Matiu 15

Bi yejamm kaar labaar

(Mak 7.1-13)

1Li yoo na ki Farisiinba nan sennu wannteeb nyii Jerusalem ki baar tan boi Yisa a 2“Bee ki a poorpoweiteeb ki waa ti yejamm kaari? Kimaan bi ki waa ti kaar nba yaa a ti tuu nit ti niiwa ŋaan di na.”

3Ki u mun boib a “Bee ki i mun ki sak Yennu sennu weiu ŋaan waa i yejamm kaari? 4Yennue din senn u sennu a ‘Turin a baa nan a naa nibaakir; ŋaan wunba tan sukir u naa amii u baa, a bin kpiu;’ 5ŋaan yimm ŋanin yaa a ‘Nirɔ-i bet u naa amii u baa a Ma bo sa turi linba na, li kpant Yennu yara; li ki tee miar kaa nan wun tur u damm siari.’ 6Ya tuun biaŋinba na, i dia Yennu sennu yanne, kimaan i yejamm kaar maŋ weiu paak. 7Yimm kpinkpannii damm na, Yennu sɔkinii Aisaya nba din pak i po biaŋinba na set tee barmɔniie. U din yet a Yennu yet a

8‘Niib na teenin nibaakir mɔi nie,

ŋaan bi para fɔk nanin saama.

9Bi jiantirin yanne,

kimaan bi dia nisaarii kaae ki want niib

kaman nan li set tee min Yennu sennue na.’ ”

Linba be nisaarik par ni labaar

(Mak 7.14-23)

10Ŋanne ki Yisa yiin nibur na ki tan yetib a “Gbiintir man, ki bann linba ki n yaa n yeti na paak; 11linba kɔɔ nisaarik mɔb ni kan fit teenɔ jakint u par ni; ŋaan linba be nisaarik par ni ki nyi u mɔb nie teenɔ jakint.”

12Ŋanne ki u poorpoweiteeb baar u boor ni ki tan boiɔ a “A mi nan Farisiinba na nba gbat a maan maŋ na, bi wutoa doo a paakawa-aa?”

13Ki u jiin betib a “Tiik nba kur ki n Baa Yennu nba be sanpaapo na ki wuu, see ki bi tan ŋabire ki lu. 14Li paak, ŋaantib man ki bii saa, kimaan bi tee kaman nan jɔɔnii nee ki daar bi jɔɔnlei; ki li-i tee ki jɔɔŋ daar u lɔɔ, see ki bi kura baa bootuk ni.”

15Ŋanne ki Piita jiin ki betɔ a “Wantit barjouk na paak.”

16Ki Yisa jiin a “I mun bia lek daa ki bant n maan na paakii? 17I ki mi nan linba kɔɔ mɔb ni, li yaa lin sik poor nie, ki kpant bint ki nyii-ii? 18Ŋaan barbiit nba ki nisaarik piak u mɔb ni, li nyii u par nie, ŋann mune teenɔ jakint. 19Kimaan nirɔ par nie ki dudukbiit nyi, nan nikpinu, nan bonchonchonn toona, nan nanyukin, nan faak siara, nan sanjaauŋ. 20Linba na nbae teen nisaarik jakint, ŋaan niijakina dinu kan fit teen nirɔ jakinti.”

Poosɔɔ nba din teen Yisa yada biaŋinba

(Mak 7.24-30)

21Tɔn, ki Yisa nyii leŋ ki saan Taya nan Saidon bɔkir po. 22Ŋanne ki Kenann tiŋ ni poosɔɔ nna mun din be bɔkir maŋ po, ki tan baar Yisa boor ni, ki yeen a “N Yomdaanɔ, David yaaboonn, tinimin ninbaauk! Narinbiiuk be n bipoo ni, ki mukisɔ bonchiann.” 23Ki Yisa din ki jiin siari; ŋaan ki u poorpoweiteeb betɔ a wun ber poo na, kimaan u mɔk fuut.

24Ŋanne ki Yisa jiin ki betib a “Israel teeb nba tee kaman nan pei nba bot na, ŋamm kuukɔɔe ki Yennu tumin a man saan bi boor ni.”

25Ki poo maŋ baar ki tan gbaan Yisa tɔɔnn ni, ŋaan yetɔ a “N Yomdaanɔ, sommitin.”

26Ki Yisa jiin betɔ a “Li ki ŋan ki nirɔ-n jii waas jeet ki tur bɔi.”

27Ŋanne ki poo na jiin a “N Yomdaanɔ, li set tee mɔniie; ŋaan bɔi nba dɔɔ bi daanɔ saaŋmanii boor ki kɔŋŋit jebura nba baa tiŋ ni ki tɔkii dii.”

28Ŋanne ki Yisa ji yetɔ a “N diamm, a teenin yada bonchiann. Linba ki a loon na, lin tun nna ki tura.” Ki u bipoo maŋ la laafia li taakpaak ni.

Yisa nba din te ki baatib bonchiann paak biaŋinba

29Li poorpoe ki Yisa nyii leŋ ki gar Galilee mɔkgbeŋŋir kpiŋ, ki saa doo kar jɔɔr paak. 30Ki niburchiauŋ baar u boor; ki bi baar nan wɔbii, nan jɔɔnii, nan mui, nan dianii, nan binba yiar yiarbooru booru kura, ki tan birib u tɔɔnn ni; ki u te ki bi kura paak. 31Ki nibur na nba la ki mui piak, ki dianii paak, ki wɔbii somm, ki jɔɔnii laat na; ki li yaar ŋaan litib, ki bi piak dont ŋamm Israel teeb yabint Yennu na sann.

Yisa nba dinn jab tusa ŋanna biaŋinba

(Mak 8.1-10)

32Ki Yisa yiin u poorpoweiteeb ki tan yetib a “Ninbaauk mɔkin nan niib na, kimaan daa ŋanntaae na ki bi be n boor nna, ŋaan ki mɔk jeet ki di. N ki loon man kunnib nan komi, ki bi tan sa mann fib nan kon.”

33Ki u poorpoweiteeb boiɔ a “Lee ki ti sa la jeet muuk na ni ki tur niburchiauŋ na ki bin di ki gboo? kimaan ba yab bonchiann biaŋinba na.”

34Ki u boib a “I mɔk boroboro kuna ŋaŋŋae?”

Ki bi jiin a “Ŋannlore, nan janbis waaminna.”

35Ki u bet niib na a bin kar tiŋ ni; 36ŋaan jii boroboro kuna ŋannlore nan janbis na, ki tur Yennu niipoouk li paak, ŋaan ŋmit ŋmit tur u poorpoweiteeb, ki bi jii tor tor niib maŋ. 37Ki niib na kur dii ki gboo ŋaan ki li tenn; ki u poorpoweiteeb lakin jeet nba tenn na, ki li gbee kpanchubit ŋannlore. 38Ki niib nba dii maŋ din tee jab tusa ŋanna, ki poob nan waas kann ki pukin leŋi. 39Li poorpo ki Yisa chab niib maŋ, ŋaan kɔɔ burgbetir ni ki poot kɔɔ Magadan tingbouŋ ni.

Tans Gekies:

Matiu 15: BIM

Kleurmerk

Deel

Kopieer