Psalms 72
72
U moet vir die koning leer om reg te regeer
1Van Salomo.
O God, U moet vir die koning leer om reg te regeer
en om reg te doen soos U.
2Ons bid dat hy reg sal regeer oor u volk,
dat hy reg sal oordeel oor mense
wat aan U behoort en wat hulleself nie kan help nie.
3Daar moet vrede wees en almal moet reg doen
in die hele land, tot op die berge en die heuwels.
4Die koning moet reg doen aan die mense
wat hulleself nie kan help nie,
hy moet die arm mense red
en hy moet die mense straf
wat ander mense laat swaarkry.
5O God, die mense moet vir U dien
so lank soos die son en die maan daar is,
in hierdie geslag en in elke geslag daarna.
6Die koning moet vir sy mense wees
soos reën op grond waar die gras kort is,
soos swaar reën wat die aarde natmaak.
7Dit moet baie goed gaan met elkeen wat reg doen,
daar moet vrede wees vir almal
so lank soos die koning lewe,
so lank soos die maan daar is.
8Die koning moet regeer van die een see
tot by die ander see,
van die Eufraat-rivier tot by die verste plekke
op die aarde.
9Die mense wat in die woestyn woon,
moet voor die koning kom buig,
sy vyande moet voor hom
op die grond kom lê.
10Konings van die land Tarsis en van die eilande
moet vir hom presente bring,
konings van die lande Skeba en Seba
moet aan hom belasting betaal.
11Al die konings moet voor hom buig,
al die volke moet vir hom werk.
12Want die koning sal die arm mense red
wat vra dat hy hulle moet help,
die mense wat hulleself nie kan help nie
en vir wie niemand wil help nie.
13Hy sal jammer wees vir die arm mense,
die mense wat niks het nie,
hy sal die lewens van die arm mense red.
14Hy sal hulle wegneem van die mense
wat hulle seermaak en hulle laat swaarkry.
Die arm mense se lewens is vir die koning kosbaar,
niemand mag hulle doodmaak nie.
15Die koning moet lank lewe.
Mense moet vir hom goud bring uit Skeba,
hulle moet aanhou bid vir hom,
hulle moet die hele dag bid
en vra dat dit goed sal gaan met hom.
16Daar moet baie koring in die land wees,
dit moet oral groei, tot bo-op die berge,
dit moet groei soos die plante op die Libanon-berg.
Daar moet baie mense in die stede wees,
so baie soos die gras in die veld.
17Mense moet die koning altyd onthou,
hulle moet sy naam onthou so lank soos daar 'n son is.
Al die volke moet weet en sê
dat dit goed gaan met hulle
omdat die koning daar is,
en hulle moet bid dat hy gelukkig sal wees.
18Ons prys God, die Here, die God van Israel.
Net Hy doen wonderlike dinge.
19Ons prys die Naam van die Here, die Koning.
Die hele aarde moet weet Hy is Koning.
Amen, ja amen.
20Die gebede van Dawid seun van Isai hou hier op.
Tans Gekies:
Psalms 72: ABA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Bybelgenootskap van Suid-Afrika 2007. Gebruik met toestemming. Alle regte voorbehou.