RIPHUTNA 15
15
Abrama zianga Pathian Thuthlung
1Kha thilhei rizoiah khan, Abrama khan inlârna a mu a, Pumapa khan a zuang isôn a, “Abram, ṭi no roh, keimah hi nê pho ki nit hih, loman roinpui tak nang kî pêk rang a nit,” a ti a. 2Nikhomsela, Abrama khan, “O Pumapa Pathian#15:2 Hebrai ṭonga ‘Adonai IAHUA’ itia riziak a nitin chu ‘PUMAPA Pathian’ itia riziak a nit., nai lak nei mang a, ni loman khah ki ta rangin im ṭhatna a om a? Ker chon iluatu rang lak chu Damaska khua mi Eliezera hih a nit a. 3Nai lak ne pe tlak mak che a; en ta, ki ina om ki suak khatkah hih ker chon iluatu rang chu a nit,” a ti a.
4Khanchu, Pumapa thu khah Abrama ziangah a zuang tlung nôk a, “Ringai roh, kha ni suak Eliezera khan ner chon lua no nih, nangma rila râ ni naipa ngêiin ner chon chu ai lua rang a nit,” a ti a. 5Pumapa khan ani khah putiang a ṭhui a, a ziangah “Rivân tiang khi en inla, ârsihei khi ni tep theiin chu tho tep roh. Ner chihei chu khi ârsihei zâkah khi la nîng an ti,” a ti a.#Rom.4:18; Heb.11:12. 6Abrama khan Pumapa chu a iam a; khasikin, Pumapa khan a iamna khah a felnaah ai be pêk a nit.
7Khanungchu, Pumapa khan a ziangah, “Hi ram hih ni lua ranga nang ipe rangin Babilon rama Ur khua ata nang iṭhui suaktu Pumapa chu ki nit,” a ti a.
8Nikhomsela, Abrama khan, “O Pumapa Pathian, ki lua rang a nit iti ingkam ki riat rang?” a ti a.#Rom.4:3; Gal.3:6; Jak.2:23.
9Ani khan a ziangah, “Serâtchal kum ithumka mi, kêlpui kum ithumka mi neh berachal kum ithumka mi neh vaṭhu neh pharvali tete hong chôi roh,” a ti a. 10Abraman khahei murdi khah a hong pêk a, artiana takah a khoi chit a, a khoilok khatkah kha a kiangtiang khoilok ridîna khan a sia chit a; ivahei kha chu khoi mak a. 11Sasel ifah ngai ivahei khah saruakheiah khan an zu fûk a; nikhomsela, Abrama khan a lei ûm inrot mai a.
12Inî tlâk rang to takin chu Abrama khah a in thlar tâk a; khanchu, ṭina neh rilônthingnan a zuang rikhû tâk a.#Job.4:13-14. 13Pathian khan Abrama ziangah, “Ner chihei khah riat loi ramah mikhualin om an ta, suakin itâng an ta, kum rizalika sung dengthei intuangin om an ti.#Fes.1:1-14; TS.7:6. 14Nikhomsela, suaka mang namhei khah deng lân thei ki ta; khanungchu, kha ram ata khah richon itam takkah hong ichôiin la hong suak an ti.#Fes.12:40-41; TS.7:7. 15Nang khom ne bâ ṭuakin dam ni ta, rithlaringam takkan thîng ni ta, nang phûm an ti. 16Rikhûk ilîka tenan hi munah hin ner chihei khah hong kîr nôk an ti; Amorhei khah dengthei intuang inrupa an isual mâkah chu ki ûm isua no rang sikin,” a ti a.
17Inî a zuang tlâk a, zân a zuang zîngin chu, voikazelin meibêl ikhû zûl zûl neh meiser ichok luai luai rilong rilong chu sa khoilokhei kârah khan a zuang om a. 18Kha zân takah khan Pumapa khan Abrama ziangah thu a thlung tâk a, “Hi ram hih Aigupta ramrîa rithoka Eufratis vadung idênin ner chihei kî pêk tâk a nit.#TS.7:5. 19Kenhei ram, Kenizhei ram, Kadmonhei ram, 20Hithei ram, Perizhei ram, Refaimhei ram, 21Amorhei ram, Kananhei ram, Girgashei ram, Jebushei ram khom kî pêk sa a nit,” a ti a.
Tans Gekies:
RIPHUTNA 15: BIATBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible Society of India
© 2014, Used by permission. All rights reserved. More
