2 uSamuweli 17:1-29

Dlulisela

2 uSamuweli 17:1-29 IBHAYIBHELI ELINGCWELE (ZUL59)

U-Ahithofeli wathi futhi ku-Abisalomu: “Mangikhethe manje abantu abayizinkulungwane eziyishumi nambili, ngisuke ngimxoshe uDavide ngalobu busuku, ngimfikele ekhathele, eyethile, ngimesabise; bonke abantu abanye bayakubaleka, ngibulale inkosi kuphela, ngibuyisele kuwe bonke abantu; umuntu omfunayo unjengokungathi bonke babuyile; bonke abantu bayakuba nokuthula.” Leli zwi lamjabulisa u-Abisalomu nawo onke amalunga akwa-Israyeli. Wayesethi u-Abisalomu: “Mawumbize noHushayi umArki, sizwe okusemlonyeni wakhe naye.” UHushayi esefikile ku-Abisalomu, u-Abisalomu wakhuluma kuye, wathi: “U-Ahithofeli ukhulume kanjalo; siyakwenza njengokusho kwakhe na? Uma kungenjalo, khuluma wena.” UHushayi wathi ku-Abisalomu: “Isiluleko u-Ahithofeli eluleke ngaso manje asisihle.” Wathi futhi uHushayi: “Uyamazi uyihlo nabantu bakhe ukuthi bangamaqhawe nokuthi bacasukile ezinhliziyweni zabo njengebhere* elaphucwe amazinyane alo endle; uyihlo uyindoda yempi, akayikuhlala nabantu. Bheka, manje ucashile emgodini noma kwenye indawo; kuyakuthi lapho esebafikela ekuqaleni nje, okuzwayo athi: ‘Abantu abalandela u-Abisalomu banqotshiwe;’ naye onesibindi, onhliziyo yakhe injengenhliziyo yengonyama, uyakuphela amandla, ngokuba wonke u-Israyeli uyazi ukuthi uyihlo uyiqhawe, nabanaye bangamadoda anamandla. “Ngalokho ngiyaluleka ukuba wonke u-Israyeli abuthane kuwe, kusukela kwaDani kuze kufike eBeri Sheba, ngangesihlabathi esingasolwandle ngobuningi, wena uqobo lwakho uye empini. Sesiyakumfikela endaweni ethile lapho engatholakala khona, simehlele njengokuwela kwamazolo emhlabathini; kuyena nabantu bonke abanaye asiyikushiya noyedwa. Noma engena emzini, wonke u-Israyeli uyakuyisa amagoda kulowo muzi, siwuhudulele emfuleni, kungabe kusafunyanwa khona netshana elilodwa.” U-Abisalomu nabantu bonke bakwa-Israyeli bathi: “Isiluleko sikaHushayi umArki singcono kunesiluleko sika-Ahithofeli.” Ngokuba uJehova wayenqumile ukuba kushafiswe isiluleko esihle sika-Ahithofeli, ukuze uJehova amehlisele u-Abisalomu okubi. UHushayi wayesethi kuSadoki naku-Abiyathara abapristi: “U-Ahithofeli weluleka u-Abisalomu namalunga akwa-Israyeli kanje nakanje; mina ngeluleke kanje nakanje. Ngalokho thumelani masinyane nimtshele uDavide ukuthi: ‘Ungahlali ngasemazibukweni asehlane ngalobu busuku, kepha uwele nokuwela, funa inkosi igwinywe kanye nabantu bonke abanayo.’ ” OJonathani no-Ahimahasi babehlala e-Eni Rogeli; incekukazi yayizinge ibatshela; bona bahamba bayibikela inkosi uDavide ukuba bangabonwa behamba beya emzini. Kepha umfana wababona, wamtshela u-Abisalomu; base beshesha, bahamba bobabili, bafika endlini yomuntu waseBahurimi owayenomthombo egcekeni lakhe; behlela khona. Owesifazane wathatha isimbozo, wasendlala phezu komlomo womthombo, weneka umqhazulo kuso, kungaziwa lutho. Zase zifika izinceku zika-Abisalomu kowesifazane endlini, zathi: “Baphi o-Ahimahasi noJonathani na?” Owesifazane wathi kuzo: “Bawuwele umfudlana.” Sezibafunile zingabatholanga, zabuyela eJerusalema. Kwathi sezimukile, baphuma emthonjeni, baya bayitshela inkosi uDavide, bathi kuDavide: “Sukani, nisheshe niwele amanzi, ngokuba u-Ahithofeli weluleke kanjalo ngani.” UDavide wayesesuka nabo bonke abantu ababe naye, bawela iJordani; ngasekuseni akusalanga noyedwa ongaliwelanga iJordani. Lapho u-Ahithofeli ebona ukuthi isiluleko sakhe asilandelwanga, wayibophela imbongolo yakhe, wasuka, waya ekhaya emzini wakhe, wayala ngendlu yakhe, waziphanyeka, wafa, wembelwa ethuneni likayise. UDavide wayesefika eMahanayimi. U-Abisalomu waliwela iJordani, yena nabo bonke abantu bakwa-Israyeli kanye naye. U-Abisalomu wabeka u-Amasa phezu kwempi esikhundleni sikaJowabe. U-Amasa wayeyindodana yomuntu ogama lakhe lalingu-Itira umIsrayeli, owangena ku-Abigali indodakazi kaNahashi, udadewabo kaSeruya unina kaJowabe. O-Israyeli no-Abisalomu bamisa ezweni lakwaGileyadi. Kwathi uDavide esefikile eMahanayimi, uShobi indodana kaNahashi waseRaba labantwana bakwa-Amoni, noMakiri indodana ka-Amiyeli waseLo Debari, noBarizilayi wakwaGileyadi waseRogelimi baletha amacansi, nemicengezi, nezitsha zebumba, nokolweni, nebhali,* nempuphu notshwele, nobhontshisi, nembumba, nenhlosa, nezinyosi, namangqanga, nezimvu, noshizi* wezinkomo kuDavide nabantu ababe naye ukuba badle, ngokuba bathi: “Abantu balambile, bakhathele, bomile ehlane.”

2 uSamuweli 17:1-29 Contemporary Zulu Bible 2024 (CZB24)

U-Ahithofeli wathi ku-Abisalomu: “Mangikhethe amadoda ayizinkulungwane eziyishumi nambili, ngisuke ngixoshe uDavide ngalobu busuku. Ngiyakumfikela ediniwe, ebuthakathaka isandla, ngimethuse; bonke abantu abanaye bayakubaleka; futhi ngizoyinqoba inkosi kuphela. Ngiyakubabuyisela kuwe bonke abantu; umuntu omfunayo unjengokungathi bonke babuyile; ngakho bonke abantu bazakuba nokuthula. Leli zwi lamjabulisa u-Abisalomu namalunga onke akwa-Israyeli. U-Abisalomu wayesethi: “Bizani noHushayi um-Ariki, sizwe ukuthi uthini nje.” UHushayi esefikile ku-Abisalomu, u-Abisalomu wakhuluma kuye, wathi: “U-Ahithofeli ukhulume kanje; kufanele senze ngokwezwi lakhe na? Uma kungenjalo; uyakhuluma. UHusayi wathi ku-Abisalomu: “Iseluleko sika-Ahithofeli asisihle ngalesi sikhathi.” Ngoba, uHusayi wathi, wena uyamazi uyihlo labantu bakhe ukuthi bangamaqhawe, futhi bachothozekile ezinhliziyweni zabo njengebhere eliphucwe amawundlu alo egangeni; futhi uyihlo uyindoda yempi futhi akafuni ukulala nabantu. Bhekani, manje ucashile komunye umgodi noma kwenye indawo; uma abanye kubo beketulwa kuqala, yilowo nalowo ozwayo uyakuthi: ‘Kukhona ukubulalana phakathi kwabantu abalandela u-Abisalomu. Futhi futhi indoda enesibindi enhliziyo yayo injengenhliziyo yengonyama, iyoncibilika ngokuphelele; ngoba wonke u-Israyeli uyazi ukuthi uyihlo uyiqhawe nokuthi labo abanaye bangamadoda anamandla. Ngalokho ngiyaluleka ukuba wonke u-Israyeli abuthane kuwe, kusukela kwaDani kuze kube seBeri Sheba, ngangesihlabathi esingasolwandle ngobuningi; nokuthi uziyele wena empini. Ngakho siyakuhlangana naye endaweni lapho ayotholakala khona, futhi siyokwehlela phezu kwakhe njengamazolo ewela emhlabathini; futhi kuye nakuwo wonke amadoda akanye naye akuyikusala neyodwa. Ngaphezu kwalokho, uma efike emzini, wonke u-Israyeli kumelwe alethe izindophi kulowo muzi, sizidonsele emfuleni kuze kungatholakali nelilodwa itshe elincane. U-Abisalomu nawo onke amadoda akwa-Israyeli bathi: “Iseluleko sikaHushayi um-Arki singcono kuneseluleko sika-Ahithofeli. Ngokuba uJehova wanquma ukuchitha iseluleko esihle sika-Ahithofeli, ngenjongo yokuthi uJehova uzomehlisela okubi u-Abisalomu. UHushayi wayesethi kuSadoki naku-Abiyathara abapristi: “U-Ahithofeli weluleka kanje nakanje ku-Abisalomu namadoda amadala akwa-Israyeli; futhi nganikeza iseluleko. Ngakho-ke thumelani masinyane nitshele uDavide, nithi: ‘Ungalali emathafeni asehlane ngalobubusuku, kepha dabula masinyane; funa inkosi idliwe nabantu bonke abanayo. OJonathani no-Ahimahasi bahlala e-Eni Rogeli; ngoba babengabonwa bengena emzini. Bahamba bayitshela inkosi uDavide. Kepha umfana wababona, watshela u-Abisalomu; kepha bashesha bobabili, bafika endlini yomuntu eBahurimi, owayenomthombo egcekeni lakhe; lapho behla khona. Owesifazane wathatha isimbozo, wendlala umgodi womthombo, weneka ukolweni ogqunyiweyo phezu kwawo; necala lalingaziwa. Lapho izinceku zika-Abisalomu zifika kowesifazane endlini, zathi: “Baphi o-Ahimayo noJonathani na? Owesifazane wathi kubo: “Bawela umfula wamanzi.” Kwathi sebebafunile kodwa ababatholanga, babuyela eJerusalema. Kwathi sebesukile, bakhuphuka emthonjeni, baya babikela inkosi uDavida, bathi kuDavida: Sukuma uwele masinyane emanzini, ngoba uAhithofeli wenze icebo ngawe. Ngemva kwalokho uDavide waqeda kanye nawo wonke amadoda ayenaye, bawela iJordani; U-Ahithofeli ebona ukuthi isiluleko sakhe asilandelwanga, wabophela imbongolo yakhe, wasuka, waya endlini yakhe emzini wakubo, wayala indlu yakhe, waziphanyeka, wafa, wembelwa ethuneni likayise. UDavida wasefika eMahanayimi. U-Abisalomu wadabula iJordani, yena nawo wonke amadoda akwa-Israyeli kanye naye. U-Abisalomu wabeka u-Amasa induna yempi esikhundleni sikaJowabe; u-Amasa wayeyindodana yendoda egama layo linguJitra, umIsrayeli, owangena no-Abigayili indodakazi kaNahashi, udadewabo kaSeruya, unina kaJowabe. O-Israyeli no-Abisalomu bamisa ezweni lakwaGileyadi. UDavide esefikile eMahanayimi, noSobi indodana kaNahashi eRaba labantwana bakwa-Amoni, noMagiri indodana ka-Amiyeli eLodebari, noBarizilayi wakwaGileyadi waseRogelimi, Lethani imibhede, nezitsha, nezimbiza zebumba, nokolweni, nebhali, nempuphu, nokolweni othosiwe, nobhontshisi, nodalili, namabele athosiweyo; nezinyosi nebhotela nezimvu noshizi ezinkomo zikaDavide nabantu ababe naye ukuba badle; ngoba bathi: Abantu balambile, badiniwe, bomile enkangala.

2 uSamuweli 17:1-29 IsiZulu 2020 (ZUL20)

U-Ahithofeli wathi ku-Absalomu: “Ake ngiqoke amadoda ayizi-12 000, ngizosuka ngimlandele uDavide ngabo bona lobu busuku. Ngizomfica ekhathele, nezandla zakhe zingenamandla, ngizomthelekela, abantu bonke abanaye babaleke, bese ngibulala inkosi, yona nje kuphela. Ngiyakubabuyisa kuwe bonke abantu. Uma ubulala oyedwa nje lo omfunayo, bonke abantu bayakuba nokuthula.” Leli lizwi lamjabulisa u-Absalomu nawo wonke amalunga akwa-Israyeli. Wayesethi u-Absalomu: “Mawumbize noHushayi, umArikhi, sizwe ukuthi yena uthini.” UHushayi wafika ku-Absalomu, u-Absalomu wathi kuye: “U-Ahithofeli ukhulume lokhu, senze njengokusho kwakhe na? Uma kungenjalo, sitshele-ke ukuthi wena uthini.” UHushayi wathi ku-Absalomu: “Iseluleko akweluleke ngaso ngalesi sikhathi u-Ahithofeli, asisihle neze.” UHushayi wabuye wathi: “Uyazi ukuthi uyihlo nabantu bakhe bangamaqhawe, nokuthi bacasukile ezinhliziyweni, bafana nebhele elephucwe amazinyane alo ehlane. Uyihlo uyindoda yempi, akasoze alala lapho kulele khona abantu. Bheka, manje ucashe emgodini noma kwenye indawo. Kuyothi lapho amabutho ethu eqala ukubathelekela, umuntu oyokuzwa uyothi: ‘Abantu abalandela u-Absalomu babulewe.’ Ngisho nonesibindi, onenhliziyo enjengeyengonyama, uyophelelwa ngamandla ngenxa yokwesaba, ngokuba wonke u-Israyeli uyazi ukuthi uyihlo uyiqhawe, nabantu ahamba nabo bangamaqhawe anamandla. “Nasi iseluleko sami sokuthi u-Israyeli wonke makaqoqelwe kuwe kusukela kwaDani kuze kufike eBheri Sheba, ube mningi ngangesihlabathi sasolwandle ngobuningi, bese umhola wena uye naye empini. Siyakumhlasela noma kuphi lapho siyomfica khona, simthelekele kuhle kwamazolo ehlela emhlabathini; akanakuphunyuka, yena nabo bonke abanaye. Uma ebalekela emzini, wonke u-Israyeli uyakuphonsa izintambo kulowo muzi, siwuhudulele emfuleni, kungabe kusafunyanwa khona netshe nje elilodwa.” U-Absalomu nabantu bonke bakwa-Israyeli bathi: “Iseluleko sikaHushayi, umArikhi, singcono kuneseluleko sika-Ahithofeli.” Ngokuba uSimakade wayenqumile ukuba kubhuntshe iseluleko esihle sika-Ahithofeli, ukuze uSimakade amehlisele okubi u-Absalomu. UHushayi wayesethi kuZadoki no-Abhiyathara, abaphristi: “U-Ahithofeli umeluleke kanje kanje u-Absalomu namalunga akwa-Israyeli. Mina ngabeluleka kanje nakanje. Ngakho-ke phuthumani nithumele kuDavide, nimbikele nithi: ‘Ungahlali ngasemazibukweni ehlane ngalobu busuku; wela nokuwela, funa inkosi ibhujiswe nabo bonke abantu abanayo lapho.’ ” UJonathani no-Ahimahasi babehlala e-Eni Rogeli; incekukazi yayivame ukuya ibatshele, bese bona bewedlulisela umbiko enkosini uDavide, babekwenza lokhu ngendlela yokuba bangabonwa muntu behamba beya emzini. Kepha mfana mumbe wababona, wayeseyobotha ku-Absalomu, base beshesha, bahamba bobabili, bafika endlini yomuntu waseBhahurimi owayenomthombo egcekeni lakhe; behlela khona. Owesifazane wathatha isivalo, wasibeka phezu komlomo womthombo, weneka umgqakazo kuso; kwakungazi muntu ngalokho. Izinceku zika-Absalomu zafika kowesifazane endlini, zathi: “Baphi o-Ahimahasi noJonathani na?” Owesifazane waphendula wathi kuzo: “Bawele umfudlana.” Lapho sezibathungathe zancama, zasuka zabuyela eJerusalema. Kwathi sezihambile, baphuma emthonjeni, bahamba bayoyibikela inkosi uDavide, bathi: “Sukani, niwele umfula ngokushesha, ngokuba u-Ahithofeli weluleke kanje ngani.” UDavide, nabo bonke abantu ababe naye, basuka bawela iJordani. Kwathi kusa, kwabe kungekho namunye owayesasele engaliwelanga iJordani. Kuthe lapho u-Ahithofeli ebona ukuthi iseluleko sakhe asilandelwanga, wabophela imbongolo yakhe, wasuka, wabuyela ekhaya, emzini wakhe. Wafika khona wahlela izindaba zomuzi wakhe, wayesezilengisa, wafa, wangcwatshwa ethuneni likayise. UDavide wahamba waze wafika eMahanayimi, kodwa u-Absalomu nabo bonke abantu bakwa-Israyeli bawela iJordani. U-Absalomu wabeka u-Amasa ukuba ahole impi esikhundleni sikaJowabe. U-Amasa kwakuyindodana yendoda yakwa-Israyeli okuthiwa ngu-Ithira, owayengene u-Abhigayili, indodakazi kaNahashi, udadewabo kaZeruya, unina kaJowabe. Abakwa-Israyeli no-Absalomu bakanisa kwaGileyadi. Kwathi ukuba uDavide afike eMahanayimi; uShobi, indodana kaNahashi waseRabha kwa-Amoni, uMakhiri, indodana ka-Amiyeli waseLo Debhari, noBharizilayi, umGileyadi, waseRogelimi, bamlethela amacansi, imicengezi, izitsha zebumba, ubhontshisi, ukolo, ibhali, impuphu, utshwele, imbumba, inhlosa, uju, izaqheqhe, izimvu, noshizi, bakuletha kuDavide nakubantu ababenaye ukuze badle, ngokuba bathi: “Abantu balambile, bakhathele, futhi bomile ehlane.”