Luk, echî 10
10
Jisos a tûm atóbhá abhê ejen
1Nji achot mmá á chíŋi, Ńtâ Jisos a kpô sáŋ ane, kən ka ntə̂m nnyí a ri nsam ane ésá njəm ane ófó na ábháe. A tûm ábho ábháe-ábháe á râŋ mbá á jên á fáre chénchén nték nnyi yê eróŋ a kí jen. 2A sə́re ábho se, “Etûm ebhin efʉʉ́m é ti, kən ayimá-etûm á ká ti. Gorê ên sê mfone ebhin a túm ane-etûm á tí.#Mat 9.37-38. 3Choŋ ên! Mme nâ n túmi ên bəre ó jî ên noŋ kpe ojo-obhúi mbi á túmi ka ekam onyam obhí.#Mat 10.16. 4Ka fî ên ntí, kpe ntâk-ejen, kpe ákúmá-akát. Ka jî ên o bhíbhá ebhú sê o kúbhá ên ane.#Mat 10.7-14; Mak 6.8-11; Luk 9.3-5.
5“O kí gye ên njû, raŋ ên mbá kûp ên ane áfo sê, deê Obhasi a karé ekone ka njû ányi. 6Nne ekone á joé áfo, deê ekûp ejə́né é kə́t na njû nnyí. Kən se cháŋ, chəbhê ên njəm tabhê ekûp ejə́né. 7Njû nnyi nne ekone a ri, kumî ên áfo, dî ên gwô kpe jen nji á káre ên, ka nne nnyo a kí yim etûm, é nóbhe sê a fon ekəp. O kâ jî ên o kumá ojû o yóŋá.#1 Korin 9.14; 1 Tim 5.18.
8“Ó si ên eték, á fi ên nono, dî ên kpe jen nji á káre ên. 9Yim ên ane bimaŋé mba á rî ka eték áji á son, o sə́re ên ane áfo sê, otúi Obhasi ó bha chén. 10Kən ó gye ên ka eték nji á ká fi ên, gyími ên ka ndûm mbá sə́re ên ábho sê, 11kpe ebhəm eték ábho nji é yághe ên ka akát, o kí yighí ó mághe ên na oyámá-ḿbə́ŋé, kən deê á mə́ŋe sê otúi Obhasi ó bha chén.#Etûm 13.51. 12N kí səre ên bəre ofú Obhasi a kí taŋ ngun, a kí fon nsôn na ane eték í Sodom a chíŋi ane eték áji.”#Eróghá 19.24-28; Mat 11.24; 10.15.
Jisos a fáme nték nnyi á ká ki ḿbə́ŋé na Obhasi
(Mat 11.20-24)
13Jisos se, “Eték í Korasi, tîk é bhîp na ên é tî é chîŋ. Ên ane Besayida eróŋ, tîk é bhîp na ên é chîŋ. Echî aŋ? Ekpatə́m í ntûm okpógha-biji nnyi á yími ka nték eyəné, á yími ka nték i Taya na Sidon eê, kə́n ebhú njí ane nték ányi á kûn na ányaghé-ḿfô, á jóme atôŋ ka biji noŋ eriŋ sê ábho á maghe obhí ábho.#Asa 23.1-18; Ese 26.1—28.26; Jow 3.4-8; Emos 1.9-10; Sak 9.2-4. 14Ka ofú Obhasi a kí taŋ ngun, a kí fon nsôn na ane Taya na Sidon a chíŋi ên. 15Ên ane Kapanom, o kérá ên tîk sê á kí ko ên sê ó faŋ ên ó chiŋ ochíŋ? Baram! Á kí ko ên ńgô sê ó ka bhik ên kpe ebhighím.”#Asa 14.13-15.
16Jisos a sə́re mân atóbhá abhê se, “Nne nnyo á yuk ên, nâ a yûk ə̂m. Nne nnyo á jiŋ ên, nâ a jîŋ ə̂m. É ká joé fə́ne sê mme-ḿmê nâ a jiŋî, a jîŋ yê nnyo a túmi ə̂m.”#Mat 10.40; Mak 9.37; Luk 9.48; Jon 13.20.
Ane mba Jisos a túmi á bha
17Nsam ane ésá njəm ane ófó na ábháe mbá, á jak ejen nji Jisos a túmi ábho, á chə́bhe njəm na ekpatə́m ogyebhá-ḿbə́ŋé. Á bhâ sə́re yê sê, “Ntûfâm, é chot e bhîŋ mbiŋ eya, kpe ojê ó kí yim nji e wóme.”
18Jisos a táme se, “Ń yen noŋ ikom í Satan í gbóe bhuúp noŋ nyaŋanya nâ a yaŋê. 19Yûk ên mân, ń kare ên ikom bəre ó jên ên ka onyô na ányaŋkíŋ, bəre chénchén ikom í Satan í jóe ka óséré obhə́né, kən kpe ejûm jə́t é bhó yim ên.#Nkôn 91.13. 20Kən deê o kâ gyébhe ên ḿbə́ŋé sê ó nyan ên ojê ó yuk ên. Gyebhê ên ḿbə́ŋé sê ka ngun Obhasi, á seŋ obhiŋ obhə́né ka nwet eye.”
Jisos a fôn ogyebhá-ḿbə́ŋé
(Mat 11.25-27; 13.16-17)
21Ka ebhú njí mân, Obhasi Ebhare Ntʉgantʉ a yîm Jisos a gyébhe ḿbə́ŋé ta a chôt se, “Ńsé, Ntûfâm ósô na nsi, ń kup wâ kpe-eji ka ó bhət iyîm mbí mbâ ane mba á kera sê á məŋe, kən ó rəbhe ó toŋe mbâ ane mba á ká məŋé. Ńsé, ḿ məŋe bəre chénchén é dʉ̂ ka okorá-ḿbə́ŋé obhâ.
22“Ńsé omé a mághe iyîm chénchén ka obhô obhámé. Kpe nne yót nnyo a məŋê ekpin í Mmon cháŋ, é ká chiŋi Ńsé átíŋ. Nne fə́ne kpe yót nnyo a məŋê ekpin í Ńsé cháŋ, é ká chiŋi Mmon na ane fə́ne mba Mmon a sáŋe se á mə́ŋe Ńsé owe.”#Jon 3.35; 10.15.
23A kpíghi mân mbâ atóbhá abhê a sə́re ábho kəma-kəma se, “Deê ogyebhá-ḿbə́ŋé ó jóe na ên, ka ó yen ên achot mmá. 24Deê ń sə́ré ên bəre akará-otîp Obhasi na atúi-ofâm etî-etî á wom sê á yén kən á ká yen, sê á yúk, kən á ká yuk.”
Egan í nne Samariya yót nnyo a fiî nne-ebhan noŋ ntem-nne
25Ka ebhú etat, ntóŋa-ebhín yót a bhák Jisos ogaé. A rúi ngyím a bhə̂p yê se, “Ńsé, n kí yim jen kən m fôn ekpin ótúm-ótúm?”#Mat 22.35-40; Mak 12.28-34.
26Jisos se, “Á séŋe ka nwet Obhasi sê jen? Ó bhiŋá ó səra echî se jen?”
27Nne nnyó se, “Á séŋe sê deê nne a kot Ńtâ Obhasi owe na ḿbə́ŋé eye chénchén, na ńtʉgântʉ eye chénchén, na ikom ifê chénchén, na íkíkéré ifê chénchén. Sê nne a kot ntem-nne noŋ a korê biji ibhê.”#Mbín 19.18; Otira 6.5.
28Jisos a sə́re yê se, “Ó məŋe otámé. Nâ yim mân ka ekpak njí, tîk o fôn ekpin.”#Mbín 18.5.
29Kən ntóŋa-ebhín nnyó a wóm a tóŋé se yê a mə́ŋe, a bhə̂p Jisos se, “Énê mân a ri ntem-nne?”
30Jisos a táme na egan se, “Ofú bhə́t, nne yót a mághe Jerusarem a kí ji Jeriko. Nji a síi ka mbá, anyághá-ajʉ̂ á fî yê á tə̂m, á jûk ḿfô ka biji, á mághe yê áfo á jak, nne nnyó a kə̂t kpít na ekpóóm.
31“Ka ebhú njí, nkara-agore Obhasi a kí chiŋ ka mbá nnyí. Nji a yéne nne nnyó a nuŋ, a kéme ebhat í mkpe mbá etat a chîŋ a jak. 32Nne yót ka ndə́p-i-njû Libhayi, a bhák ka eji njí, a yên fə́ne nne nnyó, a jî gyími áfo a kêp yê nyamḿ, kən a kéme fə́ne ebhat etat a jak.
33“Kən nne Samariya#10.33 Ane Jus á kére sê ane Samariya á bhîp á chíŋ ochíŋ. yót, a kí ji ejen ejê, a sî ka eji njí, a yên nne nnyó enuŋ, nsôn a yîm yê kpe-eji.#2 Atúi 25.15. 34A jak a jî gyími, a fôn bifú nne nnyó chénchén, a kâk akʉ́ na aməm, a bhôp ḿbə́ne. A yûŋ yê a kúni ka mfoŋ eye, á jak ka njû nnyi ajéné á sʉ́a. A kâ na nne nnyó ta ó chê, a nyáŋá yê ka emaŋé ejê.
35“Ntem-ofú, nne Samariya nnyó a yíghi ntí etûm í mfín ébháe#10.35 Ntí mmí ḿ bîk ka ekáám ka njû nnyi ajéné á sʉ́a mfín esam njəm énî. a káre mbâ nne nnyo á bhabha njû nnyí. A sə́re yê se, ‘Kép nne emaŋé omé nono. Ebhú ń chəbhé njəm, tîk m fê wâ kpe bhaghé ejûm nji o bhíbhi ka echî ejê.’ ”
36Jisos a bhə̂p mân ntóŋa-ebhín nnyó se, “Ka ifâ íkíkéré, énê ka ane mbá ásá nâ a kóe nne nnyo anyághá-ajʉ̂ á tə́me nná noŋ ntem-nne?”
37Ntóŋa-ebhín nnyó a táme se, “A ri nne nnyo a riî yê nsôn.”
Jisos a sə́re yê mân se, “Choŋ mân choŋ oyim ekpin njí jə́t.”
Jisos a jî ejen mbâ Mata na Meri
38Nji Jisos na atóbhá abhê á kí jen á jak, á jî sî ka eték jə́t. Nne-nkáé yót a kamá se Mata, a kô Jisos abhô ábháe se a gyé ka njû eye. 39Nne-nkáé nnyó a fonê mmon-i-nnyen nnyo á kamá se Meri. Meri a jî kúmi Ńtâ Jisos ka akát a yúghá okpígha-ejûm obhê.#Jon 11.1. 40Mata a yên se etûm é ti é chiŋ ka njû, é chíŋi yê ekpak nji yimím. A bhâ sə́re Jisos se, “Ntûfâm, ó bhó yen se mmon-i-nnyen omé a mághe ntûm chénchén ka obhô obhámé mme átíŋ a? Sə́re yê a bhá kak ə̂m obhô.”
41Kən Ńtâ Jisos se, “Mata! Mata! O kí karé biji ibhâ oseŋe ka iyîm etî-etî. 42Kən ejûm jə́t nâ é fáŋe é chîŋ ochíŋ. Ńjə́ne nâ Meri a sáŋe áno. Kpe nne nnyo a kí tabhé mbâ eye cháŋ.”
Okuqokiwe okwamanje:
Luk, echî 10: ETUNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ejagham New Testament © Bible Society of Nigeria and Bible Society of Cameroon, 1996.
