JESAJA 57
57
1Die regverdige gaan dood
en niemand neem dit ter harte nie.
Die getroues kom om
voor hulle tyd.
En niemand verstaan
dat regverdiges sterf
om aan boosheid te ontkom nie.
2Hulle wat opreg leef,
gaan na waar daar vrede is,
en vind rus in die graf.
Afgodsdiens veroordeel
3“Maar kom hier,
julle kinders van towenaars,
julle afstammelinge
van egbrekers en prostitute!
4Met wie spot julle?
Vir wie lag julle
en steek julle tong uit?
Julle is mos kinders
van sondaars,
die afstammelinge van leuenaars!
5Julle brand van wellus
onder elke groen boom.
Julle slag julle kinders
in elke vallei,
onder elke oorhangende rots.
6Julle gode is die gladde rotse
in die valleie.
Vir hulle het julle drankoffers
uitgegiet
en graanoffers aangebied.
Moet ek tevrede daarmee wees?
7Op hoë berge en heuwels
het jy ’n bed ingerig
vir jou onsedelikhede
deur afgode te aanbid.
Jy het daarheen opgegaan
om offers te bring.
8Agter toe deure
het jy jou afgodsbeelde opgestel.
Jy was ontrou aan My
en het jou kaal uitgetrek.
Jy het op die bed geklim,
en vir hulle plek gemaak.
Jy het ’n verbintenis
met jou bedmaats gemaak
en hulle naaktheid geniet.
9Jy het olyfolie en parfuum
as offers vir Molek gegee.
Jy het boodskappers
na ver plekke gestuur,
selfs tot in die doderyk.
10Jy het moeg geword
van jou soektog,
maar jy het nooit erken:
‘Dit is sinloos!’ nie.
Jy het jouself weer versterk,
en dan maar net aangegaan.
11“Hoekom was jy banger vir hulle
as vir My?
Hoekom onthou jy My nie meer nie
en dink jy nie meer
aan My nie?
Is dit omdat Ek lank stilgebly het,
dat jy My nie meer dien nie?
12Daarom sal Ek jou optrede
ontbloot.
Jou gode sal jou nie kan help nie.
13As jy roep om hulp,
mag jou klomp afgode jou red!
Maar ’n wind sal hulle wegwaai
en hulle omstamp.
Wie egter tot My sy toevlug neem,
sal die hele land erf
en my heilige berg besit.”
Ek sal hulle genees
14Dan sal die Here sê:
“Herbou die pad!
Verwyder die rotse en klippe
uit die pad van my volk!”
15So sê die hoë, verhewe Een
wat vir altyd bestaan,
wie se Naam die Heilige is:
“Ek woon in ’n hoë, heilige plek,
maar ook saam met die mens
wat berouvol en nederig is.
Ek gee nuwe krag
aan dié wat nederig is
en aan dié wat verdruk word,
en nuwe krag
aan dié wat berouvol is.
16Want Ek kla nie
vir altyd aan nie
en bly nie
vir lank kwaad nie.
Want dan sou dit
die einde wees van
die mens wat Ek geskep het
en aan wie Ek die lewensasem
gegee het.
17Ek was baie kwaad
oor my volk se sonde en hebsug.
Ek het hulle gestraf
en Myself in woede onttrek
aan hulle.
Maar hulle het net bloot aangehou
om te sondig.
18Ek het gesien wat hulle doen,
maar nogtans sal Ek
hulle gesond maak!
Ek sal hulle begelei
en dié wat treur, vertroos.
19Dan sal hulle
My weer loof.
En hulle sal vrede hê,
almal van ver en naby.
Want Ek sal hulle almal genees,”
sê die Here.
20“Maar die goddeloses
is soos die onstuimige see.
Dit kom nooit tot rus nie.
Die golwe hou aan
om slyk en modder uit te stoot.
21Daar is geen vrede
vir die bose mense nie,”
sê my God.
Tans Gekies:
JESAJA 57: NLV
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
2006 Christlike Uitgewersmaatskappy, Posbus 1599, Vereeniging, 1930, Eerste uitgawe 2006, Tweede uitgawe 2011