Matiu 9

Yisa nba din te ki gbanankpeenn daanɔ paak biaŋinba

(Mak 2.1-12; Luk 5.17-26)

1Ŋanne ki Yisa din ŋmat kɔɔ burgbetir na ni ki poot mɔkgbeŋŋir na gbingbanleer ki kun u doo ni. 2Ki nisiab din tan jii jasɔɔ nna ki u gbanant kpo; ki bi din teenɔ liaŋ paak ki baar nanɔ Yisa boor ni. Yisa nba din la ba teenɔ yada biaŋinba na, ki u yet baatɔɔ na a “N bik, i mɔk parcheenn; n nyik chab a biita.”

3Ki sennu wanntesiab ji din dukii bi para ni a “Jɔɔ na jikit Yennu yikoo na u yur paake.”

4Yisa ŋanin din bann bi dudukit maŋa, ki boib a “Bee teen ki i dukii dudukbiit i para ni? 5Ma yet baatɔɔ na a ‘N nyik chab a biit’ amii ma yaa n yetɔ a ‘Fiit kii somm na,’ maan munnlee na sinsuuk ni lannpoe paari? 6N ji sa wanni nan min nisaarik Bik mɔk yikoo tingbouŋ na ni ki sa nyik chab niib bi biit;” ŋaan jiant bet jɔɔ nba ki u gbanant kpo na a “Fiit ki jii a liaŋ kii kun a ŋaak ni.”

7Ki jɔɔ maŋ fiir ki kun. 8Nibur na nba din la nna maŋ ki jaŋmaanii soorib; ki bi piak dont Yennu nba tur nisaarik yikoo na booru.

Yisa nba din yiin Matiu biaŋinba

(Mak 2.13-17; Luk 5.27-32)

9Ki Yisa din nyii leŋ ki saa, ki saa la jasɔɔ nna, ki bi yiu Matiu, ki u kar u toonn paak lampogaar diiuk ni; ki Yisa betɔ a “Fiit kii waan.” Ki u fiir ki waau.

10Yisa nba din saan Matiu na ŋaak ki saa kar ki di jeet yoonba na, ki lampogaarteeb nan biitdamm bonchiann din kɔɔ ki tan kar pukin Yisa nan u poorpoweiteeb po ki di namm. 11Farisiinba na nba din la nna maŋ, ki bi boi u poorpoweiteeb na a “Bee ki i wanntɔɔ maŋ di jeet nan lampogaarteeb nan biitdammi?”

12Ki Yisa din gbat bi pinpauk maŋ ki yetib a “Binba mɔk laafia ki loon tebtɔɔ; binba yiar, ŋamme loon tebtɔɔ. 13Li sɔb Yennu gbouŋ ni a ‘Yennu loon ninbatinue ki gar marouŋ.’ I saa man ki saa tumii bann linba na paak. N ki baar a n yiin popeendamm kaa; ŋaan n baar a n yiin biitdamme a bin nyik bi biit.”

Mɔloru labaar

(Mak 2.18-22; Luk 5.33-39)

14Ki Jɔɔnn wunba din wuur niib Yennu nyunwuru na poorpoweiteeb din tan baar Yisa boor ni ki boiɔ a “Timm nan Farisiinba lorin mɔi yoo kura; bee teen ki a poorpoweiteeb ki lorimi?”

15Ki Yisa din jiin ki boib a “Poochianu-i be, saamm sii mɔk parbiir yoo nba ki pooyookir sɔrɔ daa be bi boor ni nawa-aa? Aaii. Ŋaan yoo baat na, ki bi tan sa nyinn pooyookir sɔrɔ na bi boor; li yooe ki bi sa lor mɔi.

16“Sɔɔ kan jii chabpaann ki lik takperi; li-i tee ki u teen nnaie, chabpaann na sa pat takper nae, ki li patimin na sa ŋamm pukin. 17Sɔɔ bia kan sak liak dapaanin dalenkper ni; wunba tun nna, dapaanin na-i taŋŋi mɔ, li sa put dalenkper nee ki biir, ki daan-n mɔɔn; ŋaan bi tuu jii dapaanin ki liak linlenpaann nie, a li kura daa biiri.”

Yudaansɔɔ bonpobik baatuk labaar

(Mak 5.21-43; Luk 8.40-56)

18Yisa nba din daa piak ki teemm yoonba na, ki yudaansɔɔ nna baar ki tan gbaan u tɔɔnn po, ki yetɔ a “N bipoyemmire dɔɔ ki kpowa; li paak, baat na ki tan jii a nuu ki yii u paak, ki u sa la manfoor.”

19Ki Yisa din fiir ki jii u poorpoweiteeb pukin u mɔŋ paak, ki bi weiɔ ki saan.

Poosɔɔ nba sii Yisa liatir ki la paaku biaŋinba

(Mak 5.25-34; Luk 8.42-47)

20Poosɔɔ nna mun din be leŋ, ki siik faboŋ ki tan jaŋ bina piik nan ŋannlee; ki u din tan bar lint Yisa poorpo ki saa sii u liatir mɔgbann; 21kimaan u poŋ din dukin u par niewa a “Mi-i lekii sii u liatir gbaa, n sa la laafia.”

22Ki Yisa din jiant ki la poo na, ki betɔ a “N niipoo, i mɔk parcheenn. Fa teenin yada na paake te ki a la laafia.” Li taakpaak ni, ki u set la laafiawa.

Yisa nba fiin bonpobik na kuun ni biaŋinba

(Mak 5.35-43; Luk 8.49-56)

23Yisa nba din saa baar yudaanɔ maŋ ŋaak ni yoonba, ki u la yerpebira peeb yerii, ki niburchiauŋ bia bui kpemɔnii ki fabin. 24Ki u betib a “Yii nyi man; bonpobik na ki kpo kaa, ŋaan u gɔɔnte.” Ŋaan ki bi laau. 25Ŋanne ki bi ber niib maŋ ki nyinnib; li yoo na ki Yisa kɔɔ ki soor bonpobik na nuu, ki u yeent ki fiir. 26Ki bi din mɔɔnt li labaar tingbouŋ maŋ ni kur po.

Yisa nba din nyɔɔnt jɔɔnii bannlee ninbina biaŋinba

27Yisa nba din nyii leŋ ki gaar saa tɔɔnn po na, ki jab nna bannlee din tee jɔɔnii ki waa u poorpo, ki yikin ki yeen a “Fin David yaaboonn, a tint ninbaauk.”

28Yisa nba din saan ki saa kɔɔ ŋasiak nna ni yoonba, ki jɔɔnii na baar ki kɔɔ leŋ. Ŋanne ki u boib a “I teen yada nan n sa fit ki tun nna-aa?”

Ki bi jiin a “Ti Yomdaanɔ, nn.”

29Ŋanne ki u jii u nuu ki sii bi ninbina, ŋaan betib a “Ya teen yada biaŋinba na, lin tun nnee ki turi.” 30Ki bi ninbina maŋ nyɔɔnt; ŋaan ki u din kpaamm fanu a bii mi ki bin bet sɔɔ li po.

31Ŋaan ki bi din nyii ki saa mɔɔnt u labaar tiŋ maŋ ni kura.

Biaŋinba ki Yisa din te ki muuk paak

32Ba din fiir ki nyii yoonba, ki siab mun din baar nan jasɔɔ wunba ki narinbimuuk be u ni na, ki baar nanɔ Yisa boor ni. 33Ki Yisa din nyinn narinbimuuk na jɔɔ na ni, ki u ji fit piin ki piak li yoo. Li din yaar ŋaan lit niburchiauŋ maŋ, ki bi ji yeen a “Ti daa ki mi la bonbooru na timm Israel teeb tiŋ nna.”

34Ŋaan ki Farisiinba din daan nyatuk a “Narinbiit bate teenɔ yikoo a wuu nyint narinbiit niib ni.”

Biaŋinba ki Yisa din mɔk ninbatinu nan niib

35Tɔn, ki Yisa din kak lin doi kur ni nan digbanbis ni, ki kɔɔ Yenjiantu diit ni, ki mɔɔntir Yennu naan barŋanii ki want niib, ki te ki binba yiar yiarboorii boorii kur paak, nan binba yiar yiarbiit kur. 36Wa din tan la niburchiauŋ maŋ na ki ninbaauk soorɔ, kimaan bi din tee tatimme ki kaa sommsiari, ki naan nan pei nba kaa pekpaarik na. 37Ŋanne ki u din bet u poorpoweiteeb a “Dii na beer ki bia yaba, ŋaan ki dijaara waar. 38Li paak, yii mei man dii maŋ daanɔ ki wun ŋamm pukin dijaara ki te ki bin saan jaan u dii maŋ.”

Tans Gekies:

Matiu 9: BIM

Kleurmerk

Deel

Kopieer