RIPHUTNA 19
19
Sodom khua sualzia
1Vântirtôn inikahei khah kha nî kholoiah#19:1 Abrahama omna Hebrona rithoka hin Sodom khua hi sûn nikah lam a nit. khan Sodom khua an zu tlung a; Lota khah Sodom khua kul dâikotah khan a lei iṭhung a. Lotan anni khah a mu kaneh chu a thoi lik a, a lei va don a. An makungah khan â bok a, 2an ziangah, “Epuhei, ringaiihoi takkan nin suak inah hong lût hi unla, zân hong riak rei, nin kehei risûng nin ta; khanchu, zîng takah nin fena ranga chu la fe nôk rei,” a ti a.
Nikhomsela, anni khan “Ni mak e, tolâiah hin la riak pai rong ung,” an ti a.
3Khannisela, anni khah â thlêm â thlêm sikin a ziangah an fe a, a inah khan an lût tâk a. Lota khan â somhei khah chol pol ino ibai isiam a, a mikhualhei rang fâk itui tak inrifûk rangin a tir a. An inrifûk zoiin chu an fâk tâk a.
4An zâl maah khan Sodom khuaa mi itar ivâng an rêngkan in khah an hong hual a; 5Lota khah an isam a, a ziangah, “Vuanzâna ni zianga riak ranga mi hong ilûthei khah taktiang im an iom? Nuamninga kin ompui theina rangin kin ziangah hong ṭhui suak roh,” an ti a.#Roi.19:22-24.
6Lota khah inkhâr bulah khan an ziangah a va suak a, inkhâr khah putiang a hei khâr nôk a. 7An ziangah khan, “Suapuihei, ringai ihoi takkan khangkah dôr dôr chu insual tum no rei ba! 8Ringai rei, ipa lai tôn ngai ino nainu inikah ki nei a, anni khah nin ziangah hong ṭhui suak ki ta, nin nuam lam takkan an chungah la tho ta rei. Nikhomsela, hi mihei chungah hin chu îte tho tlak no rei, ki mikhual an nit a, ke hoi rang an nit,” a ti a.
9Khannisela, anni khan, “Rikiang roh; nangmah mikhual hintaka om ranga zuang rithon hin kin chungah thu nei nî tum na hi; anni chunga kin itho nêka inrik ual ni chungah kin itho rang a nit,” an ti a. Khanchu, Lota khah an nam ṭuk ṭuk a, inkhâr iseh rang itumin an hong nâi a. 10Nikhomsela, mi pasal inikahei khan an kutin an hei iban a, Lota khah insungah khan an hei kâi lût a, inkhâr an ikal khap tâk a. 11Khanungchu, inkhâr bula om mihei khah â lian â chînin; an mit an indel#19:11 Vântirtônhei hin ivâr an isua a, amakhan an mit a îndel pêk a nit, â del thal tâk tina ni mak. pêk a, inkhâr khah mu thei khâi mak a.#2 Rêng.6:18.
Lotan Sodom khua a mâk
12Mi pasal inikahei khan Lota ziangah “Hi khosungah hin insungkua dang ni nei im? Hi khuaah hin imâkhei, nainuhei, naipahei neh insungmi dang dang nî nei murdi kha ṭhui inla suak rei. 13Hi khua hih kin înrimang rang a nit, hi mihei thurchi Pumapa beng hong itlung khah rikhêl natinsat tak a nit a, ân rimang rangin Pumapa khan a ne itir a nit hi,” an ti a.
14Khanungchu, Lota khah a suak a, a nainuhei ineitu rang, â mâk hualhei ziangah khan a fe a, an ziangah, “Thoi unla, ei khua ata hih suak zel ta rei, Pumapa khan khua hih a înrimang rang a nit,” a ti a. Nikhomsela, â mâk hualhei khan thuzer itho angka paiin an lei ringai a.
15Kôlrisam kaneh chu Vântirtônhei khan Lota khah an tur lîp a, “Rimot roh, ni nupui neh ni nai nupang inikahei hih ṭhui inla, suak ta rei; khanonchu, hi khua inrimangnaah hin nangni khom nin rimang sa duai lôiin,” an ti a. 16Nikhomsela, Lota khah a lar vuak zâm a; khanchu, Pumapa khan ani khah lung ân kham sikin mi pasal inikahei khan a kutah neh a nupui kutah neh a nai nupang inikahei kutah khan an itûk a, khua ata kha an kâi suak tâk a.#2 Pet.2:7. 17Khua penah an va thak zoiin chu Vântirtôn khatkah khan Lota ziangah, “Nin ringna rangin itlân suak rei; nin inung tiang ngat no unla, phâizôl khomah ringam viat no rei. Itlângheiah son itlân thal rei; khanonchu, nin irmang rang a nit,” a ti a.
18Lota khan an ziangah, “Epuhei, ringaiihoi takkan kha angkan ni no riseh. 19Nin suak hin nin lungkhamlianna natinsat tak ki dong a, kha lungkhamlianna khah ki ringna inzôkin ki chungah nin inlang tâk a. Nikhomsela, itlâng soh chu a lat rei tâk; hi thil ṭhano hin ne hong de phâk a ta, so mun soh ki tlung man kî thi rang a nit. 20Khasikin, en ta u, soa khua soh nin hei mu na? Inâi tenga om a nit banah khua chînte khom a nit a, ama son lei fe rong; khanchu, zôk ki ti,” a ti a.
21Ani khan a ziangah, “A ṭhat, nang ke zoipui; ni khua ti kha chu inrimang no ning e. 22Rimot inla, amakhan itlân roh; kha mun ni tlung mâkah chu îte kî tho thei ino rang a nit a,” a ti a.
Lota khan khua chînte a ti sikin kha khua rimingah khan Zoar#19:22 ‘Îte ni no, Â chînte,’ tina a nit. an ibe tâk a nit.
Sodom neh Gomora khua kâng siat thu
23Lota khan Zoar khua khah a tlungah khan inî khah a hong suak tâk a. 24Khanchu, Pumapa khan Sodom neh Gomora khua chungah khan mei neh kât rivâna rithokin ân sûr zel tâk a.#Mat.10:15; 11:23-24; Lk.10:12; 17:29; 2 Pet.2:6; Juda.7. 25Kha khuahei khah ân rimang vang a, phâizôla khuahei neh mi murdihei kha rinênga thil iṭoi murdi neh khan ân rimang vang tâk a.
26Lota nupui khan chu nungtiang a ngat a, ichi lungphun a chang tâk a.#Lk.17:32.
27Abrahama khah zîng takah a thoi a, Pumapa makunga â dingna munah khan a hang fe a. 28Sodom neh Gomora khua tiang neh phâizôl ram tianghei a zuk thlîr a, kha ram ata meipui khû angkana meikhû ding ngut a zuk mu tâk a. 29Nikhomsela, Pathianin Lota omna phâizôl khuahei ân rimang lâiah khan Abrahama kha a riat mai a, Lota kha rimangna ata ai san isua a nit.
Moabhei neh Amonhei hong riphutna bul
30Lota khah Zoar khuaah khan a om ngam no sikin amah neh a nainu inikahei khah tlângramah an rot a, ipûkah khan an om tâk a. 31A nai nupang ulian ual nu khan a unainu ziangah khan, “Ei pa hih a ûnlian tâk a, rammual balama ne nei a, nai nen nei rang lak rinêng chungah hin ipa khatka lua om khâi mak a. 32Tho, ei pa hih uain in-in ei ta; a ziangah zâl ei ta; khanchu, ei pa richi hih a irmang ino rang a nit,” a ti a. 33Khanchu, kha zân zelah khan an pa khah uain an in-in tâk a; a ulian ual nu khah a lût a, a pa ziangah khan a va zâl a; nikhomsela, ani khah ân rui rai sikin a nainu khah a hong zâl lâi khah reh mak a, a thoi nôk lâi khom khah reh ual mak e.
34A tûkah chu a ulian ual nu khan a naipang ual nu ziangah khan, “Zâninah khan ei pa ziangah ki zâl a; vuanzân khomah hin uain in-in nôk ei ta; a ziangah va zâl inla; khanchu, ei paa rithokin richi ei inei seng seng rang a nit,” a ti a. 35Kha zân khomah khan an pa khah uain an in-in a; a naipang ual nu khah a thoi a, a pa ziangah khan a va zâl tâk a; nikhomsela, ani khah ân rui rai sikin a hong zâl lâi neh a thoi nôk lâi khom îte reh ual mak a. 36Khangkah khan Lota nainuhei ruai khan an paa rithokin nai an ivong seng seng a nit. 37A ulian ual nu khan naiipa a nei a, arming kha, “Moaba,” a sak a; kha mi khah atûn lâia Moabhei richibul hi a nit. 38A naipang ual nu khom khan naiipa a nei a, arming kha, “Ben-Amona,”#19:38 Moab hi ‘Ki Pa ata inzir’ tina a nit. Ben-Amon hi ‘Ken zirpui nai, ki mihei nai,’ tina a nit. a sak a; kha mi khah atûn lâia Amon mihei richibul hi a nit.
Tans Gekies:
RIPHUTNA 19: BIATBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible Society of India
© 2014, Used by permission. All rights reserved. More
