nga mga butang?” Kag nagsabat sila sa iya, “Ang nahanungud kay Jesus nga Nazaretnon, nga manalagna nga gamhanan sa buhat kag sa polong sa atubangan sang Dios kag sang tanan nga katawohan, 20kag kon paano nga gintugyan sia sang puno nga mga sacerdote kag sang amon mga manugdumala agud nga tagudilian sa kamatayon, kag ginlansang sia sa cruz. 21Apang naglaum kami nga sia amo ang matubus sang Israel. Hoo, kag labut pa sini tanan, karon ikatlo na nga adlaw kutub sang pagkahanabu sini. 22Labut pa, ang pila sang mga babayi nga kaupdanan namon nagpayanghag sa amon. Nakakadto sila sa lulubngan sing aga pa 23kag wala nila makita ang bangkay niya; kag nag-abut sila nga nagasiling nga nakakita man sila sing palanan-awon sang mga manugtunda, nga nagsiling nga sia buhi. 24Ang pila sang mga kaupud namon nagkadto sa lulubngan, kag nakita nila ini subong sang ginsiling sang mga babayi; apang sia wala nila makita.” 25Kag nagsiling sia sa ila, “O mga tawo nga buangbuang, kag makuli sing tagiposoon sa pagtoo sa tanan nga napamolong sang mga manalagna! 26Indi bala kinahanglan nga ang Cristo mag-antus sining mga butang kag magsulud sa iya himaya?” 27Kag sumugud kay Moises kag sa tanan nga manalagna, gintalastas niya sa ila sa bug-os nga mga kasulatan ang mga butang nahanungud sa iya kaugalingon.

28Gani naghinamput sila sa minoro nga ginapakadtoan nila. Nagpahayag sia nga daw magapadayon pa, 29apang ginpilit nila sia, nga nagasiling, “Pabilin ka sa amon, kay kahaponon na kag malapit na ang gab-i.” Gani nagsulud sia sa pagpabilin sa ila. 30Sang nakalingkod sia upud sa ila sa pagkaon, ginkuha niya ang tinapay kag ginpakamaayo, kag sang natipiktipik ini ginhatag niya sa ila. 31Kag nagsanag ang ila mga mata kag nakilala nila sia; kag sia nadula sa ila panulok. 32Nagsinilingay sila, “Wala bala nagadabdab ang aton mga tagiposoon sa sulud naton sang nagpamolong sia sa aton sa dalan, sang nagtalastas sia sa aton sang mga kasulatan?” 33Kag nagtindug sila sa sadto gid nga takna kag nagbalik sa Jerusalem; kag nakita nila ang napulog isa nga nagtilipon kag ang kaupdanan nila, 34nga nagsiling, “Matuud gid nga nabanhaw ang Ginoo, kag nagpakita kay Simon!” 35Niyan ginsugid nila ang nahanabu sa dalan, kag kon paano nga nakilala nila sia sa pagtipiktipik sang tinapay.

Si Jesus Nagapahayag sa Napulog Isa

(Mat. 28:16-20; Mar. 16:14-18; Juan 20:19-23)

36Sang nagpamolong sila sini, si Jesus gid nagpatunga sa ila [kag nagsiling sa ila, “Paghidait sa inyo!”] 37Apang nakugmat sila kag kinulbaan, kag naghunahuna nga nakakita sila sing espiritu. 38Kag nagsiling sia sa ila, “Ngaa bala nagakalisang kamo, kag ngaa bala nga nagaabut ang mga pangduhaduha sa inyo mga tagiposoon? 39Tan-awa ang akon mga kamut kag ang akon mga tiil, nga ako gid ini; hikapa ninyo ako, kag tan-awa; kay ang espiritu walay unud kag mga tul-an subong sang ginatan-aw ninyo nga ako may akon.” [40Kag sang nakasiling sia sini, ginpakita niya sa ila ang iya mga kamut kag ang iya mga tiil.] 41Kag sang indi pa sila makatoo bangud sa kalipay, kag natingala, nagsiling sia sa ila, “May kalan-on bala kamo diri?” 42Ginhatagan nila sia sing inihaw nga isda, 43kag ginkuha niya ini kag ginkaon sa atubangan nila.

44Niyan nagsiling sia sa ila, “Ini amo ang akon mga polong nga ginpamolong ko sa inyo, sang kaupud pa ako ninyo, nga ang tanan nga butang kinahanglan matuman nga nasulat sa kasogoan ni Moises kag sa mga manalagna kag sa mga salmo nahanungud sa akon.” 45Niyan ginbuksan niya ang ila mga painoino agud nga makahangup sila sang mga kasulatan, 46kag nagsiling sia sa ila, “Amo ining nasulat, nga ang Cristo mag-antus#Isa. 53:1-12. kag mabanhaw sa ikatlo nga adlaw,#Os. 6:2. 47kag nga ang paghinulsul kag ang kapatawaran sang mga sala iwali sa iya ngalan sa tanan nga kapungsuran, sumugud sa Jerusalem. 48Kamo amo ang mga saksi sining mga butang. 49Kag yari karon, ginapadala ko sa inyo ang saad sang akon Amay;#Binu. 1:4. apang pabilin kamo sa banwa, tubtub nga masukloban kamo sing gahum gikan sa kahitaasan.”

Ang Pagkayab ni Jesus

(Mar. 16:19-20; Binu. 1:6-11)

50Niyan gindala niya sila sa gowa tubtub sa Betania, kag ginbayaw niya ang iya mga kamut kag ginpakamaayo sila. 51Sang nagapakamaayo sia sa ila, nagbulag sia sa ila [kag ginbayaw pa langit]. 52Kag sila [nagsimba sa iya, kag] nagbalik sa Jerusalem nga may dakung kalipay, 53kag didto sila sa templo sing dalayon nga nagadayaw sa Dios.

Tans Gekies:

LUCAS 24: ABHIL82

Kleurmerk

Deel

Kopieer