Qala Lapha | Izinyathelo Zokuqala NoJesuIsampula

Usuku 14 | KwabaseKolose 4

Sanibona bangani bami. KwabaseKolose 4 namuhla, futhi sibuyela kokuyisisekelo. UJesu wasifundisa imiyalo emibili elula: thanda uNkulunkulu ngakho konke onakho futhi uthande umakhelwane wakho njengoba uzithanda wena. Futhi lezo zihluthulelo ezilula ziqondisa zonke izinyathelo njengoba silandela uJesu. 

Isahluko sesi-4 siqala lapho u-3 egcine khona: ngezikhombisi-ndlela zobudlelwane. Lapha - izigqila namakhosi. Manje kufanele ubuze: ingabe iBhayibheli liyabusekela ubugqila? Ingabe livumela ukungalingani, ubuhlanga, nokucindezelwa? 

Ngivumele ngikubeke kanje. Cha. IBhayibheli alikusekeli ukugqilazwa, futhi noma ubani osebenzisa iBhayibheli ukuze asekele ukucindezelwa noma ukungalingani kwabantu ulisebenzisa kabi futhi uwasebenzisa kabi amazwi - ehlazweni labo. Manje iBhayibheli likhuluma nezigqila namakhosi ngoba ubugqila babuyinto engokoqobo yangaleso sikhathi, futhi uPawulu unikeza iziyalezo zendlela yokuphila kwangempela. Ezigqileni, uthi: sebenza kanzima - sengathi usebenzela uNkulunkulu ngoba uyinkosi yakho yeqiniso. 

Futhi esahlukweni 4:

“Makhosi, nikelani izinceku zenu okulungile nokufanele, ngoba niyazi ukuthi nani nineNkosi ezulwini.”

Lapha nakwezinye izindawo iBhayibheli likhumbuza amakhosi nezigqila ukuthi bayalingana ngesilinganiso sikaNkulunkulu, kungakhathaliseki ukuthi umphakathi ubahlukanisa kanjani. Noma kunjalo, kufanele uzibuze ukuthi kungani uPawulu engaqedi nje ukugqilaza ngegunya likaNkulunkulu. 

Lokhu kubalulekile. UJesu, ekufikeni Kwakhe kokuqala, akezanga ukuzolungisa uhlelo nokulungisa umhlaba wethu. Weza ukuzolungisa izinhliziyo zethu, alungise izinhliziyo zethu kuNkulunkulu. Ekubuyeni Kwakhe kwesibili, uJesu uzomisa uMbuso Wakhe emhlabeni, kodwa Weza kuqala ukuzomisa uMbuso Wakhe kithi. Okokuqala: Inkosi yenhliziyo yakho. Okwesibili: Inkosi yezwe. 

Ngakho uPawuli usifundisa ukuthi siphile ngendlela eqondileyo emhlabeni ongakalungi. Izinceku namakhosi, izisebenzi nabaqashi, benza okulungile. Kamuva uPawulu utshela izigqila ukuba zithole inkululeko yazo uma zingakwazi, futhi incwadi yakhe eya kuFilemoni itshela inkosi yesigqila ukuba ikhulule isigqila sayo futhi isibize ngokuthi mfowethu—inkulumo enkulu ngalolosuku.

Siya phambili ngokushesha emlandweni, futhi sithola ukuthi amaqhawe amaningi alwa futhi azidele ukuze aqede ubugqila agqugquzelwa futhi eqhutshwa ukholo lwawo eBhayibhelini. UNkulunkulu washintsha izinhliziyo zabo, base beshintsha umhlaba wabo. 

Emuva kwabaseKolose, ivesi 2:

“Zinikeleni emthandazweni, nilindile, nibonge.”

Futhi lokho kusinika umkhuba wethu omusha olandelayo: umthandazo. Funda iBhayibheli lakho futhi uthandaze nsuku zonke. Futhi, akusiso isibopho, wukufinyelela. Umthandazo uyamangalisa. Sithola ukukhuluma noNkulunkulu - uMdali wendawo yonke - ngokuqondile. UPawulu uthi “zinikele” kukho. Kwenze kube yinto eza kuqala. 

Yini okufanele uyithandazele? Konke. Okudingayo, lokho obonga ngakho, okucabangayo noma odideke ngakho noma okulindele. Thandazela abantu. Ngikhulekeleni! Ngiyawudinga. Thandaza - ngakho konke. 

Cabanga ngakho. Ukuxhumana kubalulekile kubo bonke ubudlelwano. Ukukhuluma yindlela esazana ngayo. Okuhle ngohambo sindawonye yisikhathi sokuxoxa, ukuvulelana izifuba, ukujula. Kuyafana nangoNkulunkulu. Njengoba silandela uJesu, siyakhuluma endleleni. Sivulelana okwangempela, ukwabelana ngamathemba nokwesaba. Sivula iminyango bese singenisa uJesu. 

Cabanga ngomthandazo njengokukhuluma nomngani omuhle. Uma kungenampilo, kumayelana nokuthola okufunayo. Uma kunempilo, kumayelana nokwazana. Umthandazo akuwona umsebenzi wesikole noma indaba efika ezingeni, ngakho ungakhathazeki ngokuthandaza "ngendlela efanele." Yiba qotho nje. Sondela esihlalweni sobukhosi sikaNkulunkulu ngokuzithoba nangenhlonipho - unguNkulunkulu; kodwa futhi ngokuzethemba - uJesu wakwenza walunga kuNkulunkulu. Futhi amaRoma 12 athi “qinani emthandazweni” - njengocingo olungavaleki. 

Okunye kwabaseKolose kuyimikhonzo. Khumbula, lena incwadi yangempela phakathi kwabantu bangempela. Futhi labo bantu babethandana! Ngakho bathumela imikhonzo. Ngiyakuthanda lokhu ngeBhayibheli. Okomuntu siqu. UNkulunkulu wayengaqopha izwi lakhe ngokuqondile etsheni, kodwa wakhetha ukulibhala kuqala ezinhliziyweni zabantu abathandayo. Futhi lolo thando luyakhanya ekhasini. 

Futhi kusiletha kumkhuba owodwa futhi: ukuhlanganyela. Chitha isikhathi namanye amaKristu. Julani ekuphileni ndawonye. Thanda uNkulunkulu futhithanda abanye. AmaHeberu ayasixwayisa ukuthi ungakuyeki ukuhlangana komndeni wakho wamaKrestu - ibandla.  

Manje igama elithi ibandla ebhayibhelini alisona isakhiwo, ngabantu abalandela uJesu. Isonto lingahlangana esakhiweni, kodwa uma singaxhumani ngendlela yangempela, silahlekelwa iphuzu. Njengoba ufunda isahluko 4, bheka amagama - abantu abazikhathalelayo - uMarku, uJustu, u-Ephafra, uLuka, uNimfa, futhi qaphela, 

“...ibandla endlini yakhe” (4:15).

Ngaleso sikhathi, amasonto ayehlangana ezindlini - njengomndeni. 

Ngakho lezo yizisekelo: thanda uNkulunkulu futhi uthande abanye. Ukuze wenze lokho, qala umkhuba womthandazo: yazi uNkulunkulu. Futhi qala umkhuba wobudlelwane: yazi abanye. Mhlawumbe umeme othile emsebenzini noma esikoleni ukuba alandele lolu hlelo nawe, nixoxe ngemibuzo yezingxoxo, futhi nithandaze ndawonye. Lowo ngumkhuba weBhayibheli, inkambiso yomthandazo, kanye nomkhuba wokuhlanganyela. Hewu. Lokho bekulula ngempela.

Manje uma udinga usizo lokuqalisa, sizoxoxa ngalo kusasa. Okwanamuhla, funda KwabaseKolose 4, futhi ukugcine kulula: thandani uNkulunkulu futhi nithandane. 

Okokuzindla Nezingxoxo 

• Ucabanga ukuthi kungani umthandazo ubalulekile ekulandeleni uJesu? Umkhuleko ukuthinta kanjani ukuhamba kwakho noNkulunkulu?
• Ucabanga ukuthi kungani ukuhlanganyela kubalulekile ekulandeleni uJesu? Ukuhlanganyela namanye amaKrestu kukuthinta kanjani ukuhamba kwakho noNkulunkulu?