Matiyu 9

Isaye kam tiyinju nunaa isangaduwu

(Mar 2.1-12; Luk 5.17-26)

1Daji Isa maaradǝro ngaye bǝrǝmdǝa falje koje bǝrninjaro#9.1 bǝrninjaro - Bǝrni Kafarnaambe. wallada. 2Am laa kam tiyi nunaa kǝla bǝnaramben ngojane nanjuro kewudo. Isa kambǝrsenjadǝa kirunniya, kam tiyinju nunaadǝro: «Tadani, bare tǝma kollǝmmi, biwunǝm gawurdǝna,» yeno. 3Daji malǝmba Attauraye laa karwunjan: «Kam attǝ Alaa gaskajǝna, diye!» yera. 4Amma Isa awo karwunjaye asuje tayiro: «Awiro karwundon niadiwi dǝganadǝ? 5Ndaso gǝle budu wo: “Biwunǝm gawurdǝna” wulduma ra “Cine lene!” wulduma? 6Nonowo, Tada Kambedǝ nanjun kǝnduwo biwu ambe dunialan gawurduye mbeji!» yeno. Daji kam tiyinju nunaadǝro: «Cine bǝnarammǝm ngone fannǝmbo lene!» yeno. 7Kamdǝ cije fannjuro leyeno. 8Jama captanadǝ adǝa kerunniya, rijane Ala kǝnduwo adǝ gai ambo cinadǝa kengoro.

Isaye Matiyua bowodu

(Mar 2.13-17; Luk 5.27-32)

9Isa nadǝa kolji duwon, kam laa tiro Matiyu cani kidaramnju akki mowoyen napkadaa kiro. Isaye tiro: «Wua sǝgai!» yenniya, cije tia giya.

10Isa fado Matiyuyelan masǝnaro napcǝna duwon, akki mowomaso-a biwuma gadeso-a kada ye isane ti-a fuwurawanju-a rokko masǝna dioro napkera. 11Farisawa adǝa kerunniya, fuwurawanjuro: «Awiro malǝmndo akki mowomaso-a biwuma gadeso-a rokko masǝna cadidǝ?» yera. 12Isa adǝa fangenniya, tayiro: «Kam dondi gǝnia, kam ngadǝ lowotor majiwawo. 13Lenowo, mana adǝye maananju asunowo: “Bu fida gǝni, kanjimaɍima raakko.”#Hos 6.6 Awoa jiremasoa gǝni, biwumasoa bowoduro#9.13 biwumasoa bowodu - Tuwa cadoro. kadikko,» yeno.

Kambiwu kǝla asemben

(Mar 2.18-22; Luk 5.33-39)

14Daji fuwurawa Nawi Yahayaye na Isayero isane tiro: «Awiro andi-a Farisawa-a asem#9.14 asem - Asem faral gǝni, nafila. taiye, amma fuwurawanǝm asem cadaiwawodǝ?» cane keworo. 15Isaye tayiro: «Mai larusaye dawunjan duwon, ngaladiya karwunja kuttaji wa? A’a, amma sa ise mai larusayedǝa dawunjan cattuluwiya, sa adǝn duwon asem cadai.

16«Wunduma guntu batta bǝɍinne ingiro cakke captǝnni ngoje kajǝmu dinaro cukkududiwawo. Ngai cǝdia, batta bǝɍindǝ capte kardudǝ cayemaro kuraro walji. 17Koro wunduma diben bǝɍin ngoje satki dinaro fijiyiwawo. Ngai cǝdia, satkidǝ falde,#9.17 satkidǝ falde - Diben bǝɍin mojogolje kuraro walji nangaro, satki dinadǝ faldi. diben ye cidiro fidiyi, satki ye bannadi. A’a, amso diben bǝɍindǝa satki bǝɍinno fijagai, adǝgainin tayi yindi samma kǝlewa dasayi,» yeno.

Kǝnduwo Isaye kǝla kǝndondi-a karmo-ayen

(Mar 5.21-43; Luk 8.40-56)

18Isa tayiro manajiyi ngai duwon, kura dandalle laa ise fuwunjun tungurumje tiro: «Kǝrmama feroni bawoyeno. Are mukkonǝm tiro gǝnagǝne, roaro walji,» yeno. 19Daji Isa cije fuwurawanju-a rokko kamdǝa geya.

20Kamu laa ye nadǝn mbeji, kǝrwu mewun yindinno bu fidanju#9.20 bu fidanju - Salanambu. dajǝnni. Daji kamudǝ ise ngawo Isayen susuje ci kalwunjuyedǝa leyeno, 21awoa karwunjun: «To, kajǝmunju bas lekkia, ngakki,» cǝni. 22Isa suworde tia kirunniya, tiro: «Feroni, bare tǝma kollǝmmi! Kambǝrsenǝm nangaro njǝkkawo fandǝmma!» yeno. Sadǝman kamudǝ ngayeno.

23Isa fado kam kura dandalledǝyero ise algaidawu lagaranneso-a jama captana kalala fijai-aa kirunniya, 24tayiro: «Luwowo lenowo! Ferodǝ bawojǝnni, kǝnǝm cǝdi,» yeno. Amma tia rujane tiro kaasu keddo. 25Jamadǝa deyaro kettuluwunniya, ngaye ferodǝa mukkoyen cǝdane ciyeno. 26Lawar adǝ cididǝ ngaro tatargaada.

Isaye kambu yindia isangaduwu

27Isa nadǝa kolje ledu cǝdi duwon, kambu yindi tia jaane kowo sapcane: «Isa *Tada Mai Daudaye,#9.27 Tada Mai Daudaye - Kaduwu Mai Daudaye, kaala Almasiwu Alaye. andia njunosane!» cani. 28Fado laaro kǝrgaanniya, kambuwadǝ nanjuro kadira. Isaye tayiro: «Rangǝkke adǝa njaddǝkkiro mǝrsasuwwa wa?» cǝne kiworo. Kambuwadǝye: «Aaa, Kǝma!» yera. 29Daji Isa simnja leje tayiro: «Kambǝrsendo nangaro, nayiro wakkanjaa!» yenniya, 30sim kewando. Isa tayiro wada ce: «Fanowo, bare wunduma adǝa nojǝnni!» yeno. 31Amma lejane lawar Isayedǝa cididǝ ngaro tataryeyera.

______________________________________________________________________

Kalmaram: Tada Mai Daudaye

Nawi Mai Dauda jairo duwon Ala Nawi Samailaa cunode kǝla Daudayero kǝndawu jaitunne fijiye samjiye mai Israyilayero galayeno. Tǝn yimdǝn Ruhu Alaye karwu Daudayero kǝrgawo. Nawi Mai Dauda kǝladowa jama Alaye sammaa lardu Israyilawuyen duje kǝrmainju ye cidi kǝrdiyaye ngǝwuro tatargadan. Maiya Israyilaye samman Nawi Mai Daudama kura wo.

Ci nawiyayen Kǝmandeye kaduwu Nawi Mai Daudaye laa tia daraja-a kǝnduwo-alan kojǝna ise nodo bargaa Mai Samemaye dunia ngaro dunoaro tarjiyi yeno. Mai kura adǝ tima Almasiwu Alayedǝ wo. Adǝgaima Bargaande Isa Almasiwudǝ warasama Nawi Mai Daudaye nangaro, tia kaala Tada Mai Daudayelan bowojai.

______________________________________________________________________

Isaye karuwama manajiwawoa isangaduwu

32Tayi sim cawandǝnadǝ sapkadaranniya, am gade karuwama laa rakce manajiwawoa ngojane na Isayero kewudo. 33Isa sedandǝa duyenniya, kamdǝ manadu badiyeno. Daji jamadǝ ajapcane: «Ngaltema awo adǝ gai lardu Israyilayelan turunni!» yera. 34Amma Farisawadǝye: «Kǝnduwo mai sedannayen sedannaa duji,» yera.

Kala ngǝwu, kidawu gana

35Daji Isa leje dandalnjan jamaa alamje kawuɍi kǝji nodo bargaa Mai Samemaye wuljiye am dondia kasuwanja ngan isangajiyi ngai duwon, bǝla-a bǝladeya-a sammaa giya. 36Jama kada captanadǝa kirunniya, tayia njunoyeno, dalilnjudǝ jǝktane hangalnja caa cijǝna alama dimiya sǝni bawoa gai nangaro. 37Daji fuwurawanjuro: «Kaladǝ ngǝwu, amma kidawudǝ gana. 38Adǝ nangaro kǝma kalayedǝa lowonowo, kidawu gade yea tiro kala njǝddoro cunodo!» yeno.

Tans Gekies:

Matiyu 9: kby

Kleurmerk

Deel

Kopieer