Imibuzo kaNkulunkuluIsampula

Uma uNkulunkulu engokoqobo, kungani-ke ububi nokuhlupheka kukhona? 

Uma sibheka bonke ububi obukhona, kungaba nzima ngempela ukukholelwa ebukhoneni bukaNkulunkulu omuhle, owazi konke, onothando olukhulu, onamandla onke. Nakuba inkinga yobubi nokuhlupheka ibaphikisa onkulunkulu abaningi, ayiphikisani noNkulunkulu wobuKristu. 

Kungani? Kungenxa kaJesu. UJesu unguNkulunkulu osesimweni somuntu. UJesu wangena ebubini nasekuhluphekeni komhlaba wethu, wabhekana nakho ngqo, wakhetha ukufa esiphambanweni ukuze sibe nokuphila noNkulunkulu. UJesu uyisithombe esihle kunazo zonke esinaso ngoNkulunkulu. UJesu wahlupheka. Futhi uJesu wafa. UJesu unguNkulunkulu ovezwe ngokuhlupheka.

Ngokufa kwakhe esiphambanweni, uJesu wathatha uphawu lokugcina lokufa nokubhujiswa walusebenzisa ukuletha ukuphila nensindiso emhlabeni. 

Iqiniso lokuthi sibona ububi nokuhlupheka njengenkinga, ngokumangalisayo, ubufakazi bukaNkulunkulu. Kungani? Ngoba ngaphandle kukaNkulunkulu bekungeke kube khona okuhle nokubi. Ngoba uma uNkulunkulu engekho akukho mgomo wokuziphatha. Ngaphandle kukaNkulunkulu, indawo yonke ingama-athomu angqubuzana nama-athomu. Okusho ukuthi akukho okuhle nokubi, kukhona kuphela izinto esizithandayo noma esingazithandi. 

Kodwa ekujuleni, lapho sibona ububi nokuhlupheka, sinawo lomqondo ojulile wokuthi akumele ngempela kube njalo. 

C.S. ULewis, owayengakholelwa ebukhoneni bukaNkulunkulu owaba umKristu, washo kanje: “Amathunzi afakazela ukukhanya kwelanga.” 

Usitshela ukuthi ukuba khona kobubi (izithunzi) kuwubufakazi bokuthi kukhona into enhle (ukukhanya kwelanga). Ngaphandle kokuziphatha okuqondile, okuhle nokubi akukho. Inhloso yokuziphatha ngeke ibe khona ngaphandle kukaNkulunkulu. 

Esikweni lobuKristu, ububi nokuhlupheka kwaqala kwangena emhlabeni ngesigameko esibizwa ngokuthi Ukuwa. UNkulunkulu, ngenxa yokuthi ubunjalo Bakhe bunothando, wadala isintu saba nenkululeko yokuzikhethela. Uthando alukwazi ukuba khona ngaphandle kokuzikhethela. Leyo nkululeko isho ukuthi abantu bangakwazi ukukhetha okuhle noma okubi. Ukuwa kwaba yisikhathi lapho isintu sathatha lokho uNkulunkulu ayekuhlosile ukuba kube kuhle futhi sikusebenzisele okubi. Kwaba yilapho isono sangena esithombeni. Isono singaphezu nje kwephutha. Isono isifo esiye sangena esintwini futhi sonakalisa indalo. Ububi nokuhlupheka esikubona emhlabeni namuhla kuyimiphumela yaleso sifo. 

Futhi kusukela ekuqaleni, uNkulunkulu ubesebenzisa ububi nokuhlupheka ngokuhle. Akukho lapho lokhu kubonakala khona okwedlula isiphambano, lapho uJesu athatha okubi kakhulu emhlabeni futhi wakusebenzisa ukuze alethe okuhle kakhulu kukaNkulunkulu: ukuphila kokuvuka. 

Lokho uNkulunkulu akwenza ngaleso sikhathi kwakuyisiqalo nje. Ngenxa yokufa nokuvuka kukaJesu, kuyofika usuku lapho konke okubi kulungiswa, lapho wonke amanxeba elashiwe, yonke into ephukile ihlanganiswa, futhi ububi nokuhlupheka kungasekho. 

UbuKristu yindaba yalokho uNkulunkulu akwenzile, lokho uNkulunkulu akwenzayo, nalokho uNkulunkulu azokwenza ngenkinga yobubi nokuhlupheka.