MATHAI 10
10
Sawltak sawmlehnihte
(Mrk. 3.13-19; Luk. 6.12-16)
1Tualeh aman nungjui sawmlehnihte a sapkhit in, akiang uah kha-ni`nte tung a thuneihna apia a, amauhte hawlkhia ding leh damlouhna chiteng leh natna chiteng damsak ding in. 2Tualeh sawltak sawmlehnihte min ahihleh hihte ahi: amasa penin, Simon, Peter zong kichi leh a sanggampa Andru; Jebedi tapa Jakob leh a sanggampa Johan; 3Philip leh Bartholomai; Thoma leh siah dongpa, Mathai, Alphai tapa Jakob leh Lebbai, amin khem Thaddaite; 4Kananmi Simon, leh juausan a mansakpa Juda Iskariotte.
Sawmlehnihte sawlkhiatna
(Mrk. 6.7-13; Luk. 9.1-6)
5Hih sawmlehnihte Jesu`n a sawlkhia a, tualeh hichi`n thu apia a: “Jentelte lampi ah paikei unla, Samaria mite khuapi ah lut kei un. 6Hinanleh Israel nam belam mangte kiangah paijaw un, achi hi. 7‘Tualeh na pailai un, van gam anaita!’ chi`n tangthupha genjel un. 8Damloute damsak unla, phakte bawlsiangthou unla, misite kaithou unla, dawite hawlkhia unla, athawn a na muh uh ahi a, athawn in pia un. 9Na dangka bawm kawnggak uah kham hiam, sumsan hiam, daan dangka hiam kengkei un; 10na khualhawhna a dingin thungpi hiam, puan-ak nih hiam, khedap hiam, chiangkhut hiam kengkei un, nasemmi pen anek mutak ahi. #1 Kor. 9.14; 1 Tim. 5.18.
11“Tualeh khuapi hi`n khua khat peuhpeuh ah nalut chiang un, nou hungtungsak theiding mi zongkhia unla, na pawtkhiat masiah uh tuamun ah om kinken un. 12Tualeh innsung a nalut ding chiang un, ‘Chibai buk un.’ 13Inn neite khamuanna tangtak ahih uleh, na khamuanna thu uh atung uah tung hen, ahihhang in khamuanna tangtak ahihkei uleh na khamuanna thu uh noukiang ah hung kileh kik hen. 14Tualeh kuapeuh nou hung vaitun nuam loua, nathu uh zong angaihnuam kei uleh, tua inn a kipan hiam, khuapi a kipan a na paichiang un, na kengphang ua leivui thingkhia un. #Nst. 13.51. 15Adiktak in na kiang uah kung hilh ahi, thukhenni chiangin tua khuapite sangin Sodom leh Gomorrah gamte thuak ding adan a omjaw ding hi. #Mat. 11.24; Gen. 19.24-28. #Luk. 10.4-12.
Bawl gentheihna hungtung dingte
(Mrk. 13.9-13; Luk. 21.12-17)
16“Ngaiin! ngia lak a belam om bangin kung sawlkhia hi. Tuajiakin gul bangin pil unla, vakhu bangin poikhoihlou in om un. #Luk. 10.3. 17Hinanleh mihing lak ah pilvang un, denchiah vaihawmmite maiah a hungtun kha ding ua, a kikhopna inn lak uah ahung jep kha ding uhi. #Mrk. 13.9-11; Luk. 12.11,12; 21.12-15. 18Tualeh keimah jiakin gam vaihawmtute leh kumpipate maiah Jentelte leh amauhte dikna lahna dingin nou ahung paipih ding ua. 19Hinanleh tuachia nou ahung piakkhiat hun chiang un bang chiding, bang gen ding ka hia chi`n lungkham kei un; na gen ding uh ahuntak in na kiang uah piak in na om ding uhi. 20A genpa pen noumah na hikei ding ua, hinanleh na Pa uh kha in noumah sung pan in agen nading hi.
21“Tuin thah dingin a sanggampa`n a sanggampa amansak ding a, pa in a tate a mansak ding a, tate in anu leh apa a dou ding ua; a thatsak ding uhi. #Mrk. 13.12; Luk. 21.16. 22Tualeh ka min jiakin mijousiah huat nahi ding ua, hinanleh kuapeuh atawptan a thuakjoute hundam ahi ding uhi. #Mat. 24.9; Mrk. 13.13; Luk. 21.17; Mat. 24.13; Mrk. 13.13. 23Hinanleh hih khuapi a ahung gawt uleh khuapi dang ah taikhia un. Adiktak in na kiang uah kung hilh ahi, Mihing Tapa a hungpai masiah Israel khuapite na tuansuak kei ding uhi.
24“Nungjui khat pen a siapa tung ah a omngai kei; sila khat zong apu tung ah a omngai kei. #Luk. 6.40; Jhn. 13.16; 15.20. 25Nungjui khat a siapa banga a om, tualeh sila khat zong apu banga aom ahun hi. Innneipa bawn Beelzebul chia asap uleh, a inn kuanpihte bangzah in ahahchih sem tading ua le! #Mat. 9.34; 12.24; Mrk. 3.22; Luk. 11.15.
Kua ahia lauding
26“Tuajiakin amauhte laukei un. A kilanglou ding a phual bangmah a omkei a, tualeh theihlouh ding a im bangmah a omkei hi. #Mrk. 4.22; Luk. 8.17. 27Mialnuai a nou kung thuhilh jousiah, va`k ah gen unla, tualeh na bilkawm ua na ja`kte uh inntung vum pan in phuangkhia un. 28Tualeh taksa pumpi thatthei hinanleh kha thattheiloute laukei unla; hinanleh meidil a ataksa pumpi leh kha anih a hihmang theipa, amah laujaw un. #Meidil=Hell (english)=Gehenna (grik) in ahi. 29Vatou nih daan dangka khat in a juakjel uh hilou maw? Ahihhangin alak ua khat zong na Pa uh theihlouh in tual ah akiakei ding hi. 30Hinanleh, na lutung ua samzangte nangawn simsiang ahi. 31Tuajiakin lau kei un; vatou tampi sang in na manpha jaw uhi!
Krist deihlouhna phuankhiatna
(Luk. 12.8,9)
32“Tuajiakin kuapeuh mite mai a kei hunggum jousiah, ken zong van a om ka Pa maiah amah ka gum ding hi. 33Hinanleh kuapeuh mite mai a kei hung kitheihmoh bawl jousiah, ken zong van a om ka Pa maiah ka kitheihmoh bawl ding hi. #2 Tim. 2.12.
Lemna hilou hinanleh namsau
(Luk. 12.51-53; 14.26,27)
34“Leitung ah lemna tunding a hungpai hungsa kei un. Lemna lengsak ding a hungpai ka hikei a, namsau lengsak ding a hungpai ka hijaw hi. 35Tapa in apa, tanu in anu, mou in a inpinu dousak ding a hungpai ka hi hi; #Mik. 7.6. 36tualeh mi agalte amah innkuanpihte lak a mi mah ahi ding.
37“Kuapeuh anu hiam apa hiam kei sang a itjawte pen kami hitaklou ahi uhi. Tualeh kuapeuh atanu hiam atapa hiam kei sang a itjawte zong kami hitaklou ahi uhi. 38Tualeh kuapeuh a kross pua a ka nung hungjuiloute pen kami hitaklou ahi uhi. #Mat. 16.24; Mrk. 8.34; Luk. 9.23. 39Kuapeuh ahinna mu in ata`n ding a, tualeh kuapeuh kei jiaka ahinna ta`n in amu ding uhi. #Mat. 16.25; Mrk. 8.35; Luk. 9.24; 17.33; Jhn. 12.25.
Nuamman
(Mrk. 9.41)
40“Kuapeuh nou hung kipahpihte pen kei hung kipahpih ahi a, tualeh kuapeuh kei hung kipahpihte pen kei hung sawlpa kipahpih ahi uhi. #Luk. 10.16; Jhn. 13.20; Mrk. 9.37; Luk. 9.48. 41Kuapeuh Jawlneite Jawlnei ahihjiak a kipahpih in Jawlnei nuamman amu ding. Tualeh kuapeuh midiktatte midiktat ahih jiak a kipahpih in midiktat nuamman amu ding. 42Tualeh kuapeuh hih mineute lak a khat kiang a nungjui ahih jiaka tuivot noukhat mai piate zong, adiktak in kung hilh ahi, a nuamman muh ding ata`n kei ding uhi.”
Tans Gekies:
MATHAI 10: THKHBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
