Jesu koty rewarà kõ 13
13
PANAPE KÕ SAURU REVE WÃPARÕ YPY OPOSIKOA REMẼWARÀ
(13.1–14.28)
Sauru kõ oo Jesu rekoa mojenua rè remẽwarà
1Ãmẽ Ãtiokia taa pè Jesu koty rewarà kõ Janejare'e ayvu rè tui kupa upa ipi. Ãmõgwerà poromotekokuwa Janejare'e ayvu rè mãe kõ. Ãmõgwerà ijayvu mojenuarà kõ. Kejõ kupa. Panape. Ãmõ, Simeão. Mira pijõnà eu teve Simeão pè. Ãmõ, Rusiu. A'e Sireni taa wãnerà tè. Ãmõ, Manãe. Kovenatu Eroti reve ojimovija maekwerà tè a'e. Ãmõ, Sauru tè ky'y. Mokopejõ kupa. 2Ãmõ remẽ a'e kõ ojimoaty Janejare'e moe'e kupa upa. Nojimi'ui rã'ĩ tesõ iko kupa, oporegeta ijupe kupa upa remẽ. Ãmẽ Janejare'e 'Ãg oporegeta ijupe kõ. Kee e'i ijupe kõ:
– Aã kõ tapemonooka eayvu mojenuarà kõ rõmõ. Panape. Ãmõ, Sauru. Mokopejõ, e'i.
3A'evo ekoi ãmẽ kupa. Janejare'e pè oporegeta wemimono rã kõ rè kupa. Nojimi'ui rã'ĩ tesõ iko kupa a'evo ekoia rã mẽ. Ojipoinõ wemimonoarà rã kõ ãkãg 'aryvo kupa, Janejare'e tomokasi kõ. Sauru. Ãmõ, Panape. A'evo wereko kõ imono kupa.
Sipiri ypõ'õgwerà rupi ekoi kupa remẽwarà
4Ãmẽ Janejare'e 'Ãg omono Panape kõ remẽ, Sereusi taa kyty rã'ĩ oo kupa, pee rupi. A'e pe wyi Sipiri ypõ'õ wasu kyty oo kupa, nawiu rupi. 5Ãmẽ Saramina eu jãemijarà mõ pè. A'e pè rã'ĩ ovãe kupa. A'e wãnà kõ pè ypy Janejare'e ayvu omojenu kupa, [Jesu rekoa]. Janejare'e ayvu rè jimo'ea retã kõ wyry pè omojenu kupa. Juwão Maku ve eeve kõ ekoi, ipãtavõarà kõ rõmõ. 6Ajaire ypõ'õgwerà wasa oo kupa. [Pee rupi tè ky'y. Janejare'e ayvu omojenu jenu erokwa iko kupa.] Ypõ'õgwerà wasapa kupa ky'y remẽ, a'e pe wyi Papu taa pè ovãe kupa. A'e pè paje vo mã'ẽ wesa kupa. Juteu mõ tè a'e. Pajesu eu erà pè, Juteu kõ ayvu pè. Kereku wãnà kõ ayvu rupi ãmẽ Erimasi eu. “Janejare'e ayvu mojenuarà tè ije”, e'i rã'ãga sõ owari rõmõ mã'ẽ a'e. 7A'e ypõ'õgwerà pewarà rõvijã jimorypa tè a'e. Seju Pauru eu a'e jõvijã pè. Otekokuwavay mã'ẽ tè Seju Pauru. A'e Panape omuu okoty, Sauru reve, opota Janejare'e ayvu wenu rewarà mõ. 8Ajamã'ẽ paje vo mã'ẽ nopotai jõvijã toenu. Ajawyi Panape kõ omotekokuwa ipe remẽ, a'e wayvu wenone'a ne'a jẽ, “Janejare'e ayvu pè toenu e'ã”, e'i rewarà mõ. 9Ajamã'ẽ Sauru Janejare'e 'Ãg kasia rupi ekoi. Mõrijõ Sauru rerà. Pauru eu teve ijupe. Ãmẽ paje vo mã'ẽ rè omã'ẽ Pauru remẽ, ovajikõ'õ tesõ Pauru ee omãjã. 10Ajawyi kee e'i Pauru ijupe:
– Manyvore põ poromoripe sõ ene! Ãjãgai rõvijã ra'yry tè ene! Pirujẽ ivo ekoi mãe kõ ãpã tè ene! Ivo e'ãa tè nepota! Manyvore põ? Aje ywete mã'ẽ tè orerõvijã ywete ayvu! Ajamã'ẽ iwari mã'ẽ tè ene rewarà mõ nemotee ijayvu! 11Ajawyi age'e Janerõvijã ywete nemomorijautà, tanereapyo e'ã rã'ĩ neiko. Neremã'ẽ'ãi rã'ĩ kwaray reny rè. Awyje rõwã ipe ajamã'ẽ a'evotà, e'i Pauru ijupe.
Ameve py'awarà mõ aje paje vo mã'ẽ naeapyoi ky'y. Pãtõnusu omã'ẽ ky'y. Ajawyi oiko iko tite ky'y.
– Epopyy ereraa pekupa! e'i tite.
12Ãmẽ jõvijã a'evoa rè omã'ẽ remẽ,
– Haa! Aje ywete si Janerõvijã ywete ayvu! e'i ojimotekokuwa.
Ãmẽ ywesõ ojimotekokuwa Jesu ayvu renutà iko.
Pauru kõ Pisija yvy pè ekoi remẽwarà
13Ajaire Pauru kõ ojisyry oo Papu taa pe wyi, oo upi mãe kõ reve. Nawiu rupi oo mijẽ kupa, Peji taa kyty. A'e Pãpiria yvy pewarà. A'e pè Juwão Maku oity kõ ojivy oo Jerusarẽ taa kyty ky'y. 14Ajamã'ẽ Pauru kõ oo jẽ Ãtiokia taa kyty. A'e Pisija yvy pewarà.#13.14 Ãmõ tè a'e Ãtiokia taa. Mõrijõ Ãtiokia taa eu erà pè mãe kõ. Ãmẽ jimoava 'arà mẽ, oo Janejare'e ayvu rè jimo'ea retã pè kupa. Ovãema a'e pè remẽ, oike wapy kupa. 15Ãmẽ ava mõ tãmõ Moisesi remikusiwarerà pẽ rã'ĩ omogeta atyry kõ rovake, toenu kupa. Janejare'e ayvu mojenuarà kõ remikusiwarerà kõ pẽ ve omogeta. Aja paire Janejare'e ayvu rè jimo'ea retã rõvijã kõ kee e'i Pauru kõ pè.
– Oreretãrã kõ, pepota peporegeta oremokasia rõmõ remẽ, tapeporegeta ãmẽ, e'i ijupe kõ.
16Oporegeta Pauru ãmẽ. Opõ'ã ojipomomojai rã'ĩ moregetaa momi rã'ĩ toenu kupa. E'i ijupe kõ:
– Isaeu kõ. Ãmõ, Juteu rõwã mãe kõ. Pirujẽ Janejare'e omoe'e mãe kõ. Tapejapyaka katu ikõ eayvu rè nẽ. 17Isaeu kõ tè jane ike. Ajawyi Janerõvijã wasu tè Janejare'e. A'e tè itõkõ janerãmõi amyry kõ opyteporo oupe wemĩgwai kõ rõmõ maekwerà, e'i. Ajawyi itõkõ omojikwaoka kõ ywete Ejitu yvy pè. [Kãramõ temĩgwai ai kõ rõmõ a'e pè ekoi kupa. Ãmõ waite e'yiwarà rõmõ ekoi kupa.] Ãmẽ a'evo ekoi kupa remẽ itõkõ Janejare'e werojisyry kõ Ejitu yvy pe wyi eru kõ. Okasia kõ omojisaoka ijupe kõ, werojisyry kõ remẽ.#Jisyry. 1.7; 12.51 18A'e kõ 40 kwaray rõmõ tesõ werokasi, tekoe'ãma rupi ekoi kupa remẽ. A'evo remẽ itõkõ omojaiwe tesõ Janejare'e ereko kupa ipi. Ijayvu ai iko kupa remẽ, Janejare'e ojimomãatã kõrijõ tè.#P.Moirõ. 14.34
19– Ajaire itõkõ Kanaã yvy opãsarõoka ijupe kõ, ena kõ rõmõ. 7 atyry kõ omomaoka. A'e kõ tapererà kõ opãsarõoka tãmõ kõ pè. A'e pè itõkõ ojimoena kupa. Ajaate ijarà kõ rõmõ ekoi ãmẽ kupa ky'y. Janejare'e tè a'evo werekooka kõ.#Jos. 14.1 20[Janejare'e rõmõ'ĩte rã'ĩ tõvijã kõ rõmõ ekoi.] 450 kwaray rõmõ tesõ itõkõ a'evo ekoi.
– Ajaire tekoua kuwaparà kõ Janejare'e oinõ tãmõ kõ rõvijã kõ rõmõ. Wekovija vijanõ jẽ itõkõ ipi, ajaate Janejare'e ayvu mojenuarà Samueu tõvijã kõ rõmõ ekoi ky'y.#T.K. 2.16; 1Sa. 3.20 21Ãmẽ kee e'i jane kõ: “Noropotai tekoua kuwaparà kõ kõrijõ orerõvijã rõmõ”, e'i kupa. “Jõvijã e'e tè oropota. Jõvijã wasu tè. [Ãwitõ ãmõ yvy wãnà kõ rõvijã wasu kõ, ãwĩvo mã'ẽ oropota,]” e'i itõkõ kupa. “Hoõ” e'i itõkõ Janejare'e ijupe kõ ãmẽ.
– Ãmẽ itõkõ opyteporo jõvijã mõ ijupe kõ ky'y. Sau eu erà pè mã'ẽ opyteporo. Kisi ra'yry tè a'e. Pejãmĩ jeapyrerà tè. A'e oiko puku jõvijã wasu rõmõ iko. 40 kwaray rõmõ tesõ werokwapa jõvijã wasu rõmõ ekoi remẽ.#1Sa. 8.5; 10.21 22[Ajamã'ẽ noerovijai Janejare'e ayvu ipi. “Ije ywesõtà tè ajimokasi”, e'i ywe'e tite kõrijõ ipi.] Ajawyi ajaire Janejare'e nomojõvijãokari ky'y.
– Ekovijarà kõrijõ wesa mijẽ. Tãmõ Tavi tè itõkõ tõvijã kõ rõmõ ekoi ky'y. A'e pewarà mõ Janejare'e kee e'i: “Aesapa mã tè apota mã'ẽ. Tavi, Jese ra'yry tè a'e. A'e eayvu rupi katu ekoità”, e'i Janejare'e tãmõ Tavi pewarà mõ.#1Sa. 13.14; 16.12; Jĩg. 89.20
23– A'e jeapyrerà tè Jesu. A'e tè Janejare'e omuroka Isaeu kõ rereko katuarà rõmõ toiko. Wayvu rupi katu tè a'evo ekoi. [“Kãramõ amuutà. Tavi jeapyry rõmõ amuutà”, e'ipa maekwerà rupi katu tè a'evo ekoi.] Aekwerà si Janejare'e omuu tomãnõ janeaiwererà repykarà mõ, ãwisõ janeaiwererà toitypypyioka janewyi. Janejare'e pyri tijaiko karuaru jaiko. Ijayvukwerà rupi katu tè a'evo ekoi. Jesu eu Emimuurerà pè.
24– A'e uutà pyri'ĩ remẽ, Juwão [poromojãmorĩ mã'ẽ] ekoipa amãtejẽ yvy rupi iko. Isaeu kõ motekokuwaarà rõmõ ekoi mijã. Kee e'i imojenu: “Pejimosĩoka ikõ peaiwererà rè nẽ,” e'i. “Pejimome'u ikõ Janejare'e pè peaiwererà reitypypyipaoka nẽ”, e'i imojenu ijupe kõ. “A'evo pepota peiko remẽ, poromojãmorĩtà”, e'i imojenu pirujẽ Isaeu kõ pè.#Mak. 1.4; Ruk. 3.3 25Ãmẽ Juwão posikoa awyjepatà remẽ, kee e'i jane kõ pè: “‘Janejare'e Remimuurerà tè Juwão ekoi’, pejẽ sõ ije”, e'i. “A'e rõwã ije. Ije rõwã erãrõtà pekupa”, e'i. “Ajaire si a'e ywe'e uutà”, e'i. “A'e ywesõ e'arà kytywarà rõmõ ekoità!” e'i amãtejẽ Juwão Jesu pewarà mõ.#Juw. 1.20; Mat. 3.11; Mak. 1.7; Ruk. 3.16; Juw. 1.27
26E'i jẽ Pauru:
– Eretãrã kõ, kee a'e mã'ẽ rè tapejapyaka teve. Janeupe tè Janejare'e wayvu omuu, tãmõ Aparão jeapyrerà kõ rõmõ, e'i. Omãnõ janeaiwererà repykarà mõ mã'ẽ omuu. A'e si Jesu. Ãmõ, janeupewarà mõ rõmõ'ĩte rõwã omuu. Juteu rõwã mãe kõ pè teve omuroka, Janejare'e omomojy wete kupa remẽ. Pirujẽ janereve ijayvu werovija mãe kõ pè ve wayvu omuu, janerereko katuarà rewarà. 27Ajamã'ẽ Jerusarẽ taa wãnà kõ nokuwai poroereko katuarà tè sikaepo Jesu. Ãmõ, Juteu rõvijãgwerà kõ ve nokuwai. Okuwa kuwasi kupa mijã! Jimoava 'arà mẽ upi upi omogeta ipe Janejare'e ayvu mojenuarà kõ remikusiwarerà kupa ipi mijã. Ajamã'ẽ nokuwai Jesu pewarà mõ tè aepo e'i kupa.#Juw. 5.39,46 Omoputuputurioka kõrijõ tè Jesu ijukaoka kupa. “Janerõvijã tè”, ne'i'ãi wete Jesu pè kupa. “Tomãnõ ikenẽ!” e'i kõrijõ tè ijupewarà mõ kupa. Janejare'e ayvu mojenuarà kõ remikusiwarerà kõ rupi katu tè a'evo wereko kupa. Ajamã'ẽ nokuwai a'evoa kupa. 28Noesai 'eteay ipe nivoi mã'ẽ Jesu rè kupa mijã, eewarà mõ tojuka kupa. Ajamã'ẽ omonooka jẽ tesõ kovenatu Piratu tojukaoka kupa ky'y.#Mat. 27.22-23; Mak. 15.13-14; Ruk. 23.21-23; Juw. 19.15 29Ajamã'ẽ Janejare'e ayvu rupi katu tè teve a'evo ekoi kupa. Pirujẽ Janejare'e e'ipa amãtejẽ Jesu jukaa rã rè maekwerà rupi katu tè ekoi kupa! A'evo paire eãgwerà wekyi eraa yvyra jipokana re wyi imokatu pareti kwarà pupe kupa.#Mat. 27.57-61; Mak. 15.42-47; Ruk. 23.50-56; Juw. 19.38-42
30– Ajamã'ẽ Janejare'e omomoera mijẽ. 31Aja paire ijaty 'arà tesõ ojisa mijẽ wemimonokwerà kõ pè. Jane kõ Karireja yvy wãnà kõ oo upi Jerusarẽ taa pè maekwerà kõ pè ve ojisa. A'e kõ tè age'e omojenu jenu Jesu rekoa erokwa, Isaeu kõ pè.#J.K.R. 1.3 32A'evoa mojenuarà teve ore! A'e rõmõ tè orojo pekoty, ãwisõ Janejare'e ayvu e'eay Jesu rewarà tapekuwa. 33Karamoe remẽ Janejare'e omome'upa amãtejẽ Jesu momoeraa rã tãmõ kõ pè. Kee e'i [tãmõ Tavi] ikusiwa Janejare'e ayvu rõmõ:
“Oromojikuwaokatà Era'yry rõmõ jane kõ rovake.
Ajikuwaoka tary ve Neruu rõmõ”, e'i maekwerà.#Jĩg. 2.7
Aekwerà rupi katu tè age'e a'evo janerereko. 34A'evoa rè kee ojikusiwapa amãtejẽ tãmõ Tavi pè Jesu pewarà mõ:
[Awyje nomãnõ'ãi mãerã tè. A'e rã tè nejeapyry rã.
Jane kõ rõvijã rõmõ ainõtà, e'ipa amãtejẽ.]#Isa. 55.3
Aekwerà rupi katu teve a'evo ekoi. 35Kee ãmõ ojikusiwa teve Jesu ayvu rã rõmõ:
[“Amãnõ remẽ aiko karuarutà nepyri.]
Ereãgwerà neremonẽoka'ãi mãnõa pè, eupewarà tè ije rewarà mõ”, e'i mã'ẽ ojikusiwapa.#Jĩg. 16.10
36E'i jẽ Pauru:
– Ãmẽ tãmõ Tavi Janejare'e werovija katu mã'ẽ teipe mijã. Ajamã'ẽ omãnõ remẽ itõkõ ojiaty tè wãmõi kõ pyri, omãnõ e'e kõrijõ tè rewarà mõ. Nopoerai itõkõ. Eãgwerà inẽma kõrijõ tè. Ajawyi jakuwa oupewarà mõ rõwã tãmõ Tavi aepo e'i ikusiwa. [Jesu pewarà mõ tè e'i amãtejẽ.] 37Aje Janejare'e remimomoerakwerà tè Jesu. Ajawyi tè ninẽi eãgwerà.
38– Kee a'e teve, eretãrã kõ. Aje ywete Jesu rupi kõrijõ tè Janejare'e “awyjepa” e'i kuwa janeaiwererà pè. 39Jesu rè janerako'i mã'ẽ rupi kõrijõ tè janeaiwererà nikasi'ãi janeupe ky'y. “Ivo mã'ẽ tè ene”, e'i Janejare'e janeupewarà mõ ãmẽ ky'y. Tãmõ Moisesi remikusiwarerà ivo tekoua rewarà rè janerako'i remẽ, manyvo nija'e'ãi “ivo mã'ẽ” te'i janeupe. Ikasi jẽtà janeaiwererà janere. 40-41Ajawyi kee a'e pejẽ. Ikatu ikõ peiko Janejare'e rè jimoteitetea wyi nẽ, a'e pejẽ. Ãmẽ tè nimanyvo'ãi peupe. Kee e'i itõkõ Janejare'e ayvu mojenuarà kõ ikusiwa noerovija tari mãe kõ pewarà mõ:
“Pejapyaka rã'ĩ si Janejare'e rè, ojimoteitete mãe kõ!
Pejimonyi sa'u ekojẽ! Pemãnõ sa'u ekojẽ teve!
Age'e ainõtà marama naperovijari ywe'e tite mã'ẽ.
A'evoa ojenu ipe sõ peupe remẽ, ‘aje’ napejẽ'ãi kuwa”, e'i ikusiwa Janejare'e ayvu rõmõ noerovijai mãe kõ pewarà mõ.#Apk. 1.5
Aekwery vo ikõ awi tapeiko e'ã nẽ! e'i Pauru ijupe kõ.
Awyjepa rã'ĩ Pauru ayvukwerà ãmẽ ky'y. Atyry kõ ory aepo renu.
42Ãmẽ oẽ oo kupa remẽ, e'i Pauru kõ pè kupa:
– Ãmõ jimoava 'arà mẽ ikõ pejo mijẽ oremotekokuwavay nẽ. Ãwitõ age'e oremotekokuwa pekupa, ãwĩvo mijẽ, e'i kupa.
43Aja paire mõa'ãrõwã jane kõ oo Pauru kõ rupi, Juteu kõ. Ojimojuteu mãe kõ teve. Janejare'e omoe'e mãe kõ tè a'e kõ. Ajawyi Pauru kõ omotekokuwa kõ ywete imokasi kõ.
– Janejare'e janerereko katu ipi, e'i kupa. Janeporijauesa teve ipi, e'i kupa. Ajawyi upi katu tapeiko jẽ ipi, e'i Pauru kõ.
44Ãmẽ ãmõ jimoava 'arà mẽ, Pauru kõ oo mijẽ Juteu kõ jimoatya retã pè. Ãmẽ ywesõ aty wasu kõ uu ojapyaka ee. A'e taa wãnà kõ oporakapa tesõ jimoatya retã wyry pè ky'y. Werywete pirujẽ a'e taa wãnà kõ oike ojapyaka ee ky'y, opota ywete Janejare'e ayvu renu kupa rewarà mõ.
45Ajamã'ẽ Juteu kõ noerovija tari mãe kõ a'evoa kõ rè omã'ẽ remẽ, ojimõarõ ãmẽ Pauru koty jẽ kupa.
– Pauru ayvu ywesõ wenu katu janeayvu wyi kupa! e'i oupe kupa.
Ajawyi ojimõarõ ikoty kupa. Ãmẽ oporegeta ai Pauru rè kupa, aty wasu reminu rõmõ.
– Pemoripetà tè Pauru kõ! e'i tite atyry kõ pè kupa.
46Ãmẽ ywesõ Pauru kõ ojimokasi tesõ oporegeta ajamã'ẽ, Panape reve. Kee e'i Juteu kõ pè kupa:
– Peupe ypy Janejare'e ayvu Jesu rewarà oromojenu, Juteu kõ pejẽ orevo rewarà mõ, e'i. Ajamã'ẽ a'evo ipe remẽ, napepotai sire'e. “Nijaiko karuaru'ãi teipõ”, pejẽ ywe'e tite rewarà mõ. Ajawyi noromojenu'ãi pepytery pè ãmẽ ky'y. Juteu rõwã mãe kõ pytery pè tè oromojenutà ajawyi, 47kee e'ipa Janejare'e oreupe rewarà mõ:
“Poroyape mã'ẽ vo poroinõ,
ãwisõ poroereko katua tapemojenu jenu erokwa pirujẽ jane kõ pè,
pirujẽ yvy yvy wãnà kõ pè”, e'ipa rewarà mõ.#Isa. 42.6; 49.6
Aekwerà rupi katu tè oroikotà ãmẽ ky'y, e'i kupa.
48Ãmẽ aepo jaa Juteu rõwã mãe kõ wenu remẽ, oryvay ãmẽ kupa ky'y.
– Haa! Ikatuay wete Janerõvijã ywete ayvu! e'i e'i ãmẽ kupa.
Jesu remipyteporokwerà kõ “aje ywete” e'i oiko karuarua rã pè ky'y. 49A'evo paire Janerõvijã ywete ayvu katu ojenu jenu ywete pirujẽ taa taa kõ rupi ky'y. 50Ajamã'ẽ Juteu rõvijã kõ noesa tari Pauru. Wakaoka Pauru kupa, a'e tena wãnà kõ rõvijã kõ pè, erekwarà kõ pè teve. A'e wãivĩ kõ Janejare'e omoe'e ipe mãe kõ pè teve. Omopiraioka Pauru ãmẽ kupa ky'y, Panape reve. Omomorijauoka kõ teve imoisyryoka kõ a'e yvy pe wyi kupa.
51A'evo remẽ Pauru kõ ojipytyvyro vyro yvy ku'ikwerà reity. “Napeenu tari sire'e põ Janejare'e ayvu!” jaa tè a'evo ekoi. Aja paire Ikoniu taa kyty oo kupa ky'y.#Mat. 10.14; Mak. 6.11; Ruk. 9.5; 10.11
52Ajamã'ẽ a'evo ipe remẽ, Jesu koty rewarà kõ oryvay jẽ upa, Ãtiokia taa wãnà kõ, Janejare'e 'Ãg eeve kõ ekoi rewarà mõ.
Tans Gekies:
Jesu koty rewarà kõ 13: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
