RIPHUTNA 25
25
Abrahama richi danghei
(1 Rich.1:32-33)
1Abrahama khan nupui dang a nei a, arming chu Keturi a nit a. 2Ani khan Zimrana, Joksana, Medana, Midiana, Isbaka, Suaha hei a nei pêk a. 3Joksana khan naipa Seba neh Dedana a nei a. Dedana naipahei chu Asurhei, Letushei, Leumhei an nit. 4Midiana naipa hei chu Efa, Efera, Hanoka, Abida, Elda hei an nit. Khahei murdi khah Keturi naihei chu an nit.
5Abrahama khan ai nei murdi Isaka a pêk a. 6A thâikêmnu naipahei kha chu Abrahama khan a la dam lâi ngêiah khan thilpêkhei a pêk a; khanungchu, a naipa Isaka an chîm inbuai nona rangin anni chu khosak tiang ramah ân fe riai tâk a.
Abrahama thi thu neh an phûm thu
7Abrahama dam sung chu kum riza lei sômsarika ringakah a nit a. 8Abrahama kha tar ikhûna damin a thi tâk a, a chipuihei ziangah iṭhuiin ai om sa tâk a nit. 9A naipahei Isaka neh Ismaela khan Hit mi Zohara naipa Efrona ram Mamre sak tianga Makpela pûkah khan an phûm tâk a; 10Kha mun khah Abrahaman Hit mihei ziang ata a irchôk a nit. Amakhan Abrahama neh Sari chu munkan an iphûm a nit.#Riph.23:3-16.
11Abrahama thi nungah khan Pathianin a naipa Isaka chu ṭhat a vur a; Isaka chu Beer-lahai-roi kôlah khan a om mai tâk a.
Ismaela richihei.
(1 Rich.1:28-31)
12Hihei hih Abrahama naipa Ismaela, Sari suaknu, Aigupta mi Hagarin Abrahama ai nei pêk richihei riming chu a nit. 13Hihei hih Ismaela naipahei a ûnlian indôna riming chu a nit: Ismaela nai lutîr chu Nabaiota a nit a; a unaihei chu Kedara, Adbeela, Mibsama, 14Misma, Duma, Masa, 15Hadada, Tema, Jetura, Nafisa neh Kedema hei an nit. 16Khahei khah Ismaela naipahei an nit a; an khua neh an riabuk chit an riming riput tâk chu a nit a, annihei kha nam sôm lei nam inika richibulhei chu an nit. 17Ismaela damsung chu kum riza lei sômithumka sarikah a nit a; khanchu, a thi a, a chipuihei ziangah khan iṭhuiin a om tâk a. 18Ismaela naipahei chu Havila rama rithoka Asuria ram isonga Aigupta ram ridîn Sur idênin an om a. Abrahama richi dangheia rithokin a ranin an iom a nit.
Esauva neh Jakoba suak thu
19Hihei hih Abrahama naipa Isaka richihei chu an nit: 20Isaka khan kum sômilika mi a nitin Mesopotamia rithoka Suria mi Bethuela nainu, Labana farnu Rebeki chu nupuiin a nei a. 21Rebeki khah a ching sikin Isaka khan Pumapa ziangah a ṭongṭai pêk a. Pumapa khan a ngênna khah arngai pêk a; khanchu, a nupui Rebeki khan nai a vong tâk a. 22Nai inphîr a vong a, a naihei khah an la suak ma, sungah an om lâi rengin an risual ngai a. Ani khan, “Hingka hin a nit rangin teh ring zoi ki tîma o?” a ti a. Khanchu, Pumapa isôn rangin a fe tâk a.
23 Pumapa khan a ziangah,
“Ni sûlah khan nam inikah an om a,
Ni sunga rithok ngêiah khan chi inikah ringei ino tak an om;
Nam khatkah kha nam khatka nêkan rât ual a ta;
A ulian ual khan a naipang ual sin thông a ti,” a ti a.#Rom.9:12.
24A nai nei zoro a hong nitin chu nai inphîr ipa a hong nei tâk a. 25A masa ual chu a sen vung a, puan rimul angkana rimul thûtin a zuang suak a; khanchu, arming kha “Esauva” #25:25 Esauva ti hih ‘Seir’ iti neh a omzia munkah a nit, Edom iti neh khom a omzia munkah a nit, ‘Rimul thût, mul isen thût’ iti nîng a ti. an sak a. 26Kha rizoiah khan a unai khah a zuang suak nôk a, a kutin Esauva ke khah â tûk khap a; khanchu, arming kha Jakoba#25:26 Hebraihein ke ârtui iti hi ‘Iakob’ (Jakob), an ti a. ‘Nung tianga mi rizûl,’ ‘Riat loi kâra mi doi’ tina a nit thei a, amakhah ‘Ilêm’ tina khom a nit thei sa. Jakoba riming hi ‘Lêmtu, Milêmsia’ itih thei a nit. an sak a. Rebekin annihei khah a nei lâiah khan Isaka chu kum sômirukka mi a nit a.
Esauvan a nai lutîr nitna a zuar
27Naipanghei khah an hong thuar a; Esauva kha sa kâp ithiam tak, ramvatualtla tak a hong nit a; Jakoba kha chu mi tak inning, insung ngaisak mi tak a nit. 28Isaka khan Esauva kha sa kâp ithiam tak a nit sikin a kan ual a; Rebeki rêk khan chu Jakoba khah a kan ual a.
29Sûnkah chu Jakoba khan itika a but a; Esauva khah ram tianga rithokin rizal nengkan a hong suak a. 30Esauva khan Jakoba ziangah, “Ringaiihoi takkan ni itika sen but khah nen fah ta; ṭâmsôl ne itho kêng,” a ti a. Khasika khan arming khah Edoma#25:30 Hebraiin Edom, a sen tina. an ibe sa tâk a nit.
31Jakoba khan, “Ni nai lutîr nitna ni ne pêkin chu nang pêng ki ti,” a ti a.
32Esauva khan, “O a ṭhat, voniṭâmin kî thi rang kêng; nai lutîr nitna hih ki rangin im arfena a om rang?” a ti a.
33Jakoba khan, “Ni nai lutîr nitna nang ki lan iti ṭongrikhâm bak roh,” a ti a. Khanchu, Esauva khan ṭong arkhâm a; a nai lutîr nitna khah Jakoba ziangah a zuar tâk a.#Heb.12:16. 34Khanungchu, Jakoba khan Esauva khah ibai neh an ibut a pêk a, a fâk a, a in a, a thoi a, a fe tâk a. Khangkah khan Esauva khan a nai lutîr nitna khah ai ngainêp a nit.
Tans Gekies:
RIPHUTNA 25: BIATBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible Society of India
© 2014, Used by permission. All rights reserved. More
