JESAJA 63:1-10

Wie is dit wat kom uit Edom, uit Bosra, met bloedrooi klere aan? Wie kom met die pragtige klere aan terwyl Hy met groot krag voortmarsjeer? “Dit is Ek, die HERE, wat sê dat Ek julle red. Ek is sterk genoeg om te red!” Waarom is u klere so rooi soos dié van iemand wat die wynpers getrap het? “Ek het alleen die wynpers getrap. Daar was niemand van die volke wat My gehelp het nie. In my woede het Ek my vyande vernietig. In my wraak het Ek hulle vertrap. Hulle bloed het op my klere gespat, en so my klere rooi gemaak. Want die tyd het gekom om my volk te verlos, om hulle van hulle vyande los te koop. Ek het gekyk, maar daar was niemand om my volk te help nie. Ek was ontsteld omdat daar niemand was wat kom help het nie. Daarom het Ek alleen wraak geneem, sonder enige hulp het Ek die oordeel uitgespreek. Ek het die volke in my woede vertrap. Ek het hulle laat steier van woede. Ek het hulle bloed oor die grond laat vloei.” Ek sal vertel van die goedheid van die HERE, sy roemryke dade wat Hy verrig het, ja, die talle goeie dinge wat Hy gedoen het: sy goedheid vir Israel, en alles wat Hy in genade en liefde gedoen het. Hy het gesê: “Hulle is my eie volk. Hulle sal nie weer ontrou aan My word nie.” So het Hy hulle Redder geword. In al hulle nood het Hy saam met hulle gely. Hy was die engel wat hulle toe gered het. In sy liefde en genade het Hy hulle gered. Hy het hulle opgetel en gedra soos in die ou dae. Maar hulle het in opstand gekom en sy Heilige Gees bedroef. Daarom het Hy hulle vyand geword en self teen hulle geveg.