Okutandika 18
18
Abrahamu okukunira baamaraika
1MUKAMA yaayeyorekyera Abrahamu aha myela ya Mamure, ashutami omu muryango gw'eihema rye omu ihangwe; 2#Heb 13:2. ku yaimukize amaisho, yaareeba abashaija bashatu beemereire hangahari. Ku yaabareebire, yaimuka omu muryango gw'eihema, yairuka kubabugana, yainama ahansi, yaagira ati: 3Mukama wangye, ku ndaabe ningirirwa embabazi omu maisho gaawe, ninkweshengyereza otahingura omwiru waawe. 4Kabareete otwizi, munaabe aha bigyere, mwije ahansi y'omuti, muhuumure, 5naanye ndeete akagaati, mugarukwemu amaani mubone kugumizamu, nk'oku mwahunguka aha mwiru waanyu. Baagira bati: Kora nk'oku waagamba. 6Abrahamu yaayehuuta, yaataaha omu ihema, yaashangamu Saara, yaamugira ati: Rahuka ogire encuro ishatu z'esaano y'obunono, okibumbabumbe, ogiihemu otugaati. 7Kandi yairuka, yaaza omu masyo, yaihamu enyana nto nungi, yaagiha omushumba we, nawe yaagibaaga ahonaaho, yaagiteeka. 8Abrahamu yaatwara amajuta n'amate n'enyama y'enyana ei yaateeka, yaabita omu maisho gaabo; yaaguma ayemereire aha rubaju rwabo ahansi y'omuti, nibarya.
9Baamubuuza bati: Saara omukazi wawe arahi? Yaagarukamu ati: Ari omu ihema. 10#Rom 9:9. MUKAMA yaagira ati: Buzimazima, obunaku ku burihika, ndyagaruka; kandi reeba, Saara omukazi waawe aryazaara omwana w'omwojo. Saara akaba ari omu muryango gw'eihema enyima ye, abihuriire. 11#Heb 11:11. (Obwo Abrahamu na Saara bakaba bakuzire, bahikire omu ngingo zaabukuru; kandi Saara akaba atakiza mu micwe y'abakazi.) 12#Luk 1:18. N'ahabw'ekyo Saara yaashekyera aha mutima, naagira ati: Nimbaasa kushemererwa naakaikwire, na ibanye ari omugurusi? 13MUKAMA yaagambira Abrahamu ati: N'enki ekyashetsya Saara, akagira ati: N'eky'amazima ndyazaara omwana nkaikwire? 14#Yer 32:17; Mat 19:26; Rom 4:18-25. Hariho ekirema MUKAMA? Omu bunaku obwatairweho ndyagaruka; kandi ebiro bye ku birihika, Saara aryazaara omwana w'omwojo. 15Kwonka Saara yaayehakana ati: Tinaasheka; ahakuba akaba atiinire. Yaamugarukamu ati: Ngaaha! Okusheka kwo waasheka.
Ruhanga okumanyisa Abrahamu eby'okuhwerekyereza Sodoma
16Abo bashaija baimuka, baarugayo, baagyenda bagyemire Sodoma; na Abrahamu yaabashendekyereza 17-18#Zab 25:14; Yoh 15:15. MUKAMA yaayebuuza ati: Abrahamu ku araabe arihinduka eihanga rikuru ery'amaani, kandi n'amahanga goona ag'omu nsi gariheerwa omugisha omuriwe, nshemereire kumushereka eki ndikuza kukora? 19#Bir 6:6, 7; Yos 24:15. Ngaaha! Ahakuba nkamutoorana, ngu abone kuragiira abaana be n'ab'omu ka ye abarimukurata, okuguma omu muhanda gwa MUKAMA, nibakora eby'okuhikiirira n'eby'oburyo, ngu MUKAMA abone kureetera Abrahamu ebi yaamugambiire. 20MUKAMA yaagira ati: Nk'oku okutaka kw'abarikurega Sodoma na Gomora kuri kwingi ahabw'ekibi kyabo ekihinguraine munonga, 21#Kur 3:8. nikyo naaza kushuumira hati, nkareeba kwo, ku baraabe bakozire nk'okutaka kw'abarikubarega, oku mpuriire, oku kuri; nari ku kiraabe kitari kityo, nakyo nkimanye. 22Abashaija abo baaruga aho, baagumizamu nibaza Sodoma; kwonka Abrahamu yaaguma ayemereire omu maisho ga MUKAMA.
Abrahamu okweshengyerereza aba Sodomu
23 #
Kub 16:22. Abrahamu yaamwirira haihi, yaagira ati: Buzima noija kucwekyereza abahikiriire hamwe n'ababi: 24Mbwenu omu rurembo ku haakuba harimu abahikiriire makumi ataano, okaarucwekyereza, oyanga kurusaasira ahabw'abahikiriire makumi ataano abarimu? 25#Rom 3:5, 6. Nikikabure ekyo kukurugaho, okwita abahikiriire hamwe n'ababi, n'okureeba abahikiriire nibatwazibwa nk'ababi! Ekyo nikikabure! Omucwi w'emanja z'ensi yoona tarikora ebihikire? 26#Yer 5:1; Ezk 22:30. MUKAMA yaagarukamu ati: Omu rurembo rwa Sodoma ku ndaashangyemu abahikiriire makumi ataano, niinyija kurusaasira rwona ahabwabo. 27#Zab 8:4. Abrahamu yaagaruka yaagira ati: Reeba, naayehanga kugamba na Mukama wangye, haza ndi omucuucu n'eiju. 28Mbwenu shi, abahikiriire makumi ataano kuhaakuburaho bataano, okaacwekyereza orurembo rwona ahabw'abo abataano abaaburaho? Yaagira ati: Ku ndaashangyeyo makumi ana na bataano, tindikwija kurucwekyereza. 29Abrahamu yaagaruka yaamugira ati: Ku haraabonekyeyo makumi ana! Yaagarukamu ati: Tindikwija kurucwekyereza ahabw'abo makumi ana. 30Kandi yaagaruka yaagira ati: Mukama wangye arekye kungwerwa kubi, ngarukye ngambe. Ku haraabonekyeyo makumi ashatu. Yaamugarukamu ati: Tindikwija kurucwekyereza, ku ndaashangyeyo makumi ashatu. 31Yaagira ati: Reeba, naayehanga kugamba na Mukama wangye. Ku haraabonekyeyo makumi abiri. Yaagarukamu ati: Tindikwija kurucwekyereza ahabw'abo makumi abiri. 32#Bar 6:39. Bwanyima yaagira ati: Mukama wangye arekye kuguubwa kubi, ngarukye ngambe omurundi ogu gwonka. Mbwenu shi ku haraabonekyemu ikumi. 33Yaamugarukamu ati: Tindirucwekyereza ku hakubonekayo ikumi. 34MUKAMA ku yaaherize kugamba na Abrahamu, yaagyenda; kandi na Abrahamu yaagaruka owe.
Tans Gekies:
Okutandika 18: RR64
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible in Runyankore-Rukiga © United Bible Societies, 1964
