2 uSamuweli 22:1-25
2 uSamuweli 22:1-25 IsiZulu 2020 (ZUL20)
UDavide washo amazwi aleli hubo kuSimakade, ngosuku uSimakade amsindisa ngalo esandleni sazo zonke izitha zakhe nasesandleni sikaSawule imbala, wathi: “USimakade uyidwala lami, nenqaba yami, nomkhululi wami. UNkulunkulu uyidwala lami engiphephela kulo, isihlangu sami, nophondo lwensindiso yami, inqaba yami ephephileyo nesiphephelo sami; msindisi wami, uyangisindisa ebudloveni. Ngimemeza uSimakade ofanele ukudunyiswa, ngisindiswe ezitheni zami. “Amagagasi okufa angihaqa; izikhukhula zobubi zangisibekela. Izintambo zendawo yabafileyo zangizungeza, izihibe zokufa, zangehlela. Ekuhluphekeni kwami ngambiza uSimakade, ngambiza uNkulunkulu wami; walizwa izwi lami esethempelini lakhe. Ukukhala kwami kwafinyelela ezindlebeni zakhe. “Umhlaba wawusuzamazama, wandindizela; izisekelo zezulu zathuthumela, zaqhaqhazela, ngokuba ethukuthele. Kwaphuma intuthu emakhaleni akhe, nomlilo oqothulayo emlonyeni wakhe, namalahle avuthayo kuye. Wadabula amazulu, wehla; isigayegaye sobumnyama sasiphansi kwezinyawo zakhe. Wakhwela phezu kwekherubhi, wandiza; wabonwa emaphikweni omoya. Wenza ubumnyama bube ngamadokodo amphahlayo, amanzi aqoqane, amafu abe nzima yimvula. Ekukhazimuleni okuphambi kwakhe kwavutha amalahle omlilo. USimakade waduma ezulwini; Ophezukonke walizwakalisa izwi lakhe. Wathuma imicibisholo, wabangquzula, yebo, ngonyazi wabadidizelisa. Kwembulwa izisekelo zolwandle, nezisekelo zomhlaba zabonakaliswa ngenxa yokuthetha kukaSimakade, nokufutha kwamakhala akhe. Waselula isandla sakhe ephezulu, wangibamba; wangikhipha emanzini amaningi. Wangisindisa esitheni sami esinamandla nakubo abangizondayo, ngokuba babenamandla amakhulu kunami. Bangihlasela ngosuku engehlelwa ngalo yinhlekelele, kodwa uSimakade waba yinsika yami. Wangikhiphela endaweni ebanzi: wangikhulula, ngokuba ethokoza ngami. “USimakade ungivuzile ngokulunga kwami, wangibuyisela njengobumsulwa bezandla zami. Ngizigcinile izindlela zikaSimakade; angikwenzanga okubi ngokufulathela uNkulunkulu wami. Imithetho yakhe yayiphambi kwami, nezimiso zakhe angichezukanga kuzo. Ngangimsulwa kuye; ngazigcina, angenza okubi. USimakade wangivuza ngangokulunga kwami, nanjengokuhlanzeka kwami phambi kwamehlo akhe.
2 uSamuweli 22:1-25 IBHAYIBHELI ELINGCWELE (ZUL59)
UDavide wakhuluma kuJehova amazwi aleli hubo mhla uJehova emophula esandleni sezitha zakhe zonke nasesandleni sikaSawule, wathi: “UJehova uyidwala lami, nenqaba yami, nomkhululi wami; uNkulunkulu uyidwala lami engiphephela kulo, nesihlangu sami, nophondo lokusindiswa kwami, inqaba yami ephakemeyo nesiphephelo sami; msindisi wami, uyangisindisa ebudloveni. Ngiyamemeza kuJehova odumisekayo, ngisindiswe ezitheni zami. “Ngokuba amaza okufa angihaqa; izikhukhula zokona zangethusa. Izintambo zasendaweni yabafileyo zangizungeza, izihibe zokufa zangehlela. Ekuhluphekeni kwami ngambiza uJehova, ngakhala kuNkulunkulu wami; walizwa izwi lami esethempelini lakhe; ukukhala kwami kwangena ezindlebeni zakhe. “Umhlaba wawusuzamazama, wadikizela; izisekelo zezulu zathuthumela, zaqhaqhazela ngokuba ethukuthele. Kwenyuka umusi emakhaleni akhe, nomlilo odlayo emlonyeni wakhe; amalahle avutha kuye. Wathobisa izulu, wehla; ubumnyama babuphansi kwezinyawo zakhe. Wakhwela phezu kwekherubi,* wandiza; wabonwa emaphikweni omoya. Wenza ubumnyama bube ngamadokodo amphahlayo, amanzi aqoqane, amafu abe nzima. Ekukhazimuleni okuphambi kwakhe kwavuthiswa amalahle omlilo. UJehova waduma ezulwini; oPhezukonke walizwakalisa izwi lakhe. Wathuma imicibisholo, wabangquzula, yebo, nonyazi, wabadidizelisa. Kwase kubonakala imisinga yamanzi; izisekelo zomhlaba zambulwa ngesijeziso sikaJehova, ngokufutha komoya wamakhala akhe. Waselula isandla sakhe ephezulu, wangibamba; wangikhipha emanzini amaningi. Wangophula esitheni sami esinamandla nakubo abangizondayo, ngokuba base bengahlulile. Bangihlasela ngosuku lwesigemegeme sami, kepha uJehova waba yinsika yami. Wangiphumisela endaweni ebanzi: wangikhulula, ngokuba ebethokoza ngami. “UJehova wangivuza ngokokulunga kwami; wangibuyisela njengokuhlanzeka kwezandla zami. Ngokuba ngizigcinile izindlela zikaJehova; angimukanga kuNkulunkulu wami ngokushinga. Ngokuba yonke imithetho yakhe yayiphambi kwami, nezimiso zakhe angizivumanga ukuba zisuke kimi. Ngangiphelele kuye; ngabuxwaya ububi. UJehova wayesebuyisela kimi njengokulunga kwami, njengokuhlanzeka kwami phambi kwamehlo akhe.
2 uSamuweli 22:1-25 Contemporary Zulu Bible 2024 (CZB24)
UDavide wakhuluma amazwi aleli hubo kuJehova mhla uJehova emkhulula esandleni sezitha zakhe zonke nasesandleni sikaSawule; Wathi: “UJehova uyidwala lami, nenqaba yami, nomsindisi wami; Nkulunkulu wedwala lami; ngithembele kuye: uyisihlangu sami nophondo lwensindiso yami, inqaba yami ephakemeyo nesiphephelo sami, umsindisi wami; Uyangisindisa ebudloveni. Ngiyakumbiza uJehova ofanele ukudunyiswa; ngakho ngizakhululwa ezitheni zami. Lapho amaza okufa engihaqa, izikhukhula zababi zangethusa; Izinhlupheko zesihogo zangizungeza; izingibe zokufa zangivimbezela; Ekuhluphekeni kwami ngambiza uJehova, ngambiza uNkulunkulu wami, walizwa izwi lami ethempelini lakhe, ukukhala kwami kwangena ezindlebeni zakhe. Umhlaba wazamazama, wazamazama; izisekelo zezulu zanyakaza, zazamazama, ngokuba wayethukuthele. Kwenyuka umusi emakhaleni akhe, nomlilo emlonyeni wakhe wadla; amalahle abaswe ngakho. Wawathoba amazulu, wehla; nobumnyama babuphansi kwezinyawo zakhe. Wakhwela phezu kwekherubi, wandiza, wabonakala emaphikweni omoya. Wamisa ubumnyama baba ngamathende akhe nxazonke, amanzi amnyama namafu ezulu. Amalahle omlilo avutha ngokukhazimula phambi kwakhe. UJehova waduma ezulwini, oPhezukonke walizwakalisa izwi lakhe. Wathuma imicibisholo, wabahlakaza; umbani, wabadunga. Kwabonakala imisele yolwandle, izisekelo zomhlaba zambulwa ngesijeziso sikaJehova ngokuphephetha komoya wamakhala akhe. Wathumela ephezulu, wangibamba; Wangikhipha emanzini amaningi; Wangisindisa esitheni sami esinamandla nakubo ababengizonda, ngokuba babenamandla kunami. Bangivimbezela ngosuku lwesigemegeme sami, kepha uJehova waba yinsika yami. Wangikhipha wangiyisa endaweni enkulu; Wangisindisa, ngokuba wayethokozile ngami. UJehova ungivuzile njengokulunga kwami; njengobumsulwa bezandla zami ungibuyisele. Ngokuba ngizigcinile izindlela zikaJehova, angisukanga kuNkulunkulu wami ngobubi. Ngokuba zonke izimiso zakhe zaziphambi kwami, nezimiso zakhe angisukanga kuzo. Futhi ngangiqotho phambi kwakhe, ngazilinda ebubini bami. Ngakho uJehova ungibuyisele njengokulunga kwami; njengokuhlanzeka kwami phambi kwamehlo akhe.