LUK 19
19
Jisu leh Sakhaja
1Jisu ngi Jerikho lut da, ungta sethleng ngi chet da. 2Ungta mmiing Sakhaja tdit kinreel miilai khasna klou suwangpa khat amda. 3Ungta mma ngi jisua ku tdit dei chnuwm da, pdainu kurtuwl mii rekki mlei kurthuwk da pchaang me, mleija mma ava toi da. 4Ava leiji mma ngi mdu sukki va chenda, Mma mdo dee chaak nra, bungba ding khat lownda, mleija lam ava ktong tha Jisu ngi chet da. 5Ungta Jisu ngi mun ava thung ngi marvan thungta, hansuw thida, mhin theda, “Sakhaja, koknotti arjun ṭum; mleija sniiva nah inn thung ngi kthlun ma rome.” 6Ava leiji kok notti mma ngi arjungṭum da, ungta kanpa ngi Mma ava arlaang chda. 7Ungu mmaanni ava mdee in thungta, mkheng inni karseel sop sop lamda, “Mma ava pnu kirvei miilai ava hinni malpa khatti kvang nga.” 8Ungta Sakhaja ngi rip thida Mukpu hinni theda, “Asuw, Mukpu, kdona thloi mṭim ava neiji sra hin pii chnu, ungu kindit kma ngi ku mii khat hinki do klo cheva, kret vei plii ngi kdo pinlet pik.” 9Ungbi Jisu ngi mhin theda, “Sniiva hava inn thung ngi kirliinna kurjung nga; mleija mma rukka Abraham chapa khat kurthuwk. 10Mleija Mii Chapa ava kmaang kcha kthlaam ra ungu kaktlan pik ra kurjung.”
Jeering Sum Paupurtol
11Mmaanni hava le maryaak slii arlaanni, Mma ngi pau purtol khatti the purjom da, mleija Mma ngi Jerusalem naida, ungta mmaanni Isowr Kruwngpaam ava kbeiji kandang rang pak da kdingi bin lam da. 12Ava ngi mlei kurthuwk da Mma ngi theda, “Klin nong kpuw miilai khatti kruwngpaam khat karlaang chra khuwpaam lamkla tha kthlung kinle rangki pjiin da. 13Ungta mma ngi msra owr rek miilai sowm own thida, mhin inni jeering sum pii lamda, ungta mhin inni theda, ‘Nei kthlun du khim khai hava ngi sumdowl alo naan.’ 14Pdainu mma ava mii rek va pder chda, ungu mdil pṭoi lamda pau pthla lamda, ‘Neen ktun inni hava miilaiji mpaal ra ava ngei maan ring,’ kdingi the lamda. 15Mma ngi kruwngpaam arlaang da mkinlet mpha thu, mma ngi jeering sum mdo piik sra owr rek ava, talu sumdowl lo nlamda tija mphaak chaak inna tdit mdo dee nra, mma hin mdo own lam nra pau pṭum da. 16Ru kri ki ava ngi arvangda mmaiṭhuwm mi rip da, theda, ‘Mukpu, nah do piik jeering sum ava ngi sowm lot tpom chnu,’ dida. 17Ungbi mma ngi mhin theda, ‘Kṭha deekki atlotta, kṭha sra owr, nang ngi nong kdil suwn thung ngi trin chaak akurhui leiji, khuwpii rek sowm tun ni nang ngi rutan thloi ndi.’ 18Ungta miknit na ngi arvang da, theda, ‘Mukpu, nah do piik jeering sum ava ngi parnga lot tpom chnu.’ 19Ungbi mma ngi mhin theda, ‘Ungta nah khuwpii rek parnga tun ni am ndi.’ 20Ava dilli ktlok khat nowlli arvang da, theda, ‘Mukpu, nah ajeering summa hei, buwlaak khatti klumnu kdo arkhiik daat. 21Mleija nah aril khaa reenda, nang ngi ado thiik ma lou tinu, ungu ado pṭau ma ava khau tinu, ava leiji aṭi chnu.’ 22Mma ngi mhin theda, ‘Kṭha kma sra owr nang, aner kat dothe ava ngi neiji araal lou nik di! Neia kril kakhaa miilai kurthuwk nu, kdo thiik ma lounu, kdo paṭau ma kdo khau ava nang ngi adee mo? 23Neiji kthlun kinlet mpha thu sum mdo lot tpom tu kdolo chaak nra, talu leiji ksum ava sum lot na thung ngi thii mti?’ 24Ungta mma ngi mbe krip rek hin theda, ‘Mma hinki jeering sum ava alou inra, jeering sum sowm kthloi hinni apiin. 25(Ungbi mmaanni mhin theda, ‘Mukpu mma jeering sum sowm mdo thloi ma!’) 26‘Neiji ahin thaanni kthea, ditta kthloi ku mii khat hinni kheel betti kpii ra; pdainu kthloi kma mii ava mdo thloi chaak mruk suwn rukka klou pthiira. 27Pdainu mmaan tun ni nei kpaal ra kngei kma nei mukusnuwm kma rekka hava tha arvan ṭhiinra kmaiṭhuwm mi asur you tir in,’ ”
Kapchaang riimmi Jerusalem Mhan
28Ungta Mma ngi hava the thida mdu bet inni Jerusalem tha hang da. 29Mma ngi kruwn lown tdit Bethphas leh Bethania mnai thungta, siikhu rek knii Mma ngi va siida, 30theda, “Adu suk inki khuw ava thung ngi va lut in, naanni ava lu inbi, ku mii khat lee ko on nma skowlraam suwn khat kupsuk daat pha naan di, ava aparthlet inra, hava tha arvan ṭhiin. 31‘Talu leiji aparthle inna? dida ku mii khatti mthe ta, Mukpu ngi kriing da,’ adiinra atheen.” 32Ungu Mma dosii rekki mhai in thungta, mdo the pik lam ava hep heppi pha chlam da. 33Ungu mmaanni mparthle in thungta, mma kpupa ava ngi mhin inni theda, “Talu leiji skowlraam ma aparthle inna?” 34Ungbi mmaanni theda, “Mukpu ngi kriing da.” 35Ungta mmaanni Jisu hin arvan ṭhi lamda, skowlraam leenni buw phat lamda, mleenni Jisua ko ongda. 36Ungta Mma ngi hanto mche slii arlaanni, miirek va lam thung ngi buw phat lamda. 37Mma ngi arjung naida, kruwn lown thang ngi murjun thungta, kurtuwl siikhu rek mii mkheng va Mma nong tlot klin klin mdo dee lei inni, kanpa pṭhun lamda, ungu krowl khdaatti Isowr panpaak chlam da, 38the lamda, “Mukpu miing ngi kurjung Kruwng ava msuw kṭha! Parwaan tha kdaai ungu kheel sii ngi kparthaang ekurthuwk so!” 39Ungta kurtuwl mii rek thungki Pharisi rek mii angṭhe ngi Mhin theda, “Chukpu, asiikhu rekka arai lam.” 40Mma ngi arthawngda, “Neiji naan hinni kthea, hava mmaanni rim kdi ma ambi, lung rek katti ko owng pthuwk lamra.”
Jerusalem tummi Jisu ngi Mṭa
41Ungta Mma ngi arjung naida khuwpii ava mdee thungta ṭap da, 42theda, “Snii kat rukva nang ngi kdaai adee chaak daat tlaangbi! Pdainu tunva amik sut na thungki kurdowl kcha lamma. 43Mleija aleen nit rek ava kurjungra, nah aksnuwm kma rekki aploi donle rowng aktlot psuk ra, aktu khul dokra, markil plii thung ngi karkam pthii ra; 44ungu nang leh anaolea dul akikcheen nraan, ungu nah athung ngi lung khat leenni lung khat kurtuwn daatti am nime; mleija nah ado tvel nra mpha ava dei chi mti.”
Jisu ngi Luwbuk Inn thu Mlu
45Ungta Mma ngi luwbuk Inn thu lut da kjur rekka krei pthii pṭhun da, 46mhin inni Mma ngi theda, “Mdo kjit dok, ‘Nei Ki inn na tiṭhil chaak na Inn khat ra; pdainu naanva kup pru rek khur apurthut pthiinna.’ ”
47Ungta Mma ngi luwbuk Inn thung ngi mnii ktaiji purchuk da. Thiimpu kinreel rek leh Nowlam chukpu rek, ungu nong klin kpuw rekki mdo eayo nraan mlam thlaam lamda. 48Pdainu mdo tlot raan ava mmaanni do khat lee pha lamme, mleija mii mkheng ngi Mma pauna plung plut da.
Tans Gekies:
LUK 19: LAMKBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
