Genesis 7
7
Le hiɗ naɗi beum
1Noa nug Kayak hekkununab aum bia ha male amu, Yawe nug Noa amegppa aum. “Da nahipnu amu, na am danab gemu daatteb oolagppa genab tutukku hak danab daattem anidttem amunu, na, na baenadppa ele, ag uub ooppa noig! 2Na doɗ iɗu iɗu oh mana mettaknu elele amu, anig eblaih aɗit ele, dawai eblaih aɗit ele diiadna, uub ooppa maatte! Doɗ iɗu iɗu oh mana mettaknu elele iitta amu, anig laippu, dawai laippu ele diiadna maatte! 3Ai iɗu iɗu oh anig eblaih aɗit, dawai eblaih aɗit ele diiadna, bau daaglagnu maatte! 4Aɗinu? Deɗ eblaih aɗit uueb amu, da heppi, gu okkai na, amun 40, tuqan 40 ele daakku amunu, keeke oh da hatti, wanppa bau daatteb ele, am iitta mekkulag,” awa aum.
5Yawe Nug anam a, Noa nug keeke oh Yawe hekkununab aum amu, nug amubia babaittom.
6-7Babaitta, nug maɗ nuhig 600 dayeye, le hiɗ naɗi bekkunu heehe amu, nug, nug wau, amu nug bekkod ewam, ag waalkad ele, ag oh bau daaglagnu uub ooppa noppig. 8Doɗ mana mettaknu elele, mana mettaknu elele iitta, ai, doɗ laa ag oolag wan qeeqe oitteb ele, 9anig, dawai ele anam anam, Noa ele, Kayak Noa haknunab aum bia noppig. 10Amu deɗ eblaih aɗit ele uue, hiɗ naɗi wan atu oh tonakkunu digmeum.
11Haen amuppa Noa nug maɗ 600 dayom. Maɗ 600 dayeye, kalam ebqak aɗit, kalam amunu deɗ 17ppa, gu okkai neene, Kayak Nug he, wan panatte, wan ooppanu le huanak qeppuɗin beegeg, le hiɗ naɗi digma beum. 12Gu okkainab, amun 40, tuqan 40 ele neum.
13Le hiɗ naɗi digmeum, deɗ amuppa Noa, wau ele, bekkod ewam Sem, Ham, Japet, ag waalkad ele, 14aria, doɗ dakkuɗ, doɗ aabppanu, ai, doɗ laa ag oolag wan qeeqe oitteb oh ele, amu oh ag anen anen appatna, ag diilag amubiaib betteb amu, ag uub ooppa nona malappig. 15Doɗ iɗu iɗu oh bau daappig ele, ag oolagppanu anig, dawai ele, ag Noa ele uub ooppa noppig. 16Kayak Noa hekkununab aum bia, doɗ iɗu iɗu oh bau daappig ele, ag oolagppanu anig, dawai ele, Noa ele uub ooppa noeg, Yawe Nug uub od manom.
17Mane amu, deɗ 40ppa le hiɗ beebe, le titiɗa, uub ele wanppanu attannab huma, 18mawa beebe, le huana titiɗe, uub le qaɗeppa maya ma oiyom. 19Ge! Le nug titiɗa baaba, qauko okkai wan atu ohppanu tonatta, qauko eɗitta 20attan ta, 7 mita anam batak dayom, 21amunu keeke bau wanppa oippig am mauhppig; amuam ai, doɗ aabppanu, doɗ dakkuɗ, doɗ naunau huanaknab wan qaɗeppa oitteb, amu danab ele, ag oh mauhppig. 22Genab, keeke bau wanppa oippig amu, ag oh mauhadppig. 23Yawe Nug he, danab, doɗ, ai, doɗ laa ag oolag wan qeeqe oitteb ele, amu oh iitta maadna malappig, amge Noa, nuhikkudppa ele, agib ii mauhppig.
24Amu le hiɗ naɗi am deɗ 150 wanppa dayom.
Okuqokiwe okwamanje:
Genesis 7: NB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2022, Wycliffe Bible Translators, Inc. All rights reserved.