LUK 23
23
Jisu mi Pailet Ko Ahgii Bitii
(Mt 27.1,2,11-14; Mk 15.1-5; Jn 18.28-38)
1 #
Mt 27.1-2; Mk 15.1; Jn 18.28. Ho hikha sipahi atañ guritii, ho mohmi Pailet ko ahgii bitii. 2#Lk 20.25. Ho mohlu mohmi halii ritii, lubiidola, “Ngunu siika miyu siimi ngunu ganda mi niikhuniiche dopa kapato, ho ngunumi Kesar mika bisa niimi bima dopa, ho mo lyake Kristo radde hiila luniiñ mi.” 3#Mt 27.11-12; Mk 15.2-3; Jn 18.29-38; Lk 22.70. Ho Pailet mohmi takatii, “No Jew atañka Radde ha?” Ho mo lusitii mohmi, “No ludonii hiila siilo.” 4#Lk 23.14,22,41; Mt 27.24; Jn 19.4,6; Miin 13.28. Ho Pailet lutii nyibu burii atañ la miyu danii atañmi, “Ngo siika miyu ko hang diigyalugya nii kappa ma.” 5Hojalo mohlu gyunyatii, lubiidola, “Mo miyu atañmi lu luha ne, hikha Judia ho tonsḛr biidola, Galili hokii so lohe pa.”
Jisu mi Herod Ko Ahgii Bitii
6Siimi Pailet tapa lala, mo takatii hokoda siika miyusi Galili hokii ha. 7Ho mo Herod kii dalyi hokii hiila mo chila lala, mo mohmi Herod ko nembo bitii, hiika myodu ho motrḛ Jerusalem ho dutii. 8#Lk 9.9; Miin 4.27-28. Herod Jisu mi kappa lala, mo hempḛr hempyo tii, niimpalukoda mo mohmi hempḛr kappa nala hentii, niimpalukoda mo mohka piigo mi tapatii, ho mo kagiñnanii miiniiñmi kapatodo hiila hentii. 9#Mk 15.5. Hopa mo mohmi abuje takatii; hojalo mo hang lusi matii. 10Nyibu burii atañ la pagiinii atañ mo aruñho dala, hempḛr uropa mohmi halii biido. 11#Mk 15.17-19; Jn 19.2-3. Ho Herod mohka sipahi atañ agiñho mohmi khiima hama ho nyapa koya mohmi miitii; hiikahiibaho, mohmi hempḛr kapyo giiju agiilala, mo mohmi Pailet ko nenku bibii doku. 12Ho Herod la Pailet nyi ajiñ pa biisu tiiku hiika allo jaho hokii, niimpalukoda siimi kapyo yaho mo anye kone anyañ mi kasu matii.
Jisu mi Mendo Pa Lubiido
(Mt 27.15-26; Mk 15.6-15; Jn 18.39—19.16)
13Pailet miilañrumi gyotii nyibu burii atañmi ho sangii nii atañmi ho miyu atañmi, 14#Lk 23.4,22,41. ho mohlumi lutii, “Nunu siika miyu mi ngiiko ahgii bitii miyuatañ mika niikhu niiche niike hiila; ho nunuka kadopa mohmi takatii, kato, ngo hang kappa ma siika miyu ka miigya nii nunuka mohmika luniiñmi halii dopa; 15Herod tiirḛ haliima, niimpalukoda mo ngunuko mohmi nenku bitiiku. Kato, mohmi mendo pa ludopa hang lulii saniiñ giima; 16#Lk 23.22; Jn 19.12-14.Hopa ngo mohmi hike nelala ho mohmi apatalyi ku.” 17Siisi mo miyu kone mi mohlupa apalindopa lyitii dituñ soduho. #23.17: (kakato Mk 15.6)
18 #
Mt 27.20-23; Mk 15.11-14; Miin 3.13-14; Jn 18.38-40; 19.14-15. Hojalo mohlu hikha tongepa gyutii, “Siika miyu siimi mento, ho Barabas mi ngunupa apatokupe” 19miyu kone humina pattiih ude ho tuntii nii citi hoka payagaya kopa, ho menko hopa. 20Pailet hiira rongeta mohlumi luriitii, Jisu mi apa nala; 21hojalo mohlu gyutii, “Ledato, ledato mohmi!” 22Rohiñ niipa mo mohlumi lutii, “Niimpa, nii diimmah mo miitola? Ngo mohmi mendopa hang diigyalugya nii kappa ma; hopa ngo mohmi hila lala ho mohmi apatalyi.” 23Hojalo mohlu uroyapa lutii, hempḛr goropa gyubii dola lutii mohmi ledato. Ho mohluka luniiñmi miibitii. 24Hopa Pailet lutii mohluka kuniiñ mi miibi tote hiila. 25Mo hiika miyu miya apa lintii humina payagaya ho miyu menko hopa pattiih ho tuntii nii, humi na mohlu kutiinii; hojalo Jisu mi mohluka henko ho apa bitii.
Jisu mi Ledatii
(Mt 27.32-44; Mk 15.21-32; Jn 19.17-27)
26 #
Mt 27.32; Mk 15.21; Jn 19.17. Ho mohlu mohmi ingiila dokele, mohlu Sairene hoka Saimon mi setutii, ganda ka ago hokii ahku laka doniimi, ho pogyañ mi mohmi jobitii, Jisu ka kiiliñ ho jobii tola inke nendupa. 27Ho hiiko hempḛr miyu taropa mohmi imbo montii, ho annii akha atañ rimiromo ho mohpa heru biidola. 28#Lk 21.23-24; 19.41-44. Hojalo Jisu mokur biila mohlumi lutii, “Jerusalem ka wiinga atañ, ngiipa kheyo, hojalo nunupa ho nunuka himmeoho atañ paya kheto. 29Kato, allo hii loliñ kendoke niidana mohlu luchinii, ‘Tarluñ atañ lyanko kendo, ho ronge hetḛr wiinga bumanii atañ, ho ronge hetḛr anyi asiñ maniiatañ!’ 30#Mih 6.16. Ho mohlu luri kendo putoo atañmi, ‘Ngunu mi giije lope’; ho putoopuko atañmi, ‘Ngunumi giipyu biipe.’ 31Niimpalukoda mohlu matiirḛ siimi yasañ ka sale laka doho miido koda, sika selyi kuho niihtañ kendo?”
32Khiibe anye mita, hunyina diimmaroma tiinii, ingiitii mo agiñho mendu pa hiila. 33#Mt 27.33-44; Mk 15.22-32; Jn 19.17-24. Ho mohlu Dhinkhu hiila luniiñ gandaho ahchi tiiku, hiiko mohlu mohmi ledatii, ho demaroma anye mita, konemi lahbidalyiho ho konemi lahchi dalyiho. 34#Miin 7.60.Ho Jisu lutii, “Aba, mohlumi helloto; niimpalukoda mohlu chimake mohlu nii miido hiila.” Ho mohlu pota tuka siitii mohka pulye atañmi tache siidu pa hiila. 35#Lk 4.23.Ho miyuatañ aruñho datii, kala, hojalo sangiinii atañ mohmi somiñ biitii, lubiidola, “Mo khiibe mi lyangurtii; mo attoh mi lyangur siike nento, mo Pinii ka Kristo milo, mohka Kahenii Kone milo!” 36#Mk 15.23. Sipahi atañ tiirḛ mohmi nyapatii, ahhi biila ho mohmi roalha sarsii hokii bitii, 37ho lubiido, “No matiirḛ Jew atañka Radde milo, attohmi lyangur siito!” 38Hiiko pagetola miilañ mohka ayoh ho giitii, “Siikasi Jew atañka Radde.”
39Hiika leda konii demaroma kone mohmi sobiido, lubiidola, “No Kristo masuha ehna? No attohmi lyangur siito ho ngiinyi miilañmi!” 40Hojalo kone hii mohmi gabiido, lubiidola, “No Pinii mi biiso mapo, notiirḛ ahiñpa haliikotola dola? 41#Lk 23.4,14,22. Ho ngiinyi miyade miidiko miida; niimpalukoda ngiinyi yadiñde ngiinyi ka miigya kopa haliikotii; hojalo siika miyu si hang miigya ma.” 42Ho mo lutii, “Jisu, ngiimi hempa lyape niida no niika raddeganda ho ahchiku.” 43#2 Kor 12.3; Mih 2.7. Ho mo mohmi lutii, “Jijeloda, ngo niimi lukoso, siilo no ngiika agiñho Diilyañdiiloganda ho chabo kendoke.”
Jisu ka shiiniiñ
(Mt 27.45-56; Mk 15.33-41; Jn 19.28-30)
44 #
Mt 27.45-56; Mk 15.33-41; Jn 19.25-30. Siisi gunta talyañlenye pa lyitiiku, ho hikha kiiddiapiñ ho kamoramba dotii alyiñdalyi ka gunta tahiñ lohepa, 45#Hib 9.8; 10.19.danyi byongu dakele; piniiude daka pulye hii tanye sarche ritii. 46Ho Jisu, hempḛr goropa gyubii dola, lutii, “Aba, niika alah ho ngo ngiika yajiyallo mi tiilii biilyi ke!” Ho hiila lula lala mo shiihi tiiku. 47Siisi sipahi sabii siika lyiniiñ siimi kappa lala, mo Pinii mi assañtii, ho lutii, “Jije siika miyusi hang miigyamatii!” 48Ho hikha miyuatañ hoka dala ka kapanii atañ, mohlu hoka lyiniiñmi kappa lala, mohluka habyañho kiisu biidola mohlu ude ho inkur nyatiiku. 49#Lk 8.1-3; 23.55-56; 24.10. Ho mohmika kachiñ nii atañ la annii akha atañ mohmika Galili hokii ka imbo monii atañ adho ho dala kala datii ho siika drih atañmi kappatii.
Jisu mika Alie kuniiñ
(Mt 27.57-61; Mk 15.42-47; Jn 19.38-42)
50 #
Mt 27.57-61; Mk 15.42-47; Jn 19.38-42; Miin 13.29. Siisi hiiko Josep hiila miyu kone dutii Arimatia ka Jew taun hokii. Mo bulyañ hoka dubonii kone, denki ho lotii miyu, 51mo mohluka miipa ka miiniiñ ho miiniiñatañ mi talii mommatii, ho mo Pinii ka raddeganda mi metii. 52Siika miyu si Pailet ko ahtii ho Jisu ka shiima mi kutiiku. 53Ho mo hiimi jolo lala ho pulye bolyo ho aputii, ho mohmi yalañ hoka byuh heniiñ ho jotii, niihona siisi lohepa kone mitrḛ alie matiinii. 54Siikasi Miimyo biniiñ allo pa lyitii, ho dumoalo hii loritii. 55Annii akha atañ Galili hokiika mo agiñho ahbomonii atañ imbo montii, ho byuh mi kappatii, ho niihtañ pana mohmi jotiinii; 56#Mk 16.1. ho mohlu ahkur tiiku, ho kutu la nelii nansanii atañmi miimyo tii.
Dumoalo ho mohlu dumo nyatii lujubiniiñ chulipa.
Tans Gekies:
LUK 23: APATBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
