Mak, echî 10
10
Jisos a chôt nchot ebháé efábhám
(Mat 19.1-12; Luk 16.18)
1Jisos na atóbhá abhê á mághe mân Kapanom á jak ebhát í Judiya. Á yáŋe aya mma Jodan. Ane á bhak á nyígha onyíghí mbâ eye. Ka ekpak erû ejê, a róghe fə́ne ábho achot Obhasi ekpíím.
2Ane echəme Farasi á bhak sê á gáe yê. Á bhə̂p yê sê, “Sə́re êt, ebhín ejə́ré é kam se nne-ndûm a bhím nkáé owe ka ebháé á?”
3Jisos se, “Mosis a karê ên bhaghé ebhín ka nchot ebháé nnyí?”
4Á táme sê, “Mosis a kâm se nne-ndûm nnyo a timî nkáé ebhímím, deê a séŋ nwet ebháé emanám kən a bhím mân nkáé.”#Otira 24.1-4; Mat 5.31.
5Jisos a sə́re ábho se, “A ri osoná-echî obhə́né nâ ó yími kən Mosis a káre ên ntʉ́ghi ebhín njí. 6Kən ka eróghá-ndə́p í ngun, ebhú Obhasi a yimî nne, a yimî nne-nkáé na nne-ndûm.#Eróghá 1.27; 5.2. 7Ka echî njí, nne-ndûm tîk a mághe ńsé na nnyen, a chə̂m biji na nkáé owe, 8á kət ejûm jə́t. Ane mbá ábháe á chəbhe nne yót, á ká kpo joé ane ábháe.#Eróghá 2.24. 9Deê mân nne kpe yót a kâ chât ejûm nji Obhasi a chə̂m eji jə́t.”
10Ebhú á chə́bhe njəm ka njû, atóbhá abhê á kpô bhə́p yê ebhə̂p ka nkúbhi nchot nnyí. 11A táme ábho se, “Nne-ndûm nnyo á bhim nkáé owe, a kô nnyo tat, a gbô ekun. 12Nne-nkáé fə́ne nnyo á maghé ndûm owe a kô nnyo tat, a gbô ekun.”#Mat 5.32; 1 Korin 7.10-11.
Jisos a káre abhonche enare
(Mat 19.13-15; Luk 18.15-17)
13Ane etat á kô abhonche á bhak mbâ Jisos sê a kuní ábho obhô ka echî, a karé ábho enare. Kən atóbhá Jisos á nyân ane mbá sê á kâ kpô yim. 14Nji Jisos a yéne ábho á yimá erû njí, é yâm yê kpe-eji. A bhîŋ ábho a sə́re se, “Deê abhonche á bhá mbâ amé, ka kpó taŋé ên ábho. Echî aŋ? A ri ane mba á fóne ḿbə́ŋé jáé noŋ abhon ntʉ́ghi mbá, nâ á gyêk ka otúi Obhasi. 15Deê ń sə́ré ên bəre nne nnyo á ka gbíŋí otúi Obhasi noŋ mmonche á gbíŋa ásé, tîk á bhó yen ḿbə́ne.”#Mat 18.3. 16A kô mân abhonche mbá a kúni ábho obhô ka echî, a káre ábho enare.
Jisos na nne-ntí yót
(Mat 19.16-30; Luk 18.18-30)
17Nji Jisos a kə́ bha oyəp ndə́p a ji ejen, nne-ndûm yót a bhéne a bhák mbâ eye. A tə̂m arúŋ ka nsi áfo ka ochî obhê. A bhə̂p yê se, “Nyima-ono ńsé, n kí yim jen kən ḿ fôn ekpin ótúm-ótúm?”
18Jisos a bhə̂p yê se, “É yími nan o kí bhiŋ ə̂m se nyima-ono? Kpe nyima-ono yót cháŋ ka nsi nnyí, é ká chiŋi Obhasi átíŋ. 19Ó məŋe se bibhín Obhasi í rî sê o kâ yúi nne, o kâ gbô ekun, o kâ jʉ̂ ejʉ̂, o kâ gyími ntî-isê áfúbhí, o kâ móe nne, jíghí ńsé owa na nnyen owa.”#Ane 20.12-16; Otira 5.16-20.
20Kən nne nnyó se, “Ńsé, bibhín mbí chénchén, n dóghe ekíím ta ka obhóné obhámé.”
21Kən Jisos a yûŋ amə̂t a kêp nne nnyó na okot, a sə́re yê se, “Ejûm é rî jə́t nji o nyə́ne ó ka yim. Choŋ ogurî iyîm ibhâ chénchén mbi o fonê. Karê ntí ámi mbâ akpák. Tôp ə̂m mân. Tîk o fôn efaŋ ka ósô.”
22Nji nne nnyó a yúghi nchot nnyí, amə̂t á bhî ka echî, a mághe a kʉ́rá na nsae ka ḿbə́ŋé, ka yê a ri ekpatə́m í nne-ntí.
23Jisos a kêp mân atóbhá abhê a fáre. A sə́re ábho se, “Tîk é sôn kpe-eji kən nne-ntí a yén otúi Obhasi.”
24Biji í kpô atóbhá abhê kpe-eji ka ntʉ́ghi nchot nnyí. Kən Jisos a sə́re ábho a jak ochî se, “Abhon abhámé, tîk é sôn kən ane á yén otúi Obhasi. 25É ká yuŋi mfoŋ echóé a chíŋ ka mfúk ḿbíabə́n, noŋ é kí yuŋi nne efaŋ a yén otúi Obhasi.”
26Nji atóbhá abhê á yúghi, á yíri biji, á kpíghi á bhə̂p atem sê, “Kən énê mân tîk a sêm?”
27Jisos a yûŋ amə̂t a kêp ábho a sə́re se, “Nne á bhó bhik eyimím ejûm ntʉ́ghi njí, kən Obhasi a kí yim. Kpe ejûm nji é chíŋa Obhasi eyimím cháŋ.”
28Pita a fâp a sə́re Jisos se, “Ńgyê êt, é maghe chénchén iyîm ibhə́ré e kí top wâ.”
29Jisos a táme se, “Deê ń sə́ré ên bəre kpe bhaghé énê nnyo á maghé njû eye, kpe abhon-í-nnyen ka ane-akáé ka ane-arûm, a mághe nnyen kpe ńsé kpe abhon, a mághe mbin eye ka echî ejámé na ka echî otîp Obhasi, 30tîk a fôn ekpatə́m ekəp ka mfá-mfá. A kí fon iyîm ka nsam na nsam, ojû, abhon-í-nnyen, abhon-í-ńsé, anyen, abhon na kpe mbin. A ri tîk a fôn atû na ekpatə́m oseŋe ka obhô achot Obhasi. Kən ka nsígha-njəm ebhú, tîk a fôn ekpin ka ótúm-ótúm. 31Kən məŋê ên sê, tîk ane etî-etî mba mfá-mfá á rî ochî, á gbô njəm. Mba fə́ne á rî njəm mfá-mfá, tîk á chə́bhe ochî.”#Mat 20.16; Luk 13.30.
Jisos a chôt nchot ekʉ̂ ejê ka osúí ntə̂m ésá
(Mat 20.17-19; Luk 18.31-34)
32Jisos na atóbhá abhê, á yə̂p á kí ji nnyi Jerusarem. Yê a ri mbá-ochî, atóbhá abhê á tóbha na ekpatə́m orəmá-ḿbə́ŋé. Ane mba á tóbha ábho, á fôn efup. Jisos a kpô bhiŋ ágbán abhê ófó na ábháe mbá-njəm, 33a sə́re se, “Yûk ên, é jak áno nnyi Jerusarem. Tîk á fî ə̂m, mme Mmon-i-ntem-nne, á káre mbâ ane-echî akará-agore Obhasi na atóŋá-ebhín. Tîk ane mbá á kími nchot sê á yúí ə̂m, á kô ə̂m á káre mbâ ajéné. 34Tîk ajéné mbá á kâk ə̂m ntuŋ, á chô ə̂m oson ka biji. Tîk á tə̂m ə̂m, á yúi ə̂m. Kən ebhú á kən ə̂m, ka osúí mfín ésá, tîk n nyə́me ka ekʉ̂.”
Ejûm nji Jems na Jon á bhə́bhe Jisos
(Mat 20.20-28)
35Jems na Jon mba abhon í Sebedi á bhâ sə́re Jisos sê, “Ńsé, e kí wom ó yîm ejûm jə́t ó káre êt.”
36A bhə̂p ábho se, “Ó woma ń yîm jen ń káre ên?”
37Á táme sê, “E kí goré sê ebhú ó kumí ka otúi obhâ na ejík, deê ó yîm êt é kúmi na we, yót obhô-okáé, yót obhô-orûm.”
38Kən a sə́re ábho se, “Ó ka məŋé ên ejûm nji ó bhəbha áno. Deê m bə̂p ên kpá ebhə̂p. Nâ-ngá tîk o kâm ên o yên oseŋe mbi tîk n yên a? Kə́n o kâm ên o kpô ên ekpak ekʉ̂ nji mme tîk m kpô a?”#Luk 12.50.
39Á táme sê, “Nn̂, tîk e kâm.”
Jisos a sə́re mân ábho se, “Tîk o sôn ên ḿbə́ŋé o tábhe ên oseŋe noŋ mme, o kpô ên fə́ne ekpak ekʉ̂ nji n kí kpo. 40Kən ń ka fon ikom mfi n kí saŋ ane mba á kí kumí ə̂m mkpe obhô-orûm na mkpe obhô-okáé. Ngûm nnyí a ri mbâ ane mba Obhasi a sáŋe se á kúmi.”
41Nji ágbán mba ngá ófó á yúghi nchot nnyí, á fôn ekpatə́m oyámá-ḿbə́ŋé na Jems na Jon. 42Kən Jisos a bhîŋ ábho chénchén a chôt se, “Ó məŋe ên sê ka ekpin ngun, ane mba á kébha sê a ri ane-echî ábho nâ á fóne ikom, kpe nnyón nne a ri ka óséré ábho.#Luk 22.25-26. 43Kən áno asík é kí joé na ên. Nne owəné nnyo a kí wom se yê a joé ochî, a ri a gbo osʉ́ŋ a karé atem chénchén. 44Nne owəné fə́ne nnyo a kí wom a joé ochî, deê a gbo osʉ́ŋ a karé atem chénchén.#Mat 23.11; Mak 9.35; Luk 22.26. 45Echî aŋ? Kpe Mmon-i-ntem-nne á ka bhá se ngun á tʉ́k yê, kən a bháe ngun otʉ́k, a karé fə́ne ekpin ejê se ane etî-etî á sém.”
Jisos a yîm Batimeyus nnyo ntána-amə̂t a sôn
(Mat 20.29-34; Luk 18.35-43)
46Jisos na atóbhá abhê á jên á sî Jeriko. Ebhú á mághe Jeriko á kí ji, ekpatə́m ekam ane á tobha ábho á jak. Ntána-amə̂t yót nnyo á kamá se Batimeyus, mmon i Timeyus, a kun ka mkpe mbá a gyéŋá egyéŋé. 47Nji a yúghi se Jisos nnyo nne Nasaret nâ á bhak áno, a róghe ekúghúm se, “Jisos, mmon i Debhit, ri ə̂m nsôn.”
48Ane etî-etî á nyân yê sê a maghé ejok. Kən á ka maghé, a kpére a kûk mân na ikom-ikom se, “Mmon i Debhit, ri ə̂m nsôn.”
49Nji Jisos a síi áfo, a gyími. A sə́re ane se, “Bhiŋ ên yê a bhá.”
Á jî bhîŋ mân nne nnyó, á sə́re yê sê, “Duî ngyím, son ḿbə́ŋé bhák, a kí bhiŋ wâ.”
50Nne nnyó a tə̂m a rúi ngyím a mə̂t éfô ńgô, a bhéne a jak mbâ Jisos.
51Jisos a bhə̂p yê se, “Ó woma ń yîm jen ń káre wâ?”
A táme se, “Ńsé, n kí wom ḿ kpó yen mbá.”
52Jisos a sə́re yê se, “Choŋ kʉ́ri, ḿbə́ŋé eya nnyi o kíi na Obhasi a yîm wâ ó son.”
Ka ngyím ányi, amə̂t amê á rə́bhe, a róghe Jisos etóbhóm.
Okuqokiwe okwamanje:
Mak, echî 10: ETUNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ejagham New Testament © Bible Society of Nigeria and Bible Society of Cameroon, 1996.
