KANTHOUNA 2
2
Sabbath
1 #
Hoy 20.11. Heisitoubi Thangwanrei wanshangle tlaipangpal heirou Aiyei hutsarap nammakhi sheemwurchila. 2#Heb 4.4,10. Heirou tlaini enini tlungnirouri Dunpune Aiyei hutsa rapbei lhouya luilhakurla; heitoubi tlaini enini tlung heirouri Ane Aiyei lhou'rouwei mathrilkur. 3Heirou Dunpune enini tlung tlaini heiya marthingthutbi khyingei tlaini khoini phor pikur; ngamri Dunpune Aiyei sheemthut-sathutnei lhourap namyerwa luilhakbi heiyei tlainirou mathrilkur.
Heengna-Rona Sheemkur
4Heirouri Dunpune Thangwan ramle heirou Tlaipang thlei sheemthutnei wari asitoubi klei:
Umpu Dunpune tlaipangle thangwan rapya sheemthutni tlainirouri, 5heikhei heengtrung-rotrungrap heirou ramna-louna kouchakhatkhi pukmakhui, ngamri Dunpune thleimaira nung rosundayermakhui; heirou thlei toubaibi lou trunpirou tlaipang thimikhi makkhui. 6Heiya thleimairei yuinil kabine heitoubi nungthoura yuiramei omyerkur heitoubi tlaipangpal karyouni nung rosundakur. 7#1 Co 15.45-47. Heirouri Um Dunpune thleirei rahuini tlaipang thimiya sheemthutkur, heitoubi aiyei napurra khringei nil solhakpikur; heirouri thimi heiri lhawai khring chiwi khat hoikur.
Eden Yekul Sheemkur
8Heirouri Um Dunpune kulkung lhangrei klei Edenra yekul khat sheempikur, heitoubi Dunpune bi heirou Aiyei sheemkur thimiya khoupikur. 9#Kre 2.7; 22.2,14,19. Heitoubi Um Dunpune thleirei heengna-rona limlimkhi pukyerkur, heirou heengtrung-ramtrungrap heiri thiyeinung ukningra beimakni pilkna, heirou chamainungeikhi lhangai, heitoubi yekul heiyei tlailamra khring chaanyei heengtrung khatkhi pukyerkur; heiyei heengtrung heiri lhangai-lhangaimak ningmu'kna khyallei heengtrung khatkhi khoi.
10Heitoubi yekul heiya yui chainungei Edenra Kung khatkhi chankyer; heirou bi heiyei kung heiri kungban phalitam karphaangkyer. 11Heirou lamkri kungbanyei minri Pishon toubine ung, heirou Pishon kungban heiri sinani bil thimbi klei Havilayei ram karyouni chan. 12Heirou ram heiyei sinari beimakni lhangai, ram heirouri muiknam bedola mroh trungkhi heirou Onyx thlung'khringkhi marthumni klei. 13Heirou khintamtlung kungban heiyei minri Gihon toubi ung; kungban heiri Cushyei ram karyouni chan. 14Heirou khyumtam tlung kungban heiyei minri Tigris toubine ung; kung heiri Assyriayei kulkung lhangra chan. Heitoubi phalitam tlung kungban heiyei minri Euphrate toubine ung.
15Heitoubi Um Dunpune napawa heiya Edenyei yekulra khoupibi, heirou yekul heiya lhouchur-lhoupangbini thikulkyer. 16Heirou Um Dunpune napawa heiya chay pibini shun, “Yekul rillei klei heengtrung kantangrei hei heiri nangni leemni cha kya; 17heiya lhangai-lhangaimak ningmuna khyallei heengtrungrei hei heiwari nangni kouniroukhi chanung yamakrou; ngamri nangni hei heiya chaloukur tlainirou nangri shuimakni hirou.”
18Heirouri Um Dunpune shun, “Napawa heiya aitamtom leikyer heiri lhangaimaklei; heineri akou leikalhonbi trungpinanung thimi khat Keine sheempirouwa.” 19Heitoubi Um Dunpune thlei'rouwei yaalim-yoolimrap, heirou nungthourei traicha waalim kantangkhi sheemthutkur, heitoubi heirapya thiyerbi yaiyei min rapya thulyernanungei napawa heiyei bira yenkhoupikur; heisitoubi aiyei thulbangpikur minrap heiri yaalim-yoolim rapbei min hoikur. 20Heisi toubine napawa heini ui-waa rapbei minkhi, nungthourei traicha ramwaa rapbei minkhi, heirou ramhangrei yaalim-yoolim kantangei min rapkhi thulbangpikur; heiya Adamyeiri akou leikalhon kya aya trungpirouri hukhatkhi yaomaklei. 21Heiyei ngamni Um Dunpune napawa heiya khinakni iplhakyerbi, heirou ani iplhakkur hillouri Dunpune aiyei mnak thru khat louthutkur, heitoubi mseibi heiri shamiteeni tholkhalkur. 22Heitoubi Um Dunpune napawarei louthutkur mnakpou thru heini napuiya khat sheemthutkur, heitoubi aya napawanungei yenpikur. 23Heirouri napawa heini loukyun: “Asinungri a heiri keiyei thru rapbei thru; heirou keiyei miteeyei-mitee; heineri ayari Napuiya toubine ungrou. Ngamri a heiri Napawarei louthutkur.” 24#Mt 19.5; Mk 10.7; 1 Co 6.16; Eph 5.31. Ngam heineri napawa khatni aiyei pui-paya horkhoubi, heitoubi aiyei nule leikalhonrou; heitoubi yarukhniri sharung khatsi hoirou. 25Heitoubi napawa, napuiya khintam heini nu-shal shangram khat hoibini, phitho tilrilnara koukhi khyarilnei rikraikna makrou.
Tans Gekies:
KANTHOUNA 2: MARIBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
