SIEMCHILBU 11
11
Babel innsang
1Tualeh leitung pumpi ham khat kamsuo khat ana hia. 2Tualeh tambang ahing hi a, suolam apat apei lai un, Shinar gamah phaijang khat amu ua, tuanah atengta uhi. 3Tuachi’n “Kisa un, tehlei kheng vai in, tualeh hoitah in halgaw vai” akichita uhi. Tuachi’n suong taangin tehlei, tualeh akimattuona dingin tar#Tar: Singnai, tembaw bawl chienga amat tuona dinga kizang. azang uhi. 4Tualeh hing pei un, “Khopi khat bawlvai in, innsang avum van suding khat i lamding ua, i min uh thangsah vai, tua ahisihleh leitung pumpi ah kithezah sieng khavai” achi uhi.
Leitunga ham kithethangna
5Tuachi’n Mangpa mihing taten abawl uh khopi leh innsang ending in ahing peisuh a. 6Tualeh Mangpa’n “envawi un, mite pumkhat hi ua, abawn un ham khat maimai anei uhi. Tualeh tam sil abawl panta ua, tuin asil bawl tup uh khamguol ahita sih ding hi. 7Hing pei un, ikuon dinga khatlekhat ham akitheituo louna dingun aham uh ivasulamdang ding uh” achi hi. 8Tuachi’n Mangpa’n amauh khum mun apat leitung pumpi ah athezah siengta a, tuachi’n a khopi bawl uh atawpsanta uhi. 9Tuaziehin amin khu Babel akichita hi. Mangpa’n khunah leitung pumpi ham a subuoita hi. Tualeh Mangpa’n amauh leitung pumpiah athezah siengta hi.
Shem akipat Abraham tan khanggui
10Tamte Shem hahlesuonte ahi uh, Tuichim tunzou in Shem kum za a upa ahia, tuichim tunzou kum ni nua in, Arpaksad ahing hi. 11Tualeh Shem in Arpaksad ahin nua in, kum za nga adam a, tapa leh tanute anei nalai hi.
12Tualeh Arpaksad kum sawmthum leh kum nga ahi in, Shelah ahing a. 13Shelah ahin nua in, Arpaksad kum zali leh kum thum adam a, tapa leh tanute ahing nalai hi.
14Tualeh Shelah kum sawmthum ahi in, Eber ahing hi. 15Eber ahin nua in, Shelah kum za li leh kum thum adam a, tapa leh tanute ahing nalai hi.
16Tualeh Eber kum sawmthum leh kum li ahi in, Peleg ahing hi. 17Peleg ahin nua in, Eber kum za li leh kum sawmthum adam a, tapa leh tanute ahing nalai hi.
18Tualeh Peleg kum sawmthum ahi in, Reu ahing a. 19Reu ahin nua in, Peleg kum za ni leh kum kuo adam a, tapa leh tanute ahing nalai hi.
20Tualeh Reu kum sawmthum leh ni ahi in, Serug ahing hi. 21Serug ahin nua in, Reu kum zani leh kum sagi adam a, tapa leh tanute ahing nalai hi.
22Tualeh Serug kum sawmthum ahi in, Nahor ahing a. 23Nahor ahin nua in, Serug kum zani adam a, tapa leh tanute ahing nalai hi.
24Tualeh Nahor kum sawmthum leh kum kuo ahi in, Tera ahing hi. 25Tera ahin nua in, Nahor kum za leh kum sawm leh kuo adam a, tapa leh tanute ahing nalai hi.
26Tualeh Tera kum sawmsagi ahi in, Abram leh Nahor leh Haran ahing hi.
27Tamte Tera hahlesuonte ahi uhi. Tera in Abram, Nahor leh Haran ahing a, Haran in Lot ahing hi. 28Tualeh Haran pen apienna gam Kaldaite khuo Ur ah apa Tera shi masangin ashita hi. 29Tualeh Abram leh Nahor in zi anei tuoh ua, Abram zi min Sarai ahia, Nahor zi min Haran, Milkah leh Iskah pa ahi. Haran tanu Milkah ahi. 30Hinanleh Sarai pen achiing a, ta anei sih hi.
31Tualeh Tera in atapa Abram leh atupa Haran tapa Lot leh amounu, atapa Abram zi Sarai apui a, tuachi’n Kanaan gam a peiding in Kaldaite khuo Ur apat ahing pawtdoh ta ua, tualeh Haran khuo ahing tung ua, tuanah atengta uhi. 32Tualeh Tera damsung kum za ni leh kum nga ahia, Tera Haran khuo ah ashita hi.
Tans Gekies:
SIEMCHILBU 11: ZOUBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
