मत्ती 4
4
मरुभूमिइ येशूयात जाँचय् याःगु
मर्क १:१२-१३; लूक ४:१-१३
1पवित्र आत्मां येशूयात शैतानपाखें जाँचय् याकेत मरुभूमिइ ब्वनायंकल।#हिब २:१८; ४:१५ 2पिइन्हु पिइचा तक अपसं च्वनादीगुलिं वय्कःयात तसकं हे नयेपित्यात।
3अबलय् हे शैतानं वयाः वय्कःयात थथे धाल – “छि परमेश्वरया काय् खःसा थ्व ल्वहंयात मरि जुइमा धकाः धयादिसँ।”
4येशूं लिसः बियादिल – “थथे च्वयातःगु दु –
“‘मनूत मरिं जक मखु,
परमेश्वरयागु म्हुतुं पिहां वःगु
छगू छगू वचनं म्वाइ।’” #
व्य ८:३
5शैतानं हानं वय्कःयात पवित्रगु शहरय् यंकल, अले देगः च्वकाय् यंकाः थथे धाल – 6“छि परमेश्वरया काय् खःसा थनं तिंन्हुयादिसँ। छाय्धाःसा थथे च्वयातःगु दु –
“‘छ न्ह्याथाय् वंसां रक्षा यायेत
परमेश्वरं थः दूततय्त आज्ञा बियादी
ल्वहँतं छंगु तुतियात घाःपाः मजुइमा धकाः
इमिसं थःगु ल्हातं छन्त ल्ह्वना तइ।’”#भज ९१:११-१२
7येशूं वयात धयादिल – “थथे च्वयातःगु दु – ‘छं परमप्रभु परमेश्वरयागु मन स्वये मते।’”#व्य ६:१६
8अनंलि शैतानं वय्कःयात तःजाःगु पहाडय् यंकाः संसारयागु बाबांलाःगु फुक्क राज्य व उमिगु वैभव क्यन। 9“छिं जितः भागि यानादीसा जिं छितः थ्व फुक्कं बी” धकाः शैतानं धाल।
10अले वय्कलं धयादिल – “अय् शैतान, जिगु न्ह्यःने च्वने मते, हुँ। थथे नं च्वयातःगु दु –
“‘छं छिम्ह परमप्रभु परमेश्वरयागु जक
सेवा यायेमाः।
वय्कःयात जक मानय् यायेमाः।’” #
व्य ६:१३
11अले तिनि शैतानं वय्कःयात त्वःतावन। अले स्वर्गदूतत वयाः वय्कःयागु सेवा यात।
येशूं गालीलय् भिंगु खँ न्यंकेगु ज्या शुरु यानादीगु
मर्क १:१४-१५; लूक ४:१४-१५
12बप्तिस्मा बीम्ह यूहन्नायात झ्यालखानाय् कुनातल धकाः न्यनादीगुलिं येशू गालीलय् झायादिल।#मत्ती १४:३; मर्क ६:१७; लूक ३:१९-२० 13वय्कः नासरतय् च्वना मदिसे जबूलून व नप्तालीया दथुइ लाःगु गालील समुद्र लिक्क च्वंगु कफर्नहुम झायाः च्वनादिल।#यूह २:१२ 14थुकथं यशैया अगमवक्तां धयाथकूगु थ्व खँ पूवन –
15“यर्दन खुसि व समुद्र दथुइ
लाःगु जबूलून व नप्ताली,
अले यहूदीमखुपिं च्वनाच्वंगु गालील,
16थ्व खिउँथाय् च्वनाच्वंपिं मनूतय्सं
छगू तःधंगु जः खनीतिनि।
कालया किचलय् लाःगु देशय्
च्वनाच्वंपिन्सं नं थ्व तःधंगु जः
स्वइतिनि।”#यशै ९:१-२
17उबलय् निसें वय्कलं थथे धकाः न्यंकादिल –
“पश्चाताप या,
छाय्धाःसा स्वर्गयागु राज्य न्ह्यःने
थ्यंकः वये धुंकल।” #
मत्ती ३:२
येशूया दकलय् न्हापांयापिं चेलात
मर्क १:१६-२०; लूक ५:१-११
18छन्हु येशूं गालील समुद्र सिथय् झाया च्वंबलय् जाः ह्वानाः न्या लानाच्वंपिं निम्ह दाजुकिजापिं सिमोन व वया किजा अन्द्रियासयात खन। इपिं न्या लाइपिं खः। 19वय्कलं इमित धयादिल – “जि नाप वा, अले जिं छिमित मनूत लाइपिं यानाबी।” 20थ्व खँ न्यनेवं इपिं थःगु जाःजी हे त्वःताः वय्कः नाप वन।
21अनं झाःबलय् वय्कलं जब्दिया निम्ह काय् याकूब व वया किजा यूहन्नायात खन। इपिं थः अबु जब्दि नाप नांचाय् च्वनाः पुलांगु जाः ल्ह्वनाच्वंगु खः। वय्कलं इमित नं सःतादिल। 22धयाकथं इपिं थः अबु व नांचा त्वःताः वय्कः नाप वन।
येशूं तःता ज्या यानादीगु
लूक ६:१७-१९
23येशू गालील फुक्कभनं चाःहिलादिल। धर्मशास्त्र स्यनीगु छेँय् झायाः मनूतय्त स्यनेकने यानाः परमेश्वरयागु राज्ययागु भिंगु खँ न्यंकादिल। अले तःतामछि ल्वय् दुपिं मनूतय्त नं लाय्कादिल।#मत्ती ९:३५; मर्क १:३९ 24वय्कलं थथे यानादीगु खँ सिरिया देशय् फुक्कभनं बय्बय् जुल। अले तःतामछि ल्वय् दुपिं, तःतामछि दुःखकष्ट दुपिं, भूत दुबिना च्वंपिं, तिल्वय् वःपिं व पक्षवातं कःपिं मनूतय्त वय्कःयाथाय् हल। वय्कलं इपिं फुक्कसिगु ल्वय् लाय्कादिल। 25गालील, डेकापोलिस, यरूशलेम, यहूदिया व यर्दन खुसिया पारिंनिसें वःपिं ग्वाः ग्वाः मनूत वय्कः नाप नाप जुल।
Tans Gekies:
मत्ती 4: NEW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Nepal Bible Society, Newa Christian
Literature Center and Wycliffe Bible Translators, Inc.