Matiu 17

Yisa gbanant lebitu labaar

(Mak 9.2-13; Luk 9.28-36)

1Li poorpoe ki li tan teen daa ŋannloob, ki Yisa jii Piita, nan Jems nan u naa bik Jɔɔnn, ki doo namm jɔɔr nba fɔk bonchiann paak, bi kuukɔɔ. 2Li yoo na ki bi la ki u lebit; ki u numm po kpint nyirii kaman nan yennu na; ki u liant penn ki nyirik kaman nan yentu na. 3Ki bi la Moses nan Elaija lekit yomm, ki see piak nanɔ. 4Ŋanne ki Piita yetɔ a “N Yomdaanɔ, li ŋan nan ta be nna na. Li-i tee ki a bo sa saki, n bo sa faa lanbont ŋanntaae, ki yenn-ii tee a yar, ki leer-ii tee Moses yar, ki leer-ii munii tee Elaija yar.”

5Ki Piita mɔb daa ki baa tiŋi, ki sanpagbanpeeuŋ sik bakin bi paak; ki bi gbat kunkɔsiar nyii sanpagbann na ni, ki yet a “N Bilonkakii na, wunba ki n numm gboou na, gbiintir u mɔb man.”

6Ki Yisa poorpoweiteeb na nba gbat kunkɔr maŋ na, ki jaŋmaanii soorib, ki bi gbaan tiŋ ni. 7Ki Yisa baar ki tan yii yiib, ŋaan betib a “Fiit man. I daa tiin jaŋmaanii.” 8Ki bi gokit bi yura, ŋaan ji ki la sɔɔ bi boor, see Yisa kuukɔɔ.

9Ba nyii jɔɔr na paak ki sik yoonba, ki Yisa kpaamm a “I daa beer sɔɔ linba ki i la na, ki saa tuu yoo nba ki min nisaarik Bik na tan sa fiir kuun ni.”

10Ŋanne ki u poorpoweiteeb boiɔ a “Bee ki sennu wannteeb yaa a see ki Yennu sɔkinii Elaija baar Masia sinsinni?”

11Ki u jiin betib a “Li set tee mɔniie nan see ki Elaija maŋ baar sinsinn ki tan ŋamm bonsiar kur ki sennir li sɔnu ni. 12Ŋaan mine beeri na, Elaija poŋ daan baar na, ŋaan bi daan ki bannɔ, ki diau gbaka gbaka nna, kaman nan ba loon biaŋinba. Nnee ki bi mun bia sa teen min nisaarik Bik na, ki dinnin fara.”

13Ŋanne ki u poorpoweiteeb ji bann nan u piak Jɔɔnn wunba daan wuur niib Yennu nyunwuru na poe.

Yisa nba din nyinn narinbiiuk naasinbik ni biaŋinba

(Mak 9.14-29; Luk 9.37-43a)

14Ki Yisa nan u poorpoweiteeb banntaa maŋ tan baar niburchiauŋ na boor; ki jasɔɔ baar ki tan gbaan Yisa tɔɔnn ni, ŋaan yetɔ a 15“N Yomdaanɔ, tinin n bija na ninbaauk, kimaan u baa gbitgbiire; li daamɔ bonchiann ki u tuu tan baa muu ni, ki bia tuu tan baa nyun ni yoo kura. 16Ki n baar nanɔ a poorpoweiteeb boor ni, ki bi gbar u tebu.”

17Ki Yisa jiin boib a “Yimm mɔtana niib nba mantik kaa yada, ki bia ki waa Yennu fanu, n sa yukir nani nlee? yoo nlee ki n sa di sukuru nani mantiki? Baat nan bik maŋ nna.” Ki bi baar nanɔ. 18Ki Yisa tian narinbiiuk na paak, ki u chiar nyii ŋaan nyik bik na, ki u paak ken ken li yoo na.

19Li poorpo, ki Yisa poorpoweiteeb baar u boor, bi kuukɔɔ, ki tan boiɔ a “Bee ki timm ŋanin bo ki fit nyinn narinbiiuk maŋi?”

20Ki u jiin betib a “I yada kaarin paak. Barmɔniie ki n beeri na, li-i tee ki i teen Yennu yada ki li yab kaman nan jinjirik binn na, i sa fit yet jɔɔr na a ‘Fiit ki saa baa nawa,’ ki li set sa fiire; i bo sa fit tun bonsiar kura. 21Ŋaan narinbiiuk na booru ŋanimi, i kan fit nyinn li booru na, see ki i lor mɔi ki mei Yennu.”

Yisa nba din ŋamm pak u kuun po biaŋinba

(Mak 9.30-32; Luk 9.43b-45)

22Tɔn, Yisa poorpoweiteeb nba tan lakin leeb Galilee tiŋ ni na, ki u betib a “Bi tan sa jii min nisaarik Bik ki kubinin niib nuu ni 23ki bin kpin, ŋaan daa ŋanntaa daar ki n bia sa fiir kuun ni.”

Ki li ji biir u poorpoweiteeb para ni bonchiann.

Yennu jiantu ŋasaakak likgaaru labaar

24Ki Yisa nan u poorpoweiteeb nba tan baar Kapenaum yoonba, ki Yennu jiantu ŋasaakak likgaarteeb baar ki tan boi Simon Piita a “A wanntɔɔ ki pa likirii maŋi?”

25Ki Piita jiin a “U pa,” ŋaan kɔɔ ŋaak ni. Li yoo na ki Yisa dɔŋ piin li barii ki boiɔ a “Simon, a dukii nlee? Lamme tuu pa lampo ki teen tingbouŋ na kpanbara, bi mɔŋ booru ni niib amii saammii?”

26Ki u jiin a “Saamme.”

Ki Yisa yetɔ a “Tɔn, li-i tee nnaie, li want nan bi mɔŋ booru ni nuu kaa nni. 27Ŋaan ta ki loon ki tin biir bi para ni na paak, li paak, i saa mɔkgbeŋŋir na ni, ki saa lu janpeenu ki dat jaŋ nba ki a soorɔ sinsinn na ki donn; li-i tee ki a yaat u mɔb, a sa la likirii nba sa fit pa min nan fin paak; ki fan jii ki pab.”

Tans Gekies:

Matiu 17: BIM

Kleurmerk

Deel

Kopieer