Mak, echî 16

Jisos a chə́bhe njəm ka ekpin

(Mat 28.1-8; Luk 24.1-12; Jon 20.1-9)

1Oyoa-biji ane Jus ta ó man, na egu áji, Meri nnyo Madarin na Sarome na Meri nnyo nnyen i Jems, á nâm akʉ́ mma á fóne énoê egyʉ, sê á jóme Jisos. 2Ntem-ofú na ofú-ofú, á yə̂p á kí ji ka oyəm obhê. 3Nji á jâk ka mbá, á kí bhəp biji ábho sê, “É jak nná, énê nnyo tîk a yíghi êt ndûm i ntáé nnyi á bhúi ka nnyo oyəm?”

4Kən á kpó to á sí ágo, á yên ntáé nchane a chə́bhe ka mkpe, oyəm ó kət fóŋ. 5Á gyê ka etím, á yéna nguŋi nâ a kun mkpe obhô-orûm na ábháré ḿfô ka biji kpóóŋ. Efup é súi ábho biji.

6Nguŋi nnyó se, “Deê biji í kâ kpô ên. Ḿ məŋe bəre ó nora ên Jisos nnyo nne Nasaret nnyo á kúmi nná ka ego. Yê kpó cháŋ mfá, a nyə́me ka ekʉ̂. Ńgyê eji nji á núŋi yê.”

7A tíbhi mân ábho se, “Chəbhê ên njəm, choŋ osə́ré ên Pita na ágbán í Jisos mba ngá se yê a râŋ ábho mbá nnyi Gariri, tîk á kpúghi yê ágo ka ekpak a sə́re ábho kən a kpó.”#Mat 26.32; Mak 14.28.

8Na efup njí, ane-akáé mbá á fâp ka oyəm mbí á kâk ekát ábhiî. Á ká chot kpe ejûm mbâ nne kpe yót ka obhô efup.

Etəm Ejeghé nwet etat#16.8 Onwet mbi tat ó ká fon Mak 16.9-20, ó kí man ka Mak 16.8.

Jisos a fâp ka ochî Meri nnyo Madarin

(Mat 28.9-10; Jon 20.11-18)

[ 9Ofú oyoá-biji ane Jus ta ó chiŋ, ntem-ofú, na ofú-ofú Jisos a nyə́me ka ekʉ̂. Nji a nyəmê, a raŋê mbá kpá a fâp ka ochî Meri nnyo Madarin nnyo yê a yighî mkpak ojê enígisá ka biji. 10Meri a jak a jî sə́re nchot nnyí mbâ atem mba á jéna na Jisos nji á rʉra ekʉ̂ ejê á yimá iyîm ekʉ̂ chénchén. 11A kpo to a sə́ré ábho se Jisos a chə́bhe njəm ka ekpin, ta yê a yên yê na amə̂t amê, á ká kam na yê.

Jisos a fâp ka ochî ane ábháe mba á tóbha yê

(Luk 24.13-35)

12Kpe é ká kət, Jisos a fâp ka ekpak etat ka ochî ane ábháe mba á tóbha yê. Ane mbá á jâk mô ejen. 13Á chə́bhe njəm á bhâ sə́re atem, kən kpe nne nnyo a kamê cháŋ.

Jisos a fâp ka ochî ágbán abhê ófó na yót.

(Mat 28.16-20; Luk 24.36-49; Jon 20.19-23; Etûm 1.6-8)

14Nji ágbán í Jisos ófó na yót á kûn, á kí di édî, a fâp ábho áfo. A fáme ábho, ka á ká ki ḿbə́ŋé na yê, á ku fə́ne atûŋ á ká kam na ane mba á yéne yê mbít.

15A káre mân ábho etûm se, “Choŋ ên ka ngun ndə́m, sə́ré ên ane chénchén otîp ogyebhá-ḿbə́ŋé Obhasi.#Etûm 1.8. 16Nne nnyo á ki ḿbə́ŋé na Obhasi, a fûk ayép, tîk a sêm. Nnyo á ka kí, tîk á kími ngom á káre yê. 17Ane mba á ki ḿbə́ŋé na Obhasi, tîk á fôn ikom á yighá ojê mbâ ane ka mbiŋ amé. Tîk á chorá nyum i nték etat. 18Tîk á fî onyô na abhô, kən á bhó yim ábho kpe ejûm. Kpe á wóe ejûm ebhí, é bhó yim ábho kpe ejûm. Tîk á fôn ikom nne ábho á kəmé obhô obhê mbâ nne emaŋé kpe nnyón, a sôn oson.”

Obhasi a kô Jisos ka ósô

(Luk 24.50-53; Etûm 1.9-11)

19Nji Ńtâ Jisos a manê ekubhi na ágbán abhê, Obhasi a kô yê a jak ka ósô. A jî kî yê ekumi ejík, mkpe obhô-orûm obhê.#Etûm 1.9-11. 20Ágbán í Jisos á róghe mân ejeném ka ngûm ka ngûm, á səra ane achot Obhasi. Ńtâ Jisos a ri fə́ne na ábho tə́mé-tə́mé. A tóŋá ngun ndə́m se okpígha-ejûm ane abhê ó rî ka echî, ka ikom mfi a karê ábho á yimá iyîm okpógha-biji. Áno.]

Okuqokiwe okwamanje:

Mak, echî 16: ETUNT

Qhakambisa

Dlulisela

Kopisha