LUKE 24
24
Hiwurnarei Ringthut
(Mt 28.1-10; Mk 16.1-8; Jn 20.1-10)
1Haptayei(tangla tlunpul) lamkri tlainirou Marngeiniyei ningshun manma napuiya rapne, yai marshikkur muiknam shirekya urbine lhanra wakur. 2Heirou lhanpur pingkhalna thlungpak heiwari latdurbi louklei heiya yane wamukur. 3Heisi tounarouri yane rilla wachangkur. Heiya yane Pu Jesuei sharungri wamumakur. 4Heirou yane kngakni mayungbi leiyeinung, lepcharou loumuthungmakne napawa napung-khnine kar'alkur shambni kanshambine yaipongra mayungbi heiklei. 5Heirouri napuiya rapne mathunwurbi shikhuplhakbine leikur, heirou napawa rapne yanungei kyun, “Nane kounungei hikur rapbei hangrei ringthutkur heiwaya raphakurrawo? 6Ari bi arou makkura; ringthutdura. Ane Galilee'ra nale pulne leikhouyei yunkhou heiwaya nane ningthutlak: 7‘Thimiyei Chanapawayari borh thimi rapbei hutra malanlhakurbi, heirou manyarhatrou, heitoubi khyumni tlungrouri ringthutthurou.’ ” 8Heirouri napuiya rapne Aiyei shunkhou tlou rapya ningthutkur, 9heirouri yane lhanbom heirouwei cheemra kallengurbine, thukkur lhou namyerwa heiya ruishikrap napung chiple khatnungle heitoubi thimidei namnungei hungsunpikur. 10#Mk 16.1; Lk 8.1-3; Jn 20.2. Napuiyarap heiri Mary Magdalene, Joanna, heirou Jamesyei pui Mary; heitoubi napuiya dei rapkhi yale pulne kalhonbi lhouthuk namyerwa heiya Paocha rapnung shunpikur. 11Heiya Paocha thimi rapne tlou heiwaya mandalme toubine lhou hoipimakur, heirou yai kyun heiwaya malungampimakur. 12Heiya Peter'ne kanthoubi lhanranung chankur; heirouri ane lhanrilla shikhuplhakbi thinarouri lhanrilla phaikhringei punshel nimakne deiri koukhatkhi muphamak. Heirouri ane thukkur lhou heiwirou kngakni cheemra kallengkur.
Emmaus Yulthungranung Chakur
(Mk 16.12-13)
13Heiyei tlainihakrou Jesuei hilthung thimirap napung-khnine Jerusalem'rouwei lamtup enitam tlatrilbi klei Emmaus yulthungranung lam tlayeinung, 14thukkur lhou rapbei ngamrou yakhune heisi yunrilbi loucha. 15Heirou yakhuntane heisi yunrilbi chayeinung, Jesu'ne yaihangra pokarsilbi pulne chamalnakur. 16#Jn 20.14; 21.4. Yakhunekhi Aya loukmu, heiya yai mitne mubikhi A heiri huwo touri yane mumanrechangmakur. 17Heirou Jesu'ne yakhuntanung kngai, “Nakhuntari lam tlamalom yunrilkur tloubomya kouwo?” Heirouri yakhuntane uksabi loumayungkur. 18Heirou yai tlakrei napung khat- aiyei minri Cleopas toubi ung heiwane anung loumallang, “A'tlak'khatrou Jerusalem'rei lhouthukya mumakei klei miram-mithrillei thimi wa'tlungna hangrouri neitamtom'ngeisane?” 19#Mt 21.11; Lk 7.16; 13.33; Pao 3.22. “Kounaksi lhouthukya leikurawo?” toubi Ane loukngai. “Nazareth'rei Jesuei ngamrou lhouthuk khat kleime,” toubi yane loumallangkur. “Napawa heiri Thimkhui, heirou A heiri Dunpunekhi heirou thimi namyerwanekhi aiyei toukur lhou rapya heitoubi aiyei yunthutkur tloulhangser heiri mantrang kyaome toubine karsilkna. 20Kaiyei Suipipu raple heirou Raallui pu rapne aya hatnungei pithutdurbi, heitoubi Aya heengkarbakra manyarhatkur. 21Heirou kane malungamni ningchalei touri, A tomni Israel rapya kalpirouri! Moi chimlei, touri heirapya duine, lhou heiwaya thukkur heirouwei waiyoubine angtuhak awari khyumni tlungura. 22Kaihangrei napuiyarap thane kaya ngakyerkuri, yane ningshun manma lhanra wabi thinarouri, 23Aiyei khi'lhung heiri wamumakura. Heirouri yane kallengbi, ‘Thangring rapne Ari ringthudura toubi loushunpi heiri kane muwurla’ toubine yane hungshun. 24#Jn 20.3-10. Napuiya rapbei kyun'nakne kai hangreikhi thane lhanra wathinarouri heinakrimne louklei, heiya yane Aiyei khi'lhung heiyari wamumak.” 25Heisi tounarouri Jesu'ne yanung kyun, “Kounakei yuntlungmak thimi rapbo nari, Thimkhui rapbei yunthutkhourap heiya nane uklumrouri nai ukning heiri kounakei tapkurrawo! 26Heinaksinung'tlim hipinanungei Messiahni klah-knang doubine, heirou Aiyei thang'allei lhoubomra changbom thukmakeiya?” 27#Lk 24.44-45; Pao 28.23; 1 Pt 1.11. Heirou Jesu'ne aingamrou Khyingei Lailikra mayelhakpikur hei rapya Moses'yei lailikrei waiyoubine Thimkhui rapbei mayepikhou namyerwaya yanungei waiknaini yenyunpikur. 28#Mk 6.48. Heirouri yane wachangrou kyou yulthungra heikarnakkur heirouri, Jesu'ne yaya tladuirou'nakrimne wairangkur; 29heiya yane Aya khamthungbi kyun, “Angturi kale pulne chaklakase; ngamri kinnikhi yenchipbura, heirou mehkhi yenmehwura.” Heisi tounarouri Ane yale pulne yarekkur. 30#Lk 9.16; 22.19. Heitoubi ane yale pulne lukturng doura chamainanung omkarhilkur, heirou ane mumtol loubine, Dunpuei phor buchakur, heirou Ane threlchaalbine yanungei malanpikur. 31Heirouri yai mitmai warrubine yane Aya mumanrekur; heiya yane Aya kanreni muwurnarouri kanchai mangurthu. 32Yane khatle khat yunrilkur, “Ane lam tlayeinung tlou yunkur heitoubi Khyingei Lailik rapya shunmatupiyei kalnungri kai malungra meinakne loukangkur nimaka?” 33Heirou yane tallengne kanthouwurbi Jerusalem'ra kallengkur, bi heirou ruishik napung chiple khatkhi heirou thimi deikhi pulne kartilbi louklei hungchanphakur, 34#1 Co 15.5. heirouri yane hungshun, “Upawa heiri tanghakne ringthutdura! Heitoubi Ahakne Simon'nungkhi muyerwurla!” 35Heirouri ya napung-khnine lam tlanarei thukkur lhou raple heirou yane mumtol shaibi leiyeinung Upawaya koutoubi mukurro tou heiri yanungei yunpikur.
Jesu'ne Aiyei Ruishik Rapnung Mu'kyer
36 #
Jn 20.19-20,27; 21.5,9-13; 1 Co 15.5; Pao 10.40-41. Heirou napung-khnine yanungei yunbi leiyeinung, tallengne Upawane yaihangra heimayungbi heirou yanungei kyun, “Nai malungdam hoiyasu.” 37Heirou yane chimathunwurbi, yai mukur heiri thralwangasane toubi ningchakur. 38Heiya Ane yanung kyun, “Koutounei nai ukning heiri plangkurawo? Heirou nai ukningra koutounei heinakei khalchanakurawo? 39#1 Jn 1.1. Keiyei hutmairale heirou Keiyei homairakhi thilak, Keihakme; nane Keiyei sharungra palthilak, heirou nane murou; kouweiyo touri nane Keiya mukurnakne lhawairi shamitee heirou thruri makrou.” 40Ane heitou yunbi heirou Aihutle Aiyei ho rapya yanungei mutpikur. 41Heisibilyakhi yane Aya uklumpimak, heiyanungkhi yai ukningra hakrao-nungkngaine thimkur. Heirou Ane yanung kngai, “Bi arou nai chaanung-mainung kou leilei?” 42Heirou yane Anungei thanga thungkhou harkhat louloupi, 43heirouri ane yai maibongra loubine thanga hei mailoukhei. 44#Lk 24.26-27; Pao 28.23. Heirouri ane yanung kyun, “Atoubi Keine nale pulne leikhouweinung yunkhou namyerwa heiri, heitoubi Keiyei ngamrou Moses'yei Tloulamra, heirou Thimkhui rapbei lailikra heirou Laa lailikra mayelhakurkhou namyerwa heiso kartlikmakne hungtlungeirou touri ariya.” 45Heirouri Ane yai ukning rapya latdurbine Khyingei lailikya mulhakyerkur, 46#Hos 6.2; 1 Co 15.3-4. heirou yanungei kyun, “Mayepikurri arime: Messiahni klah-knang doubi hipiwurbi, heirou khyumnirouri hiwurnarei ringthutthurou. 47#Pao 1.4-8; Mt 28.19. Heitoubi Aiyei minra lim namyerwane borh'rouwei ukning hungurbi kukpi phanei lhangaiyei paolaaya, Jerusalem'rouwei waiyoubine shunthutpirou. 48Heirou nari lhouthuk namyerwa heiya mitne muthungbi heinung'tlim mayung thimi hoirouso. 49#Pao 2.1-4; Jn 14.26; 20.21-23. Heitoubi thilak, Keine naidoura Pawaei tlou kantompikur heiya malhetsundapirou. Heiya naidoura thang'allei mantrang hei yongdapibongyenri nane Khukarthilra karngeibi louleiniyalo.”
Jesu'ya Thangmunra Urbaangkur
(Mk 16.19-20; Pao 1.9-11)
50Heirouri Ane yaya Jerusalem'rouweine Bethany wa'tlungne ruilouheikur, bi heirou Ane yaidoura Aihut lambine yanungei phor pikur. 51#Pao 1.9-11. Ane yaidoura heisi phor shampikhoubi, heirou Ane yaya lakurkhoubi heitoubi Thangmunra loubaangkur. 52#Pao 1.12-14. Heirou yane Aya khrumkhoubi hakraone thimmurbi Jerusalem'ra kallengkur, 53heirou yane kheenserrou Pukhrumna Cheemra Dunpuya mathangbine leikur.
Tans Gekies:
LUKE 24: MARIBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
