Jesu koty rewarà kõ 4
4
Peturu kõ mopã'ãa rewarà
1Peturu kõ, Juwão reve, oporegeta jẽ atyry kõ pè kupa upa remẽ, Janejare'e pè oporegeta mãe kõ uu ikoty kõ, Janejare'e moe'ea retã rãrõarà rõvijã reve. Ãmõ, Satuseu kõ mõ reve. Mokopejõ uu kupa. 2A'e kõ ojikõ'õ Peturu rè, Juwão revejẽ, atyry kõ omotekokuwa kupa rewarà mõ. “Jesu opoerapa omãnõ maire ky'y”, e'i kupa rewarà mõ. “Ãwĩvo ve japoeratà jamãnõ remẽ, jaa tè Jesu poeraa”, e'i kupa rewarà mõ. [Ãmẽ Satuseu kõ kee e'i mã'ẽ tè: “Nijapoera mijẽ'ãi jamãnõ maire”, e'i mã'ẽ tè.] A'e a'e kõ tè ojikõ'õ Peturu kõ rè. 3Opyyoka kõtà eraa jõvijãgwerà kõ rovake kupa. Ajamã'ẽ karumẽ rewarà mõ jimopã'ãga pè rã'ĩ weraa kõ ity, tikõ'ẽ a'e pè kupa. Kõ'ẽme tè weraa kõtà jõvijã kõ rovake kupa.
4Aty wasu ãmẽ, “Aje, Jesu opoera”, e'i Peturu kõ ayvu wenu remẽ. Jesu koty rewarà kõ rõmõ ekoi ãmẽ kupa ky'y. Kwaima'e kõ kõrijõ tè jamoirõ irõ remẽ, werywete 5.000 rõmõ tesõ a'evo ekoi mãe kõ.
Juteu rõvijãgwerà atyry rovake tui kupa remẽwarà
5Ãmẽ kõ'ẽmeve jõvijãgwerà kõ ojimoaty Jerusarẽ taa pè, Juteu rõvijãgwerà kõ. Kejõ: Tãmõ Moisesi remikusiwarerà rè poromo'e mãe kõ ve. 6Ãmõ, Janejare'e pè oporegeta mãe kõ rõvijã wasu teve, Anasi eu erà pè mã'ẽ. Ãmõ, Kaipasi eu mã'ẽ. Ãmõ, Juwão eu mã'ẽ. Ãmõ, Aresãtiri. Ãmõ kõ, Janejare'e pè oporegeta mãe kõ rõvijã wasu retãrã kõ ve ojimoaty eeve kõ. Mokopejõ ojimoaty Juteu kõ rõvijãgwerà kõ rõmõ. 7A'e kõ omuroka Peturu kõ ovake kõ javo:
– [Manyvo ywe'e põ pereko noatai maekwerà imokatu? e'i kupa.] Ava ayvu rupi ywe'e põkõ pemokatu? e'i. Ava kasia rupi põ? e'i kupa.
8-9Ajamã'ẽ Janejare'e 'Ãg Peturu py'a pupe ekoi. Ajawyi ikasia rupi tè wayvuapi kõ. Kee e'i ijupe kõ:
– Jõvijã kõ, pejapyaka eayvu rè aporegeta pejẽ remẽ. Noatai maekwerà oromokatu rewarà mõ orereru penovake age'e pekupa. Aje ywete, napekuwai manyvo e'i okatupa rõmõ, e'i. 10Tapekuwa awi amome'u pejẽ remẽ. Pirujẽ Isaeu kõ rõmõ tapekuwa. Jesu Kiristu, Nasare taa wãnà ayvu rupi tè ãwĩ opõ'ã wata ky'y, e'i. Kõitokõ yvyra jipokana rè pemoputuputurioka ijukaoka. Aekwerà kasia rupi tè ikatupa! e'i. Janejare'e omomoera maekwerà kasia rupi tè! e'i. 11A'e napeesa tari maekwerà kasia rupi tè! A'e ywesõ ikatuay wete, e'i. Ãwĩ Jesu! Kõitokõ karamoe remẽ Janejare'e ayvu mojenuarà kee e'i oporegeta ikusiwa ee:
“‘Aã takuru nikatui’, e'i ywe'e titetà tetã reinõgarà kõ oinõ ypy takuru tetã mõ remẽ.
Ajamã'ẽ a'e ywesõ sikaepo ikatuay wete tetã mokasiarà rõmõ”, e'i maekwerà.#Jĩg. 118.22
12Aekwerà rupi katu tè Jesu ekoi. Ãwĩvo ve Jesu rõmõ'ĩte poroeraa poromoigooka karuaru mã'ẽ rõmõ ekoi! [“Nivoi”, pejẽ ywe'e tite ijupe mã'ẽ rõmõ'ĩte!] A'e rõmõ'ĩte janeaiwererà oitypypyioka kuwa janewyi mã'ẽ! Janejare'e Remimuurerà tè rewarà mõ tè ãwĩvo ekoi! Nuvei ãwĩvo poroereko mã'ẽ ipi! Jesu rõmõ'ĩte a'evo ekoi mã'ẽ! e'i Peturu ijupe kõ.
13Ãmẽ Juteu rõvijãgwerà kõ ojimonyi aepo renu, nojipiraui tesõ Peturu kõ ovake kõ rewarà mõ.
– Haa! Ãwĩvo si! Manyvo põ ãwĩ kõ ijayvukasi tesõ! e'i kupa. Ajamã'ẽ oiko tepe'yte mãe kõ teipe kupa. Nojimotekokuwai mãe kõ teipe kupa mijã. Jesu reve ekoi maekwerà kõ tè si mijã! e'i ojiupe kupa.
14Ajamã'ẽ noatai maekwerà Peturu kõ uvuri tui upa, jõvijãgwerà kõ rovake. Ajawyi manyvo ne'i'ãi Peturu ayvuapi kupa. 15Ajawyi kee e'i kõrijõ tè kupa:
– Peẽ rã'ĩ orepytery pe wyi, orevote torojimogeta, e'i kupa.
Ojisyry rã'ĩ ãmẽ kupa. Ãmẽ jõvijãgwerà kõ ovote ojimogeta rã'ĩ, kee javo:
16– Manyvo tary we'e põkõ ãwĩ kwaima'e kõ sireko? Emã'ẽ! Jane noatai mã'ẽ omokatupa maekwerà tè ãwĩ kõ. Aã ike Jerusarẽ taa wãnà kõ pirujẽ okuwa ãwĩvoa. Ajawyi, “Ãnĩ. Iwari tè!” nija'e'ãi ijupe kõ, e'i kupa. 17Ajawyi kee sirekotà. Janeayvukasità kõrijõ tè ijupe kõ. Siayvumomi kõtà, Jesu rekoa tomojenu e'ã erokwa kupa ky'y. Mõa'ãrõwã jane kõ okuwatà Jesu rekoa ãmẽ, e'i kupa. Ikoty rewarà kõ rõmõ ekoità teve kupa, nisiayvumomi kõ sõ remẽ, e'i ojiupe kupa.
18Aepo e'i kupa ire omuu mijẽ Peturu Juwão reve oovake kõ kupa. Kee e'i ijupe kõ kupa:
– Awyje ikõ tapeporegeta e'ã Jesu rè ky'y nẽ! Tapemo'e e'ã mirà mõ pe'ĩ ikõ ijayvu rupi nẽ. Aepo oro'epa pejẽ! e'i epe kupa.
19Ajamã'ẽ Peturu kõ wayvuapi kõ:
– Jõvijã kõ, kee a'e pejẽ. Mã rapijarà ywesõ põkõ Janejare'e opota toroiko? Peayvu rupi tè põ? Ijayvu rupi tè põ? e'i. 20Oromã'ẽ Jesu rè! Oroenu teve! [Emimo'ekwerà kõ tè ore!] Ajawyi orokuwa katuay Janejare'e Remimuurerà tè Jesu, e'i. Ajawyi noropoi kuwa'ãi oreremikuwa mojenua wyi! e'i kupa.
21Aepo e'i paire, jõvijãgwerà kõ ijayvukasiay ipe Peturu kõ pè ky'y.
– Tapeporegeta e'ã ikõ Jesu rè peiko ky'y nẽ! Pepi iwyi! e'i epe kupa.
Aja paire omono toẽ oo kupa. Opota ipe omomorijau kõ kupa mijã. Ajamã'ẽ atyry kõ omoe'e ywete Janejare'e noatai maekwerà mokatuawerà rewarà mõ. 22A'e noatai maekwerà 40 kwaray rõmõ tesõ a'evo ekoi. [Ovote manyvo ne'i'ãi okatupa rõmõ mijã.]
Janejare'e omoe'e kupa remẽwarà
23A'evo paire Peturu, Juwão reve, ojivy oo ovoarà kõ gyty kupa. A'e kõ pè pirujẽ manyvo jõvijãgwerà kõ ijayvukasi epe ijupe kõ maekwerà ayvukwerà kõ omome'u kupa. Ãmõ, Janejare'e pè oporegeta mãe kõ rõvijã kõ ayvukwerà. 24Ãmẽ aepo omome'u kupa ire, Jesu koty rewarà kõ ojeeve omoe'e ywete Janejare'e kupa. Kee e'i imoe'e kupa:
– Orerõvijã wasu tè ene! Yva reinõgarerà tè ene! Yvy reinõgarerà teve ene! Pãranã reinõgarerà teve! Pirujẽ ipupewarà kõ reinõgarerà teve ene!#Jisyry. 20.11; Ne. 9.6; Jĩg. 146.6 25Karamoe remẽ neporegeta neremĩgwai Tavi pè, orerãmõi pè. Ne'Ãg rupi neporegeta ijupe. Ãmẽ a'e ajaire omojenu orerãmõi kõ pè. Kee e'i maekwerà:
“Ãmõ mirà kõ ojikõ'õ ai tite! Juteu rõwã mãe kõ!
Janerõvijã ywete rè ojikõ'õ ai tite kupa.
Ajawyi ojimogeta ywe'e tite Janejare'e ayvu renu tare'ã kupa.
26Ãmẽ jõvijã kõ ojimoaty ywe'e tite owãninĩ rõmõ Janerõvijã ywete reve.
Ãmõ, Emimuurerà reve, Emiekyiarerà reve”, e'i tãmõ Tavi imojenu maekwerà.#Jĩg. 2.1-2
27– Aje ywete, aekwerà rupi katu wereko age'e ike kupa ky'y, Jerusarẽ mè. Oreyvy pewarà kovenatu Eroti kõ ojimoaty kupa, Neremimuurerà Jesu moai. A'e ivo katu teãmã mã'ẽ. Neremimota rupi ekoi. Ãmõ, kovenatu Põsiu Piratu ve a'evo ve. Ojimoaty imoai kupa. Ãmõ, Juteu rõwã mãe kõ reve. Ãmõ, Isaeu kõ reve. Omojaiwe kupa.#Ruk. 23.7-11; Mat. 27.1-2; Mak. 15.1; Ruk. 23.1; Juw. 18.28-29 28Tãmõ Tavi ayvu rupi katu tè a'evo ojimoaty imoai kupa. Neayvu rupi katu tè, neremimota rupi tè sikaepo a'evo ekoi kupa. Erepa amãtejẽ maekwerà rupi katu tè sikaepo. Ene nekasiay rewarà mõ, moko kõrijõ tè wereko kupa. Neayvu rupi tè ãwĩvo wereko kupa. 29Ajawyi age'e orepãtavõ rejupa, oro'e neupe. [Ãwitõ Jesu omoai kupa, ãwĩvo ve] oremoai teve orereko kupa, ikoty rewarà kõ rõmõ. “Tapeporegeta e'ã ikõ Jesu rè peiko ky'y nẽ”, e'i epe wayvukasi rõmõ oreupe kupa. Ajawyi oremokasi rejupa, torojimonyi e'ã neayvu mojenua rè! oro'e ene. 30Oremokasioka rejupa neremĩgwai kõ rõmõ! Itekorã mãe kõ emokatuoka oreupe teve, e'i. Mãrãnà jikuwa e'ã kõ einõoka oreupe nekasia rupi. Neremimuurerà tè Jesu, a'e ivo katu teãmã ekoi mã'ẽ tè. Neremimota rupi a'evo orerereko rejupa [ãwisõ ãmõ kõ tanemoe'e ãmẽ,] e'i kupa.
Aepo e'i Janejare'e pè kupa. 31Ãmẽ oporegeta kupa ire, Janejare'e omokasiay kõ o'Ãg rupi. Ikasiaya oporakapa tesõ tetã ojimoaty iwyry pè kupa mã'ẽ. Omonãrã nãrã tesõ tetã ikasia upa. Omokasiay kõ tomojenu jenu Jesu rekoa kupa. Tojimonyi e'ã imojenua rè kupa ky'y.
Nokãte'ãi omoma'e rè kupa remẽwarà
32Ãmẽ pirujẽ Jesu koty rewarà kõ ojevo jẽ ojipy'amogeta kupa ipi. Ojevo jẽ ve poroporijauesa kupa ipi. Nokãte'ãi oma'e kõ rè kupa, iporijau mãe kõ oporijauesa remẽ. [Ajawyi kee e'i kupa: “Nema'e rõmõ teve ema'e kõ”, e'i kupa. Pirujẽ oma'e kõ oovajaro ojiupe kupa ipi.]#J.K.R. 2.44-45 33A'evo ekoi kupa remẽ, Janejare'e omokasiay Jesu remimonokwerà kõ Jesu poeraawerà tomome'u me'u mirà kõ pè erokwa remẽ, “aje ywete” te'i kupa ky'y. A'evo Janejare'e wereko katu kõ, pirujẽ. 34Ajawyi naiko ekojẽi iporijau mã'ẽ mõ ky'y. Ãmõ ãmõ remẽ jane kõ mõ oyvy ome'ẽ teve karakuri repy rõmõ ipi. Ãmõ, tetã ve ome'ẽ ve kupa. 35A'e repykwerà weru Jesu remimonokwerà kõ pè ime'ẽ ipi, tomosãi iporijau mãe kõ pè kupa, ãwisõ tojimomorijau e'ã kupa. Ajamã'ẽ emiporu rã kõ repy rõmõ'ĩte ome'ẽ kupa ajamã'ẽ.
36Ajawyi Juse eu ijupe mã'ẽ a'evo wereko. Revi jeapyry mõ Juse. Sipiri ypõ'õgwerà wãnerà mõ a'e. A'e rerà Jesu remimonokwerà kõ omotee. Panape e'i tè erà pè kupa ky'y. “Poromokasi wayvu rupi mã'ẽ” jaa tè aepo e'i kupa, a'evo ekoi teãmã rewarà mõ. 37Ãmẽ a'e ipõ oyvy ome'ẽ karakuri repy rõmõ. A'e repykwerà ajaire ome'ẽ Jesu remimonokwerà kõ pè, tomosãi iporijau mãe kõ pè kupa. [Nokãte'ãi okarakuri rè mã'ẽ tè Panape.]
Tans Gekies:
Jesu koty rewarà kõ 4: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
