JON 2
2
Kana Hoka Mihie Millo Lasunii
1 #
Jn 4.46; 21.2. Allo lohiñ niiho mihie millo lasutii Galili daka Kana ho, ho Jisu ka annii hiiko datii; 2Jisu mitrḛ mihie millo lasu koho gyotii, mohka henjeajiñ atañ agiñho. 3#Jn 19.26; Mk 3.31. Roalha tanja kukele, Jisu ka annii mohmi lutii, “Mohlukii roalha nyiku mayuke.” 4#Mk 1.24; 5.7; Jn 7.6,30; 8.20. Ho Jisu mohmi lutii, “Annii akha si, ngiimi niipa nii miitote hiila? Ngiika myodu siisi ahma ranke.” 5Mohka annii miira atañmi lutii, “Mo nii hiila luchi hiimi miito.” 6#Mk 7.3; Jn 3.25. Siisi hiiko yakhañ khañkhe dutii, Jew atañka darii miiju miina naniiñpa, yakhañ khange abi nyikhañhe malo hikhañhe harpo kane ahnii. 7Jisu mohlumi lutii, “Yakhañ atañmi yasie hilii to.” Ho mohlu alañ lohepa poteje hiliitii. 8Mo mohlumi lutii, “Siisi hokii iche suliñto, ho hiimi butiiapiñ honiiñmika kagii bomi bito.” Hopa mohlu hokii suliñtii. 9Butiiapiñ honiiñ mika kagiibo yasie ka roalha lyiku niimi tanka lala, ho mo chimatii si nohkii ahtii hiila (miira yasie suliñbo chinsu tii), butiiapiñ honiiñ mika kagiibo mabo mi gyoliitii 10ho mohmi lutii, “Miyu kone abi kapyopa aya miya bipyodu; ho miyu atañka tangii lyikuho, ho sarsii roalha mi bidu; hojalo no roalha tampyo yamiya siisi lohepa atii budunii.” 11#Jn 2.23; 3.2; 4.54; 6.2. Siikasi, mohka miipyoja kagiñnanii miiniiñ, Jisu Galili ka Kana ho miitii, ho mohka tatu katu mi kakiñtii; ho mohka henjeajiñ atañ mohmi henje nyatii.
12 #
Mt 4.13; Jn 7.3; Mk 3.31. Siika hiiba ho mo Keparnam ho totii, mohka annii ho mohka anubarmii ho mohka henjeajiñ agiñho; ho hiiko mohlu allo lonye lohiñ hepa dutii.
Jisu Piniiude Ho Intii
(Mt 21.12,13; Mk 11.15-17; Lk 19.45,46)
13 #
Jn 6.4; 11.55; Lk 2.41. Jew atañka impobiiniiñ dituñ tunii tiiku, ho Jisu Jerusalem ho chatii. 14#Mt 21.12-13; Mk 11.15-17; Lk 19.45-46. Piniiude ho mo siihhiibo ho subuñ ho pakoo atañmi pyula doniimi kappatii, ho tiicko bihii bikhe siiniiñ mi mohluka kiiri miiko ho. 15Ho lopalo hibii dola, mo hikha rumi mompa limbiido, siibuñ agiñho siihhiibo miilañmi, piniiude ka agoho; ho tiicko bihii bikhe siila donii posa atañmi kumpa tii ho mohluka miitananii atañmi jopatii. 16#Lk 2.49. Ho mo hutiina pakoo atañmi pyula dotiinii lukotii, “Siika drih atañmi jopa limbiihe; nunu ngiika Aba ka ude mi kiiri miiko ude pa biila kemake.” 17Mohka henjeajiñ atañ hempatii hiila ketola done hiila, “Niika ude paka henahii ngiimi lyamu chikañ lyabiilyi.” 18#Mk 11.28; Mt 21.23; Lk 20.2. Jew atañ ho mohmi lutii, Nii kagi nanii no ngunumi kakiñpa siimi miibii dola? 19#Mk 14.58; Miin 6.14. Jisu mohlumi lusitii, “Pyadu loto siika piniiude mi, ho allo lohiñ heho ngo siimi pencha talyike,” 20Jew atañ ho lutii, Siika piniiude mi pendupa alyañpiilye la nyañkhe anyañ nyane, ho no siimi allo lohiñ heho pencha lakiñdo hiilaha? 21#1 Kor 6.19; Jn 8.57. Hojalo mo mohka apoka piniiude mi lutii. 22#Jn 12.16; 14.26. Mohka shiiniiñ hokiika turilyikuho, mohka henjeajiñ atañ hempatii mo siika siimi lune hiila; ho mohlu piniipota mi tajetii ho Jisu ka aguñ luniiñ atañmi.
Jisu ka Miyu Henju Mika Chiniiñ
23Siisi mo Jerusalem ho Impobiiniiñ dituñ butiiapiñ diiko dakele, abuje henje nyatii mohka armyañ mi mohlu kagiñnanii atañ mohka miiniiñmi kappa lala; 24hojalo Jisu mo atohmi mohluka henjeho atii matii, 25#Jn 1.47; 6.61; 13.11; Mk 2.8. niimpalukoda mo hikha miyu atañmi chintii ho kone mitrḛ miyukii dalyi hokii hakipa anna matii; niimpalukoda mo atoh loda chintii miyu ko nii giido hiila.
Tans Gekies:
JON 2: APATBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
