LUK 23
23
Pilat hin Jisu mdo ṭhiin
1Ungta mmaan mkheng kheng inni rip lamda, Pilat hinni vanṭhi lamda. 2Ungta mmaanni mraal kpii pṭhun lamda, “Nen nmii rekka hava Miilaiji lele tha ṭhida, ungu Keisar hin khasna tpiik ruk ro mda, ungta mdak katti Khrista Kruwng khat ping ngi dida mdothe neenni pha innu.” 3Ungbi Pilat ti Mhin khewlda, “Nah Jihudia rek Kruwng ptimo?” Ungta Mma ngi mhin arthawngda, “Ado the ava ping.” 4Ungta Pilat ti thiimpu kinreel rek leh kurtuwl mii rek hin theda, “Hava Miilai doparma do khat lee neiva pha chmaang.” 5Pdainu mmaanni the teng lamda, “Judia paam mkheng, Galil thung ki ngi hava mun kpha mii rek ava Mma ngi purchukda kthlowng krep da.”
Herod hin Jisu mdo Sii
6Ungu Pilat ti hava maryaak thungta, Mma Galil Mii mo kdingi paukhewl da. 7Ungta Mma Herod paamkowl thungki tdit maryaak thungta, mpha ava thung ngi Herod mdak kat rukka Jerusalem thu ma am daat leiji Jisua mma hin vasiida. 8Herod ti Jisu mdee thungta, kdung ngi kanpa da, mleija mpha roi ksotti dei nuwmda, mleija Mma mlei thung ngi aryaa da, ungta Mma dotlot titinna dei nuwm da. 9Ava leiji mma ngi pau knempok khewlda; pdainu Jisu va arthawngme. 10Ungta Mbe tha krip daat thiimpu kinreel rek leh Nowlam chukpu rekki kdung ngi Mma ava mraal pii lamda. 11Ungta Herod ti mrawlmii rek tu kilṭhi ngi do ksi thleer ma tlo lamda pnii chaak lamda ungu buw kṭha langlang pihiil da, Pilat hinni vasi pinle da. 12Ava nit kat rongi Herod leh Pilat ta plap kurthuwk lamda, mleija chodu chodilva karhal chlam.
Jisua Kdiyoura dida mdo Palreen
13Ungta Pilat ti thiimpu kinreel rek leh paam kpupa rek ungu mii rek own purkuk da, 14ungta mhin inni theda, “Mii rek ava lele dung ngi kṭhi lulu naanni hava Miilai ava arhai ṭhiin tinu, ungta asuwn, naan amaiṭhuwm inni kpirsin na thungta, Mii hava thu naanni mraal ado piik in mraal ava khat lee pha maang. 15Herod rukva phame, mleija nen nhin mdo arhai sii pinlet. Asuwn, Mma ngi mdiyo nrangki mlei kat ava do khat lee ame. 16Ava ngi mlei kurthuwk da, neiji bunrai thida pthla pthii nik di;” 17hava kmaal thungva mma ngi mmaan tumra miilai khat khat mdo pthuw kcholu.
18Pdainu mmaan mkheng ngi krowl khdaatti owng lamda, “Hava Mma aṭhii dok, neen ktum raanna Barabas mhai pthlat pik in” 19mma ava khuwpii ki paukthuwk thu mii eayouda, ava leiji rowng inn thu mdo khum pthiin. 20Pilat ti Jisu mdo pthuw nuwm leiji vei khat nowlli mma ngi mhin inni theda; 21pdainu mmaanni owng lamda, “Mma ava khros leen apthoi pthii, khros leen apthoi pthii!” 22Ungta mma ngi mvei kdumna ngi mhin inni theda, “Talu lei, talu kṭha kma Mma va mtlot da? Mdiyo nrang kuhui mdo parma khat lee neiji pha chmaang, ava ngi mlei kurthuwk da, neiji bunrai thinira pthla pthii ni.” 23Pdainu mmaanni kdung owng lamda, kbeiji khros leen mdo pthoi pthi nra ngeen lamda. Ungta mmaan krowlli pchaang chda. 24Ava leiji Pilat ti mmaan dongeen rot pik lamda, mdiyo nra palreenda. 25Mmaan tumra mdo ngeen in paukthuwk thu mii ke eayou, rowng inn thu mdo khum miilai ava pthla pthiida; pdainu Jisua mmaan do ngei thu pii pthii lamda.
Jisua Khros leen mdo Pthoi in
26Ungta mmaanni mhan ṭhi slii arlaan inni, Syrini ki Simon, paam khat ki kipjiin kcha, mma ava Jisu dil pang tha khros mdo kdom ṭhi nra kjowng lamda pnam psuk lamda. 27Ungta kurtuwl miiluwngpa rek leh kurnung karbaang da kṭap snu rekki mdil ṭoida. 28Pdainu Jisu ngi mdil kinle da theda, “Jerusalem chanu rek, Nei ktummi ṭap maan, pdainu naan adaksaan leh anaoleen tummi ṭap in. 29Mleija asuwn, ‘Kdong mii, nao kuhur kmalai, ungu arnuw nao kakai kmalai, mmaan ava msukṭha dida mmaanni mdo the nrangki nit rek kthlengra!’ 30Ungta mmaanni lownpii rek, ‘Neen ktunni arjun tluw,’ ungu lown rek hin, ‘Neen mhai pkhum chaan’ dida kthe kupṭhun lamra. 31Mleija mmaanni ding me er slii daat thung ngi hava mtlot inbi, mṭon mpha thung ngaallu tak kthuwk chrang da?”
32Ungta mraal ka am miilai knii rek rukka Mma tu kilṭhi ngi mdo eayo nraan hanṭhi lamda. 33Ungta mmaanni luwru kdimna mun tdit ava mhan phaak in thungta, ava thu khros leen pthoi lamda, ungu mraal pum rekka mlee leh mchang tha pthoi kthen lamda. 34Ungbi Jisu ngi theda, “Apah aptlot pik chlam; mleija mmaanni talu ktlot inna tdit dei chlamme.” Ungta mmaanni mdona ava kthem rangki pchel piik sut nlamda. 35Ungta Mbe ngi krip mii rekki, sut pṭoi lamda; pdainu paam kpupa rekki Mma ning er plo psuk lamda, the lamda, “Mma va mii mursonna mdo ktlan; Mma ava Isowr ki Khrista, mdo Kchol Khat mkurthutta; mthina ngi ekartlan chaso!” 36Rawlmii rek rukva Mhin arhang lamda, ju kdor dii pneek lamda, pnii chaak lamda, 37ungu the lamda, “Nah Jehudia rek Kruwng akurthutta athi na ngi kartlan chalo!” 38Mluw leen rukva, “Hava Jihudia rek Kruwng” dida tikjit jiik khat ruk amda.
39Ungta kukthoi daat mraal ka am rek thungki khatti do ksi thleer kma Mhin theda, “Nah Khrista mti mo? Adaksaa ruk neen ruk mhai ktlan in!” 40Pdainu khatti mhin raida theda, “Nang ngi Mma tu kinṭim chakki mraal ado phaak meek slii, nang ngi Isowra ṭi mti mo? 41Ungta nenna kindit katti nnong tlot dil kṭoiji tarlaan chaak, pdainu hava Miilai ava karmak nong khat lee tlome.” 42Ungta mma ngi theda, “Jisu, Nang ngi Akruwngpaam tha ahun mpha thu neia mhai bin phaak cha.” 43Ungbi Jisu ngi mhin theda, “Kinditti, Neiji ahin kthea, snii katti nang nga Nei tu kilṭhi ngi paradais tha ta amra.”
Jisu Diyo
44Tunva ṭhang truk (ṭhang tku mdo thena) arveel mphaak thungta, mpaam mkheng nga ṭhang tku (ṭhang sowm lei knii mdo thena) kpha dekki pum jiing ngi jing chda. 45Kniw ar awng ma amma thu; luwbuk Inn buwkhaar ava knii kthuwkki karjen chda. 46Ava dilli krowl kparyaa ngi owngda theda, “Apah Nah akhut thung ngi Kraothla kparlaan chaakka!” Ungta hava theda mṭutna tdaal ṭen chda. 47Tunva rawlmii ki klin khatti kthuwk nong ava mdee thungta, mma ngi Isowr panpaak da theda, “Mkindit katti hava Miilaiva parmak chme!” 48Ungta ava ksuwra kthuwk kurtuwl mii mkheng ngi, kthuwk nong ava mdee in thungta, muplung in tpeeng lamda mi inn thaanni kinle lamda. 49Ungta Mma maidee rek leh Galil ki Mma dil kṭoi snu rek mkheng ngi hava nong khim khaija leer khatti va dei lamda.
Jisu mdo Alruwl
50Tunva Jihudia rek khuwpii Arimathia ki mmiing Joseph tdit miilai khatta ava thu amda. Mma ava karseel lop thungki kṭha, rinkindit miilai khat, 51mmaan poibin leh mnong tlot thuwnni plung piime, ungta mma ava Isowr Kruwngpaam mlam ksu slii kcha kurthuwk da. 52Hava miilaiji Pilat hinni vada Jisu kluwng nga ṭhil chda. 53Ava dilli mma ngi han pṭumda plaa buw ktarnaal dang ngi klum thida lung khat kreuda mdo vu thlaan khat, ku mii khat lee iina mlai ava thu pi iip chda. 54Mmaanni mdo purchuwl naan nit, ungta sabath nitta vei slii da. 55Ungta Mma doṭhi Galil ki snu rekki ṭoida, tak heppi mukluwng ava mpi iia, kdingi thlaan ava suw lamda. 56Ava dilli mmaanni kinle lamda, ungu reidii leh thao purchuwl chlamda. Paureen dil kṭoiji sabath nit va karnga lamda.
Tans Gekies:
LUK 23: LAMKBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
