MATA 25
25
MATA 25
1Yɛrɛ Bɛt wáátɔ riitin an nɛɛdsɛrɛ kooblɛ hi loo pitilaya̧ hi tuuk an hi rek hi dagtin hi wal nislookya a gbɔnɔ du. 2Zaadɛ nɔɔnɛ hi gi yooyɔ, wɛɛ nɔɔn zaadɛ wɔ be hi gi nɛɛdsɛrɛ kɛ̧ɛ̧tɛ. 3Yɔ yoo wɔ nɔɔnɛ hi look pitilaya̧ hi kām kurum za tik du gɛ. 4Wɛɛ nɔɔn zaadɛ kɛ̧ɛ̧tɛ wɔ be hi loo tik hi tɔ̧ɔ̧ kurumya̧ du hi kam hi pitilaya̧. 5Anyɔ nislookya bɔ gi amzugo, nɛɛdsɛrɛ wɔ koobl hi tuur hi gig ook be hi yoyo hi sɛw. 6A yɛms teesdu der ya̧a̧ɓooyyɔ a nislookya bɔ gi zaak gɛrɛ, tuuzinɛ nɛ rek nɛ dagige!
7Hɔnɛ nɛɛdsɛrɛ koobl wɔ hi rɛmɔ hi ɗund hi gɛms pitilaya̧. 8Zaadɛ yoo wɔ hi war kɛ̧ɛ̧tɛ wɔ hi kamz nɛ kurumya̧ a gaanwi kurum nɛ bɔ kaasi, pitila wi wɔ hi niŋknimɔ. 9Kɛ̧ɛ̧tɛ wɔ hi ta̧a̧ a kurum bɔ yɔ riiwɛ wɛ sɛw gɛ. Rekin a dood kurumzebtigya wɔ hi nɛ zebz nɛnɛ. 10Yɔ nɛɛd yoo wɔ hi rek kurum bɔ zebzig luumha be, nislookya bɔ zaa gɔ be. Nɛɛdsɛrɛ zaadɛ nɔɔn wɔ hi gin nɛ kurumya̧ hi gutin lɛlgbun hi nislookya bɔ a lootinslɛl bɔ gedu hi wɛɛ hi kpɛ̧ɛ̧ lukgbɔnɔ bɔ hi daksɔ.
11Kuudu yɔ nɛɛdsɛrɛ zaadɛ wɔ hi wɛɛza hi rek a lootinslɛl bɔ ge hi elik hinɛ a ɗɛnti, ɗɛnti! gborsuwi gbɔnɔ wi talɔ! 12Hɔnɛ ɗɛnt bɔ goozɔ a be raasin rɔbo, be mɛɛn gɛ. 13Yeesu wɛɛ raa a yɔ anbɔ, oonɛ anyɔ nɛ mɛɛ ɔ̧tɔ gɔ be zaa du gɛ. Kinsa lɛlli, nɛ mɛɛ gɛ.
14Hinza gi tuur an walza gi rɔbs reko gi el gbaarɛ ɔ̧ɔ̧ an gi gaahi rɔɔsɔ wɔ naan du hi woon hinɛ. 15Yɛɛl gaa gbaar biitir bɔ tus gaat duk nɔɔnɛ, zaa bɔ gaag tus gaat duk eerɛ, zaa bɔ be tus gaat duk gbunu; gaa doo gbunu anyɔ tɛŋkɔ gɔ gi ɗɛɛ, wɛɛ ɗund rek rɔbsɔ bɔ.
16Gbaar biitir bɔ hi yɛɛl hi gaag nɛ duk nɔɔnɛ rek ɓɔrbɔ zemn wɔd hi tus bɔ riŋnɔ wɛɛ dag duk za kar ha nɔɔn be. 17Zaabɔ dag nɛ duk eer be, wɛɛ woo an gbun bɔ wɛɛ dag zaa karha duk eer be. 18Hɔnɛ zaabɔ dag nɛ duk gbun be rek da zɛɛ lɛl hɛbtdi i̧i̧ ɗɛntɔ tusɔ bɔ gedu. 19Kuudu yɔ am ha̧a̧ltɔnɔ gbaarɛ wɔ ɗɛntya̧ bɔ wɛɛ zaa elihi an gi baks tusɔ bɔ hi hiya.
20Gbaar biitir bɔ hi gaag nɛ tus gaat duk nɔɔnɛ kamz duk nɔɔn bɔ hi gaag nɛ hi nɔɔn zaa bɔ dagɔ, dɔgɔ a ɗɛntyɔ, mɔ gaab nɛ duk nɔɔnɛ, yɛrɛ seemɔ, be wɛɛ be dag zaa gɛrɛ ha duk nɔɔn be. 21Ɗɛntɔ bɔ raage a bɛɛrɔ, gbaar hinwookya rɔbo, mɔ fɔ woos mɔ rɔbtɔnɔ a hin fɛŋwaayɔ be gaam gedu. Be gaamɔ zaa gbɔɔl naan du. Yɛrɛ zaam mɔ dag hat hi ɗɛnt mɔ beya.
22Zaabɔ dag nɛ tus gaat duk eer be zaa raa a ɗɛntyɔ, mɔ gaab nɛ duk eer be, yɛrɛ seemɔ, be wɛɛ be dag zaa gɛrɛ ha eer be. 23Ɗɛnt bɔ raage a gbaar hinwookya rɔbo, bɛɛrɔ, mɔ fɔ woos mɔ rɔbtɔnɔ a hin fɛŋwaa yɔ be gaam gedu, be gaamɔ zaa gbɔɔl naan du, yɛrɛ zaamɔ mɔ dag hat hi ɗɛnt mɔ beya.
24Yɔ̧ɔ̧sumɔ, gbaar bɔ dag nɛ tus gaat duk gbun be zaa raage a ɗɛntyɔ, be mɛɛnmɛɛ a mɔ doo ɓaatilyɔ, mɔ ɓɛrk tot mɔ a lɛlyɔ mɔ lug ge gɛ, mɔ mɔksig tot mɔ a lɛlyɔ mɔ fɛb ge gɛ. 25Yɔ hoobha̧a̧be, be rek be i̧i̧ tus mɔ bɔ gɔ hɛbtdi; yɛrɛ loom tus mɔ bɔ gɛrɛ.
26Ɗɛntɔ bɔ ta̧a̧ge a mɔɔ gbaar ha̧a̧l namri! Mɔ mɛɛ nɛ a be ɓɛrk tot be a lɛlyɔ be lug ge gɛ, be mɔksig tot be a lɛlyɔ be fɛb ge gɛ mi? 27Bɛrɔ! Ginɛ an mɔ gbaa tus be bɔ a tusgbaakya wɔ hi, yɔ be zaa nɛko be zɛm tus be bɔ zaa yɔ kar ha.
28Wɛɛ raa doodɔ a wɔɔzin tus gaat duk gbun bɔ gi naan du nɛ gaa zaan bɔ gin duk kooblɛ. 29Yɔ anbɔ, za̧a̧nyɔ ginɔ hi loo zaa hi goktsig ha gi gin gbɔɔltɔnɔ; za̧a̧nyɔ taan gɛ be hi wɛɛ hi loo fɛŋwaa bɔ da gin nɛ hɛw. 30Wa̧a̧n gbaar namr bɔ nɛ bisig a lakdi a lɛlwil du a lɛlyɔ dood gɔ hi kaa hi gboo nuŋgya̧ gedu.
31Za̧a̧n Waa bɔ gɔ gi zaa gi gbɔlums du hi Bɛt walɛsɛrɛ wɔ sɛw an waar gbɔɔlɛ, gi ɗɔɔt a gi waar ums ɗɔɔtillɛlɛ. 32Dood hɛbtdi sɛw hi mɔks gi muutdu, gi gɛ̧ɛ̧ dood an oora gi gɛ̧ɛ̧k tam hi isɛ. 33Gi wɛɛn tam wɔ gi naanrɔbo, isɛ wɔ be a gi naanyɛ̧li.
34Gɔ gi anbɔ waar gbɔɔl bɔ gi raa wɔ hi gi a naanrɔbo a zaanɛ, nɛɛ dood wɔ Baa be Bɛt rɔbsinɛ, talin a Bɛt wáát yɔ hi gɛmtsin a waalyɛɛliki an hi gaanɛ gedu. 35Yɔ anbɔ, be da be gi nɛ a̧a̧kili nɛ gaab leesɛ; mɛm da gib ha̧a̧ko nɛ gaab be yɔ̧; be gi nɛ rɔ̀bi nɛ dagib rɔbtɔnɔ nɛ lɛl du. 36Be gi nɛ ɔ̧lɛ nɛ heksib gbandili; be gi nɛ gumtili nɛ re nɛ boobe; be gi nɛ luknɔ du nɛ zaa nɛ sɔ̧ɔ̧be.
37Dood riitɛ wɔ hi ta̧a̧ge a Waar i, be gbɛnum a̧a̧kilɔ bili be gaam lees nɔ? Mɛmɔ ha̧a̧m bili be gaam mɔ yɔ̧ nɔ? 38Be gbɛnum rɔ̀bɔ bili be dagim be lɛl du rɔbtɔnɔ nɔ? Mɔ ginɛ ɔ̧lɔ bili be heksum gbandil nɔ? 39Be gbɛnum gumtilɔ bili be re be sɔ̧ɔ̧m nɔ? Be gbɛnum luknɔ du bili be re be boom nɔ? 40Waar gbɔɔl bɔ gi gòòhi gɔ a be raasin rɔbo; hinwɔ nɛ woo sɛw a yɛ̧ɛ̧dɛ be wɛrɛ zaa wansɔ gbun muulɛ, nɛ̍ wòòs bee hin wɔrɔ sɛw ma bɔ.
41Kuudu waar bɔ gi wɛɛ gi raa dood wɔ hi gi a gi naanyɛ̧li a hɛmlin hi beya, nɛɛ dood wɔ nɛ gin Bɛt booto! Rekin a laazɛŋk yɔ hi gɛmnts Saydanu hi walɛsɛrɛ ɔ̧ɔ̧ gedu! 42Yɔ anbɔ, a̧a̧kil gib nɛ ha̧a̧ko, nɛ gāab lees gɛ; mɛm gib nɛ ha̧a̧ko nɛ gāab be yɔ̧ gɛ. 43Be gi nɛ rɔ̀bi nɛ dagib nɛ lɛl du gɛ; be gi nɛ gumtili nɛ re nɛ sɔ̧ɔ̧b gɛ, be gi nɛ a luknɔ du nɛ re nɛ boob gɛ.
44Hi wɛɛ hi ta̧a̧ge a Waar i, wi gbɛnum a̧a̧kilɔ bili, mɛmɔ gim ha̧a̧k bili, mɔ gi rɔ̀bɔ bili, mɔ gi ɔ̧lɔ bili, mɔ gi gumtilɔ bili, mɔ gi a luknɔ du bili wi ɗaasum gɛ? 45Waar gbɔɔl bɔ gi ta̧a̧hi a be raasin rɔbo, hinwɔ nɛ woos dood wɛrɛ zaa wansɔ gbun gɛ, bee hɛw nɛ woosib gɛ. 46Doodya̧ hí rek a laazɛŋk ya̧a̧rhantya faa bɔ gedu; wɛɛ dood wɔ hi woo hin riit be hi rek a za̧a̧tig faa lɛl bɔ a bɛtha gedu be.
Okuqokiwe okwamanje:
MATA 25: NTD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Doyayo New Testament © Bible Society of Cameroon, 1991.
