San Mateo 1
1
Jesucristu ifamiliajat
1Ayʉ̱́j libru nas̈actujawigap Jesucristu ifamiliajat. Je' min David ifamiliani'c mit David min Abraham ifamiliani'c.
2Abraham iwat Isaac, mit Isaac iwat Jacob, mit Jacob iwatcʉs̈ Judá mit ije̱wajyat. 3Mit Judá iwatcʉs̈ Fares mit Zara jeme itumuwatway Tamar, mit Fares iwat Esrom, mit Esrom iwat Aram. 4Mit Aram iwat Aminadab, mit Aminadab iwat Naasón, mit Naasón iwat Salmón. 5Mit Salmón iwat Booz jeme itumuwatway Rahab, mit Booz iwat Obed jeme itumuwatway Rut, mit Obed iwat Isaí. 6Mit Isaí iwat rey David, mit rey David iwat Salomón mit ayé itumuwajtau Urías ito's̈ay.
7Mit Salomón iwat Roboam, mit Roboam iwat Abías, mit Abías iwat Asa. 8Mit Asa iwat Josafat, mit Josafat iwat Joram, mit Joram iwat Uzías. 9Mit Uzías iwat Jotam, mit Jotam iwat Acaz, mit Acaz iwat Ezequías. 10Mit Ezequías iwat Manasés, mit Manasés iwat Amón, mit Amón iwat Josías. 11Mit Josías iwatcʉs̈ Jeconías mit ije̱wajyat meru ayé tiempu Israelway jayajwat iguimunʉ́s̈caj to'ctʉgʉyic pa Babiloniajway na̱s̈.
12Cʉs̈ iguimunʉ́s̈caj pa Babiloniajway na̱s̈, Jeconías iwat Salatiel, mit Salatiel iwat Zorobabel. 13Mit Zorobabel iwat Abiud, mit Abiud iwat Eliaquim, mit Eliaquim iwat Azor. 14Mit Azor iwat Sadoc, mit Sadoc iwat Aquim, mit Aquim iwat Eliud. 15Mit Eliud iwat Eleazar, mit Eleazar iwat Matán, mit Matán iwat Jacob. 16Mit Jacob iwat José, María ina'u, mit María je' ayé ima̱m Jesús jeme inʉ'jywayey Cristu.
17Mit catorce familiajat i-ijt desde Abraham hasta David, mit it jacatorce familiajat desde David hasta iguimunʉ́s̈caj Israelway jayajwat pa Babiloniajway na̱s̈, mit desde iguimunʉ́s̈caj pa Babiloniajway na̱s̈ hasta imijn Cristu it jacatorce familiajat.
Nat i-ijt Jesucristu
18Yʉname i-ijt Jesucristu. Ima̱m María nʉmic pa inicʉ'pa̱jtʉwa'n mit José, po antes inicʉ'pa̱tcʉjʉwa'n, wayaj itsʉ̱naj, mit ayé iway igui-acmijnau Espíritu Santu. 19Mit José jeme María ipʉgámpay pa ina'u, ayé tu'c jayau yacs̈icway mit igawanu igui-acwinchu̱cyo'ywa'n. Je' inʉm ni'c igajapʉgáj po iga-actujawiyáj nepʉn. 20Po iguipensa̱jt wename, tu'c ángel iguique's̈ta̱jcau cucma'ni'c mit iguinʉjmau:
—José, mi̱ nije'yu David ifamilia, campʉ̱twit is̈pʉcwa'n María pa into's̈ay, ni'c iway tsʉ̱napay ijo̱jtugum Espíritu Santu igui-acmijnau. 21Mit je' ijtʉ̱́j tu'c iway, mit inyajcáj inʉ'jy JESUS, ayé inʉmo'jcʉp ni'c je' isalva̱tcʉs̈áj ijayajwat mit ichi'tcʉs̈áj nu'pʉjʉn mal iwatcaway.
22Nu'pʉjʉn ayʉ̱́j jat pa ma cumplia̱t lo que el Señor i-actunʉmway ayé profeta cuandu iguinʉjm:
23Tu'c quis̈ay waya-iyáj, mit ijtʉ̱́j iway,
mit iyajcajáj inʉ'jy Emanuel.
Ayé inʉmo'jcʉp ni'c Dios tsʉ̱nap mit ʉjtsat.
24Ima̱jutujc José, iwat as̈am iguinʉjmau el Señor i-ángel, mit ipʉctso̱u María pa ito's̈ay, 25po iga-aguepu as̈am ito's̈ay hasta iguita̱jc iprimer-wáy, mit José iyajcau inʉ'jy JESUS.
Tans Gekies:
San Mateo 1: PSNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nuevo Testamento en Popoluca de Sayula © Sociedad Bíblica de México, [1969].
